Edyanganangobo a mbambi nya Jesus Kraest, Mwa’a Devid, Mwa’Ebraham ; na Ebraham na dyayaka Aisak ; na Aisak na dyayaka Jekob, na Jekob na dyayaka Judas, na wana wa Gangwé. Na Judas na dyayaka Thamar, Fares, na Zara ; na Fares na dyayaka Esrom, na Esrom na dyayaka Aram : na Aram na dyayaka Aminadab ; na Aminadab na dyayaka Neason, na Neason na dyayaka Salmon. Na Salmon na dyayaka na Rahab, Boaz ; na Boaz na dyayaka na Ruth Obed ; na Obed na dyayaka Jesi, na Jesi na dyaka upolo Devid, na upolo Devid na dyayaka Solomon na a betye mwada Yuraia. Na Solomon na dyayaka Roboam ; na Roboam na dyayaka Abaia ; na Abaia na dyayaka Asa, na Asa na dyayaka Josafat, na Josafat na dyayaka Joram, na Joram na dyayaka Ozaia. Na Oraia na dyayaka Joatham, na Joatham na dyayaka Ahaz, na Ahaz na dyayaka Ezekaias. Na Ezekaias na dyayaka Manasa, na Manasa na dyayaka Amon, na Amon na dyayaka Josaia ; na Josaia na dyayaka Jekonaia, na wana wa Gangwé, egombe e tyéwenetye wa e Babilon. Va pabwenetye wa e Babilon, na Jekonia na dyayaka Salathiel, na Salathiel na dyayaka Zorobabel ; na Zorobabel na dyayaka Abaiudi, na Abaiudi na dyayaka Elaiakim, na Elaiakim na dyayaka Azor. Na Azor na dyayaka Sadok, na Sadok na dyayaka Akim, na Akim na dyayaka Elaiud. Na Elaiud na dyayaka Eleazar ; na Eleazar na dyayaka Mathan, na Mathan na dyayaka Jekob. Na Jekob na dyayaka Josef momwa Meri me dyayetye Jesus a tubwé na Kraest.

Yo ndi eyé mbambi nyéziépi eviya Ebraham kwanga na e Devid eyéndi dyomu na mbambi nyenayi, na eviya e Devid kwanga ityéwéné e Babilon eyéndi dyomu na mbambi nyenayi ; na eviya ityéwéné e Babilon na e Kraest eyéndi dyomu na mbambi nyenayi.

Nandi idyawé dya Jesus Kraest dye betyendi nyanga méni ; va betye Josef a bómbó nyangwé Meri iba, ebogo na wa wa lataka, a duwemetyendi na dyemi dya Ilina dyasa. Ndi mom’adu Josef nga betye mu soto asa, abe etoka esala mu et bwebwe, ndi a totyetyendi et véndyiyé mu timbemeni. (Bobotamaka). Ndi va betye mu a pikiliyaka e bema mé bi nana, lóngókóte na endyél a Mopandyi na va ekudwanaka mu e ndótó, na, Josef, óvé mwa’a Devid, enyóyetye dyinga dya mwada’vé Meri ; navwana eyé duwemeni na mu era eyéndi a Ilina dyasa. Ndi a ngandi dyayaka mwa’momu, nandi óvé e ngandi vandyétyé mu dina na Jesus, navwana a ngand’ondyiyétyé wato wadu eviya bebeva byaya. Nandi bi nana byéziépi be semetyendi na evara ndi va ma etimaka be kalemetye na mosótyi egala Mopandyi, na ; Lóngókóte ngóni e ngandi bapétyé dyemi, na e ngandi dyayaka mwa’momu na wa wa ngandi vandyétyé mu na, Imanuel, dyeyé ené dyiluwé na Anyambé né’wé. Na Josef né mwaka eviya viyó, na mu na saka ené nga betye endyél a Mopandyi e vókó mu, na mu na vé ngaka mwad’adu. A byo ta pulé mu kwanga va betye mu a dyaya Ndyad’adu a momu ; na mu na vandyétyé mu na Jesus.

Nandi va betye Jesus a dyawétyé e Bethlehem a Judia, e minya ma Herod Opolo, lóngókóte na wato wa mapulé na vyaka eviya madiki na e Jerusalém. ¿ Na, eve ndi vayé mu ayé dyaweni Upolo a Jiu ? Navwana le tóyóndi monang’adu e madiki, ndi le viyandi e kaliyaka mu.

Va betye upolo Herod aviy’ókaka bema mébi a tóyetyendi ndyuke, na nga Jerusalem waziépi. Nandi va betye mu a laté prist nya myolo na waléndi wa wato waziépi ta, na mu na va ebatétyé wa iboko dye ma edyawétyé Kraest. Na wa na vókó na mu na, e Bethlihem a Judia ; navwana nga nana ndi eyé yo léndweni na mosótyi na, Na óvé Bethlihem a zie a Juda, ebe tetyemeni e’bumbu a mepolo mya Juda ; navwana eviya e mboka’vé ndi e nga vyaka goveni, ema témiyétyé wato wamé Israel.

Nandi va betye Herod ondeni wato wa mapulé e pépégu, épwetyendi wa na bokeli egombe e kudwenetye monanga. Na mu na lomaka wa e Bethlihem, na, Tyétyéni va lóndyetyeni Mwana, na bokeli ; ndi etóndyé e tóyóni mu, né etimbanani ngwé ndaga ropé, na na, evara ndi va ma viya kaliyaka ngwé mu tegó. Va betye wa wóka nga betye upolo a kalaka na wa, na wa nava etyétyé ; na Lóngókóte monanga, motóyetye wa e madiki, mo tyétyé e bogo aya na yo nava tyé témétyé va betye motyétyé. Va tóyetye wa monanga, wa sariyenetyendi na mbya ebóló na ngudi. Vé retye wa e mbadi, na wa na tóyókó motyétyé na nyangwé Meri, na wa na kwaka e zie, wa mu ekaliyaka mu ; nandi va betye wa wadi bwa belandi byaya, wa tayetyendi mu bema bya botayaka, hika na bema bya sombo. Va betye wa wa kelevuwé na Anyambé e ndótó na wa timbetyegó e mboka Herod, wa tyétyendi ezity’aya na reya evókwé.

Nandi va betye wa wa tyéyé, lóngókóte na Endyél a Mopandyi na va ekudwanaka e mboka Josef e ndótó, na, Imwaka, né inga motyétyé na nyangwé né etila na Ijipt, né odiyaka erago kwanga na vayé ngwé na vidyétyé’vé ndaga ; Navwana Herod atokand’oya mwana. Vé mwetye mu, na mu né ngaka Mwana na Nyangwé, na elu, na mu na tyétyé e Ijipt. A betyendi erago kwanga na iwedi dya Herod, na evara ndi va ma’timaka ekaletye Mopandyi na modumbu a Mosótyi na, Nó ndetyendi Mwa’mé eviya Ijipt. Na Herod na lingwaka na ngudi va tóyetye mu na, wato wa mapulé wa tyebandi mu, na mu na lomityétyé e Bethlihem na tétéyi méra éziépi, e dyoya dya betumbé byéziépi, eviya igona dya mepuma mebaye na gumyeni kwé, gondyeneni na egombe ipwetye mu wato wa mapulé na bokeli. Na ekalemetye na mosótyi Jeremaia na yo na timaka. Dyoyi dyo tyenetyendi e Rama, dyingwama, na duwe na kwedi e tubwé, Retyél eyaka egala wana wadu, abe toka eswémuwé, navwana wa begó’bé.

Ndi va betye Herod awa, lóngókóte, endyél a Mopandyi e kudwenetyendi Josef e ndótó e Ijipt. Na imwaka, né inga Mwana na nyangwé, né etyéyé e zie a Israel ; navwana wa totyetye eménó a Mwana wa wendi. Na mu né mwaka, né ngaka Mwana na nyangwé, na vyaka na e zie a Israel. Ndi vó tyetye mu na Arkileos nda panga e Judia e mbada Gangwé Herod, a nyóyetyendi etyéyé erago ; ndi va betye mu a kalwéné na Anyambé e ndótó, é Iwemetyendi na e begali bya Galili. Na mu na vyaka na diyaka e mboka etubwétyé na Nasaret, na evara ndi va ma etimaka ekalemetye na mosótyi na, Angando’ndwétyé na Nazarini.

E minya mémara Jon Baptist a vetyendi, a pakwaka e ndyinga a Judia. A vókó na, Ilwakani navwana ipanga dya heven dye pabandi. Navwana mu ndi anó a kalwetye no Mosótyi Iseas na, dyoyi dyó’mbókó dya’maka e ndyinga na, Kendyétyéni reya a Mopandyi, témiyétyéni reya nyadu. Dyo Jon mé dyi ndi a betye na ngóyi nya myódyó mya camel, utumba a mokobo e eduwe adu ; na bedya byadu be betyendi mesébéni na boyi a zityi.

Na wato wa Jerusalem na Judia éziépi, na nga tétéyi nya Jodan nyéziépi na tyétyé e mboka mu. Na wa na batuwétyé na mu e Jodan wa mémétyé bebeva byaya.

¿ Ndi va tóyetye mu ebóló a Farisis na Sajusi wa vyaka ibatiyéné dyadu, a vótyendi na wa na, A igona dya nyóó, randa keleviy’inywé itila dya malingwa ma viya ? Ndi lóngókóni bebuma beyé lutyeni na dyilwa (dya melema). Na e pikiliyetyeni ivóyó e inywé méni, na, leyi na Lal’ago Ebraham ; navwana na vóyóndi né’nywé na, Anyambé a yéte a yólétyé imuwé malale mé ma nana ma mu wana wa Ebraham. Ndi ubótyé mo yé tegó nanguweni e tina nya bele, yo ndi eyé na, ele éziépi eyé e lóngó bebuma byasa e kwélwéndi, né yo e vugwé e veya. Mbambayé na batiyénd’inywé na meba e dyilwa ; ndi a viya e pug’amé a yéndi wa na ngwé, na be oyeni no ibapé dya makogo madu ; a ngandi batiyéty’inywé na Ilina dyasa na veya. Ayi na epupwi ebó adu, a mandi vyóyókó ndék’adu, né mu a yolé hwit nyadu e mbadi, ndi a ngandi dityiyétyé bevudu na veya vya mba dimaka.

Na Jesus na vyaka eviya e Galili, na tyé bómbó e Jodan ibatuwé e mboka Jon. ¿ Na Jon na petwaka mu, na, ngwé ndi na toka ebatuwé e mbok’avé, né óvé emugó vyaka vayé ngwé ? Na Jesus na avwanaka no vókó na mu na, Bóbókó yo tyatya méni, navwana nga nana ndi eluké’wé le timiyétyé enyév’éziépi, Na mu na bóbókó mu. Ndi va betye Jesus a batuwé a gundyenetyendi itótómó e meba, na lóngókóte heven nye dibwemetyendi va yé mu, na mu na tóyókó Ilina dya Anyambé dye gumyaka ené mbenga, na dyo na batamaka vayé mu. Na lóngókóte dyoyi na vyaka eviya heven dye vóyókó na, Anó ndi Mwa’mé a tóndé ngwé, a tondiyéndi ngwé dódó.

Na Jesus na tumbwénétyé na Ilina e ndyinga atyé adywétyé na Devil. Na va betye mu a hindina mabo ma bemanda manayi na mabo ma belu manayi, eviya evara na mu na vó kaka rayi. Ndi va vetye mwadyini e mboka mu, a vóyetyendi na, Etóndyé na eyéndi Mwa’Anyambé, sombétyé na malale mé ma nana mé Iwetye pémbé. Ndi avwenetyendi na vóyókó na, Eyéndi léndweni na, moto abe ngudi ediya kabo na pémbé ipó, ndi tegó na ndaga éziépi e kudwa e modumbu a Anyambé.

Na devil na tyétyé na mu na e mboka a Hole, na mu na va etémiyétyé mu e sókó a tempel. A va evóyókó na mu na, Etóndyé na eyéndi Mwa’Anyambé pukwaka’vé méni e zie, navwana eyéndi léndweni, na, A mandi sombétyé bendyel byadu egala’vé, na byo de mandi gutyétyé’vé e mabó maya evwa egombe te’gombe enyókó tudama e ilale. Jesus a vótyendi na mu na, Eyi gó léndweni na, Adyetye Mopandyi Anyabé avé.

Na devil na tyétyégó na mu e mokodi mo baléné udomba, na yo na leviyétyé mu mapanga maziépi ma zie, na ivenda dya téyi. Na yo na vókó mu na, bema mé bi byéziépi ndi be ma’tayaka ngwé óvé, etóndyé ebala-mandyé né’vé e kaliya ngwé. Nandi na Jesus na vóyókó mu na, Tyétyé abiyeneni Setan ; Navwana eyéndi léndweni, na, Emandi kaliyaka Mopandyi Anyambé avé né’vé emu diliyétyé mu ipó.

Na devil na va likaka mu, na lóngókóte na bendyel na viya dyandyaka mu.

Nandi vótyetye Jesus na Jon a vélwéndi e meboka, na mu na va tyétyé e Galili. Na e ilika dya Nazareth, na mu nava tyé diyaka e Kapernaum, eyé etébé a mekabo mya Zabulon na Neftalim : Na evara ndi va ma timaka e kalemetye na mosótyi Iseias na. Zie a Zabulon na zie a Neftalim na reya a manga ilo dya Jodan, Galili Betomba. Wato wa diyetye e iviti wa tóyetyendi bwe etubwé, bwe e panyetyendi e wa diyetye e tétéyi a edidindyi é’wedi. Eviya egombe méra na Jesus na yalétyé ipakwana na ivóyó na, Ilwakani melema ; navwana ipanga dya heven dye bakamandi.

Va betye Jesus a tamwaka baka na manga ma Galili a va tóyókó wa ibumu’vókó wabaye, Simon óndwé na Pité na Mwa’nyangwé Andru, wa vugaka elóba e manga, navwana wabetyendi wagombwi. Na mu na vóyókó na wa na, Vitétyéni ngwé ; né Ngwé na pangé nywé wagombwi wa wato. Mba inyamiyé dya’gombe na wa na likaka belóba byaya, na vitétyé mu. A véndyémétyéte eviya vara, a va tóyókó wa ibumu’vókó wavókwé wabaye Jemis mwa’a Zebedi na Mwa’nyangwé Jon e elende na gangwé aya Zebedi, wa hóngókó belóba byaya ; na mu na vó’ndaka wa. Mba’gombe wa va elikaka elende na gangwa’ya wa va vitétyé mu. Na Jesus na tyétyé atyé aty’iluwénétyé Galili ézié ékuwétyé e Sinegog nyaya, na ipakwa dya sango asa a ipanga, óndyiyétyé dyóngó dya bedaka dyéziépi na dyóngó dya mebwayi miéziépi me betye na wato. Na kum’adu na samanaka e Siria éziépi ; na wa na vyaka mu na mepondyi miéziépi me betye na mebwayi mya móngó na myadi, na wabetye na devil, na wa betye nyolo limbe limbe ; na mu nóndyiyétyé wa. Na bebumbu bya wato betbwé na vitétyé mu eviya Galili, na eviya e Dekapolis, na eviya e Jérusalem na eviya e Judiya, na eviya a mudi a Jodan.

Va tóyetye mu Bebumbu, a va ebetaka e mokodi ; na va betye mu a diya, na bikuwi byadu na vyaka e mboka mu. Na mu na bumwaka modumbu adu, amu ikuwétyé wa na ; Ibótó na wa nyamana e malina ; navwana ipanga dya heven dye yéndi idyaya. Ibótó na wé’yidyéné, navwana wa ngandó duwétyé. Ibotó na wayé swé, navwana wa ngandi dyigaka zie. Ibótó na wóka rayi na evézié e gala gondyeneni ; navwana wa ngand’olaka. Ibótó na wa tóyónó mambwangó ; navwana wa nga tegó tówétyé mambwangó. Ibótó na wayé tyéndyéndyé e molema, navwana wa ngandi tóyókó Anyambé. Ibótó na walati wa monga ; navwana wa ngandi ondwétyé wana wa Anyambé. Ibótó na wa sowé evita egala gondyeneni, navwana ipanga dya heven dyeyéndi idyaya. Ibótó né’nywé, va ma lowaka wato inywé, né wa viténétyé né’nywé, né wa wa sewaké’nywé dyóngó dya ebeva dyézié a bodyowa, na tin’amé. Sarakani, né ediyani na mbya etubwé ; navwana magomwi manu, mayéndi matubwé e hévén ; navwana nyanga méra te e vinetye wa mesótyi me betye e bogo né’nywé.

¿ Eyéndini vyanga vya zie, ndi etóndyé vyanga ve nyamiyé modyu adu, ve magó duwamaka modyu eve ? Vókóna ve mute enyévé a gape, na bovugwétyé, né ve mu tiswétyé na mako ma wato.

Eyéndini bwe a zie, mboka etubwé eyé témuweni e mokodi ebe ngudi ebotama. Wato wa bémbéné wa kaziyé vitwa ndi wa vélé vyo ibumuku dya kwe, ndi ve patwéndi e ngóbó, né vyo vemu tayaka bwe e waziépi wayé e mbadi. Bwe anu e bumwetye vayé wato, evara ndi va ma etóyókó wa bebolo byanu byasa, né wamu ebendétyé Gongwanu ayé e heven.

Epikiliyetyeni na nayéndi viyeni e dyoya dya belekanako, dyélé mesótyi, nabe viyeni e dyoya ndi e itimiyé. Na vóyóndi né’nywé póni póni, loba na zie ndi be nga dolaka, ndi ebe né’tóbé dyélé epusi etiki evókó e nga dolaka e belekanako kabo biéziépi be timuwé. Nandi mwéziépi a mó’yaka evókó e masombé mé matiki ma, né ékuwétyé wato nyanga méra a mandi ondwétyé utiki e ipanga dya heven, ndi mwéziépi a ma esaka né ékuwétyé mo, a mandi ondwétyé utubwé e ipanga dya heven. Navwana na vóyóndi né’nywé na, etóndyé gondyeneni anu mba balétyé a waléndi na Farisis, ebe ngudi irani e ipanga dya heven.

Eyéteni otyeni, na evówetyendi na nga egombe a vyo na, Oyetye ; ndi mwéziépi ayé oyanaka a ngandi bétyé e mazizi ma yéké. Ndi na vóndi né’nywé na, mwéziépi a ma lingwaka na mwa’nyang wé mba tina a ngandi bétyé e mazizi ma yéké, na mwéziépi a ma vókó na óvé ima mé a modyombini eni, a mandi bétyé na mazizi e esoka, na anga evókó na óvé ima mé a mba eni, a ngandi bétyé e mazizi ma veya vya hel. Ndi etóndyé eviya na bov’avé e Olta, etéyi eviya zimbuwétyé na Mwa’nyungwé a yéndi né’ma navé. Likaka-ndyé bov’avé e pwandya a Olta, né etyéyé enyévéné na Mwa’nyungwé ebogo, nandi eva viya tumbaka bov’avé. Lataka na molon’avé póni va ndit’inywé e reya evwa egombe te egombe molonavé motyé tayavé e moyétyiyi, né moyétyiyi mo taya’vé e movomuwini né’vé e vélwé e meboka. Póni póni na vóyóndi na’vé, ebe né’kudwidi etéyi, kabo etaya Farthing a malitylnyéné.

Eyéteni otyeni na evówetyendi na nga egombe a vyo na esetye Ihonde. Ndi na vóyóndi né’nywé, na, Mwéziépi a ma lóngókó mwado e idokwa dyadu a sandi ihonde na mu póni e molem’adu. Etóndyé digó dyavé dya’bómwé dye panga’vé e kóbókó, tongwaka dyo né’vé evuga dyo, navwana eyéndi enyévé wa na’vé na evande avé evókó e nyamaka, ndi hanga na nyolo avé’ziépi etyé vugwétyé e veya vya hel. Na etóndyé ebó avé a’bómwé e pangavé e kóbókó, lenaka yo, né’vé e vuga yo ; Navwana eyéndi enyévé ebóló na’vé na evande avé evókó e nyamaka, ndi hanga na nyolo éziépi etyé vugwétyé e hel.

Evówetyendi na, mwéziépi a ma véndylyétyé mwad’adu, a tayetye mu edyanganangobo a ipaluwéné. Ndi na vóyóndi né’nywé na, mwaziépi a ma véndyiyétyé mwad’adu, véndyiyeni egala tina a enangwéné, e pangandi mu asaka ihonde, na a ma bayaka ayé vénguweni mura asandi ihonde.

Ropé gó, evéte ni otyeni evówetye na wa egombe a vyo na, Ekanetye nyolo avé méni, ndi timiyétyé ikana dyavé e mboka Mopandyi. Ndi na vóyóndi nénywé na e kanetyeni na reya te reya ; dyélé na hévén, Navwana eyéndi eka a Anyambé. Dyélé na zie, navwana, eyéndi mbat’adu e tisa mu ; dyélé na Jerusalem, navwana eyéndi mboka ópolo utubwé. Né ové ebe tegó ngudi ekana na molo avé, navwana ebe ngudi panga we evókó epuwa dyélé evinda. Ndi dyoyi dyanu dye betye E, E, Nyawé, Nyawé ; navwana byéziépi beyé wa na bi be viyandi e ebeva.

Eyéteni otyeni na evówetyendi na digó te e digó, na igonga e igonga. Ndi na vóndi né’nywé na, Etimbiyetyeni ebeva, ndi mwéziépi a mé ngwaka óvé ibuku dya’bómwé iluwétyé mu ivókné tegó. Etóndyé moto a vité’vé né énga ngóy’avé é ndyetye tegó ekapa’vé. A ma evyatiyétyé’vé na tyétyé na mu nanda evókó, tyétyé na mu nyebaye. Vinyétyé a dyombé’vé, né evenetye a toké nganavé ndyémbi puga.

Eyéten’otyeni na e vówetyendi na, Tóndétyé a bakama na’vé né eviné molon’avé. Ndi na vóyóndi né’nywé na, Tóndétyéni waloni wanu, tuwakani ibótó e wa lók’unywé, sakani enyévé e wa vin’inywé, né emu kaliyakani egala wa vin’inywé, na wa sénywé evita. Evara ndi va ma béty’inywé wana wa Góngw’anu ayé e heven, navwana a kuduwéndi dyoba vayé wabeva na e wasa, né a lomaka mbuya e wa gondyeneni na wayé wabe gondyeneni. ¿ Navwana etóndyé e tóndiyétyéni wa tond’inywé, eyéndini na ra magomwé ? ¿ nga duti wa sate nyanga mé ? ¿ Nandi etóndyé e gomwani kabo wana nyungwé, ndi inde ndi e sé’nywé wa na wavókwé ? ¿ Nga duti wa sate na ? Diyakani leneni tya ené nga yé Góngw’anu ayé e heven leneni tya.

Bandamiyétyéni isa dya enyévé anu e pwandya nya wato, e itónó na wa ; na isedi mé dyera eva béni na magomwi ma Góngw’anu ayé e heven. Ndi va sa’vé bova avé E lóndyetye zieba e óvé méni ené nga sa wadyungulini e Sinegog na e beboka, na na evara ndi va ma duwamakawana ibendwé dya wato, Póni póni na vóndi nénywé na wa yéndi na magomwi maya. Ndi va savé bova, ebó avé a’méngu e puletye nga sa ebó avé a’bomwé. Evara ndi va ma bétyé mataya mavé e itimbiya, nandi Góngwé e tóyó itimbiya uméni a mandi gomwanaka’vé e bwebwe.

Na va kaliya’vé, enyókó diya éné nga yé wa dyugulini ; navwana wa tóndéndi e kaliya, bo témiyénétyé e sinegog na e mani ma beboka, na na evara ndi va ma tówétyé wa na wato ; Póni póni na vóyóndi nénywé na, wayéndi na magomwi maya. Ndi óvé va kaliya’vé, iraka e béd’avé, na va bé’vé e diba ikukale dyavé, kaliyaka e góngué ayé e itimbiya ; na góngwé e tóyó e itimbiya a mandi gomwanaka’vé e bwe bwe. Ndi va kaliyé’nywé e laletyeni itimbwa dya besesé, ené nga sa wayé mbé kwaka, navwana wa pikiliyandi na wa mando’kanaka egala ekal’aya ebóló ; Ndi ediyetyeni ené wa ; navwana Góngwa’nu a puléndi dyóngó dya bema de Toké’nywé ebogo né’nywé ipwakani. E kumetyeni hika’nu e zie, eyé na nyélélé na nyanga be dyungulé, e va tuba mibi né wa mu ibaka. Ipanga dyavé dye vetye, Upango avé mo semetye e zie ené nga yé yo eloba. Tayaka iwé e dyoba médyi pémbé ago a dyoba te dyoba. Né iyidyéty’iwé mananwa mago, ené ngé’yidy’iwé wa nanwé’wé. Na etyédyety’iwé e dyadywé, ndi véndyiyéty’iwé eviya ebeva, Navwana ipanga na ngudi, na ivenda, be yéndi ibyavé egombé’ziépi Amen. Navwana etóndyé iyidyéni wato belemé byaya, Góngua’nu ayé e heven a mategu yidyétyé inywé. Ndi etóndy’inywé mbé yidyétyéni wato belemé byaya, Góngwa’nu ayé e heven ava tegu’yidyi’nywé belemé byanu.

Tegó etóndyé e hindinakani, ediyetyeni ené wa dyungulini wa leviyé mambwangó ; navwana wé luwéndi mendongo myaya na na evara ndi va ma tónókó wa na wato na wa hindinandi, Póni póni na vóyóndi nénywé na, wa yéndi na magomwi maya. Ndi óvé va hindina’vé pindwaka molo avé né e suga mondongo avé. Evara ndi va ma bétyé’vé mba pulénétyé na wato na e hindinandi ; ndi kabo Góngwé ayé e itimbiya ; na Góngwé e tóyó e itimbiya, ndi a ma gomwanakavé e bwe bwe.

E kumetyeni hika’nu e zie, eyé na nyélélé na nyanga be dyungulé, e va tuba mibi né wa mu ibaka. Ndi kumétyéni egal’anu méni hika e heven, vayé nyélélé na nyanga be dyungulé, na vayé mibi me tuba né me mu ibaka. Navwana vayé ngumb’anu erago tegó e ma bétyé melema myanu.

Bwe a nyolo ndi digó ; ndi etóndye digó dyavé dye tóyókó dódó, nyoloavé ézié e mandi londaka na bwe. Ndi etóndyé digó dyavé dye diyandyé ibeva, nyoloavé ézié e mandi londakana iviti. ¿ Nandi etóndyé bwe eyé na’vé e diya iviti, imé iviti ita dye ma betyé dyera ?

Ebe, na, moto ayé a dyandyaka wapandyi wabaye ; navwana a yénd’avinétyé umboko, né a tondé umbokwé ; mba bétyé na, a mandi bómbiyétyé umbókó né a pédyé umbókwé, Ebe ngudi dyandyani Anyambé na mamon. ¿ Ndi na vóyóndi né nywé na, e natyetyeni egal’anu, e bema edyaké’nywé, dyélé bema enyaké’nywé, dyélé bya nyolo nyanu be yi’nywé e dayakani. Eménó ebe wa na edya na nyolo wa na edadi ? ¿ Lóngókóteni linyóni la loba ; navwana le liya, né lo le pumbwa, né le kumé e mambadi ; ndi Góngwa’nu ayé e loba a dyidyéte lo, Ebeni wa na lo ? ¿ Ra nd’ayé vay’inywé ayé a badétyé ekulu abama ené eguba e motéy’adu na bonakaka ? ¿ Ndi e nakandini edaya nénde ? Ta lóngóni mayanga ma’zityi, nga tombwa mo ; ma dyandya, né mo ma visa. Ndi na vóyóndi, né’nywé na, Palélé Solomon e ivenda dyadu dyéziépi a be dadywé ené evokó a bi nana. ¿ Ndi, etóndyé Anyambé a dadyétyé mabura ma’zityi nga nana mayé emunya, eméné ma tumbwé, Ava dady’inywé wa, O inywé wa ikamiyé itiki ? ¿ Ndi e natyetyeni na, le mandi dyaké’nde, dyélé na le mandi nyaké’nde, na Le mandi dadywétyé né’nde ? (Navwana bema mé bi biéziépi ndi be toka betomba) Navwana Góngw’anu ayé heven a yéte puleni na eyéndini na bema mébi byéziépi na mala. Ndi tokakani e bogo bogo ipanga dya Anyambé, na gondyenen’adu vókóna bema mébi biéziépi be mandi badwéty’inywé. Enatyetyeni egala eméné ; navwana eméné engandi nakaka egala bema byadu méni, Ebeva a dyoba eyéte kotyeni na dyo.

E yétyiyenetyeni, evwa enyókó yékuwéni. Navwana yéké e yétyiyén’inywé, yo te enga yékuwéty’inywé ; na eyéyi a dyén’inywé, yo te enga’dywénéty’inywé. ¿ Inde ndi elóngó’vé mosómbó moyé e digó dya mwa’nyungwé, ndi mba pikiliyaka mokókó mo yé e digó dyavé méni ? ¿ Ndi eyéndi e vóyó na mwa’nyungwéna, véndyiyétyé mosómbó moyé e digó dyavé dya ? ¿ Ta lóngó mokókó e digó dyavé méni ? Ové modyungulini, ta véndyiyé mokókó moyé e digó dyavé méni, nandi eva viya tóyókó kéngélélé ipaya dya mosombo moyé e digó dya mwa’nyungwé.

E tayetye eyé hole e mbwa, dyélé ivuga dya bokóndó anu e ngoya, evwa watyé tisa byo na mako maya né byo bilwa gó ilova dyanu.

Ipwakani, emandi tawéty’inywé ; tokakani, e mandi duwakani, kutakani, dye mandi dibwamak’énywé. Navwana mwéziépi épwa a pahiyandi, na atoka a duwandi, na e mu a kuta, dye mandi dibwamaka mu. ¿ Ra motwé ndi ayé vay’inywé ayé etóndyé mwa’du épwa mu pémbé, a mandi tayaka mu ilale ? ¿ Na dyélé épwa mu weyi a mandi tayaka mu nyóó ? ¿ Ndi palél’inywé na ebeva eyé né’nywé epuléléni itaya dya wana wanu bema byasa, ro nyeninga na Góngw’anu ayé e heven ava etaya wé pwa mu bema byasa wa ?

Yo ndi eyé na bema, byéziépi be toké’nywé na wato wa sety’inywé, saka tegóni wa nyanga mé ; Navwana eni eyéndi eleka nanko na mesótyi.

Irakani na dya umbyó utiki ; navwana umbyó moyéndi nó’pudyu, na reya e yéndi na raro, e tyédyéné e udyilo, na wabolo ndi wa tyéyé etéyi. Navwana umbyó mo yéndi utiki, na reya eyéndi kopya e tyédyéné e eménó, ndi nyévo te e duwa yo.

Bandamiyétyéni na mesótyi mya evela me viya vay’inywé na ibótó dya modómbé, ndi etéyi wa yéndi ró nya madyake. ¿ E mandi puiétyéni wa na bebuma byaya, wato wa patandi tyatya e membela na itóló e sóngé ? Nyanga mé ndi eyé ele éziépi a sa e kuduwéndi bebuma byasa ; ndi ele ebeva e kuduwéndi bebuma bebeva. Ele asa ebe ngudi kuduwé bebuma bebeva, dyélé ele ebeva ebe ngudi kuduwé bebuma byasa. Ele te’le eyé e kuduwé bebuma byasa elenwéndi né evugwé e veya. Ndi e mandi puiétyéni wa na bebuma byaya.

Hanga mwéziépi a vóyó na ngwé na, Mopandyi, Mopandyi ndi angé raka ipanga dya heven, kabo asa upango a Lalé ayé e heven. ¿ Wabóló wa ngandi voyókó na gwé e dyoba mé na Mopandyi, Mopandyi, le be sókókó e dina dyavé ? ¿ Na e dina dyavé le kuduwétyé devil ? ¿ Na e dina dyavé le saka bebolo be mamwéné ? Ndi a ngandi pupaka wa na, Na pul’inywé ; Véndyémétyéni vayé ngwé, inywé wa dyandya ebeva.

Ndi mwéziépi óka ndaga mé inyamé nyi, né a saka nyo, na mandi kwaniyétyé mu na moto é’pulé a londyetye mbadadu e ilale. Mbuya nye gumya, na tonda nye viya, na mepupé me vunga, né ngwamaka e mbadi mé, ndi ebe’kwa. Navwana e bandemetyendi e ilale. Ndi mwéziépi oka ndaga mé inyamé nyi, né mba saka nyo, a mandi kwanuwétyé na etiketike a moto, e londyetye mbadad’adu e ebonda. Na mbuya na gumyaka, na tonda na vyaka, na mepupé na vungaka, né ngwamaka e mbadi mé ; na yo na kwaka ; na ikwa dya yo dye betyendi itubwé.

Na ebetyendi va sutyetye Jesus ndaga ményi, wato wa mamenetyendi dyikuwinidi dyadu. Navwana ékuwetyendi wa éné umbókó ayé na ipanga, ndi mba bétyé ené wa-léndi.

Va gumyetye mu eviya e mokodi, bebumbu betubwé be vitetyendi mu.

Na, lóngókóte, na abetye na imba, na viya kaliyaka mu, na, Mopandyi etóndyé e bóbó, eyéte e pudyétyé ngwé. Na Jesus na gambiyétyé ebó adu, ava ekupénétyé mu na, na bóbóndi, puwaka, mba pedi na imba’du na puwaka. Na Jesus na, vóyókó na mu na, Ta lóngó e sebwetye moto ; ndi tyétyé, va ieviyetye ové méni e mboka Prist, né etaya mwambo mobetye Moses a sombétyé ené tali e mboka wa.

Nandi vé’retye Jesus e Kapernaum, Senturion e vetyendi e mboka mu, e sósélétyé mu. Na, Mopandyi, mosey’amé ayéndi bya e mbadi na bwayi a nyolo limbelimbe bwayi a doleni. Na Jesus na vókó na mu na, Na mandi viyó’ndyiyétyé mu. Na Senturion na’vwanaka na vóyókó na, Mopandyi, nabe oyeni na epabaka ibumuku dya moduwa-amé ; ndi sebwaka kabo ndaga, né moseyamé ónga. Navwana na yéndi moto ayé ibumuku dya ipangwé, ma diyaka na sódyé e ibumuku dyamé, na vóyó na anó na, tyétyé, né a tyéyé ; na umbókwé na, vyaka, né aviya, na e mosey’amé na saka eni ; né asa yo.

Vo tyetye Jesus yo, a mamenetyendi, ava evóyókó na wa vitetye mu na, Póniponi na vóndi né’nywé na, naga duwaka ikamiyé ita ené dyi, nyawé, dyélé e Israel. Ndi na vóyóndi né’nywé na, wabóló wa ngandi vyaka ezityi na e motema, wa nga diyaka na Ebraham, na Aisak, na Jakob, e ipanga dya heven. Ndi wana wa ipanga wa ngandi vugwétyé e iviti dya abiyeneni ; erago e ngandi bétyé duwe na ikaliyé dya magonga.

Na Jesus na vókó na Senturion na, Tyétyé, va bé’vé e kamiyé, esemetye na navé, na mosey adu na vo’ngaka e dyo iwéra mé.

Na va betye Jesus a vyaka e mbada Pité, a tóyetyendi nyangwé na mwadadu bya, na bwani a ivévu. Na mu na kupénétyé ebó adu, na ivévu nava elikaka mu ; na mu né’mwaka amu dyandyaka wa.

Va betye ekolokolo e paba na wa na vyaka na wabóló wa betye na devil, na mu na putaka malina na ndag’adu, na mu na vó’ndyiyétyé waziépi, wa betye na mebwayi. Na evara ndi va, ma, etimaka e kalemetye na mosótyi Isaia na, Mu méni éndyetyendi mavóhómó mago, na mu na bapétyé mebwayi myago.

Va tóyetye Jesus bebumbu betubwé mu iluweneni, na mu na tayaka isombé ityéyé e mud’umbókwé.

Na moléndi nógugu na vyaka, na vóyókó na mu na, na mandi vitétyé’vé iboko dyéziépi dye ma tyétyé’vé. Na Jesus na vóyókó na mu na, Mesindyi me yéndi na mepudu, linyóni la loba na mumbu ; ndi Mwa’moto a be né boko dya nandyiyétyé molo adu.

Na umbókwé a bikuwi byadu na vókó na mu na, Mopandyi, ta lika ngwé na telé tyéyé dyamé lalé. Ndi Jesus a vóyetyendi na mu na vitétyé ngwé ; mebimba me dyametye mebimba myaya.

Va betye mu a vélémétyé e’lende bikuwi byadu be vitetyendi mu. Na Lóngókóte, bokudi utubwé mo vundyetyendi e manga, kwanga elende e kuluwétyé na metyeba ndi a betyendi e viyó. Na bikuwi byadu na vyaka e mboka mu, wa vé’muwétyé mu na, Mopandyi, Ondyiyéty’iwé ; le nyamandi. ¿ Na mu na vóyókó na wa na, Inde ndi enyódyén’inywé, O inywé wa ikamiyé itiké ? Na mu na vé mwaka, na dekaka mepupé na manga, na udémbé utubwé na kwaka. Na wato na mamanaka na, Ra dyóngwé dya moto ndi dyi nana, dyélé mepupé na manga te byoka mu.

Va pabetye mu e mud’umbókwé a zie a Gerga sin, wa betye. na devil wabaye wa latetyendi na mu wa kudwaka eviya e marama, na dyeku ibóló mbagó na moto ayé a yólétyé edola na dya reya méra. ¿ Na lóngókóte, na wa na’miyénétyé na, Inde ndi ey’iwé navé Jesus óvé Mwa’nyambé ? E tokandi viya dyiliy’iwé egombe mbóta paba ? Abiyeneni na wa e betyendi na dyanga dya Ngoya itubwé dye dyidyénétyé. Na devil na sósélétyé mu na, Etóndyé evéndyiy’iwé le tyétyé vayé dyanga dya ngoya. Na mu na vóyókó na nyo na, tyétyéni, va betye nyo nye véndyémé na nyo na tyétyé e dyanga dya ngoya ; na lóngókóte na dyanga dya ngoya dyéziépi na guminyénétyé umbila umbókó e mbelenge e manga, na nyo na dyiliyanaka e meba. Na wa tatetye nyo na tiliyénétyé wa va etyétyé e mboka, wa va esebwaka ima ériépi, na be doletye na wabetye na devil. Na lóngókóte na mboka éziépi na tyétyé ilata na Jesus, va betye wa wa tóyó mu, wa sóseletyendi mu na, a véndyemetye e etébé aya.

Na mu na vélémétyé e elende, ava dyabwaka, na tyétyé e mbokadu méni. Na lóngókóte wa vetyendi mu na momu na edaka a nyolo limbelimbe, bya e ikondo, na Jesus na tóyókó ikamiyé dyaya a va evóyókó na upondyi a nyolo limbelimbe na ; Mwana tóyókó mbya bebeva byavé. biyidywénd’ivé.

Na lóngókóte na waléndi wavókó na vóyókó wa méni na wa méni na Momu ménó a lowandi. ¿ Nandi va puletye Jesus mapikiliya maya a va evóyókó na, Rémé ndi e pikiliyé’nywé ebeva e melema myanu ? ¿ Inde ndi eyé ebóbó, ivóyó dyana, bebeva byavé biyidywéndi’vé dyélé ivoyó dyana imwaka, né emu etamwaka ? Evara ndi vama puléty’inywé, na, Mwa’moto a yéndi na ngudi e zie lyidyé dya bebeva, (Na mu na vóyókó na upondyi a nyolo limbelimbe na) Imwaka ; ingaka ikondo dyavé né etyéyé e mbad’avé. Na mu na vé’mwaka na tyétyé e mbada’du.

Ndi va tóyetye ebumbu yo, wa mamenetyendi, né wa mu ebendétyé Anyambé, e tayetye wato ngudi méra.

Na va doletye Jesus eviya iboko mé dyera, a tóyetyendi momu, dina na Matiyu, diya vé ngwé duti, na mu na vóyókó na mu na, Vitétyé ngwé, na mu na vé’mwaka na vitétyé mu.

Na yo na bétyé va betye Jesus diya e huma e mbadi, lóngókóte, nga duti wabóló na wato wabeva wa vetyendi na divaka na mu na bikuwi byadu. ¿ Na va betye Farisis wa tóyó yo, wa vóyetyendi na bikuwi byadu na, Rémé ndi edya Mopandy’anu na nga duti na wato wabeva ? Ndi va betye Jesus óka yo, a vóyetyendi wa na, wayé mepesa wabe na mala na nganga, kabo wa daka. Ndi tyétyéni né ikwani ngó ya yo, na tokandi mambwangó wa na myambo, navwana nabe viyeni e dyonda dya wayé gondyeneni, kabo wabeva e dyilwa dya melema.

¿ Na bikuwi bya Jon na vyaka e mboka mu, na, Rémé ndi ehindiné’wé na wa Farisis begombe bevókó, ndi bikuwi byavé mba hindinaka ? ¿ Na Jesus na vóyókó wa na, mboyi nya mobayi nyeyéte nye tumama ukili moyé mobayi na wa ? Ndi minya ma viyandi manga ingwénétyé mobayi va yé wa, nandi wa va hindinaka. Abe na moto a vélé epusi, a modamba, a tyatya e ngoyi a vyo, navwana evélwé era e nyawandi ngoyi né ipondi dye dyungula. Na wato wa vélé ivé dya tyatya e mbute nya vyo evwa mbute etyé ganda né ivé dye tyibwama na mbute e dyungula ; ndi wa véléndi ivé dya tyatya e mbute nya tyatya, né byéziépi be tatama.

Va betye mu a kalaka na wa bema mébi, lóngókóte Mopandyi umbókó movetyendi, na sósélétyé mu na, mwa’mé a mwado ayéndi et bowaka ; ndi vyaka va batiyetye mu mabó mavé né mu a diya. Na Jesus né mwaka na vitétyé mu, na bikuwi byadu.

Na lóngókóte mwado a betye na bwayi a matyiya dyomu na mepuma mebaye, a vyaka e puga’du, ava ekupénétyé imbundya dya ngoy’adu. Navwana a vótyendi e mu méni na, Pagate na kupéné ngóy’adu vókóna nóngandi. Ndi Jesus élwemetyendi, va betye mu a tóyó mu, na mu na vóyókó na, Mwa’mwado ódókó, ikamiyé dyavé dyondyiyéndi’vé ; Na mwado nóngaka eviya iwéra mé dyera.

Va betye Jesus a pabaka e mbada mopandyi, na mu na tóyókó nga malela na wato wa saka imbunga. Na mu na vóyókó wa na, ta véndyéméni ; navwana ngóni ega waka, ndi a yayandi, na wa na tyebaka mu. Ndi, va betye wato wa kuduwé eboka, na mu né’raka, ava ebómbókó mu na ebó, na ngóni né’mwaka. Na kuma méra na va samanaka e zie méra éziépi.

Va betye Jesus émwaka evara, pógu nyebaye nye vitetyendi mu, nya maka na, Ové mwa’a Devid tóyóku’wé mambwango. ¿ Na va pabetye mu e mbadi, na pógu na vyaka e mboka mu ; na Jesus na vóyókó na wa na, Ekamiyéndini na, nayéndi na ngudi esa eni ? Wa va vóyókó mu na E, Mopandyi. Na mu nava ekupénétyé migó maya, na, Ebetye né’nywé gondyeneni na ikamiyé dyanu. Na migó maya nava edibwamaka ; na Jesus na va ekeleviyétyé wa na, Bandamiyétyéni, na e pulenetye na moto. Ndi va betye wa wa tyétyé, wa samiyenetyendi kuma’du e zie méra éziépi.

Va betye wa wa tyétyé, lóngókóte wa vetyendi mu na moto émbutye a betye na devil. Va kudwetye devil né’mbutye na kalaka, na bebumbu nava mamanaka na, eni ega tónókó e Israel. Ndi Farisis wa vóyetyendi na, Avéndyiyéndi devil na upolo a devil.

Na Jesus né’luwénétyé mamboka maziépi na mabókó, ékuwétyé e sinegog nyaya, na a pakwaka sango asa a ipanga, óndyiyétyé mepondyi myéziépi na bedaka byéziépi be yé na wato. Ndi va tóyetye mu bebumbu, a tóyetyendi wa mambwangó, navwana wa betyendi wa démbé, na wa na varanaka ené medómbé meyé mebe na motati. Na mu na vóyókó na bikuwi byadu na, pónipóni ndonda eyéndi ebóló, ndi wadyandyi wa yéndi nyévó. Ndi kaliyakani Mopandyi a ndonda, na alometye wadyandyi e ndonda’du.

Va betye mu onda dyomu na bikuwi byadu bebaye, a tayetyendi wa ngudi e véndyiyé malina mabeva, na dyondyiyé dya dyóngó dyéziépi dya bedaka na dyóngó dyéziépi dya mepondyi.

Ndi mina ma dyomu na bikuwi bebaye ndi ma nana, A bogo ndi, Saimon, óndwé na Pité, na mwa’nyangwé Andru ; Jemis dya mwa’Zebedi, na mwa’nyangwé Jon.

Felip na Bartholomio ; Tomas na Matiyu ma mundyi duti, Jemis, mwa’a Alfios na Lebios, a betye na diné’vókwé na Tadios. Saimon a nga Kenan, na Judas Iskariot a kóndetye mu.

Dyomu na wabaye mé wa ndi wa betye Jesus a lomaka a va sombétyé wa na, Etyétyeni e reya nya Betomba, na iretyeni e mamboka ma Sameria ; Ndi tyétyé-ndyéni e medómbé mya nyameni mya mbada Israel. Ndi va tédyén’inywé, pakwakani na, Ipanga dya heven dye Pabandi. Ondyiyétyéni mepondyi, pudyétyéni bimba, tonguwétyéni mebimba, véndyiyétyéni devil, eyéndini duweni bo tawétyé, tayaka tegóni botayaka. E kendyetyeni hika koikoi, dyélé hika epuwa dyélé nyényé e belandi byanu. Dyélé elandi a kola e etyéndó anu ; dyélé ngóyi nyebaye, dyélé makogo, dyélé motumbe, navwana modyandyi ayéndi oyeni na bedya byadu.

E mboka te mboka éziépi dyélé iboko dye mé raké’nywé, batétyéni ayé oyeni etéyi, emu diyakani e téyi na vay’inywé imwakani e teyi. E pabandyéni e mbadi gomwakani yo. Na etóndyé mbadi e diya oyeni, dyonga dyanu dye diyetye etéyi ; etóndyé yo mba bétyé oyeni dyonga dyanu dye timbetye né’nywé.

Mwéziépi a ma bétyé mbé’riyéty’inywé, dyélé dyoka dya ndaga nyanu va mé’mwaké’e mbadi méra dyélé e mboka méra, pupwakani ubulu a mako manu. Póni póni na vóyóndi né’nywé na, engandi bétyé ebóbó egala zie a Sodom na Gomora e dyoba dya yéké wa na egala mboka méra.

Ndi lóngókóteni, na lomand’inywé ené medómbé e tétéyi a róó. Ndi bandamiyétyéni egala wato ; navwana wa ngandi bómbiyéty’inywé e besoka, né wa wangandi dokaké’nywé e sinegog nyaya ; E ngandi viwénétyéni e pwandya nya Goveni na mepolo, na tin’amé, ené tali emboka wa na Betomba.

Ndi vayé wa wa bómbiyéty’inywé, enatyetyeni nyanga ema kalak’énywé : navwana nyanga e nga kalak’énywé engandi tawéty’inywé e iwéra mé dya ivókó dyera. Navwana abegu’nywé e kalani, ndi Ilina dya Góngwé anu ndi dye kala vay’inywé.

Mwa’nyangwé a moto a ngandi bómbiyétyé mwa’nyangwé e dyowé, na Gangwé a tayaka mwana, ma wana wa ngandi témiyénétyé na wa dyaya wa e dyowé. Engandi vinwétyéni na moto mwéziépi, egala dina dyamé ndi a nga lilimiyénétyé na isutye te a ngo’ngaka. Na vayé wa wa viténéty’inywé eni mboka, tilakani na evókwé : Navwana na vóyóndi né’nywé póni póni na, Eva ziyani mamboka ma Israeil maziépi ndi Mwa’moto mba vyaka.

Mukwi abe wa na mukuwi adu, dyélé moseyi wa na mopandy’adu ; Eyéndi twétwé, na mukwi a diyaka ené ékuwé mu, na moseyi ené Mopandyadu. ¿ Palélé wa tuba lé gangwa mbadi na Bielsibub, ro nyenninga na nyanga ema tubaka wa iwadu wa mbadi ?

Ndi enyóyetyeni wa ; navwana ebe né’ma eyé dibemeni, ema bétyé mba kudwanaka ; na a botemeni ema bétyé mba pulénétyé. E sebwa ngwé né’nywé e iviti, kalakani yo e bwe, na nyanga oké nywé e iló, pakwakani yo e meduwa.

Na e nyóyetyeni wóya nyolo, nandi wa yóle dyoya dya ilina, ndi nyóyókóni ayé e yolétyé dyoya dya ilina na nyolo ta e hel. ¿ Témbéléndyé nyebaye nye sambwé epazi a vité evókó ? Era ndi galweni bepusi benayi (Era ndi galweni bepusi benayi) ndi na a evókó ebe ngudi’kwa e zie Góngw’anu mba bétyé. Ndi na we nya moloanu nye yéndi e tango. Ndi e nyóyetyeni, eyéndini Isambo wa na témbéléndyé nyebóló.

Mwéziépi a ma mémétyé ngwé e pwandya wato, na ngategó mémétyé mu e pwandya Lalé a yé e heven. Ndi mwéziépi a ma gógókó ngwé e pwandya nya wato, na ngategó egógókó mu e pwandya a Lalé ayé e heven.

E pikiliyetyeni na nayéndi viyeni itaya dya dyonga e zie ; Nabe vyaka itaya dya dyonga kabo ukwalé’bótó. Navwana nayéndi viyeni e mogalo a momu na gangwé, na mwa’mwado na nyangwé, na ubombi na nyangwé’lukwé. Na waloni wa moto wa yéte wa mbadadu méni.

A tóndé gangwé dyélé nyangwé wa na ngwé, abe oyeni na ngwé na a tóndé mwa’momu dyélé mwa’mwado wa na ngwé a be oyeni na ngwé. Na ayé mbé’ngaha kros adu, né a vité ngwé, abe oyeni na ngwé. A duwa eméno adu a mandi nyamiyétyé yo, na a nyamiyé eménóadu na tina’mé a mandi duwaka yo.

E ngé’nywé éngandi ngwé, na énga ngwé éngandi a lometye ngwé. Enga mosótyi e dina dya mosótyi a mandi duwaka magomwi ma mosótyi ; na énga moto a gondyeneni e dina dya moto a gondyeneni a mandi duwaka magomwi ma moto a gondyeneni. Na mwéziépi a ma nyidyétyé e watiki wa umbókó imógi dya meba ma tóyi pa e dina dya ikuwi, Póni póni na vóyóndi né’nywé na a nyamiyé magomwi madu na’pusi.

Na ebetyendi va betye Jesus a sutyé isombé dya dyomu na bikuwi byadu bebaye, a va véndyémétiyé evara e dyikuwé na ipakwa e mamboka may. Nandi va betye Jon óka e mbada meboka bebolo bya Kraest ava lomaka bikuwi byadu bebaye. ¿ A va vóyókó na mu na, Ové ndi mu a viya, ndi na na le lóndyetye umbókwé ? Na Jesus na’vwanaka na vóyókó na wa na, Tyétyéni né e leviyégóni Jon bema mé byoké’nywé na betóyu’nywé. Pógu nye tóyókó, bebóku be tamwaka, bimba be pudywétyé, potye nyo’kaka, wa wewe wa tongwaka, na mekuge me pakwétyé sango asa. Ndi ibótó na mwéziépi a ma bétyé mba kóbókó na ngwé.

¿ Na ené nga tyétye wa, na Jesus na yalétyé evóyó na ebumbu egala Jon na, Etyétyendi tóyókóni inde e ndyinga ? ¿ Mongongo mo tyibénétyé na upupé ? ¿ Ndi inde ndi’tyétye tóyóku’nywé ? ¿ Momu dayeni edadi e bóbó ? Lóngókóte, wa wa daya bedadi be bóbó wa yéndi e mambadi ma mepolo. ¿ Ndi inde ndi e tyétye tóyóku’nywé ? ¿ Mosótyi ? E ; na vóyóndi né’nywé na wa na mosótyi. Navwana mu anó ndi ayé léndweni na, Lóngókóte na lomandi motodu amé e mondongo avé, mo ma kendyétyé rey’avé e bogo avé.

Póni póni na vóyóndi né’nywé na e wayé dyaweni na wado ebe na ayé kudweni ita ené Jon Baptist ; ndi ayé yéviyeni e ipanga dya heven a yéndi ita wa na mu. Eviya e minya ma Jon Baptist na e tyatya va ipanga dya heven dye yéndi dyandyweni, na wa dyandya dyo wé ngadyo na ngudi. Navwana mesótyi myéziépi na belekanako be sótyetyendi kwanga e Jon. Na etóndyé e bóbóni dyinga, Ilaias ndi anó a betye egala iviya. Ayé na maló móka ótyetye.

¿ Ndi namandi kwaniyétyé eva igona médyi inde ? Wa kwanandi wana wayé diyeneni e maketi, né wonda moramba’ya. Na, lelóngóndi’nywé mabeka, ndi ebe Dyotyeni, le diyand’inywé e dyébo ndi ebe iyidyeneni. Navwana Jon a vetyendi mba dyaka né mu mba nyaka, né wa na, Ayéndi na devil. Mwa’moto a vetyendi a dyaka a nyaka né wa na lóngókóteni, nga madyake na monyeyi maku, mboyi a wéndyi duti na wato wabeva, Ndi ikamiyé dyeyéndi kamuweni e wana wadu.

Na mu na yalétyé isembé dya mamboka ma semetye bebolo byadu betubwé navwana wa be ilwa : Maguga na’vé Koresin ; Maguga na’vé, Bethseda, navwana bebolo betubwé be semetye vayé’vé, be bétyé be samaka e Tair na Saidon, te wa dindyetyendi nélwama e banguisi na ibu egombe a doleni. Ndi na vóyóndi né’nywé na, e ngandi bétyé ebóbó wa egala nga Tair na Saidon e dyoba dya yéké wa na egal’anu. Na óvé Kapernaum eyé betuweni e loba, e ngandi gumuwétyé e hel, navwana bebolo betubwé be yé soweni’vé be bétyé be sowétyé e Sodom, te wa ndite na e dyoba médyi. Ndi na vóyóndi nénywé na, E ngandi bétyé na nga Sodom ebóbó wa e dyoba dya yéké na egal’avé.

Egombe méra Jesus a vwenetyendi na, Na tayandi’vé akeva O Lalé, Mopandyi a zie na loba, navwana e botetyendi bema mébi e ngé’pulé na bokeli, na’vé na va leviyétyé byo metyétyé. Nyanga méra Lalé ; navwana na ndi e tónetye yo dódó e migó mavé. Lalé eyéndi ngwé bómbiyeni bema byéziépi ; na ebe na moto a pulé Mwana kabo Gangwé, ebe tegó na a pulé Gangwé kabo Mwana, e mwéziépi a ma bétyé Mwana a leviyétyé mu.

Vyakani e mboka ngwé inywé wa dyandya na wayé na mayumba ma dila né ngwé na mandi tayaké nywé dyódyó. Inga kani panga’mé vay’inywé, né emu ikwakani na ngwé nawana nayéndi swé na molema ubóbó ; na emandi duwakani dyódyó e malima manu. Navwana pan-

Egombe méra Jesus a tyétyendi dya ekanga a mbasi e dyoba dya dyódyó ; na bikuwi byadu na vo’kaka rayi, na wa na va eyalétyé ibuka dya mbasi wa mu edyaka. Ndi va tóyetye Farisis yo, na wa na vóyókó namu na, Lóngókóte bikuwi byavé besandi eyé ebe twétwé né sa e dydba dya dyódyó. Ndi a vótyendi na wa na, Ega langani esetye Devid vó’tyetye mu rayi na wa betye na mu ; Nyanga iretye mu e mbad’Anyambé, ava dyaka pémbé élevuwé, e betye mba bétyé twétwé na mu a dyaka, dyélé na wa betye na mu, kabo Prist ipó ? Ityé ega langakani e belekanako e moba ma dyódyó nyanga e dyunguletye Prist dyódyó, nandi mba sembwétyé ? Ndi na vóyóndi nénywé na, Eva nana eyéndi na Ayé wa na tempel. Ndi ebétyé e pulétyéni ngo’ya eni, Na tokandi mambwangó ndi hanga myambo, e kodyetyeni wayé mba kobaka. Navwana Mwa’moto a yéndi Mopandyi dyélé a dyoba dya dyódó.

Va betye mu émwa evara, a tyétyendi e Sinegog aya ; ¿ Na lóngókóte, evara va betyendi na momu a betye ebó movisani, na wa na vé’pwaka mu na, Eyéte twétwé na dyondyiyé e dyoba dya dyódyó ? Na na evara ndi va ma sembétyé wa mu. ¿ Na mu na vóyókó na wa na, Ra motwé nd’ayé né’nywé evara ayé a diyaka na modómbé umbókó, etóndyé mokwa e mbela a dyoba dya dyódyo, ava bómbó né mu a gótó yo ? ¿ Na tyé kumbwénétyé moto ayé ita wa na modómbé ? Yo ndi eyé yo twétwé isa dya enyévé e dyoba dya dyódó. Nandi ava evóyókó na momu mé na, Gambiyétyé ebó avé, Na mu nava egambiyétyé yo ; na yo nava etimbaka upesa.

Na Farisis na kudwaka ilaté dya esoka’du a nyanga e mó’yaka wa mu. Ndi va betye Jesus a pulé yo, a dulemetyendi mu méni eviya’vara ; na bebumbu betubwé na vitétyé mu, na mu nava ondyiyétyé wa waziépi.

Na mu na puliyétyé wa na, wa pandyetye mu a pulénétyé. Na evara ndi va ma etimaka ekalemetye na mosótyi Isaia na ;

Lóngókóte mosey’amé a betye ngwé na pónókó ; a tóndé ngwé, a tóndiyé ilina dyamé dódó ; na mandi vélétyé ilina dyamé e mboka mu, na mu a mandi leviyétyé yéké e Betomba.

Ava e sódya, na mu a va’ma ; moto a vó’ka dyoyi dyadu e beboka.

Ava ebuka mongongo a tisemeni, né mu ava dimiyé bevudi be tuta, kabo a loma yéké e ibalé ;

Dina dyadu ndi dye nga petiyétyé Betomba.

Na wa na vyaka mu na umbókó a bómbwetye na devil pógu, na imbutye ; na mu nóndyiyétyé mu, eviya vara na pógu na va e tóyókó na imbutye na kalaka.

¿ Na moto mwéziépi na mamanaka na, Abe mwa’a Devid anó ? Ndi va betye Farisis wóka eni wa vóyetyi na, Anó a véndyiyé devil, kabo egala Bieisibub upolo a devil.

Na Jesus na va pulétyé mapikiliya maya, ava vókó na wa na, Ipanga dyéziépi dye gala na dyo méni dye mandi dyiliyaka ; na mboka ézié dyélémbadi e gala na yo méni eva vókóna a galandi na mu méni ; nandi ipanga dyadu témé. ¿ Ndi etóndyé Setan e véndyiyétyé Setan, dye mandi etémétyé dya ? ¿ Ndi etóndyé na véndyiyétyé devil na Bielsibub, ra nda véndyiyéné na wana wanu nyo ? Yo ndi ema bétyé wa wayétyéyi wanu. Ndi etóndyé na véndyiyétyé devil na Ilina dya Anyambé, vókóna ipanga dya Anyambé dye pabandi e mboké’nywé. ¿ Evókwé ndi na moto amandi’raka e mbada motu’bonga idyungulé dya iyumba dyadu dya, kabo óta saga mot’ubonga sazieni ? Nandi ava viya dyungulétyé mbad’adu. Ayé abe na ngwé abe egal’amé ; na ayéayolé na ngwé a variyéndi.

Yo ndi evóyó ngwé né’nywé na, ebeva éziépi na malowi be yéte bi yidywétyé wato ; ndi malowi egala Ilina dyasa mava iyidywé wato. Mwéziépi a kala ndaga egala Mwa’moto, emate iyidywé mu, Ndi mwéziépi a kala egala Ilina dyasa evé’yidywé mu, dyélé e zie meni, dyélé e zie eviya.

Nyéviyétyé ele, na bebuma byadu byasa ; dyélé beviyétyé ele na bebuma byadu bebeva ; navwana ele e pulénéndi na bebuma byadu. ¿ A igona dya nyóó, inywéni wabeva e mandi kalakani bema byasa dya ? Navwana ebóló a molema te ekala modumbu. Moto asa e ngumba asa a molema a kuduwéndi bema byasa, na moto ubeva e ngumba ebeva a kuduwéndi bema bebeva. Ndi na vóyóndi nénywé na, wato wa ngandi tayaka tango e dyoba dya yéké e ndaga ézié a mbé’tinga e kala wa ; Navwana na ndaga nyavé te nye nga kodywénétyé navé, na ndaga nyavé te ny nga kamuwétyé navé.

Na waléndi wavókó na Farisis n’avwanaka, na Mukuwi le tokandi tóyó ndembo e mboka’vé. Ndi a-vwenetyendi na vóyókó na wa na, Igona dya ihonde na ebeva dye tokandi ndembo ; ndi ebe na ndembo ema etawétyé dyo, kabo ndembo a mosótyi Jonas. Navwana ené nga betye Jonas bemanda belalo na belu belalo ibumu dya nyambembe ; nyanga mé ndi e nga bétyé Mwa’moto bemanda belalo na belu belalo e molema a zie. Wato wa Niniva wa ngandi’mwaka na igona mé dyi e yéké, na wangandi kodyétyé dyo, navwana wé’Iwetyendi na ipakwidi dya Jonas, ndi lóngókóte utubwé wa na Jonas ayéndi eva. Konde a iko a ngandi mwaka na igona médyi e yéké, na angandi kodyétyé dyo ; navwana a vetyendi eviya masuku ma zie a viyó kaka ipulé dya Solomon ; Ndi lóngókóte utubwé wa na Solomon ayéndi eva.

Etóndyé ilina ibeva dye véndyémé na moto, dye tamwandi kwanga e maboko ma mwasani, dye tokaka dyódyó, nandi mba duwaka. Na dyo na vóyókó na, na mandi timbaka e mbada’mé va kudwetye ngwé ; nandi va pabetye mu a kóbetyendi yo evovo vyóweni na kembweni. Na mu na vatyé ingaka na mu méni malina mavókwé motoba na’vókó ebeva wa na mu méni, na wa na vé’raka na diyaka etéyi ; na malityiyéné ma moto mé mayéndi ebeva wa na bogo bogo ; Nyanga mé tegó enga bétyé yo na igona mé ibeva dyi.

Va betye mu andite a kalaka na wato, lóngókóte, nyangwé na wana wa nyangwé wa témetyendi e bwebwe wa tokaka ekala na mu. Nó’mbókó na vóyókó na mu na, Lóngókóte Nyungwé na wana wa nyungwé wa yéndi eboka de, wa tokaka ekala na’vé. ¿ Ndi avwenetyendi na a sebwetye mu na, lya ndi ra ? ¿ Wana wa’ya ndi wara ? Na mu nava gambiyétyé ebó adu va betye bikuwi byadu na, Lóngókóteni iya na wana wa’ya. Navwana mwéziépi a ma saka upango a Lalé ayé e heven, mundi Mwa’ya na iluku, na iya.

Dyoba mé te dye kudwetye Jesus e mbadi, a vatyé diyaka baka na manga. Na bebumbu betubwé na laténétyé e mboka mu, na mu na va tyé diyaka e elende ; na ebumbu éziépi na va etémiyénétyé e mosaka.

Na mu na va ekalaka na wa bema bebóló na mekanakódi, na, Lóngókóte momwasi ibóngó a tyéndi mwasétyé : Va mwasetye mu, mabóngó mavókó ma kwetyendi e pépégu a reya, na linyóni na vyaka na sóbókó mo. Ivókó dye kwetyendi e iboko dya hani dye betye mba tyélé nyebóló ; na dyo na gunganaka e tyétyé, navwana dye bebé na dóku a tyélé ; Na va kudwetye dyoba dye va ebómbólónókó ; navwana dye be’bé nametamba, na dyo na visaka. Na ivókó na kwaka e mekanda, na mekanda na tobwaka, na myo na saka dyo kólu. Ndi ivókwé dye kwetyendi e zie asa, na dyo na tyétyétyé bebuma, ivókó kama, ivókó mabo motoba, ivókó mabo malalo. Ayé na maló mó’ka ótyetye.

Na bikuwi na vyaka, na vókó na mu na, ¿ Rémé ndi e kala’vé na wa na mekanakódi ? Avwenetyendi ava vóyókó na wa na, Inywé ndi eyéni taweni ipulé dya magóyi ma ipanga dya heven, ndi wa wabe taweni. Navwana mwéziépi ayé, mu ndi a ma tawétyé, né mu amu na bebóló ; ndi mwéziépi ayé puweneni amandi’ngwénétyé kwanga na eyé na mu. Yo ndi e kala ngwé na wa na mekanakodi ; navwana botóyókó wa tóyó ; bokaka wóka, né wa wa bómbiyé. Isókó dya Iseas dye timandi na wa, dye vóyó na, na dyoka e mat’okani, ndi eva bombiyéni ; na itóyó e mate tóyóni ndi evé’ngani.

Navwana melema mya wato mé wa myolandi, na maló maya ma tunwandi na dyoka, wa dibandi migó maya ; evwa egombe te egombe wa nyókó tóyó na migó maya, né wóka na maló maya, né wa bandamiyé na melema myaya, né wé’Iwa né Ngwé nó’ndyiyé wa.

Ndi ibótó na migó manu, navwana ma tóyóndi, na maló manu navwana mókandi. Póni póni na vóyóndi né’nywé na, mesótyi mebóló na wato, wasa wa yezietyendi itóyó dya bema mé be tóyu nywé bi, ndi wabe etóyó byo ; na dyoka dya bema mé byo’ké’nywé, ndi wa byoka byo.

Nandi okakani mokanakódi a momwasi ibóngó. Etóndyé moto óka ndaga a ipanga, né mba bómbiyétyé yo, vókóna ubeva a viyandi e dyinga dya a mwaswetye e molema’du, Ano ndi aduwetye ibóngó e pépégu a reya. Ndi a duwetye ibóngó e maboko ma hani, nda bé óka ndaga né mu a gungana inga yo na mbya. Né mu’méni mba bétyé na metamba, ndi a diyate ukili, kwé wa bémbéné betuniya na ndyuke be paba né mu a kóbó. A duwetye ibóngó e mekanda ndi abé óka ndaga ; inaka dya eménó méni na dyabéné dya ita be mu saka ndaga kólu né a mu tyele. Ndi a duwetye ibóngó e zieasa ndabé óka ndaga né a bómbiyé yo : Mu ndi a dyaya bebuma umbókó kama, umbókó mabo motoba, umbókó mabo malalo.

A kanetyendi wa mokanakódi, umbókwé na, Ipanga dya heven dye kwanandi moto a mwasetye ibóngó dyasa ekangadu. Va betye wato wa yadyéné na molon’adu na va viya mwasétyé ters e hwit ; na mu na va tyétyé. Ndi va kudwetye makayi, na dyo na tyétyétyé bebuma na ters nava tegó kudwaka.

¿ Na waseyi wa gangwa’mbadi na vyaka na vóyókó na mu na, Mopandyi ebe liyaka ibóngó dyasa ekang’avé ? ¿ Ndi ters nye duwamandi na ra galé ? ¿ Na mu na vóyókó na wa na, Mofoni ndi asa eni, na waseyi na vóyókó na mu na, e mate’bóbó na le tyétye gumwaka nyo ? Ndi avóyetyendi na, Nyawé, evwa vay’inywé e gumwakani ters, né e gótó tegóni hwit. Byo byéziépi be tombwetye ta kwanga na e igumwé, na egombe a igumwé na ngandi vóyókó na wagumwi na, yolétyéni ters ebogo yoleni né esagani nyo mebómbi né nye dikuwé ; ndi yolétyéni hwit et mbadi.

A kanetyendi wa mokanakódi umbókwé na, Ipanga dya heven dye kwanandi motonga a ebuma a Mustard indyetye moto na mu na mwasétyé yo ekangadu. Eyé póni yéviyeni e bolo mabóngó ; ndi va bémbéné yo e tombwa, ediyandi ita wa e wana bele betiki né liniyóni la loba lemu viya diyaka e melabi myadu.

A kanétyendi wa mokanakódi umbókwé na, Ipanga dya heven dye kwanandi ené ilanda, dye betye mwado éngaka, na mu na góbénétyé dyo na beyéyi bya flawa belalo kabo biéziépi be landa.

Bema mé bi byéziépi Jesus a kaletyendi byo na ebumbu na mekanakódi ; abe’kala na wa mba mekanakódi. Evara ndi va ma etimaka e kalemetye na mosótyi na, na mandi bumwaka modumbu amé na mekanakoki, na mandi kuduwétyé bema be betye botweni eviya idyanga dya zie.

Na Jesus na tyédyétyé ebumbu, ava tyétyé e mbadi, na bikuwi byadu na vyaka e mboka mu na, Pakwaké’wé mokanakódi a ters nya ekanga ;

A vwenetyendi na mu na vóyókó na wa na, A mwasetye ibóngó dyasa ndi Mwa’moto. Ekanga ndi zie, ibóngó dyasa ndi wana wa ipanga, ndi ters ndi wana wa ubeva. Moloni mo mwasetye nyo ndi devil ; igumwa ndi isutyi dya zie ; wagumwi ndi bendyel. Nandi ené nga sagwé ters né nye dikuwé e veya, nandi e nga bétyé yo e isutyi dya zie méni. Mwa’moto a ngandi lomaka bendyel byadu, ivéndyiyé dya bema biéziépi be kóbónó na besa ebeva eviya ipanga dyadu. Wa ngandi vugwétyé ebetye a veya, erago e ngandi bétyé duwe na ikaliyé dya magonga. Nandi wa gondyeneni wa va panyaka ené dyoba e ipanga dya Gangwé aya, Ayé na maló moka, ótyetye.

Ipanga dya heven dye kwanégó ené hika eyé botweni e’zityi, ebé vabé moto a duwa yo né mu yo boteni, na mbya a téyi a tyéndi esambiyétyé ézié eyé na mu, né mu a samba ezityi méra.

Ipanga dya heven dye kwanégo maseni ma toka pérls nyasa ; Va bémbéné mu a duwa perl evókó ésambo itubwé, a tyéyéndi né a sambiyé béziépi be diya na mu, né a sambo yo.

Ipanga dya heven dye kwanégó elóba, evugwé e manga, né yo e laté móngó maziépi. Etóndyé yo londeni e dulwéndi e mosaka, né wa mu yolétyé byasa e bebeva né wa vugaka bebeva. Nandi enga bétyé yo e isutyi dya zie ; bendyel be ngandi vyaka ipaluwé dya wabeva eviya wasa. Na bengandi evugaka wa e’betye a veya, erago engandi bétyé duwe na ikaliyé dya magonga.

¿ Jesus a vótyendi na wa na, Ebómbiyéteni bema mé byéziépi bi ? Wavoyetyendi na mu na E, Mopandyi.

Na mu na vóyókó na wa na, Yo ndi eyé na moléndi mwéziépi mukuwé e ipanga dya heven ayéndi ené moto ayé gangwa mbadi, a kuduwé e ngumb’adu bema bya tyatya na bya vyo.

Ebetyendi va ziyetye Jesus mekanakódi a véndyemetyendi evara. Nandi va betye mu a viya na e zie adu méni, ékuwetyendi wa e Sinegog aya méni, na wa na mamanaka na, momu ménó aviyandi na ipulé na bebolo mé betubwé bi eve ? ¿ Abe mwa’tyapendi ano ? ¿ Abe nyangwé óndwé Meri ? ¿ Na wana wa nyangwé Jemis na Joses, Simon na Judas ? ¿ Maluku madu maziépi mabe né’wé ? Nandi eve ndi e viya momu ménó na bema mé biéziépi bi. Na wa na numbaka na mu, ndi Jesus a vóyetyendi na wa na, Mosótyi abe né’hekuwé kabo e zie adu méni na e mbadadu méni ; A be sa bebolo etéyi, na tina a mba kamiyéty’aya.

E gombe méra ndi otyetye Herod a Titrark kuma a Jesus. Ava evóyókó na waseyi wadu na, Anó ndi Jon Baptist, atongwandi eviya iwedi : Yondi e leviyé bebolo betubwé byo méni vayé mu.

Navwana Herod a bómbetyendi Jon, a va esagaka mu, ava evélétyé mu e meboka na tina a Herodias mwada mwa’nyangwé Filip. Navwana Jon a vóyetyendi na mu na ebe twétwé na’vé ingaka mu. A nyóyetyendi ebumbu va betye mu a tokaka oya mu, navwana wa landyetyendi mu ené mosótyi ; Ndi va tatwetye dyoba dye dyawetye Herod, mwa’a Herodias a mwado a dyotyetyendi e pwandya’ya, na yo na tóndiyétyé Herod. Yo ndi atyenetye mu na ikana na, a mandi tayaka mu emé’pwaka mu éziépi. Nandi va betye mu a kelevuwé na nyangwé, na mu na vóyókó na, Bétyé ngwé molo a Jon Baptist eva e’pélo’bwaga. Na upolo na tóyókó mambwangó ; ndi na tina ékana na wabetye na mu e bedya, a sombetyendi yo na mo tawetye wa. Na mu na lomaka ileniyé dya Jon molo e mbada meboka. Na molo adu na viwénétyé epéló’bwaga, na yo na va tawétyé ngóni ; na mu na tyétyé na yo e mboka nyangwé. Na bikuwi byadu na vyaka, néngaka nyolo, wa va dyamétyé yo, na wa na va tyé sebwaka Jesus.

Va betye Jesus óka yo, a véndyemetyendi’vo na elende e iboko dya ndyinga timbemeni ; ndi va betye wato wóka nyanga méra, na wa na vyaka eviya e mamboka wa vitétyé mu na dya zie. Na Jesus na tyétyé, ava tóyokó ebumbu etubwé, na mu na tóyokó wa mambwangó, na mu nó’ndyiyétyé mebwayi myaya.

Va betye yo emu ekolokolo, na Bikuwi byadu na vyaka e mboka mu na, Dyi nana ndi iboko dya ndyinga, na egombe e dola tegó, tyédyétyé ebumbu evara ndi va ma tyétyé wa e mabókó, isamba dya bedya wa méni. Ndi Jesus a vóyetyendi na wa na, wabe na mala na wa tyétyé, tayakani wa bedya. Na wa na vóyókó na mu na, Le yéndi eva kabo membunda mya pémbé metanu, na weyi nyebaye. A vóyetyendi na, vyakani na byo na vayé ngwé eva. Na mu na sombétyé ebumbu na e e didyenetye e mbwésanga, avé ngaka membunda metanu, na weyi nyebaye, na mu na va lóngókó’loba, ava etuwaka ibótó, va betye mu a buka, ava tayaka membunda e mboka bikuwi byadu, na bikuwi e mboka ebumbu. Na waziépi na dyidyénétyé, wa vó’liyénétyé, na wa na nikaka nguhu nye lityenetye dyomu na belinga bebaye tii. Wa betye wa dyaka wa betyendi ené wa tódyeni nya wamu nyetanu véndyiyeni wado na wana.

Mba pedi na Jesus na va pangaka bikuwi byadu wa véiémétyé e elende, né wa tyétyé ebogo na mu e mud umbókwé, va betye mu andite atyédyétyé bebumbu. Va betye mu a tyédyé bebumbu, a tyétyendi e mokodi e pépégu atyé kaliyaka ; va betye ekolokolo e paba a betyendi erago ipó.

Ndi elende e betyendi emu e tétéyi a manga, e bolonganaka na metyeba ; navwana upupé mobe gondyéné na wa. Ndi e ivuré dya manayi dya elu Jesus a tyétyendi e mboka wa a tamwaka e manga. Ndi va tóyetye bikuwi mu a tamwaka e manga wa tóyetyendi ndyuke, wó vóyókó na, Dye yéndi ilina, na wa na’miyénétyé na dyóngó. Ndi Jesus a gundyenetyendi ekala na wa na Odókóni, ayéte ngwé ; enyóyetyeni. Na Pite n’avwanaka mu na, Mopandyi, etóndyé na ayéndi’vé pangaka ngwé na vetye vayé’vé e meba. Na mu na vóyókó na, Vyaka, ndi va betye Pité a gumyaka e elende a tamwaka e meba, a tyétyé vayé Jesus. Ndi va tóyetye mu upupé ubonga a nyóyetyendi, a mu yalétyé edima, ava’maka na, Mopandyi, ondyiyétyé ngwé. ¿ Mba pedi na Jesus na gambiyétyé ebó adu ava bómbókó mu, ava vókó na mu na, O óvé a ikamiyé itiki, ebéndi etyetyiyétyé né’nde ? Va betye wa wa véiémétyé elende, na upupé na waka.

Na wa betye e elende na vyaka na kaliyaka mu na, E póni póni ové ndi Mwa’Anyambé.

Na va betye wa wa dyabwa e mud’umbókwé, wa vetyendi na e zie a Genesaret. Ndi va betye wamu wa mboka méra wa puiétyé mu, wa lomiyetyendi e zie méra éziépi iluweneni, na wa na vyaka na mepondyi myéziépi e mboka mu. Wa sósélétyé mu na, wa kupenetye dyélé ukorwa a ngóy’adu ipó ; ndi tango mé e kupenetye onguwetyendi.

¿ Na waléndi na Farisis nye vetye eviya Jerusalem na vyaka e mboka Jesus na, Rémé ndi e puliyé bikuwi byavé epepa a watodu ? Navwana wa suga mabó maya va dya wa pémbé.

¿ Na mu n’avwanaka na vókó na wa na, Rémé ndi e puliy’inywé masombé ma Anyambé na bepepa byanu ? Navwana Anyambé a sombéndi na, hetyiyétyé góngwé na nyungwé ; na ama elókókó gangwé na nyangwé, a wetye bowaka. Ndi e vóyóndini na, Mwéziépi a ma vóyókó na gangwé na nyangwé na, eyéndi botawétyé e éziépi eyé’vé e kovaka na ngwé ; Nyanga méni ndi ey’inywé pandyeni masombé ma Anyambé mba ikova na bepepa byanu, na ayé a hetyiyé gangwé na nyangwé, a diyetye hulemeni. Inywé wa dyungulini, Iseas a lutyetyete e sóku’nywé na.

Wato mé wa nana wa gwéséte vayé ngwé na medumbu myaya, wa hetyiyé te ngwé na matepwa maya ; ndi melema myaya me yéndi abiyeneni na ngwé.

Ndi wa kaliyate ngwé e gape, wé’kuwétyé e gala dyikuwinidi dya masombé ma wato.

Na mu nó’ndaka ebumbu ava evóyókó na wa na, okakani né ebómbiyéni. Ebe e tyéyé e modumbu e beviyé moto, kabo eviya e modumbu ndi ebeviyé moto.

¿ Na bikuwi byadu na vyaka, na vóyókó na mu na, Epuléte na Farisis wa béndi wa numba va bé wa wóka ivoyidi mé dyi ? Ndi avwenetyendi na vóyókó na, Iliya dyézié dye betye Lalé ayé e loba mba liyaka, dye mandi gumwétyé. Likakani wa ipó ; wa yéndi pógu, watumbwini wa pógu, Na etóndyé pógu e tumbwanaka pógu wa waziépi wa mandi kwaka ebeya.

Na Pité navwanaka na vóyókó na mu na, Pakwaké’wé mokanakódi mému. ¿ Na Jesus na vóyókó na, inywé eyétegóni mba ibómbiyé ? ¿ Ega bómbiyétyéni na éziépi ira e modumbu e tyéndi ibumu, né evugwé e pépégu ? Ndi bema be kudwa e modumbu be viyandi eviya molema ; byo ndi be beviyé moto. Navwana eviya molema ndi e kuduwé mapikiliya mabeva, dyoyana, ihonde benangana, mwibi, tali a evela na elowana. Bema mébi ndi be beviyé moto ; ndi idya mba sugaka mabó dye beviyé moto.

Na Jesus na va evéndyémétyé evara a va tyétyé e betébé bya Tair na Saidon. Lóngókóte mwado umbókó a nga Kenan a vetye e betébé mé bera, ametyendi e mboka mu na, Tóyókó ngwé mambwangó O Mopandyi, Ové Mwa’a Devid ; Mwa’mé a mwado ayéndi ebeva’bóló na edaka a devil ; Ndi abe avwana mu ndaga, na bikuwi byadu nava viya sósélétyé mu na, Tyédyétyé mu, navwana a’mand’iwé. Ndi a’vwenetyendi na vóyókó na, na be’lomwé kabo e medómbé mya nyameni mya mbada Israel. Na mu na vyaka na sósélétyé mu na, Mopandyi sanaka ngwé. Ndi a vwenetyendi na vóyókó na, Ebe dódó na dyinga dya pémbé a wana, na ivuga dya yo e mbwa. Na mwado na vóyókó mu na ; Póni póni Mopandyi, ndi mbwa nye dyandi nguhu nye kwa eviya tagulu a Mopandyi aya. Na Jesus n’avwanaka na vóyókó na mu na, A, Mwado, ikamiyé dyavé dye yéndi, itubwé, ediyetye n’avé ena nyanga e toka’vé, Na mwa’du a mwado no’ngaka eviya iwéra mé dyera.

Na Jesus né mwaka evara, na mu na vyaka baka na manga ma Galili, va betye mu e mokodi, a va diyaka etéyi. Na bebumbu betubwé na vyaka e mboka mu, wa betye na wa madiyaka, bebóku, pógu, mambutye, mebukatyé, na wavókwé wabóló, wa na nandyiyétyé wa e mako ma Jesus, na mu na ondyiyétyé wa. Na bebumbu na mamanaka va tóyetye wa mambutye ma kalaka, mebukatyé myongaka, bebóku be tamwaka, na pógu nye tóyókó ; na wa na va bendétyé Anyambé a Israel.

Na Jesus na vó’ndaka bikuwi, byadu va betye mu, na mu na vóyókó na, n tóyóndi ebumbu mambwangó, navwana wa mundi na ngwé eva minya malalo, né mba ima a dyaka ; na toka tegó etyédyé wa mba dyaka evwa wa nyókó’goviyéné e reya. ¿ Na Bikuwi byadu na vóyókó na mu na, Eve ndi va ma duwak’éwé ebóló mé a pémbé era e ndyinga, nyeyé nyo’liyétyé ebóli bóli mé a’bumbu eni ? ¿ Na Jesus na vóyókó na wa na, Eyéndini na membunda mya pémbé meninga ? Na wa na vóyókó na, Motoba navókó, na wana weyi nyetiki.

Na mu na sombétyé na ebumbu e didyenetye e zie. Na mu né ngaka membunda motoba nómbókó na weyi, a va tayaka akeva, na bukaka myo, a va tayaka bikuwi byadu, na bikuwi na tayaka ebumbu. Na waziépi na dyidyénétyé, wa vó’liyénétyé, na wa nava enikaka nguhu nyebetye nye likanaka belinga motoba navókó tii. Na wa betye wa dyaka wa betyendi tódyeni nya wamu nyenayi, véndyiyeni wado na wana.

Na mu nava etyédyétyé ebumbu, a va evélémetyé e elende, a va vyaka e betébé bya Magdala.

Farisis na Sadusi wa vetye tegó, wa’dyétyé mu, wa tokaka na a leviyetye wa ndembo eviya heven. Avwenetyendi na vóyókó na wa na, va bé emu ekolokolo, inywéni na, emandi bétyé egombe asa ; navwana loba yeyéndi koikoi. ¿ Na e mwako na, emunya e mandi bétyé lubé-lubé, navwana dye yéndi koyi na bevindi, O inywé wa dyungulini epuléndini ipaluwéné dya mondongo a loba, ndi mba pulétyéni ndembo nya begombe ? Igona dya ebeva na ihonde dye tokandi ndembo ; ndi ebe na ndembo e ma tawétyé dyo, kabo ndembo a mósótyi Jonas, na mu na likaka wa ava tyétyé.

Ndi va vetye bikuwi byadu e mud’umbókwé, wa lendyiyetyendi dyinga dya pémbé. Na Jesus na vóyókó na wa na, bandamiyétyéni né emu kelevakani na lévéni a Farisis na a Sadusi. Na wa na Totondyénétyé waméni na waméni na, a vóyóndi yo navwana le bindye pémbé. ¿ Va betye Jesus a pulé a vóyetyendi na wa na, O inywé wa ikamiyé itiki inde ndi etondyén’inywé e inywé méni né’nywé méni na, navwana ebe viyeni na pémbé ? ¿ Ega bómbiyéni, né ezimbuwéni membunda metanu e tódyeni nyetanu, na ebóló a belinga be nityety’inywé ? ¿ Dyélé na e membunda motoba navókó e tódyen nyenayi, na ebóló e belinga be nityety’inywé ? ¿ Inde ndi ey’inywé mba bómbiyétyéni na nabe kaletye yo né nywé egala pémbé na kelevakani na leven a Farisis na Sadusi ? Na wa na bómbiyétyé na a be vóyetye wa na wa bandamiyetye na leven a pémbé, kabo e dyikuwimdi dya Farisis na Sadusis.

¿ Va pabetye Jesus e betébé bya Sesaria Filipai épwetyendi bikuwi byadu na, Wato wóndandi Ngwé Mwa’moto na na Yéndi ra ? Na wa na vóyókó na, wavókó wa vóyóndi na, óvé ndi Jon Baptist, wavókó na Ilaias, na wavókwé na Jeremaia, na wa mosótyi umbókó. ¿ Avóyetyendi na wa na, nandi inywé e vóyóndini na, na yéndi ra ? Na Saimon Pité na’vwanaka na vóyókó na, Ové ndi Kraest, Mwa’Anyambé a migó.

Na Jesus na’vwanaka na vóyókó na mu na, lbótó n’avé Saimon mwa’a Bar Jona ; navwana mebe megoni na matyiya me leviyé óvé yo, ndi kabo Lalé ayé e heven. Né na vóyó Tegó na’vé na, Ové ndi Pite ; na e ilale mé dyi ndi dye ma longaka ngwé ikando dyamé ; na membyó mya hel me va’balé dyo. Na mandi tayaka’vé benunguna dya ipanga dya heven, ézié ema sagaka’vé e zie e mandi sagwétyé e heven, na ézié ema vurwaka’vé e zie e mandi vurwétyé e heven.

Na mu na sombétyé bikuwi byadu na, wa sebwetye moto na mu ndi Jesus dya Kraest.

Na Jesus na yalétyé ileviyé dya bikuwi byadu eviya egombe méra, nyanga e nga tyétyé mu e Jerusalem, a tyé tóyókó ndyuke e bema bebóló a watodu na Prist nya molo, na waléndi, né ówé, né a tonguwégó dya minya malalo.

Na Pite né ngaka mu e pépégu, a mu yalétyé isembé dyadu na, Ediyetye abiyeneni na’vé, Mopandyi ; Eni evabé e mboka’vé. Na mu na vé’lwamaka, a va vóyóko na Pite na, Véndyémétyé ngwé e puga Setan ; e numbiyéndi ngwé ; navwana etóndiyé bema beyé bya Anyambé, kabo beyé bya wato.

Na Jesus na vóyóko na bikuwi byadu na, etóndyé moto a tokaka évité ngwé, a gózietye nyoloadu, né a bapé kros adu né amu vitétyé ngwé. Navwana mwéziépi a móndyiyétyé aménó adu a mandi nyamiyétyé yo, na Mwéziépi a ma nyamiyétyé eménó adu na tin’amé a mandi duwaka yo. ¿ Navwana réméndi eyé moto koveni, etóndyé a dyeya zie éziépi, né a nyamiyé ilina dyadu ? ¿ Eyé gu’nde e mó bókó na moto egala ilina dyadu ? Navwana Mwa’moto a ngandi vyaka e ivenda dya Gangwé na bendyél byadu ; nandi a va gomwanaka moto moto gondyenemi na bebolo byadu. Na sebwandi né’nywé póni póni na, Eyi na wavókó wa yé eva motémiyénéni, wa nga bétyé mba tyekaka iwedi, kabo wó ta’tóyó Mwa’moto a vyaka e ipanga dyadu.

Minya motoba doli, na Jesus né ngaka Pite, Jemis, na mwa’nyangwé Jon a va tyétyé na wa e mokodi o’domba e pépégu. Na nyolo adu na vé’Iwamaka e pwandya’ya, modongo adu mo panyaka ené dyoba, na bedadi byadu epuwa ené bwe. Lóngókóte na etéyi na va’kudwanaka Moses, na Ilaias e mboka wa, wa kalaka na mu.

Na Pité na vóyóko na Jesus na, Mopandyi, eyéndi enyévé né’wé le diyaka eva nana ; etóndyé ebóbó, né lesa besaka belalo eva, evókó egal’avé, evókó egala Moses, na evókó egala Ilaias. Va betye mu a ndite a kalaka, lóngókóte evindi a bwe e kuliyetyendi wa ; na lóngókóte dyoyi dye vetyendi e’vindi na, Anó ndi Mwa’mé a tóndwé, A tóndiyéndi ngwé dodó okakani mu. Vó tyetye bikuwi byadu yo, wa kodyenetyendi na mendongo myaya na wa na va nyóyókó dyóngó ibóló. Na Jesus na vyaka na kupénétyé wa na, Imwakani, e nyóyetyegóni. Va betye wa wa betiyé migó maya wa be tóyó moto, kabo Jesus ipó.

Va betye wa wa gumyaka e mokodi, Jesus a sombetyendi wa na, Esebwetyeni moto esisila méni, kwanga vayé Mwa’moto a tongwaka eviya iwedi :

¿ Na bikuwi byadu né’pwaka mu na, Inde ndi evóyó waléndi na Ilaias nda’luka a vyaka ebogo ? Na Jesus n’avwanaka na vóyókó na wa na, Epóni póni Ilaias nda’nga vyaka ebogo, né a timbiyé bema byéziépi. Ndi na vóyóndi né’nywé na, Ilaias a betyendi a viya, ndi wa be’pulé mu, ndi wa setyete na mu nyanga ézié e totyetye wa. Nyanga mé te enga tóyókó Mwa’moto na wa. Na bikuwi na va ebómbiyétyé na a kaletyendi na wa egala Jon Bapatist.

Va pabetye wa va betye ebumbu, moto nó gugu a vetyendi Aviya viya’kwaka na mabóngo e mboka mu na. Mopandyi tóyókó mambwangó e mwa’mé a momu, navwana a guswandi, na ókandi póni bwayi navwana begombe bevókó a kwandi e veya, begombe bevókó e meba. Na va vyaka na mu e mboka bikuwi byavé, ndi wabe yólé ondyiyé mu. ¿ Na Jesus na’vwanaka na O igona dya tyendyemeni na mba ikamiyé, na mandi diyaka né’nywé ró kilé ? ¿ Na mandi yikaka né’nywé ró kilé ? Vyakani ngwéna mu eva. Na Jesus na dekaka devil, na nyo na véndyémétyé e mboka mu ; na mwana na vó’ngaka eviya iwéra mé dyera.

¿ Na bikuwi na vyaka e mboka mu e pépégu, na, inde ndi eb’iwé mba yólétyé evéndyiyé yo ? Na Jesus na vóyókó na wa na, Navwana na mbé’kamiyé anu, navwana mbambayé na vóyóndi nénywé na, Etóndyé ediyani na ikamiyé ené motonga a molena a mustard, e mate vóyóni na mokodi mé mu na, Imwaka eva nana na e iboko mé dyenyé ; mo mat’imwa ; na ebe né’ma eyé onyémétyé nénywé. Ndi dyóngó mé dyi dye véndyéméte póni kabo na ikailiya na ihindina.

Va betye wa e Galili, Jesus a votyendi na wa na, Mwa’moto a ngandi bómbwétyé e mabó ma wato. Wa ngand’oyaka mu, né a ngandi tongwaka ropé dya minya malalo, na wa ma tóyókó mambwangó mabóló.

¿ Va pabetye wa e Kapernaum wé ndyetye duti wa vetyendi e mboka Pite na vóyókó na mu na, Mukuwi anu a taya pago ? ¿ A votyendi na, E, Jesus ótetyendi e kala na mu vé’retye mu e mbadi na, E pikiliyandi dya Saimon ? ¿ Wara ndi wa bémbéné mepolo mya zie wé nganaka ivé na wa duti ? ¿ Wana waya méni ityé wandyi ? Na Pite na vóyókó na mu na, E wandyi, Jesus a va vóyókó na mu na, Hongé na wana wa yéte humu. Nandi evwa le nyókó e numbiyé wa, tyétyé e manga né evuga iyóbó, na weyi a bogo eyé e vyaka, ingaka yo, na vayévé e dibwaka yo modumbu, e mandi duwaka epusi a dólé ; ingaka yo, né etaya wa egal’amé na avé.

¿ E egombe mé a evókó te evetye bikuwi e mboka Jesus na, Randi ayé ita wa e ipanga dya heven ? Na Jesus na vó ndaka etumbé, ava témiyétyé yo e tétéy’aya. Ava evóyókó na wa na, Póni Póni na vóyóndi né’nywé na, etóndy’inywé mbé Iwakani, né emuni ené etumbé, e’vérani ipanga dya heven. Ndi mwéziépi a ma e yéviyétyé nyolo adu ené etumbé mé etiki eni, mu ndi ayé ita wa e ipanga dya heven. Na mwéziépi a ma séndyélétyé etumbé evókó ené eni e dina dyamé a séndyéléndi ngwé.

Ndi mwéziépi a ma ebevétyé umbókó a watiki wa, kamiyé ngwé wa eyi enyévé egal’adu, na mu a tingwétyé ilale dye kokwéné e ibólu dyadu né mu a diyama e dóku a manga. Maguga na zie egala ikóbiyéné ; navwana eyéndi na ikóbiyéné dye mandi vyaka ndi maguga na moto né a ma vidyétyé ikóbiyéné. Ndi etóndyé ebó avé dyélé Eko avé e kóbiyétyé’vé lenaka byo ; eyéndi enyévé egal’avé iraka e eménó e sobétyé na ekulu a ebó, wa na idiya na mabo mabaye na mako mabaye né evugwé e veya vya egombe éziépi. Na etóndyé digó dyavé dye kóbiyé’vé, tongwaka dyo, né evuga dyo, éyéndi enyévé egal’avé iraka e eménó digó ivókó, wagó na idiya na migó mabaye né’vé e vugwé e veya vya hel.

Bandamiyétyéni, e pédyetyeni umbókó a watiki wa nana ; navwana na vóyóndi nénywé na, E heven egombyé’ziépi bendyel byaya be lóngóndi pwandya a Lalé ayé e heven. Navwana Mwa’moto a vetyendi e dyondyiyé dya ebetye nyameni. ¿ E piknyandini dya ? ¿ Etóndyé moto a diya na kama a medómbé, né umbókó a Ramba’ya mo lenga, ava e lika mabo ebuwana navókó na ebuwa navókó, né a tyéyé e mekodi, né atoka motyé motyé lengaka ? Na sebwandi né’nywé póni póni na, etóndyé ediyandyé na, né mu a duwa yo, a mandi esaraka na yo wa na mabo ebuwa na vókó na ebuwa na’vókó mebetye mba lengaka. Nyanga mé tegó mobe upango a Gongwé-anu ayé e heven, na, umbókó a watiki wa na a nyametye.

Tegó etóndyé Mwa’nyungwé a bevé’vé, tyétyé né e sebwa mu ebeva’du inywé na mu wabaye pa, etóndyé óka’vé, vókóna eduwandi mwa’nyungwé. Ndi etondyé mu mbó’kaka’vé, né inga umbókó na wavókwé wabaye, evara ndi vama témétyé ndaga e modumbu a tali nyebaye na wa nyelalo. Na etóndyé mu mbó’kaka wa, sebwaka yo e ikando, ndi etondyé mu mbo’kaka ikando a diyetye e mboka’vé ené moto a mbé’pulé na mundyi duti.

Póni póni na sebwandi nénywé na, Eziépi e ma sagaké’nywé e zie e mandi sagwétyé e heven, na éziépi e ma vurwaké’nywé e zie e mandi vurwétyé e heven.

Na vóyóndi nénywé ropé na, etóndyé wabaye wa ramba’nu wa latandyé e zie egala ima’ziépi eyé wa wé’pwaka, e mandi sowétyé wa na Lalé ayé e heven. Navwana va yé wabaye na walalo buseneni ta e dina dyamé na yéndi e tétéy’aya evara.

¿ Na Pite na vyaka e mboka mu, ava vóyókó na, Mopandyi, Mwa’ya a mandi bevétyé ngwé ro nieninga, né ngwé né’yidyé mu ? ¿ Kwanga e ro motoba na’vókó ?

Jesus a vóyetyendi na mu na, Na vóyó na’vé na, e ro motoba na’vókó ; ndi kabo e mabo ma ro motoba navókó ro motoba navókó. Yo ndi e kwana ipanga dya Anyambé ené upolo umbóko, mo totyety’inga tango na waseyi wadu. Va yaletye mu ilaté dya tango, nó’mbókó na viwénétyé mu a betye mu nanweni dyomu dya tódyeni nya talent. Ndi va betye mu mbé’ma a timbiyétyé, Mopandy’adu a sombetyendi na a sambuwetye, na mwad’adu, na wana wadu, na éziépi e betye na mu, né byo be tawé. Nandi na moseyi mé na kwaka e zie, a va esósélétyé mu na, Mopandyi, hikaka na ngwé, na mandi timbiyétyé’vé byéziépi. Na Mopandyi a moseyi mé mura na va ziéziémétyé na mambwangó, a va vurwaka mu, avé’yidyétyé mu inanwa.

Ndi va kudwetye moseyi mé mura, a va duwaka umbókó a moseyi na mu, a betye ananwaka mu kama a dolé, ava bómbókó mu na mabó, ava pambaliyétyé mu e tyingó, na, Tayaka ngwé nyanga e nanwavé. Na moseyi na mu na va kwaka e zie na mako madu amu sósélétyé mu na, Hikaka na ngwé, Na mandi tayaka’vé dyéziépi. Ndi abe’bóbó, ndi a tyétyendi ava vélétyé mu e meboka, kwanga na vayé mu a timbiyétyé inanwa. Ndi va tóyetye wadyandyi na mu be semetye, wa tóyetyendi mambwangó mabóló, na wa na vyaka na sebwaka mopandyi-aya ézié e semetye. Ndi Mopandy’adu, va betye mu óndiyé mu, a vóyetyendi na mu na, Ové moseyi ubeva, Né yidyetyendi’vé inanwa médyira dyéziépi, navwana e sóseletyendi ngwé ; ¿ E be luka tóyó moseyi na’vé mambwangó, ené nga tóyetye ngwé’vé ? Na Mopandy’adu na lingwaka, na tayaka mu e wavomuwini, kwanga na vayé mu a tayaka éziépi e nanwa mu. Nyanga mé tegó e nga saka Lalé ayé e heven inywé etóndy’inywé mbé’yidyétyéni moto mwéziépi bebeva bya wana wa nyungwé eviya e melema myamu.

Ebetyendi va betye Jesus a ziya ndaga ményi na mu na véndyémétyé eviya Galili, a va vyaka e betébé bya Judiya e mudi a Jordan. Na bebumbu be tubwé na vitétyé mu ; na mu na vóndyiyétyé wa erago.

¿ Na Firisis na vyaka e mboka mu wa va evóyókó na mu e bwadyétyé mu na, eyéte gondyeneni egala moto ityédyé dya mwad’adu na tina te tina ?

¿ Avwanetyendi a va vóyókó na wa na, ega langakani na, a setye wa e dyali a setyendi wa momi na mwadi ? ¿ Ava voyókó na, Na tina méni ndi e nga bétyé momu a likaka gangwé na nyangwé, né a tyé lataka na mwad’adu, na wa wabaye wa ngandi bétyé mogoni umboko ? Yo ndi eyé na ; wa bego wabaye, ndi mogoni umbókó, ndi eyé Anyambé laten ; ta, moto a paluwenetyegó yo.

¿ Na wa na vóyókó na mu na, Ndi inde ndi e betye Moses a sombétyé itaya dya edyanganangobo a ivéndyémé né mu a tyéyé ? A vótyendi wa na, navwana Moses na tina a melema myanu mebonga ndi e lityetye mu inywé ivéndyiyé dya wado wanu ; ndi ebe’bé na eviya dyali.

Ndi na vóyóndi né’nywé na, Mwéziépi a ma véndyiyétyé mwadaddu, kabo e diya egala enangwéné, né a baya Umbókwé, a sandi ihonde, na mwéziépi a ma bayaka mu ayé vénguweni a sandi ihonde.

Bikuwi byadu be vóyetyendi na mu na, etóndyé upako a momu na mwado mo diyandyé na, ebe dódó na ebaya. Ndi a vóyetyendi na wa na Wato waziépi wa vé’nga ndaga méni, kabo wayé yo taweni. Navwana eyéndi na metonga mevókó me dyawetye na, eviya ibumu dya nyangwé ; na eyéndi na metonga mevókó me sowetye metonga myawato. Na meyéndi na metonga me sidyetye waméni metonga egala ipanga dya heven. Ayé a yólétyé inga yo, éndyetye yo.

Na wa na vyaka na wana’tiki e mboka mu, egala a batétyé mabó madu e mboka wa, naikaliya : na bikuwi na lingwaka nawa. Ndi Jesus a vóyetyendi na, likakani wana’tiki wa vetye vayé ngwé, edetyetyeni wa, navwana dyóngó mé dyi ndi dya ipanga dya heven. Na mu na batétyé mabó madu e mboka wa, wa va e véndyémétyé evara.

¿ Lóngokóte umbókó a vetyendi na vóyókó na mu na, Mukuwi asa, ré’mé asa ndi ema saka ngwé e iduwa dya eménó a egombyé’ziépi ?

¿ Na mu na vóyókó na mu na, E tubandi ngwé asa nénde ? Ebe nó’mbókó ayé nasa kabo umbókó, mundi Anyambé ; ndi etóndyé etokaké’ra e eménó, tataka masombé. ¿ Na mu na vóyókó na mu na, Masombé mani ? Na Jesus na vóyókó na mu na, Oyetye, Esetye ihonde, Ibetye, e batyenetye. Hetyiyétyé góngwé na nyungwé ; né, emu tóndétyé a bakama na’vé ené Nyolo avé méni.

¿ Na epatye a momu na vóyókó na mu na, Na yéndi tateni bema mébi byéziépi eviya ndémbé amé ; Inde gó etoka ngwé ? Na Jesus na vóyókó na mu na, Etóndyé e tokaka diya gondyeneni, tyétyé va sambiyetye beyé na’vé, né etaya mekuge, e mandi bétyé na ngumba e heven, né e viya emu vitétyé ngwé. Ndi vó tyetye epatye a momu ivóyidi mé dyera, atyétyendi na mambwangó mabóló, navwama a betyendi na iyumba ibóló.

Na Jesus na vóyókó na bikuwi byadu na, Póni póni na vóyóndi né’nywé na, Eyéndi ebonga na moto ayé iteni éraka e ipanga dya heven. Na vóyugó né’nywé na, Eyéndi ebóbó na kamel iraka e ubana’tombo, wa na moto ayé iteni eraka ipanga dya Anyambé.

¿ Vó tyetye bikuwi byadu yo, wa mamenetyendi na ngudi’bóló na, ndi ra nda’móngaka ? Ndi Jesus a lóndyetyendi wa, ava evóyókó na wa na, Eni ebe ngudi’sama na wato ; ndi bema biéziépi be mate e sama na Anyambé.

¿ Na Pite na’vwainaka na vóyókó na mu na, Lóngókóte, le Iikandi byéziépi, né’vité dyavé ; inde ndi ema duwak. éwé nandi ? Na Jesus na vóyókó na wa na, póni póni na vóyóndi né’nywé na, Inywé wayé ngwé viteni, e idyawé dya tyatya va nga diyaka Mwa’moto e eka a ivenda dyadu, inywé tegó e ngandi diyakani e dyomu na beka bebaye e yétyiyétyéni dyomu na betungu bebaye bya Israel. Na mwéziépi ayé sendyeni mambadi, dyélé wana wa nyangwé, dyélé maluku dyélé gangwé dyélé nyangwé, dyélé mwado dyélé wana dyélé bezityi, egala dina dyamé, amandi duwaka kama a ro, na a ngandi dyigaka eménó a egombe’éziépi.

Ndi wabóló wa yé wa bogo bogo wa ngandi bétyé e puga, na wa puga wa ngandi bétyé e bogo bogo.

Navwana ipanga dya Anyambé dye kwanandi ené momu ayé gangwé a mbadi, a pundetye na mwako itoka dya wadyandyi egala ekang’adu. Va betye mu a gondyéné na wadyandyi fura e dyoba, ava elomaka wa e ekanga’du. Na mu na va ekudwaka ené wa mawera malalo, ava tóyókó wavókwé motémiyénéni e maket mba ima esa wa. Ava evóyókó na wa na, Tyétyé tegóni e ekanga na mate’tayé’nywé éziépi eyé gondyeneni, na wa nava tyétyé. Na mu na kudwakagó ené wa mawéra motoba na ebuwa na vókó, a vate saka nyangamé. ¿ Na ené wa dyomu na ivókó a vagó kudwaka, ava duwaka wavókwé motémiyénéni mbé ma’saka, a va evóyokó na wa na, Inde ndi e téminywé’va dyoba igugu mbé’ma’saka ? Wa va vóyóko na mu na, Navwana moto abi’wé lomeni, na mu na vóyóko na wa na, Tyétyé tegóni e ekanga, e mandi duwakani éziépi eyé gondyeneni.

Va betye yo emu ekolokolo mopandyi a ekanga a vóyetyendi na molóndyi adu a ebolo na vóndetye wadyandyi né etaya wa ivé dyaya, eyalétyé na a nga malityiyéné na tyé bómbó nga dyali. Va betye wa bandwetye ené wa dyomu na iwéra ivókó, na wa na duwaka moto moto fura’vókó. Ndi va vetye nga bogo bogo, wódyetyendi na wa mandi duwaka wa, na wa na duwakate moto moto fura evókó. Va betye wa nyo duweni, wa tótyelenetyendi na gangwa’mbadi. Na, wa malityiyéné wa, wa dyandyate iwéra ivókó, né ové e pangandi wa nyanga’vókó né’wé wa viya bapé iyumba na ongo a dyoba. ¿ Ndi avwenteyendi na aya umbókó na, Mboyamé, na be se’vé ebeva, ebe akanaka na ngwé fura’voko ? Ingaka avé, né e tyéyé ; na mandi etayaka a malityiyéné anó te ené’vé. ¿ Ebe gondyeneni na ngwé na saka nga toka ngwé na ibyamé méni ? ¿ Digó dyavé dyeyendi ibeva navwana na yéndi nasa ? Yo ndi enga bétyé nga puga e bogo bogo, na nga bogo bogo e puga ; navwana wabóló ndi wóndwé, ndi nyévó e pónwétyé.

Na Jesus né ngaka dyomu na bikuwi bebaye e reya e pépégu, va betye mu a betaka e Jerusalem, ava evóyókó na wa na. Lóngókóteni le betondi e Jerusalem ; na Mwa’moto a mandi kóndwétyé e mboka Prist nya myolo na waléndi na wa wa mandi kodyétyé mu e iwedi. Na wa ngandi bómbiyétyé mu ityebwé na betomba, na edokwé, na ibanda dyadu e kros ; né a tongwagó e dyoba dya malalo.

Na nyangwé a wana wa Zebedi na wana wadu na vyaka e mboka mu, a sósélétyé mu na iyega dya ima na’gugu e mboka mu. ¿ Na mu na vóyókó na mu na, Inde ndi etok’avé ? Ava evóyókó na mu na Vóyókó na wana mé iwamé wabaye wa na, wa diyetye, umbókó ebó avé bómwé, na umbókwé a eméngu e ipanga dyavé.

Ndi Jesus avwenetyendi na vóyóko na, Epuléni nyanga ipwé’nywé ¿ Eyéte ngudi e nyani imógi dye ma nyaka ngwé na ebatuwé na ibatuwidi dye ma batuwétyé ngwé ? Na wa na vóyókó na mu na, Le mate’yolé. Na mu na vóyókó na wa na, póni póni e mate nyani imógi dyamé, na ibatuwé ibatuwidi dyeyé ngwé na batuwétyé ; ndi idiya ebó amé a’bómwé dyélé amé a’méngu ebe a ngwé na tayaka, ndi engandi tawétyé e wayé Lalé yo kendyeni.

Va betye dyomu wó’ka yo wa lingwetyendi na wabaye wa nyangwé’vókó. Ndi Jesus óndetyendi wa, a va vóyóko na, Epuléndini na mepolo mya Betomba me pangandi wa, na watubwé wa pangaka wa na ngudi. Ndi eva bé né’nywé nyanga méra, ndi mwéziépi a ma ’tokaka diya utubwé vay’imywé a diyetye modiliy’anu. Na mwéziépi a ma tokaka diya molo vay’inywé, a diyetye mosey’anu. Te ené Mwa’moto abe viya isowéné, kabo isa, na itaya dya eménó adu e dyóbó dya wabóló.

Va véndyemetye mu e Jerico, ebumbu etubwé e vitetyendi mu. Lóngókóte pógu nyebaye nye didyenetyendi e pépégu a reya, vó tyetye nyo na Jesus a dolandi, nya’metyendi na, Okaké’wé manbwangó, O Mopandyi óvé mwa a Devid. Na ebumbu na, dekaka wa na, wa votyetye, ndi wa’metyigó waa na, Okaké wé mambwangó, O Mopandyi, óvé Mwa Devid.

¿ Na Jesus na témétyé de, a vó’ndaka wana. Etokandini na nasety’inywé ? Wa vóyetyendi na mu na, Mopandyi, migó mago ma dibwebemetye. Na Jesus nó’kaka wa manbwangó na mu na kupénétyé migó maya ; mba’pedi na migó maya na va duwaka itóyó, na wa na vitétyé mu.

Va betye wa wa mu bakamaka na Jerusalem, na wa na pabaka e Bethpadye e mokodi a Olivet, na Jesus na lomaka bikuwi bebaye. Avóyetyendi wa na, Tyétyéni ibókó dye yé e bogoanu, gwéseni emandi duwakani buru tingweni, na mwana na yo ; vurwakani nyo, né eviyani na nyo vayé ngwé. Etóndyé moto a vóyu’nywé ima, emu vóyókóni na, Mopandyi ayi nyo na mala, kwé kéte a lika nyo.

Eni, nana éziépi e semetyendi na, evara ndi vama timaka e kalemetye na mosotyi na ;

Sebwakani Mwa’mwado a Zaion, na, Lóngókóte Upoloavé mo viyandi vayé’vé swé, diya e buru na e etumbé a buru.

Na bikuwi na va etyétyé na saka ené nga sombetye Jesus na wa. Na wa na vyaka na buru na mwa’buru, na wa na batétyé nyo medamba myaya, na wa na didyétyé mu e loba la nyo. Na ebumbu mé etubwé na yayaka ngóyi nyaya e reya ; wavókwé wa lenaka pasi eviya e bele, wa yayaka nyo e reya. Na bebumbu be tyétye e bogo, na be vitetye, n’amiyénétyé na, Hosana na Mwa’Devid ; Ibótó na aviya na dina dya Mopandyi ; Hosana e loba la loba.

¿ Va pabetye mu e Jerusalem, na mboka éziépi na’vé muwénétyé, na, Ra nd’anó ? Na bebumbu na vóyókó na, Anó ndi Jesus mosótyi a Nazaret a Galili.

Na Jesus na tyétyé e tempel a Anyambé, ava e kuduwétyé mwéziépi a sambiyetye na wa sambetye e tempel, amu tyibwaka tagulu nya wé’luwini wa dólé na madidi ma wa sambiyetye mbenga. Ava evóyókó na wa na, Eyéndi léndweni na, Mbad’amé engando’ndwétyé na mbada ikaliya, ndi eyéndini yo pandyeni ubwalange a mibi.

Pógu na bebóku wa vetyendi e mboka mu e témpél a vóndyiyétyé wa.

Va tóyetye prist nya molo na waléndi bema be mamwéné be setye mu, na wana wa’miyénétyé e tempel na Hosana na Mwa’Devid, na wa na numbaka na ngudi. ¿ Wa va vóyókó na mu na, Okate nyanga evóyó wa nana ? ¿ Na Jesus na va vóyókó na wa na, E, ebeni landyeni na, eviya e medumbu mya metyétyé na wa nyanga, ndi egondyenetye’vé idenbwé ?

Na mu na likaka wa, ava véndyémétyé e mboka na tyétyé e Bethani, na mu na diyaka erago.

Ndi va timbetye mu e mboka na mwako, ótyetyendi rayi. Va tóyetye mu ele a itóló e reya, na mu na vyaka va betye yo, abe duwa ima etéyi, kabo makayi ipó, ava evóyókó na yo na, Evagó dyaya bebuma eviya’va na egombe éziépi, Na ele é’tóló na gunganaka evisa. Va tóyetye bikuwi yo, wa mamanetyendi na, ele a itóló e visandi bovolaka nga dya ?

Na Jesus na’vwanaka na vóyókó na wa na, Póni póni na vóyóndi né’nywé na, etóndyé ediyani na ikamiyé mba bétyé na ityétyé, eva sani kabo esama na ele a itóló eni, ndi eyéte evóyókóni na mokodi mému na, véndyémétyé né etyé kwaka e manga ; e mate esama. Na ima éziépi ey’inywé e dyombétyéni e ikaliya, ekamiyétyéni, e mandi duwakani.

Va vetye mu e tempel, prist nya molo na watodu wa wato wa vetyendi e mboka mu va betye mu ékuwétyé, na, ¿ Ré pandyé ndi dye sa navé bema mé bi nana ? ¿ Na ra nda tayetyevé ipanga mé dyi ?

Na Jesus n’avwanaka na vóyókó na wa na, ngwé na mategu’pwaké’nywé ima evókó, eyé etóndyé esebwani ngwé, Nyanga mé te ema sebwaka ngu’nywé ipanga dye sa na ngwé bema mébi. ¿ Ibatiyéné dya Jon dye vetyendi eve ? ¿ Eviya e Heven ndi na e wato ? Na waméni na pikiliyaka na, Etóndyé le vóyó na eviya heven, a mandi vóyókó na. ¿ Ebetyendi mba kamiyétyéni mu né nde ? Ndi etóndyé le vóyó na dya wato ; le nyóyóndi wato, navwana waziépi wé ndyetyendi Jon ené mosótyi. Na wa navwanaka na Jesus na, Le va’sebwa, Na mu na vóyókó na wa na, Dyélé ngwé na va sebwé’nywé ipanga dye sa na ngwé bema mébi nana. ¿ Ndi epikiliyandini dya ? Moto nó’gugu a betyendi na wana wabaye ; ava vyaka e abogo, na, Mwama, tyétyé va dyandyetye’ekanga’mé emunya. Avwenetyendi na mu na vóyókó na, na va’tyéyé, ndi kwé va betye mu é’Iwama, ava etyétyé. Na mu na vyaka e awabaye, ava te vóyókó nyanga mé, na mu na’vwamaka na vóyókó na, Na tyéyéndi Lalé, ndi mba tyétyé ? E wa wabaye wara ra nd’asetye upango a gangwé ? Wa vóyetyendi na mu na, a bogo, Jesus a vóyetyendi na wa na, póni póni na vóyóndi né’nywé na, Wéndyi duti na bevove wa Tyéndi ipanga dya Anyambé ebogo nénywé.

Navwana Jon a vetyendi vay’inywé na reya a gondyeneni. ndi ebe’kamiyéni mu, ndi wéndyi duti na bevove ndi wa kamiyetye mu, ndi inywé va tóyety’inywé yo ebe ilwamani nana evara ndi va ma e kamiyéty’inywé mu.

Okakani mokanakódi umbókwé, ebetyendi na gangwa mbadi na egugu a liyetye ekanga, ava iluwénétyé yo na ugómba, na mu na pudwaka itisidi dya ivé e téyi, a va longaka elongo, ava likaka yo na waliyi na mu na tyétyé ezityi a abiyeneni. Va betye egombe a bebuma e mu bakamaka, ava lomaka waseyi wadu e vayé waliyi, na evara ndi va ma duwaka wa bebuma bya téyi. Na waliyi na vé ngaka waseyi, wa va dokaba umbókó, wa vó’yaka umbókwé wa va lumaka umbókwé malale. A vagó lomaka waseyi wavókwé wa na wa bogo, na wa nava saka wa nyanga mé ; Ndi e malityiyéné a lometyendi mwa’du e mboka wa na, wa mandi diliyétyé Mwa’mé. Ndi va tóyetye waliyi wa tóyókó mwana, wa vóyetyendi wa méni na waméni na, modyizi ndi mu ; vyakani lo yetyeni mu ni’wé li nga idiyiga dyadu. Na wa na bómbókó mu, wa vugaka mu na e bwebwe a ekanga wa vó’yaka mu. ¿ Nandi va nga vyaka Mopandyi a ekanga, a ngandi saka na waliyi mé wara dya ?

Wa vóyetyendi na mu na, a ngandi dyiliyétyé wato mé wabeva wara na idyiliyidi, né mu a lika Ekanga’du e waliyi wavókwé wa nga tayaka mu bebuma e begombe byaya.

Jesus a vóyetyendi na wa na, ega langakani, e maléndwé Ilale dye tyiyetye walondyi ndi dye betye molo a esuduku ; ¿ dyi nana ndi isedi dya Mopandyi na dye yéndi dye mamwémé e migó mago ? Yo ndi e vóyó ngwé né’nywé na, Ipanga dya heven dye mand’ingwénétyé inywé, né dye tawé e etomba enga vidyétyé bebuma bya téyi. Ndi mwéziépi a ma kwaka e ilale, mé dyi a mandi bukaka, ndi e mwéziépi a ma bétyé dyo dye kwaka dye mandi tisaka mu nguhu.

Va betye prist nya molo na Farisis wóka mokanakódi mému, na wa nénganaka na a kaletyendi na wa. Ndi va totyetye wa ebómbó mu, wa nyóyetyendi ebumbu navwana wéndyenetyendi mi egala mosótyi.

Na Jesus na kalakagó na wa ma, mekanakódi na ; Ipanga dya heven dye yéndi ené upolo nó gugu mo sidyetye iba dya Mw’adu ; Ava lomaka waseyi wadu e dyonda dya wóndwetye e iba, ndi wa mba tokaka eviya. Na mu na lomakagó waseyi wavókwé na, Sebwakani na wa betye wondwétyé na, Lóngókóteni, na viyandi kendyé huma’mé, na viyandi oyidyé nyati nyamé na nyama nya mavóngó, bema byéziépi be kokandi ; vyakani e iba. Ndi wa bebé né’lóngó etéyi, wa va tyédyénétyé’maya, umbókó e ekanga’du, umbokwé e mekita myadu. Na wa lityenetye né ngaka waseyi wadu wa va dyungulétyé wa, wa vóyaka wa. Ndi vó’tyetye upolo yo, na mu na va lingwaka, na mu na lomaka mokindi adu, wa va dyiliyétyé wóyini mé wara, wa va etumbaka mbok’aya.

Né ava evóyókó na waseyi wadu na, Iba dye kokandi, ndi wóndwetye wa bebé oyemi. Ndi tyétyéni e reya nye tubwé, ebóló e ma duwaké’nywé umu ondakani yo e iba. Na waseyi mé wara nava tyétyé e reya nyetubwé, na wa na latétyé ebóló e duwetye wa éziépi ta ; wabeva na wasa, na iba na londaka na wandyi.

Nandi vé’retye upolo itóyó dya wandyi, na mu ma tóyókó moto a betye mba edadi a iba etéyi. ¿ Ava evóyókó na mu na, Mboy’amé, ebéndi e vyaka eva mba edadi éba dya ? Ndi abe ekala. Na upolo na vóyókó na waseyi na, Sagakani mu mako na mabó, né ingani mu, evugani mu e iviti dya abiyeneni ; erago e ngandi bétyé duwe na ikaliyé dya magonga. Navwana wabóló ndi wóndwé ndi nyévo te e pónwé.

Na Farisis na tyédyénétyé, wa tyé lataka esoka a nyanga ema dyutyiyétyé wa mu e ikalidi dyadu. Na wa na lomaka bikuwi byaya e mboka mu na Herodian na, Mukuwi, le pulété na eyéndi póni póni, né e leviyéndi reya a Anyambé na póni póni, e sóló tegó egala moto te moto ; navwana e tangina pwandya nya wato. ¿ Ndi sebwaké’wé nyanga e pikiliya’vé, Eyéte gondyeneni itaya dya Sisar duti, ndi na le tayetye ?

¿ Na Jesus na pulétyé bebeva byaya, a va evóyókó na wa na, Adyéndini ngwé nénde inywéni wasazini ? Leviyétyéni ngwé dólé a duti, na wa na vyaka mu na fura ; ¿ Ava’vóyókó na wa na, uvela mé mu na dina ndi bya ra ? Wava vóyókó na mu na, bya Sisar, na mu na vóyókó na wa na, Tayakani Sisar bema beyé bya Sisar ; na e Anyambé bema beyé bya Anyambé.

Va betye wa wóka ndaga ményi, wa mamenetyendi, wa va likaka mu wa va etyédyénétyé.

Sadyusi wa vetyendi e mboka mu e dyoba mé, wa vóyó na itongwa dyebe, na wa na vé’pwaka mu. Na, Mukuwi, Moses avóyetyendi na, etóndyé moto a wa mba bétyé na mwama, mwa’nyangwé a bayetye mwad’adu, né a mu témiyétyé mwa’nyangwé ibóngó. Le betyendi na wa nyangwé evókó motoba na’vókó ; a bógó va betye mu a baya mwado, na mu na waka, mba likaka ibóngó, ava likaka mwad’adu na Mwa’nyangwé. A wabaye tegó nyanga mé a’vókó, na a walalo, kwanga na a motoba na’vókó. E malityiyéné na mwado nava tegó e waka. ¿ Nandi e itongwa a ngandi bétyé mwada ra ? ¿ E motoba na vókó mé mu ? Navwana wa waziépi te wa betye na mu.

Na Jesus n’avwanaka na vóyókó na wa na, enyóngóndini, epuléni maléndwé, dyélé na ngudi a Anyambé. Navwania e itongwa wa va’baya, dyélé ibadyéné, ndi wayéndi ené bendyél bya Anyambé e heven. Ndi egala itongwa dya wa wewe, ega langakani nga kaletye Anyambé né nywé na ; ¿ Ngwé ndi Anyambé a Ebraham, na Anyambé a Aisak na Anyambé a Jekob ? Anyambé ebe Anyambé a mewewe, ndi a wayé e migó.

Vó tyetye bebumbu eni nana, wa mamenetyendi dyikuwinidi’dyadu.

Ndi vó tyetye Farisis na, a kubiyéndi Sadusis, wa latenetyendi ta. Na aya umbókó a betye mopuli a belekanako, na vé’pwaka mu nyuwe e bwadyétyé mu, na ; ¿ Mukuwi ré’sombé itubwé ndi dyeyé e elekanako ? Na Jesus na vóyókó ma mu na, Tóndétyé Mopandyi Anyambé avé, na mole’mavé mwéziépi, na ilina dyavé dyéziépi, na ipikiliya dyavé dyéziépi. Isombé dya bogo bogo na itubwé ndi dyi nana, Na dya mabaye dye yéte ené dyo, Tóndétyé a bakama na’vé ené nyolo avé méni. Belekanako byéziépi na mesótyi byó’dóndi na masombé mé mabaye ma nana.

Va betye Farisis lateneni ta Jesus é pwetyendi wa. ¿ Na, epikiliyandini dya egala Kraest ? A yéndi mwa’ra ? Wa vóyetyendi na mu na Mwa’a Devid. A vóyetyendi na wa na, ndi inde ndi onda Devid mu e ilina na, Mopandyi na ;

Mopandyi a vóyetyendi na Mopandy’amé na, Diyaka ebó amé a’bómwé, kwanga na vayé ngwé na vélétyé waloni wavé e mbata e tisa’ve.

¿ Ndi etóndyé Devid óndaka mu na Mopandyi, a mégó bétyé Mwa’du dya ?

Abe na moto a yóletye etimbwana mu ndaga, eviya dyoba mé dyera moto te moto a begó dyidya mu dyipwa dya nyuwé evókwé.

Na Jesus na kalaka na bebumbu na bikuwi byadu ; Na Waléndi na Farisis wa diyandi ididi dya Moses ; Ima éziépi ema sebwaka wa né’nywé na tatakani, tatakani né emu sakani yo, ndi e setyeni bebolo byaya ; navwana wa vóyóndi, ndi mba saka. Navwana wa sagandi mómba ma dila ebonga na ibapwé, né wa mu batiyétyé mo e mabétyé ma wato ; ndi wa méni mba yólétyé iziézié dya mo dyélé umbókó a minó myaya. Ndi wa sandi bebolo byaya byéziépi na, evara ndi va ma’tónókó byo na wato ; wa saka failaktiri nyaya upudyu, né wétiyétyé masuku ma ngóyi nyaya. Wa tóndétyé maboko ma beteni e masango, na madidi matubwé e sinegog. Na magomwi e maketi, na dyondwé na wato na, Rabai, Rabai. Ndi ondwetyeni na Rabai : navwana motumbwini anu moyéte umbókó, moyé Kraest ; na inywéni waziépi wana wa’ya. Ondetyeni moto e zie na Góngw’anu ; navwana Góngw’anu eyéte evókó, mu ayé e heven. Ondwetyeni dyélé na Watumbwini ; navwana motumbwini anu moyéte umbókó moyé Kraest. Ndi ayé ita wa vay’inywé a mandi bétyé mosey’anu. Na mwéziépi ama betiyétyé nyolo adu méni a mandi gumuwétyé, na ama gumiyétyé nyoloadu méni a mandi beluwétyé.

Ndi maguga né’nywé waléndi na Farisis, wasazini ! navwana edibandini wato ipanga dya heven ; n’inywé méni e tyéyéni erago, n’inywé ebóbóni wa toka etyéyé na wa tyétye etéyi. Maguga nénywé waléndi na Farisis, Wasazini ! navwana epukulandini mambadi ma mekusi, esakani makaliya maabé ; yo ndi enga duwak’énywé ivomuwé itubwé.

Maguga né’nywé waléndi na Farisis, Wasazini ! navwana iluwénéndini manga na zie ipanga dya umbókó élwamaka ; vé Iwama mu, e pangani mu mwa a hel ro nyebaye wa né’nywé méni.

Maguga né’nywé wa tumbwana pógu ! wa vóyó na a kana na tempel dyebe ima ; ndi mwéziépi a ma kanaka na hika koikoi a tempel, a yéndi monanwi. ¿ Inywéni betiketike na pógu, Eni ndi eyé ita wa, hika’koikoi, ndi na tempel e pudyé hika koikoi ? Na ama kanaka na Olta, dyebe ima, ndi mwéziépi a ma kanaka na itawé dye yé batweni etéyi, ayéndi kobeni. ¿ Inywéni betiketike na pógu, eni ndi eyé ita wa, itawé, ndi na olta e pudyé itawé ? Mwéziépi a ma kanaka egala olta a kanandi yo nabema biéziépi beyé etéyi. Na mwéziépi a kana na tempel a kanandi na yo, na mu a diya e téyi. Na a kana na heven, a kanandi na eka a Anyambé na mu adiya e téyi.

Maguga né’nywé waléndi, na Farisis, wasazini, navwana e tayandini mbéyi a dyomu e méwé dólé na eliyani ézié a sombo, né elikakani edila a mepako mya belekanako, yéké, mambwangó, na ikamiyé ; bi nana ndi be bety’inywé e lukaka esani, hanga egala ilika dya bevokwé mba sowétyé. Inywé wa tumbwana pógu, wa lindyé vipisi, né e minakani kamel.

Maguga nénywé waléndi na Farisis, wasazini ! navwana e pudyéndini imógi na epélé e bwebwe, ndi etéyi londeni ti na mbabo na ebeva. Ové Farisis a pógu, pudyétyé imógi na epélé etéyi e bogo, evara ndi va ma puwaka bwebwe aya tegó.

Maguga né’nywé Waléndi na Farisis wasazini ! navwana eyéndini ené marama mayé puweni, ma leviyé enyévé e bwebwe mbambayé, ndi etéyi londeni ti na bevezie bya wato wa mowedyénéni na séké’ziépi. Nyanga mé tegó e kudwané’nywé waziépi gondyeneni e mboka wato, ndi eyéndini etéyi londeni ti na esagana na ebeva.

Maguga né’nywé waléndi na Farisis wasazini ! navwana e longandini marama ma mesótyi, né e lutyiyétyéni marama ma wa gondyeneni. E vóyókóni na, Loka’bé e minya ma walalé, te le byoka lata na wa e matyiya ma mesótyi. Ndi inywé méni e pakwakani na, eyéndini wana wa tango mé oyetye mesótyi. Londiyétyéni eyéyi awagóngwé. ¿ Inywéni nyóó, inywéni igona dya peyi, e mandi tilakani yéké a heli dya ?

Ndi tóyókóteni nga loma ngwé inywé mesótyi, na wato wa mapulé, na waléndi ; etéyi e ngandi oyakani wa na ibanda dyaya e kros, e ngandi dokakani wavókó e sinegog nyanu, na e viténétyéni wa eviya mboka na mboka. Evara ndi va ma batamaka matyiya ma wato wasa ma soletye e zie maziépi vay’inywé, eviya matyiya ma Ebel a gondyeneni, na e matyiya ma Sakarias Mwa’a Barakaias, óyety’inywé e tétéyi atempel na Olta. Póni póni na vóyóndi né’nywé na, bema mébi byéziépi be ngandi batamaka e igona médyi.

O Jérusalem, Jerusalem, Ové oya mesótyi, na iluma dya wa lomwé vayé’vé malale, ro nyebóló ndi nye totyetye laté ngwé wana wavé ta, ené nga laté dyaye dya kuba beledi byadu ibumuku dya mapépu madu, ndi ebe’tokani. Lóngókóte, nga likana mbada nu kodo. Navwana na vóyóndi nénywé na, Evagó tóyóni ngwé eviya’va, kabo vanga vóyóku’nywé na, Ibótó na a viya na dina dya Mopandyi.

Na Jesus na véndyémétyé, ava kudwaka eviya tempel, na bikuwi byadu na vyaka emboka mu, ileviyé dyadu malonga ma tempel. ¿ Na Jesus na vóyókó na wa na, Etóyóni bema mé byéziépi bi ? Póni póni na vóyóndi né’nywé na, eva, eva likana ilale ivókó batemeni ivókwé, dye nga bétyé mba sadywétyé. Va betye mu dia e mokodi a Oliv, na bikuwi na vyaka e mboka mu bo botamaka, na, ¿ Sebwaké’wé, ra gombé ndi e nga bétyé bema mébi ? ¿ na ndembo a iviya dyavé e ngandi bétyé dya na a isutyi dya zie ? Na Jesus na’vwanaka na vóyókó, na wa na, Bandamiyétyéni evwa moto a nyókó kóndu’nywé. Navwana wabóló wa ngandi vyaka na dina dyamé, na, ngwé ndi Kraest na wa ngand’abétyé wabóló. Engandi okakani beduka na bedungu bya beduka ; lóngókóni na evavetyeni, navwana bema mébi byéziépi ndi be ngó’taka dola, ndi isutyi dyega betyé. Navwana etomba e ngandi’mwaka na etomba evókwé, na ipanga na ipangé’vókwé, rayi nya usalóku nye ngandi bétyé, na bevuva, na zie e tyibénétyé e mabokó mavókó. Bi nana byéziépi ndi dyali dya mambwangó. Nandi wa na viya bómbiyéty’inywé e itódywé dya etuniya, wa ngando’yaké’nywé ; e ngandi vinwétyéni na betomba byéziépi egala dina dyamé. Na wabóló wa ngandi kóbókó, wa ngandi kóndónókó wa ngandi vinénétyé. Na mesótyi mebóló mya evela me ngandi imuwénétyé, wa ngan’dabétyé wabóló. Navwana ebeva e ngandi sapwaka, na itóndi dya wabóló dye ngandi ótókó.

Ndi a nga lilimiyénétyé na isutyi ; munda’ngó’ngaka. Na sango mé asa a ipanga eni e ngandi pakwétyé e zie éziépi egala tali a betomba byéziépi ; nandi isutyi dye va vyaka.

Nandi va nga tóyóku’nywé ima e vinwé a udyilo, e kalemetye na mosótyi Daniel, témeni e iboko dya hole. (Mwéziépi a langa a bómbiyetye.) Ndi wayé e Judiya wa tiletye e mekodi. Ayé e mbadi e loba a gumyetyegó e dyinga dya ima e mbada’du. Dyélé na ayé e ekanga a timbetyegó e puga e dyinga dya ngóyi nyadu.

Madyili na wayé na memi na wa nyandyiyé e minya mé mara. Ndi kaliyakani na itila dyanu dye nyókó diya egombe a ivévu, dyélé na e dyoba dya dyódyó ; Navwana etuniya etubwé e ngandi bétyé eyé ega bé eviya dyali dya zie, na e tyatya’va, nyawé eva tegó’bé. Mobe na mogoni mongó’ngaka, kabo minya mé mara na vuvuwéndyé, ndi minya mé mara ma ngandi vuvuwétyé na tina a wayé pónweni.

Ndi etóndyé moto te moto a vóyó nénywé na, Lóngókóte Kraest ayéndi eva nana, na evanyé ; ekamiyetyeni yo. Navwana Kraest nya bodyowa nye ngandi’muwénétyé, na mesótyi mya bevela wa ngandi leviyétyé ndembo nyetubwé na memamo ; ebétyé na eyéndi e yólémétyé, te wa ngandi abétyé wa yé pónweni. Lóngókóteni na yét’inywé sebweni. Yo ndi eyé etóndyé wa vóyó né’nywé na, Lóngókóte a yéndi e ndyinga, etyétyeni, lóngókóte ayéndi e velika vya téyi ; e kamiyetyeni yo. Navwana ené nga viya evélivéli eviya e madiki, né e panyaka na e motema, na tegó enga bétyé iviya dya Mwa’moto. Navwana iboko dyéziépi dye yé ubimba, dyo te dye buséné mbela (a vinyóni).

Mba’pedi va nga bétyé etuniya a minya mé mara doli, dyoba dye ngandi vindaka, ngóndé e vagó taya ipanya dyadu, menanga me ngandi ekodyénétyé eviya e loba, na ngudi nya loba nye ngandi tyibénétyé. Nandi ndembo a Mwa’moto eva kudwanaka e loba ; nandi betungu bya zie be vé’yidyénétyé, na wa ngandi tóyókó Mwa’moto a vyaka e bevindi bya loba na ngudi na ivenda itubwé. Nandi a va viya lomaka bendyél byadu na dyoyi itubwé dya zieba, wa ngandi latétyé iwadu wa pónweni ta eviya masuku ma zie manayi ; eviya isutyi dya loba ivókó na e ivókwé.

Ndi ikwakani mokanakódi a ele a itóló ; Va bémbéné melabi myadu mendite mebóbó, né me mu kuduwétyé makayi, epuléndini na egombe a vyoyi e bakamandi. Nyanga mé te anu vanga tóyóku’nywé bema mé bi byéziépi pulétyéni na emundi baka e menbyó. Póni póni na vóyóndi né’nywé na, igona médyi dye va dola, ndi bema mébi byéziépi mba timaka. Loba na bie be ngandi dolaka, ndi ndaga nyamé ne va dola.

Ndi dyoba médyira na iwéra mé dyira be puléné na moto, nyawé, dyélé bendye ! beyé e heven, kabo na Lalé ipo. Ndi ené nga betye minya ma Noa, na tegó enga bétyé iviya dya Mwa’moto. Navwana nyanga e betye minya ma ebogo na tonda wa dyetyete, wa nyaka, wa bayaka, wa badyénétyé, kwanga na e dyoba dyiretye Noa e Ark. Wa be pulé kwanga va vetye tonda, na yo né ngaka wa waziépi ; nyanga mé te e nga bétyé iviya dya Mwa’moto. Wabaye wa ngandi bétyé ezityi ; umbókó a ngandi ngwétyé, na umbókó a likwé. Wado wabaye wa ngandi kókókó e Ilale ivókó, umbókó a ngandi ingwétyé, né umbókwé a likana.

Ndi pevakani navwana epuléni iwéra dye nga vyaka Mopandy’anu ; Ndi pulétyéni eni, gangwa mbadi a bétyé a pulétyé egombe e peva mwibi te a vetyendi ipeva, te abe’bóbó mbadadu na etubwetye. Ndi diyaka tegóni kotyiyeni, navwana iwéra dyeyinywé e pikiliyani, ndi dyenga vyaka Mwa’moto.

¿ Ra ndi ayé moseyi seyé na a ipulé, ayé mopandy’adu témiyeni molóndyi a mbadadu, itaya dyaya bedya e egombe adu ? Ibótó na moseyi mé mura, moyé va nga vyaka Mopandyi’adu né a kóbé mu a saka nyanga méra. Póni póni na vóyóndi né’nywé na, a ngandi pangaka mu molóndyi a bema byadu byéziépi. Ndi etóndyé moseyi mé ubeva mora, mo viya vóyókó na molema’adu na, Mopandy’amé a dingandi iviya dyadu. A mu yalétyé idoka dya waseyi na mu, na edya, na enya na beyónga ; Mopandyi a moseyi mé mura a ngandi vyaka e dyoba dye yé mu a lóngó egal’adu, na e iwéra dye yé mu apulé. Ndi a ngandi lenaka mu na e tétéyi, né a vélé ngaboadu na wasazini ; erago e ngandi bétyé duwe na ikaliyé dya magonga.

Ipanga dya hévén dye mandi kwanuwétyé na dyomu dya ngóni, nyi’ndyetye lambi laya wa va’kudwaka ilata na Mobayi. E ramba’ya ebetyendi na ngóni nyetanu nya bokeli, na nyetanu nya betiketike. Nye betye betiketike wé ndyetyendi lambi laya, ndi wabi’nga mavulé e ramba’ya. Ndi nya bokeli nyi’ndyetyendi mavulé e beva byaya nae lambi laya. Va betye mobayi a dinga na wa wazié na tityiyénétyé na wa na yadyénétyé. Elu’tema na mwamoko na’mwétyé, na, Lóngókóni, Mobayi aviyandi ; kuduwénétyéni ibongana dyadu. Na ngóni mé nyera nyéziépi né’muwénétyé, na kombiyénétyé lambi laya. Na nya betiketike na vóyókó na nga bokeli na, Vinyétyén’iwé e mavulé manu ; navwana lambi lago le dimandi. Ndi nya bokeli nye vóyetyendi na, Hanga na ; evwa ma nyókó ebé mba kokaka egal’ago na inywé ; ndi tómókó e tyéyéni e wa sambiyé, né e sambani egal’anu méni. Ndi ukili mo tyétye wa isamba, na mobayi na vyaka ; na wa betye kotyiyeni wa vé’raka na mu e iba ; na ikukale na dibwétyé. Kwé na ngóni nyevókwé tegó na va vyaka, wa mu ondaka na, Mopandyi, Mopandyi, dibwaké’wé. Ndi avwenetyendi na vóyókó na, Póni póni na vóyóndi né’nywé na ; na Pul’inywé.

Ndi pevakani, navwana e puléni dyoba na iwéna dye nga bétyé Mwa’moto a vyaka.

Navwana, ipanga dya heven dye yéndi ené moto a tyétyé e zie a abiyeneneni, ondetye waseyi wadu méni, ava bómbiyétyé wa iyumba dyadu. A va tayaka talent nyetanu e mboka umbókó, nyebaye emboka umbókwé, na emboka umbókwé evókó, moto moto gondyeneni na ngud’adu mba inyamiyé dya egombe, ava saka etyéndó adu.

Na a duwetye talent nyetanu a va etyé sambaka na nyo, a va kovaka na nyo talent nyevókwé nyetanu. Nyanga mé te a atawetye nyebaye, a va kovaka nyevókwé nyebaye. Ndi a duwetye evókó, a tyétyendi a va vwasaka e zie, a va botaka dólé a mopandy’adu.

Doleni egombe abé na mopandyi a waseyi mé wara na va vyaka, e dyinga dya tango na wa. Na a duwetye talent nyetanu na va vyaka, ava vyaka na talent nyevókwé nyetanu na, Mopandyi, e bómbiyetyendi ngwé talent nyetanu ; lóngókóte na kovandi nyevókwé nyetanu na nyo. Mopandy’adu a vóyetyendi na mu na, Esandi dódó, óvé moseyi seyé na asa ; eviyandi diya na ibandamiyé e bema betiki, na mandi pangaka’vé mopandyi a bema bebóló ; iraka e mbya a mopandy’avé. Naaduwetye talent nyebaye ava tegó vyaka na, mopandyi, ebómbiyetyendi ngwé talent nyebaye, lóngókóte na kovandi talent nyevokwé nyebaye na nyo. Na mopandy’adu na vóyókó na mu na, esandi dódó moseyi seyé na asa ; eviyandi diya na ibandamiyé e bema betiki, na mandi pangaka’vé mopandyi a bema bebóló ; iraka e mbya a Mopandy’avé.

Nandi a duwetye talent evókó a vetyendi na, Mopandyi na puletyete na eyéndi moto ubonga, e pumbwaka bebetye’vé mba mwasétyé, né eyolétyé be betye’vé mba kumétyé. Na nyóyetyendi, nava tyé’botaka talent avé e zie, lóngókóte, ingate avé méni. Na Mopandy’adu na’vwanaka na mu na, óvé moseyi ubeva na a elumé, óvé te puleni na na pumbwandi be betye ngwé mba mwasétyé, na yolétyé bebetye ngwé mba kumétyé ; Ndi elutyetyete evélé dol’amé e weluwini te na mate eduwa amé méni na nyeno e iviya dyamé. Nandi ingakani talent e mboka mu, né etayani yo e ayé na dyomu dya talent. Navwana mwéziépi a yé ndi a ma etawétyé né a mu na bebóló, ndi ayé mba bétyé a mandi ingwénétyé na beyé na mu. Vugakani moseyi a mbé’kova e iviti dy’abiyeneni, erago e ngandi bétyé duwe na ikaliyé dya magonga.

Va nga vyaka Mwa’moto e ivenda dyadu, na bendyel bya hole na mu, nandi ava viya diyaka e eka a ivenda dyadu. Betomba byéziépi be ngandi busénétyé e pwandya’du ; né a va paluwétyé wavókó e wavókwé, ené nga paluwé motat’a medómbé medombé myadu eviya e tomba. A ngandi témiyétyé medómbé e ebó adu a’bómwé, ndi tomba e a eméngu.

Nandi upolo ava vóyókó na wa ebó a’bómwé na, wa ibótó dya Lalé Vyakani dyigakani ipanga dye kengwety’inywé eviya idyanga dya zie. Navwana na betyendi na rayi, né’nywé na va tayakani ngwé bedya, Na betyendi na evézié, né’nywé na va nyidyétyéni ngwé ; na betyendi mwéndyi, nénywé na vé’riyétiyéni ngwé. Na betyendi uhamba né’nywé na dadyétyéni ngwé, Na datyetyendi né’nywé na va pevakani ngwé, na betyendi e meboka, né’nywé na vyakani e mboka ngwé. ¿ Nandi wa gondyeneni wa ngand’avwanaka mu na, Mopandyi, eve ndi va tóyéty’iwé’vé na rayi, né le dyidyé’vé ? ¿ dyélé evézié né le nyidyé’vé ? ¿ Le tóyetyendi’vé mwéndyi, né liriyé’vé eve ? ¿ Dyélé uhamba né le dadyé’vé ? ¿ Dyélé le tóyetyendi’vé e dakaka dyélé e meboka né le viya emboka’vé eve ? Ndi upolo a ngand’avwanaka na wa na, Póni póni na vóyóndi né’nywé na, te ené nga setyi’nywé yo e umbókó a wana mé wa iya watiki wa, e setyendini yo e mboka ngwé.

Ndi a ngandi vóyókó tegó na nga ebó a’méngu na, véndyémétyéni eviya mboka ngwé, inywé wayé lókweni e veya vya egombé’ziépi, ve kengwetye egala devil na bendyel byadu. Navwana na betyendi na rayi ndi ebe tayani ngwé bedya ; na betyendi na evézié ndi ebe nyidyéni ngwé. Na betyendi mwéndyi, ndi ebi’riyéni ngwé, uhamba ndi ebe dadyéni ngwé ; na edaka, na meboka ndi ebe pevani ngwé. Né wa ngategó avwanaka mu na, Mopandyi, eve ndi va tóyety’iwé’vé na rayi, na evézié, dyélé mwéndyi, na wa uhamba, dyélé edaka, na meboka, ndi iwé mba sanaka’vé ? Ndi a ngand’Avwanaka wa na, Póni póni na vóyóndi né’nywé na, te ené nga bety’inywé mba sakani yo e umbókó a wana mé wa iya watiki wa, ebe sani yo e mboka ngwé.

Ndi wa nana wa ngandi tyétyé e ivomuwé dya egombé’ziépi ; ndi wa gondyeneni e eménó a egombé’ziépi.

mi myéziépi, ava vóyókó na bikuwi byadu na, Ebetyendi va betye Jesus a ziya mepako mé. E puléndini na e minya mabaye doli eyéndi na isango dya inókó, Mwa’moto a bómbuwéndi egala ibandwé e Kros. Na Prist nya myolo waléndi na watodu wa wato na va laténétyé e móbé a prist e tubwé, a betye ondwétyé na Kaiafas. Na wa na gondyénétyé egala dyinga dya Jesus na mokóndó, né wóya mu. Na wa na gondyénétyé na, hanga e dyoba dya isango, evwa isoko dye nyókó diya wato etéyi.

Ndi va betye Jesus e Betani, e mbada Saimon a imba. Mwado a vetyendi e mboka mu na egala a Alabaster a mavulé ma sombo asa, a va tyibwaka yo e molo adu va betye mu diya e bedya. ¿ Ndi va tóyetye bikuwi byadu yo, wa numbetyendi na, igumbana mé dyi dye yéndi dyénde ? Navwana mavulé méma ma béte ma sambuwé isambo itubwé, né nye tawé mekuge. ¿ Va betye Jesus a bómbiyé yo, a vóyetyendi wa na, Esandini mwado ndyuke nénde ? Navwana a sandi ngwé ebolo asa. Navwana mekuge me yéndi né’nywé egombé’ziépi, ndi eva béni na ngwé egombé’ziépi. Navwana na era a tyibwandi mavulé mé ma sombo ma e nyolo amé, a sandi yo e madyamé mamé. Póni póni na vóyóndi né’nywé na, iboko ti’boko dye nga pakwétyé sango mé asa eni e zie éziépi, dyo tegó dyenga sebwétyé esa mwado ménó eni nana egalé’zimbuwé dyadu.

Na umbókó a dyomu na wabaye óndwé na Judas Iskariot, na va tyétyé e mboka prist nyetubwé. ¿ Ava vóyókó na wa na, E-mandi tayakani ngwé inde, né ngwé na bómbiyi’nywé mu ? Na wa na panganaka na mu na, mabo ma bepazi bya hika’puwa malalo. Eviya egombe méra ndi etóyetye mu iboko dya kóndókó mu.

¿ Nandi e dyoba dya bogo bogo dya isango dya pémbé a mba ilanda, na bikuwi na vyaka e mboka a Jesus, na wa na vóyókó na mu na, Eve ndi va tokavé na le kendyetye egal’avé e idya dya inókó ? Ava vóyókó na, tyétyéni e mboka moto nó’gugu, né evóyóni na mu na, Mukuwi a vóyóndi na, egombe amé e bakamandi ; na mandi tataka inókó e mbad’avé na bikuwi byamé.

Na bikuwi na saka ené nga sombetye Jesus wa ; na wa na kendyétyé inókó.

Nandi va betye ekolokolo e paba na mu na diyaka na dyomu na wabaye. Va betye wa wadyaka, a va vóyókó na, Póni póni na vóyóndi nénywé na, anu umbókó a mandi kóndókó ngwé. ¿ Wa betyendi na mambwangó mabóló na ngudi, wa mu yalétyé e vóyó mu moto moto na, Mopandyi ayéndi ngwé ? Na mu na timbwanaka wa na, A duba ebó adu na ngwé e epélé, mu ndi a ma hóndókó Ngwé. Mwa’moto a tyéyéndi ené nga yé yo mu léndweni ; ndi maguga na moto mé a ma ekóndókó Mwa’moto ; e betyendi enyévé egala moto mé mura na te abe edyawé. ¿ Na Judas a kóndetye mu, na va timbwanaka na, Lalé a yéndi ngwé ? Na mu nava vóyókó mu na, Evóyóndi na.

Ve betye wa wa dyaka, Na jesus na vé’ngaka pémbé, ava etuwaka yo iboto, ava bukaka yo, ava tayaka yo’mboka bikuwi byadu na, Ingakani, dyakani ; eni nana ndi nyoloamé. Na Mu na’vé ngaka imógi, ava tayaka akeva, a va tayaka dyo e mboka wa, na, Nyakani dyo inywé waziépi. Navwana ma nana ndi matyiya mamé ma panga a tyatya, ma sola egala wabóló egala dyiyidyé dya bebeva. Ndi na vóyóndi né nywé na, e tyatya’va na vagó’nya ebuma mé a ivé eni, kabo e dyoba mé dyera vanga nyaka ngwé yo a tyatya né’nywé e ipanga dya Lalé.

Va betye wa wémba vembo, wa va kuduwénétyé, na tyétyé e mokodi a Oliv.

Na Jesus na vóyókó na wa na, Inywéni waziépi e mandi kóbókóni egala’mé e elu méni, navwana eyéndi léndweni na, na mandi bómbókó motati a medómbé né medómbé mya mwanga me mandi varanaka. Ndi va ngago’tongwaka ngwé, na ngandi tyétyé ebogo né’nywé e Galili.

Na Pite na va’vwanaka na vóyókó na mu na, Dyélé waziépi wa kóbókó navé, ngwé nabe ngudi e kóbó. Na Jesus na vóyókó na mu na, Póni póni na vóyóndi na’vé na, elu méni ebogo na kuba e kókólókó e mandi gógókó ngwé ro nyelalo. Na Pite na vóyókó na mu na, Dyélé e diyate na na wandi na’vé na be ngudi egógó’vé, Nyanga mé te evóyetye bikuwi byéziépi.

Na Jesus na vyaka na wa e iboko dyondwétyé na Gethsemani, a va vóyókó na bikuwi na, Diyakani’nywé eva nana, ukili motyé kaliyaka ngwé ona.

Na mu né’ngaka Pite na wana wa zebedi wabaye, wa yaletyendi itóyó dya mambwangó mabóló na ivóhómó itubwé. Na mu na va vóyókó na wa na, Ilina dyamé dye yéndi na mambwangó mabóló, kwanga na iwedi ; vurétyéni eva, né emu pevakani na ngwé. Na mu nava, gwésétyé kwé, ava kwaka na mondongo adu, amu kaliyaka, na, O Lalé, etóndyé na eyéte e yolémétyé, imógi mé dyi dye doletye eviya e mboka ngwé ; ndi hanga nga toka ngwé, kabo nga toka’vé.

¿ Na mu na vyaka e mboka bikuwi, a va kóbétyé wa wa yadyénétyé, a va vóyókó na Pite na, El’inde, ebe ngudi pevani na ngwé iwéra ivókó ? Pevakani né emu kaliyakani, evwa enyókó irani e dyadywé, mbambayé ilina dye yéndi kotyiyeni, ndi megoni me yéndi vóó.

Ava tyétyégó ro a nyebaye, a mu kaliyaka na, O Lalé, etóndyé na imógi mé dyi dye va dola ngwé kabo na nya dyo, upango avé mo semetye. Na mu na vyaka ava kóbétyégo wa wa yadyénétyé ; navwana migó maya ma betyendi madila. Na mu na likata wa avagó tyétyé, ava kaliyaka ro a nyelalo, ivóyó dya ndaga mé nya nyevókó.

Na mu na vyaka e mboka bikuwi byadu, a va vóyókó na wa na, Yayakani nandi, emu ódyiyénétyéni, lóngókóteni, iwéra dye pabandi, na Mwa’moto a bómbwéndi e mabó ma wato wabeva. Imuwénétyéni, le tyétyeni ; lóngókóteni a bómbiyé ngwé a bakamandi.

Va betyete mu a ndite a kalaka, elóngómé nga Judas umbókó a dyomu na wabaye, a vyaka na ebumbu etubwé na mu, na mekwala mya mabótó na metumbe eviya e mboka prist nya myolo na watodu wa wato. Ndi a bómbiyetye mu a tayetyendi wa ndembo na, ama bétyé ngwé na pyópyókó, mu ndi mura ; sagakani mu. Na mu na gunganaka’viya vayé Jesus na, mbolo Lalé, a va pyópyókó mu. ¿ Na Jesus na vóyókó na mu na ; Mboy’amé, e viyandi saké’nde ? Na wa na vyaka, wa na bómbókó Jesus, wa na sagaka mu.

Lóngókóte umbókó a betye na Jesus a va gambiyétyé ebó adu, na idula, dya ukwal’adu ebótó, ava kokaka moseyi a prist etubwé, na lenaka iló dyadu. Na Jesus na vóyókó na mu na. Timbiyétyé ukwala’vé ébótó ropé e iboko dyadu ; navwana wé nga ukwalé’bótó wa ngandi nyamaka na ukwalé’bótó. Epikiliyandi na e tyatya’va na be na ngudi kaliya Lalé né a taya ngwé e botémétyé’va dyomu dya lidyon nya bendyel nyebaye ? ¿ Ndi maléndwé ma mandi timaka dya, na nga nana ndi eluka diya yo ?

¿ E iwéra mé dya ivókó dyera na Jesus na vóyókó na bebumbu na, eviyandini e dyinga dyamé na mekwala mya mabótó na metumbe ené mwibi ? na diyandi dyoba te dyoba né’kuwétyé e tempel né’nywé, ebe’bómbóni ngwé. Ndi éziépi eni esemetyendi, na evara ndi vama bétyé maléndwé ma mesótyi ma timaka. Na bikuwi biéziépi na likaka mu, wa va tiliyénétyé.

Ndi wa sazietye Jesus wa tyétyendi na mu e mboka Kaifas prist etubwé, va betye waléndi na watodu buseneni.

Ndi Pite a vitetyendi mu abiyeneni na e móbé a prist etubwé, a’vé’raka, ava diyaka na waseyi, egalé tóyó dya isutyi.

Prist nye tubwé na watodu, na nga esoka waziépi, wa totyetyendi tali nya evela egala Jesus e ibómbiyé dyadu e iwedi. Ndi wabe’duwa. E malityiyéné na tali nya bevela nyebaye nava vyaka. Na nyo na vóyókó na, Anó nana a vóyetyendi na, na yété na ngudi variyé tempel a Anyambé, né na longa yo na minya malalo.

¿ Na prist etubwé né’mwaka, a va vóyókó na mu na, A’vwana ima ? ¿ Inde ndi e pakwawa agal’avé ? Ndi Jesus a diyetyendi voo, Na prist etubwé na’vwanaka na vóyókó na mu na, Na kanandi na’vé na Anyambé a eménó, na sebwaké’wé ityé óvé ndi Kraest Mwa’Anyambé. Jesus a vóyetyendi na mu na, Ové ndi evóyó yo, ndi na vóyóndi né’nywé na, Eva doli e ngandi tóyókóni Mwa’moto diyeni ebó a ngudi, a vyaka e bevindi bya loba. Na prist etubwé na nyawaka ngóyi nyadu, na, Aviyandi lowa. ¿ Ra malé gó may’iwé na tali ? Lóngókóteni e tyatya’va okateni malowi madu. ¿ Epikiliyandini dya ? Wa va’vwanaka na vóyókó na A lukandi né’wedi.

Na wa na tuwaka mu matyéndyé e mondongo, wa mu dokaka mu, wavókwé wéngwaka mu mabaro. ¿ Wa vóyókó na, Sókók’uwé óvé Kraest Ra ndi a dokavé ?

Ndi Pite a diyetyendi ikudwinidi dya móbé ; na tyoli a mwado na vyaka e mboka mu na, Ové e betyetegó na Jesus a Galili. Ndi a gózietyendi e pwandya’ya a waziépi na, Na pu lé nga vóyó’vé. Va betye mu a kudwa na elémbé, nó’mbókwé na tóyókó mu, ava vóyókó na wa betye etéyi na, Anó nana a betye tegó na Jesus a Nazareth. Na mugó na gógókó na ikana na, Na pulé moto mé mura. Kwé na wa betye motémiyénéni baka, wava vóyókó na Pite na, Póni póni óvé eyé tegó umbókó aya, navwana mbóyi avé eleviyéndi. Na mu na yalétyé ilowa na ikana na, Na pulé moto mé mura, meba enya edinga kuba e kókólókó. Na Pite na zimbuwétyé ndaga a Jesus, e vóyetye mu na mu na, Ebogo na kuba e kókólókó e mandi gógókó ngwé ro nyelalo, Ava kudwaka eboka amu iy aka na ngudi.

myéziépi na watodu wa wato nava lataka Va betye yo momu mwako, prist nyetubwé esoka egala Jesus nyanga e mó’yaka wa mu. Va betye wa wa viya saga mu, wa va tyétyé na mu, wa va bómbiyétyé mu’mboka Pontius Pailat goveni.

Na Judas a kóndetye mu va tóyetye mu na a kobandi, é Iwemetyendi mu méni, ava vyaka na mabo ma bepazi bya hika’puwa malalo e mboka prist nyetubwé na watodu. ¿ Na nayéndi seni ebeva nga kóndetye ngwé matyiya ma mba bwakaka, na wa na vóyókó na mu na, Era eyéndi inde vay’iwé ? Era eyénd’avé. Na mu na tyibwaka bepazi bya hika puwa na e tempel, ava tyétyé, atyé patiyétyé nyolo adu.

Na prist nyetubwé néngaka bepazi bya hika’puwa, na wa na vóyókó na, ebe dódó na nye vélwétyé e igóyi dya dólé, navwana dyeyéndi isambo dya matyiya. Na wa na va saka esoka na wa na va sambaka na nyo ezityi a moméyi idyamé dya wandyi etéyi. Yo ndi ondwetye ezityi méra na ezityi a matyiya na e dyoba médyi.

Na e kalwetye na mosótyi Jeremaia na timaka na, na wa na vé’ngaka bepazi bya hika’puwa dyoyidi dya isambo dyadu, a betye wana wa Israel wa lenaka isambo. Na wa na tayaka nyo egala ezityi a moméyi ené nga leniyetye Mopandyi na ngwé.

¿ Na Jesus na témétyé e pwandya a Góveni ; na Góveni na vé’pwaka mu na, Ové ndi upolo a Jiu ? Na Jesus na vóyókó mu na, Ové ndi e vóyó yo. Va betye mu a bakwétyé na prist nyetubwé na watodu, a be timbwana ima. ¿ Na Pailat na vóyókó na mu na, oka bema mé bebóló be pakwa wa egala’vé bi nana ? Ndi a be timbwana mu dyélé ndaga’vókó ; na yo na pangaka goveni a mamanaka na ngudi’bóló.

Nandi e isango mé dyera góveni a betyendi a lalaka ikuduwé dya mbala evókó e mboka wato, a bémbéné wa na mala. Egombe méra wa betyendi na mbala evókó a kuma, ondwétyé na Barabas. ¿ Nandi va betye wa wa buséné ta, na Pailat na vóyókó na wa na, Ra nda tokénywé na, na gótety’inywé mu ? ¿ Barabas, ndi na Jesus óndwé na Kraest ? Navwana a puletyendi na wa bómbiyetyendi mu na ivina.

Va betye mu a diya e ididi dya yéké, na mwadadu na lomiyétyé mbando e mboka mu na, Ediyetye né’ma a saka na moto mé asa mura ; navwana na tóyóndi ndyuke a bema bebóló emunya e ndótó na tina’du.

Ndi prist etubwé na watodu wa sombetyendi ebumbu na, wa dyombetye Barabas né wa wóya Jesus. ¿ Na góveni na timbwanaka ava vóyókó na wa na, e wabaye a randa’toké’nywé na, na lityety’inywé ? Na wa navwanaka na vóyókó na Barabas. ¿ Na Pailat na vóyókó na wa na, nandi na mandi saka na Jesus óndwé na Kraest dya ? Na wa waziépi na vóyókó na mu na, A bandwetye e Kros. ¿ Na góveni na vóyókó na, na rémé, asandi ra’bévé ? Ndi wa miyenetyendi gó na Abandwetye e Kros.

Va tóyetye Pailat na a va yólé ima, e mesani edungu e kwetyendi, é ndyetyendi meba, ava sugaka mabó madu e pwandya a ebumbu na, na be n’ópako e matyiya ma moto mé asa anó, lóngókóni yo inywé méni. Na wato waziépi na’vwanaka na vóyókó na, Matyiya madu ma diyetye né’wé na wana wago. Na mu na likaka wa Barabas ; va betye mu Jesus dotyiyeni a va bómbiyétyé mu egala ibandwé e Kros.

Na sódyé nya góveni na vé’ngaka Jesus na e móbé a bwebwe, na ramba a sódyé éziépi na busénétyé e mboka mu. Na wa nava gótókó mu ngóyi nyadu, na wa na va dadyétyé mu ngóyi a ingóla. Va betye wa wa longa korowa a mayó, wa na vélétyé yo e molo adu, na motumbe ebó adu a’bómwé ; Na wa na vutaka mabóngó e pwandya’du, wa tyebaka mu na, Mbolo, Upolo a Jiu. Wa tuwaka mu matyéndyé, na wa né ngaka motumbe wa mu’ngwaka mu yo e molo. Va betye wa mu tyebeni pa, na wa na véndyiyétyé mu ngóyi, na wa na dadyétyé mu ngóyi nyadu méni, na wa na tyétyé na mu ibandwé e kros.

Va betye wa wa kudwa e bwebwe wa duwetyendi moto a Sairini dina na Saimon, mundi a betye wa wa pambaliyétyé ibapé dya kros adu. Va pabetye wa iboko dyondwé na Golgotha, dye vówé na, iboko dya mbombo. Wa va tayaka mu a nyaka vinigar buseneni na rondyi, va betye mu yo tyityeni, a be toka’nya yo.

Na wa na bandaka mu e kros, na wa na kabanaka ngóyi nyadu, wa saka kasé : egala itima dya ebetye e kalamaka na mesótyi na, wa kabenetyendi ngóyi nyamé wa méni na waméni ; wa gótókó kasé e ngóyi nyamé. Wa modidyénéni wa lóngókó mu erago.

Na wa na vélétyé e loba la molo adu iléndwé dya ebuty’adu, na, ANO NDI JESUS UPOLO A JIU.

Ebetyendi na mibi mebaye me bandwetye na mu, umbókó ebó a’bómwé umbókwé ebó a’méngu.

Wa betye wa dolaka baka wa lowetyendi mu, wa kóduwétyé myolo myaya. Na, óvé a variyé tempel né elonga yo na minya malalo, ondyiyétyé nyoloavé etóndyé na eyéndi Mwa’Anyambé, gumyaka eviya kros. ¿ Nyanga mé tegó e vóyetye prist nyetubwé na waléndi na watodu wa tyebaka mu na, Ondyiyetyendi wavókwé, abe na ngudo’ndyiyé nyolo adu méni ? etóndyé na eyéndi Upolo a Israel gumyaka eviya kros. A petiyetyendi Anyambé ; a véndyiyetye mu e tyatya’va etóndyé na a tóndéndi mu, navwana a vóyetyendi na ayéndi Mwa’Anyambé. Mibi me bandwetye na mu me timbiyetyetegó mu ndaga mé.

Nandi eviya iwéra dya motoba iviti dye diyetyendi e zie éziépi kwanga na e iwéra dya ebuwa na’vókó. ¿ Na e iwéra dya ebuwa na’vókó na Jesus na va’maka na dyoyi eloba na, ELOI, ELOI, lama sabakthani ? ¿ Era ndi na Anyambé amé, Anyambé amé, e sendyandi ngwé né’nde ? Wavókó wa betye vo motémiyénéni, vó’tyetye wa na, wa vóyetyendi na, moto ménó óndandi Ilaias. Mba’pedi na aya umbókó na vó’kwaka umbila, avé’ngaka nyóndó ava londiyétyé yo na vinigar, ava vélétyé yo na e mbute, ava tayaka mu anyaka yo. Wavókwé wa vóyetyendi na, Likaka, le télé tóyó ityé Ilaias a mandi viyó’ndyiyétyé mu.

Va betye Jesus a viyagó amaka na dyoyi e loba ava likaka ilina.

Na lóngókóte na epaga a tempel na va lenaka bepazi bebaye eviya e loba na e zie, na zie na va tyibénétyé, malale ma galaka. Marama ma dibwamaka ; na nyolo nya wato wasa wabóló wa betye wa yadyénétyé nyi’muwénétyé. Nye kudwanaka e marama itongwa doli, na wa na tyétyé e mboka a hole, wa tónetyendi na wabóló.

Va betye Senturion na wabetye na mu wa pevaka Jesus, wa tóyókó zie e tyibénétyé, na bema mé be semetye bera, wa nyóyetyendi na ngudi bóló, wa vóyetyendi na, Mbambayé anó a betyendi Mwa’Anyambé.

Wado wabóló wa betyendi’vo wa lóngókó abiyeneni wa vitetye Jesus eviya e Galili, isana dyadu. Wavókó wa betyendi Meri Magdalini na Meri mya nyangwé na Jemis na Joses, na nyangwé a wana wa Zebedi.

Va betye dyoba dyemu ekolokolo, na enami a momu a Arimathia na va vyaka, dina na Josef, mu abetye tegó ikuwi a Jesus. A tyétyendi e mboka Pailat ava dyombétyé nyolo a Jesus, na Pailat na sombétyé na, nyolo e tawetye. Va betye Josef énga nyolo a dindyetyendi yo na modamba évéla upuwa. A va nandyiyétyé yo e rama’du méni a tyatya e vwasetye mu e ilale, na mu na bindyilétyé ilale itubwé e umbyó a rama ; a va tyétyé. Erago e betyendi Meri Magdalini, na Meri mevókwé, modidyénéni e pwandya a rama.

E dyobé’vókwé dye vitetye dyoba dya ikendyé, na prist nyetubwé na Farisis na busénétyé e mboka Pailat. Na, Lalé, le zimbuwéndi nga vótye mwabini mémura ukili mobetye mu andite e migó na, minya malalo doli a ngégó’tongwaka. Ndi sombétyé na rama e lóngwetye kwanga dya minya malalo, evwa bikuwi byadu wa nyókó viya na’lu né wé’ba mu, né wa vóyó na wato na, A tongwandi eviya iwedi ; vókóna inyóngó dya malityiyéné dye mandi bétyé beva wa na dya bogo bogo. Na Pailat na vóyókó na wa na, eyéteni na wavuri, tyétyéni, va suliyetyeni yo ené nga pul’inywé. Na wa nava’tyétyé wa va suliyétyé rama, wa va’ngaka ilale na itémiyé dya wavuri.

E isutyi dya dyódyó, e mbaka-mbaka a dyoba dya wiki dya bogo bogo, na Meri Magdalini na Meri mevókwé na vyaka itóyó dya rama. Na lóngókóte, zie e tyibenetyendi na ngudi, navwana Endyél a Mopandyi e gumyetyendi eviya e heven, na yo na va viya bindyilétyégó ilale eviya umbyó, na yo na diyaka na e dyo. Mondongo adu ma betyendi ené evélivéli, na ngóyi nyadu epuwa ené Sno. Dyóngó dyadu ndi dye liziemetye na wavuri, wa va diyaka ené mebimba.

Na endyel na’vwanaka na vóyókó na wado na, Enyóyetyeni ; navwana na puléndi na e tokandini Jesus a bandwetye e kros. Abe’va nana ; navwana a tongwandi, ené nga vóyetye mu, vyakani va tóyetyeni iboko dye bé Mopandyi bya.

Ndi tyétyéni bovoliyétyé, né esebwani bikuwi byadu na, a tongwandi eviya iwedi ; ndi lóngókóteni, a tyéyéndi e bogo né’nywé e Galili ; erago ndi va ma tóyóku’nywé mu ; lóngókóteni, na sebwand’inywé.

Na wa na tyétyé bovoliyétyé eviya rama na dyóngó na mbya etubwé, na wa na vó’kwaka membila ipabiyé dya bikuwi byadu sango. Nandi va tyétye wa isebwa dya bikuwi byadu, lóngókóte na Jesus’nava’bonganaka na wa, ava vóyókó na, Mboloani, na wa na vyaka na kupénétyé mu e mako madu, wa mu ekaliyaka mu. Na Jesus na vóyókó na wa na, Ediyetyeni na dyóngó ; tyétyéni va sebwetyeni wana wa’ya na, wa tyétye e Galili erago ndi e ma tóyókó wa ngwé.

Ndi va betye wa wa tyétyé, lóngókóte na wa pevi wavókó na vyaka e mboka, wa va’pakwaka prist nyetubwé bema byéziépi be betye be samaka. Va betye wa wa buséné na watodu, na wa na lataka esoka, na wa na va tayaka sódyé dólé nyebóló. Wava evóyókó na wa na, Sebwakani na, Bikuwi byadu wa viyandi na elu, wa’ve baka mu va bi’wé le yadyénétyé. Etóndwé eni okana e maló ma Góveni, le mandi pangaka mu a kamiyétyé, né le sembe gu’nywé. Na wa na vé’ngaka dólé wa va saka ené nga levuwetye wa, ivóyidi médyi dye ndite dye pakwétyé e Jiu na e dyoba médyi.

Na dyomu na ikuwi evókó na tyétyé na e galili e mokodi mo levetye Jesus wa ; Va tóyetye wa mu, wa mu kaliyaka mu, ndi wavókó wa tyetyiyétyé.

Na Jesus na vyaka na kalaka na wa na, Ipanga dyéziépi dye yéndi ngwé taweni e heven na e zie. Ndi tyétyéni e mu’kuwétyéni Betomba byéziépi, e batiyétyéni wa na dina dya Gangwé, na dya Mwana, na dya Ilina dya sa ; Ikuwétyéni wa itata dya bema byéziépi beyé ngwé inywé sombeni ; lóngókóteni na yéndi né’nywé egombé’ziépi kwanga na isutyi dya zie. Amen.

Dyali dya sangwasa a Jesuscristo, Mwanyambé.

Ené nga yé yoléndweni e edyanganangobo a mosótyi Isaias na : Hilétyéte na lomandi motwamé a maloma ebogwavé, egala na a kombetye reyayé ebogwavé.

Dyoyi dya ama e ndyinga na : Kombakani reya a Mopandyi, témiyétyéni meziyo myadu de.

Juan’a batiyenetyendi e ndyinga, né mu apakwaka ibatuwé dya dyilwa dya melema dyiyidywé dya bebeva. Wato wa betébé bya Judea, na bya Jerusalem wa tyédyenetyendi e mboka mu, na mu nava batiyétyé wa e ediba a Jordan, wa mémétyé bebeva byaya.

Juan a betyendi a dayaka ibótó dya myódyó mya camello na utumba a ekoto tindyeni e eduwadu ; né mu adyaka mesébéni na boyi a zityi. Né mu a pakwaka na : Motumbókó a viyandi e pugamé, ayé na ngudi wa nangwé, ayé ngwé nabe oyeni na na balakaka ivurwa dya mekódi mya makogo madu. E pónipóni ngwé na batiyéndinywé na meba ; ndi mu angandi batiyétyinywé na Ilina Dyasa.

E minya mé mara, na Jesus nava vyaka eviya Nazaret a Galilea, na Juan nava batiyétyé mu e Jordan. Era doleni, itótómó dyadu eviya e meba, na mu nava tóyókó loba le dibwamaka bwe, na Ilina ené mbenga dye gumyaka ibatama e loba ladu. Na dyoyi nava vyaka eviya loba dye vókó na : Ové ndi mwamé a tóndé ngwé, a tóndiyé ngwé dódó.

Evara doleni na Ilina nava tyédyétyé mu e ndyinga. Na mu nava bétyé e ndyinga rago mabo ma minya manai adywétyé na Setani ; a betyendi erago na nyama nya malingwa, na bendyéli be dyandyaka mu.

Va betye Juan a vélwé e meboka, na Jesus nava vyaka e Galilea a pakwaka sangwasa a ipanga dya Anyambé, A vókó na : Egombe e timandi, na na ipanga dya Anyambé dye mundi vavuve ; ilwakani melema ninywé emu kamiyétyéni sangwasa.

Va betye mu a dolaka baka na etima a Galilea, na mu nava tóyókó Simon waza Andrés mwanyangwé wa vugaka elóba e manga, tinandi wabetyendi wagombwi. Na Jesus nava vókó na wa na : Vitétyéni ngwé, né ngwé na mandi pangakénywé e bétyéni wagombwi wa wato. Evara doleni, va betye wa wa lika belóba byaya, na wa nava vitétyé mu.

Va betye mu gwéseni ebogo kwé, na mu nava tóyókó Santiago mwa a Zebedeo na mwanyangwé Juan, wa tegó elende eteyi wa hóngókó belóba. Na mu tegó navóndaka wa ; na wa nava likaka gangwaya Zebedeo elende na wadyandyi, na wa nava vitétyé mu.

Na wa nava tyétyé e Capernaum ; e moba ma dyódyó éretyendi sinagoga né mu amu ikuwétyé. Na wa nava mamanaka dyikuwinidi dyadu, tinandi ékuwetyendi wa ené moto ayé népanga, mba bétyé ené waléndi.

Momumbókó a betyendi e sinagoga aya na ilina ibeva, na mu nava amaka. A vókó na : ! Ibé ! ¿ rémé ndi eyiwé navé, e Jesus a Nazaret ? ¿ Eviyandi idyiliyé dyago ? Na puléndi moto ayévé, moto a hole a Anyambé. Na Jesus nava bemétyé mu na : Vokaka voo, névé ekudwa eviya mboka mu. Va betye ilina ibeva mu suguweni na dyo dyamaka na ngudi na dyo nava kudwaka eviya emboka mu.

Na wa waziépi nava mamanaka né maminidi dye pandyetye wa wépwanaka waméni na waméni na : ¿ rémé ndini ? Rékuwinidi gó dya tyatya dyi, tinandi a sombendi kwanga malina mabeva na ngudi né mu mókaka mu. Na kumadu nava varanaka bovolaka etébé a Galilea éziépi.

Va kudwetye wa eviya e sinagoga, na wa nava tyétyé e mbada Simón na Andres, wazya Santiago na Juan. Motyiya Simon a mwado a betyendi bya na ivévu dya edaka, na wa nava gunganaka puliyé mu egaladu. Va pabetye mu, na mu nava bómbókó mu ebó, na mu nava témiyétyé mu, eviya iwéra mé dyera na ivévu nava ziyakamu, na mu nava ken dyétyé wa.

Egomba ekolokolo, va betye dyoba dye gumya, wa vetyendi mu na mwéziépi a betye a pongaka, na wa betye na dévili. Na mboka éziépi nava laténétyé ikukale. Na mu navóndyiyétyé wabóló wa betye na bedaka bya móngómóngó, na mu nava kuduwétyé dévili nyebóló ; né mu abe bóbó devili nye puletye mu nye kalaka.

Na mu nava pundaka na mwako mwako, dyoba te mbótaka eménywé, akudwetyendi na mu nava tyétyé iboko dya timbemeni, amu kaliyaka eró. Na Simon nava vitétyé mu, na wa betye na mu. Va betye wa wakóbé mu na wa nava vókó na mu na : Wato waziépi wa tokandivé. Na mu nava vókó na wa na : Okani e maboko mavókwé ma vavuve, egala na na pakwetye tegó erago ; navwana tina evetye ngwé ndira.

A pakwetyendi e sinagoga nyaya e Galiles éziépi, né mu a kuduwétyé dévili.

Na upondyi a imba umbókó nava vyaka e mboka mu, mo sósélétyé mu ; né yo ibóngó vuteni, mova vókó na mu na : Etóndyé e panga e yéte e panga ngwé na diyaka puweni. Na Jesus navókaka mu mambwangó, na mu nava gambiyétyé ebwadu, na mu nava kupénétyé mu. Va betye mu na kaleni, na imba nava ziyaka moto mé mura, na mu nava bétyé puweni. Na mu nava keleviyétyé mu, ava tyédyétyému va betye vara doleni. Ava vókó na mu na : Bandamiyétyé, e sebwetye ima tima e mboka moto te moto ; kabo te na, tyétyé, leviyétyévé meni e mboka sacerdote, névé etawé egala ipudywé dyavé bema be vótye Moises, ené tali e mboka wa. Va tyétye mu ava yalétyé isebwa bwe na bwe na isamaniyé dya sango méra, e va pangaka Jesus a yólegó dyira dya mboka e bwe na bwe, amu diyaka kabo a maboko ma ndyinga ; wato wa vidyenetyendi e mboka mu eviya maboko maziépi.

Na mu na vagó tyétyé e Capernaum va betye pati a minya doleni, na sango nava samanaka na a mundi e mbadi. E ro mé avókó na ebumbu nava yolénétyé, wa mbagó ikotyidi dyélé umbyó, na mu nava pakwaka wa ndaga.

Na wato wavókó na viaka mu na moto na edaka a nyolo molimbani bapweni na wato wanayi. Va betye wa mba yólétyé ibakama e mboka mu na tina a ebumbu, na wa nava bokwaka moduwa a iboko dye betye mu, va betye wa ipolo dibweni, na wa nava gumiyétyé ikondo dye betye upondyi a nyolo molimbani bya. Nandi Jesus na itóyó dya ikamiyé dyaya, na mu nava vókó na upondyi a nyolo molimbani na : Mwana bebeva byavé biyidywéndivé.

Né waléndi wavókó wabetyendi modidyénéni evara, na wa nava yalétyé ikala e melema myaya e téyi ; Wa vókó na : ¿ Rémé ndi e kala moto ménó nyanga méni ? A lóhóndi na Anyambé. ¿ Randi avé évidyétyé bebeva, véndyiyeni Anyambé mu méni ? Va betye Jesus a pulé e ilina dyadu nyanga e betye wa wa pikiliyaka e melema myaya e iwéra mé dyira, na mu nava vókó na wa na : ¿ Ra tiné ndi epikiliyénywé mambo mé ma e melema myanu ? ¿ Rémé ndi eyé ebóbó wa, ivó na upondyi a nyolo molimbani na : bebeva byavé biyidywéndivé, ndi na ivó dyadu na : Imwaka ingaka ikondo dyavé névé emu tamwaka ? Nandi egala na pulétyéni na Mwa moto a yéndi na ngudi e zie a dyiyidyé dya bebeva (ava vókó na upondyi a nyolo molimbani na) : Na vóndi vé na : imwaka, ingaka ikondo dyavé, névé e tyéyé e mbadavé. E iwéra mé dyévókó na mu navémwaka, ava ingaka ikondo dyadu, na mu nava tyétyé e migó ma wa waziépi, na yo nava pangaka wa waziépi wa mamanaka, wamu bendétyé Anyambé, wa vókó na : Le ga tóyókó dyi nana névókwé.

Na mu navagó tyétyé e manga, na ebumbu éziépi nava vitétyé mu, amu ikuwétyé wa,

Va betye mu adolaka, na mu nava tóyókó Levi, mwa Alfeo, diya ididi dya wéndyi duti, na mu nava vókó na mu na. Vitétyé ngwé. Na mu navémwaka ava vitétyé mu.

Nandi va betye Jesus a dyaka e mbadadu, wéndyi duti wabóló na waseyi ebeva wa betyetegó e tagulu na Jesus na bikuwi byadu ; tinandi wabetyendi wabó ló, né wa wavitétyétego mu. Va tótye waiéndi na Fariseos wa tókó mu a dyaka na wéndyi duti na waseyi bebeva, na wa nava vókó na bikuwi byadu na : ¿ Rémé ndini, a mu a dyaka né mu anyaka na wéndyi duti na waseyi bebeva ? Nandi Jesus na dyoka dya yo, na mu na vókó na wa na : Wayé mepesa wabe na mala ma nganga, ndi kabo wa datyiyéné. Nabe viye e dyonda dya wayé gondyeneni, ndi kabo waseyi ebeva.

Nandi bikuwi bya Juan na bya Fariseo be betyendi be hindinaka rai ; na wa nava vyaka na wa népwaka mu na : ¿ Na ra tiné ndi e hindina bikuwi bya Juan na bya Fariseo, ndi ibyavé mba hindinaka ? ¿ Na Jesus nava vókó na wa na : wato wayé iba wayéndi ngudi hindina rai ulingo moyé mobayi na wa ? Ukili moyé mobayi na wa wabe ngudi hindina, N-di minya ma viyandi, vanga bétyé mobayi mo vénguwé wa, evara vókóna wa hindinandi e minya mé mara. Abe na moto a hóngó ebóbó a edadi na epusi a modamba a tyatya ; tinandi epusi mé a tyatya era e mandi dulaka ebóbó a edadi né ipóndi dyita gó wa na wa. Né tegó moto a vélé ivé dya tyatya e beva bya vyo ; tinandi ivé dya tyatya dye mandi gandiyétyé beva né ivé dye tyibwama, né beva be tyenama ; ndi ivé dya tyatya dye vélwéndi e beva bya tyatya.

E dyoba dya dyódyó na mu nava dolaka na dya bekanga bya mbasi, na bikuwi byadu nava yalétyé ibuka dya mbasi. Na Fariseos na vókó na mu na : Ta lóngó, ¿ Ra tiné ndi esa wa ima eyé mba lukaka sama e dyoba dya dyó-dyó ? Na mu na vókó na wa na : ¿ Ebeni landyeni nyanga e setye David va betye mu dyeleni né mu ókaka rayi, mu na wabetye na mu : Nyangéretyemu e mbad’Anyambé egombe méra Abiatar mu sacerdote a molo, na mu nava dyaka pémbé a ilevuwé ebetye mba bétyé lutyeni nédyowé kabo na bolo sacerdote ipó, na mu tegó nava tayaka wabetye na mu ? A vótye tegó na wa na : Dyoba dya dyódyó dye sowetyendi egala moto, ndi anga moto egala dyoba dya dyódyó. Na tina méra ndi eyé mwa moto mopandyi a dyoba dya dyódyó.

Na mu na vagó iraka e sinagógi ; né momumbókó a betyendivo a betye na ebó molimbani. Na wa nava bémbétyé mu itó na a mandi ondyiyétyé mu e dyoba dya dyódyó egala isembé dyadu. Na mu na vókó na momu né abetye ebó molimbani na ; Témétyé e tétéyi. Na mu nava vókó na wa na : ¿ E yéte lutyeni nésa dya enyévé e dyoba dya dyódyó, ndi na isa dya ebeva ? ¿ Dyondyiyé dya eménó ndina dyoya ? Na wa nava votyiyénétyé. Na mu nava lóngókó wa nélingwa, ókaka mambwangó na tina a pógu a melema myaya, na mu nava vókó na momu mé mura na : Nyónyiyétyé ebwavé. Na mu nava nyónyiyétyé yo, na ebwadu nava timbaka upesa.

Va kuduwenetye Fariseos, na wa nava lataka esoka na Herodianos egala dyoya dyadu.

Ndi Jesus atyétyendi na bikuwi byadu e manga, na ebumbu etubwé nava vitétyé mu eviyai e Galilea na Judea. Na eviya e Jerusalem no Idumea, na mudumbókwé a Jordan. Na wa tétéyi nya Tiro na Sidon ebumbu etubwé e vetyendi e mboka mu, na dyoka dya bema be mamwéné be setye mu.

Na mu nava vókó na bikuwi byadu na wa diyetye mu mwa elende kendyeni evwa ebumbu e nyókó dibiyé mu. Tinandi óndyiyetyendi wato wabólómé, tina méra ndi e betye tango éziépi ebetye na bedaka wa pinyiliyénétyé e mala ma ikupéné dyadu. Né malina mabeva nétóyó dyadu, na mu nava kodyénétyé e pwandyadu, mamiyénétyé na : Ové ndi Mwanyambé. Ndi a levetyendi mu na ngudi egala na ma nyókó panga mu a pulénétyé.

Na mu nava betaka e mokodi, na mu navóndaka tango e betyemu a tokaka ; na wa nava tyétyé vabetye mu. Na mu nava pónókó dyomu na wabaye, egala na wa diyetye na mu, na egala iloma dyaya ipakwa, Né wa wa duwama na ngudi a dyondyiyé dya bedaka na ivéndyiyé dya dévili.

Simón abetye mu a vandyétyéna Pedro ; Santiago amwa Zebedeo, na Juan mwanyangwé na Santiago, wa vandyetye mu na Boanerges, dye minaka na, Wana wa nyémbé. Na Andrés, na Felipe, na Bartolomé, na Mateo, na Tomas, na Santiago a mwa Alfeo, na Tadeo na Simón a Canan. Na Judas Iscariote, a kóndetye mu, na wa nava tyétyé e mbadi.

Na ebumbu navagó yolénétyé ropé, iyolinidi dye betye wa mbagó idyedi. Ve betye iwadu okamé na, na wa nata tyétyé idyusé dyadu, tinandi wa vótyendi na : A guswandi.

Na waléndi wa vetye eviya Jerusalem nava vókó na a yéndi na Belzebub, tegó na na avéndyiyéndi dévili na nguda mwópolo a dévili. Né va betye mu ónda wa, na mu nava kalaka na wa na mekanakódi na : ¿ Setani alé a yolétyé ivéndyiyé dya Setani dya ? Etóndyé ipanga négugu dyo méni dye kabana, ipanga mé dyira dyebe ngudi lilimiyé. Etóndyé mbadi nagugu yo méni e kabana, mbadi méra ebe ngudi lilimiyé. Ndi etóndyé Setani a témiyénéndyé na mu méni, né mu a kabana na mu méni, abe ngudi lilimiyé. Abe na moto ayé a yolétyé dyira e mbada motubonga, né mu a kiné mu ngumbadu, mu mbótaka saga moto mé ubonga mura saziéni, nandi ava viya kinétyé ngumbadu.

E pónipóni na vóndi nénywé na, bebeva byéziépi bengandi iyidywétyé wana wa wato, na nyanga te nyanga éziépi eyé wa wa lóhókó na Anyambé. Ndi moto te moto ayé a lóhókó na Ilina Dyasa abe na iyidywé ndi ayéndi e mazizi ma yéké a egombe éziépi. Tinandi wa vótyendi na : A yéndi na ilina ibeva.

Evara doleni, na wana nyangwé na nyangwé tegó nava vidyénétyé, né wa e bwebwe motémiyénéni, wava lomaka e dyonda dyadu. Ebumbu e betyendi modidyénéni iluweneni mu sóta, na wa nava vókó na mu na : Nyungwé na wana nyungwé wa tokandivé eboka. Na mu nava timbwanaka na wa na : ¿ Ra ndi iya, né wana lalé ndi wara ? Na mu nava lóngókó wa betye modidyénéni iluweneni na mu sóta, ava vókó na : Hilétyéni, iya na wanaya, Tinandi mwéziépi ama saka upango a Anyambé, mundi mwaya, na iluku dyamé na iya.

Na mu nava yalétyé dyikuwé ropé baka na manga, na ebumbu etubwé nava yolénétyé e mboka mu, ebólidi e pandyetye mu a vélémétyé elende na mu nava diyaka e manga, ebumbu éziépi e betyendi e mosaka e zie.

Na mu nékuwétyé wa bema bebóló na dya mekanakódi, a vótyendi na wa e dyikuwinidi dyadu na : Votyiyétyéni : Moliyi mo tyétyendi iliya dyébóngó. Nandi va betye mu aliyaka, na pati evókó nava kwaka e pépégu a reya, na linyóni la loba nava minaka dyo. Na pati evókwé nava kwaka e bani, iboko dye betye mba tyélé nyebóló, na dyo navate kudwaka, na tina e betye dyo e iboko dya mba edóku a tyélé ; Va kudwetye dyoba, na dyo nava bómbólónókó na tina a dyo mba bétyé na metamba na dyo nava visaka. Nevókó nava kwaka e mekanda, va betye mekanda etombwamé na myo nava limbiyétyé dyo, dyeva bétyé mba lóngókó bebuma. Névókó nava kwaka e zie asa, na dyo nava lóngókó bebuma bebóló, dyemu tombwaka, dyemu bólókó, dyemu lóngóko bebumba bebóló, ivókó mabo malalo, ivókwé mabo motoba, ivókwé kama. Na mu nava vókó na wa na : Ayé na maló ma dyoka ótyetye.

Va betye mu a likana uméni ipó, na wato wabetye na mu, na wa ramba a dyomu na wabaye, na wa navé pwaka mu egala mokanakódi me mura. Na mu na vókó na wa na : Inywé ndi eyéni taweni ipulé dya magóyi ma ipanga dya Anyambé, ndi wayé eboka, bema byéziépi na dya mekanakódi. Egala na itóyó te dyeyé wa wa tóyókó ndi wapulé ; dyoka te dyeyé wa wókaka ndi wa mba bómbiyétyé evwa wa nyókulwa ne wa wéyidywé bebeva. Na mu na vókó na wa na : ¿ Epuléni mokanakódi mé mu ? ¿ Nandi e mandi pulétyéni mekanakódi miéziépi dya ? Moliyi ndi a liya ndaga. Wa nana ndi nga pépégu a reya, wabé ndaga liweni e wa téyi ; ndi vabé wa yo otyeni a viyandi né mu énga ndaga nye liwetye e melema myaya. Yo nyanga mé a vókó ndi a wayé liweni e hani ; wa ndi wabé ndaga otyeni né wa wa gungana yo dyinga na mbya. Né wa mba bétyé na metamba e wameni, wa ma bétyé wato wa egombe, wabé vabé betuniya na evita epabamé egala ndaga vokona wa kóbóndi. Né wa nana ndi wayé liweni e mekanda ; wóka ndaga ; Nandi matoka ma eménó méni, na mókóndó a ngumba na matóngina mayé e bema bevókwé, vé ra byo, be lótyiyéndi ndaga né yo emu mba lóngókó bebuma. Né wa nana ndi wa liwetye e zie asa ; wabé wóka ndaga, né wa wénga yo, né wa wamu lóngókó bebuma, umbókó mabo malalo, umbókwé mabo motoba, numbókwé kama.

Ava tegó vókó na wa na : ¿ Vitwa ve viwénéndi egala ivélwé ibumuku dya kwe, ndi na ibumuku dyékondo tetó ? ¿ Anga egala itémuwé e ima egutyé vitwa ? Tinandi ebe néma eyé botemeni ema bétyé mba kudwanaka e bwebwe dyélé esoka eyé ebétyé mba salamaka. Mwéziépi ayé na maló egala dyoka ótyetye.

Na mu navókógó na wa na : Bandamiyétyéni egala nyanga okénywé ; tinandi eyéyi adyéné ninywé yo tegó ema bétyé wato wavókwé wadyétyé nénywé né wa wa badé wa e mbokénywé okani. Tinandi ayé na bema, angandi tawétyé ; né ayé puweneni a ngandi ingwénétyé dyélé yo ima mé eyé na mu.

Na mu navagó vókó na : nyanga méra ndi eyé ipanga dya Anyambé, bwésé ené moto a mwasé ibóngó e e zie. Né mu ayayaka, émwaka elu na emanda, né ibóngó dye kudwaka né dyo dye tombwaka nyanga eyé mu apulé. Tinandi zie yo méni te e kuduwé bebuma, ebogo ndi motondo, baka ndi molo, kwé nandi migó ma londa e molo. Nandi va béné ebuma eviyódó, vókóna a véléndi ukwala mo lenwéné mabóngó, tinandi egombe a iyolé dya behuma e pabandi.

Na mu na vókó na : ¿ Le mandi kwaniyétyé ipanga dya Anyambé na rémé ? ¿ Dyélé tetó na, na ra mokanakódi ndi moyiwé ladyétyé na yo ? Dye yéndi ené motonga a ebuma a mostaza e bé va liwé yo e zie, eyéndi etekama wa na bebuma biéziépi beyé e zie. Nandi vabé yo liweni, e tombwandi, né yo emu ita wa na bele bevókwé betiki, né yo emu kuduwétyé melabe metubwé, né yo epanga linyóni la loba le yólétyé ediya e kólwadu.

Na mekanakódi mebóló mya dyóngó mé dyi ndi me kaletye mu wa ndaga, gondyeneni na nyanga e betye wa wa yólétyé dyoka. Né abe kala na wa kabo póni na mekanakódi ; ndi egombe a ipó a pakwetyendi móyidi ma miéziépi e mboka bikuwi byadu.

Na mu nava vókó na wa ekolokolo a dyoba mé dyira na : Le dyabwetyeni e mudumbókwé. Va betye mu ebumbu lityiyeni, na wa navéngaka mu, póni ené nga betye mu e elende ; belende bevókwé be betyetegó na mu evara.

Na bokudi utubwé a upupé nava vungaka, mopangaka metyeba me vélémétyé elende, ivélimidi dye pandyetye elende e yalétye ediyama. Né mu a betyendi e tina bya e loba la eponduma, na wa nava imuwétyé mu, wava vókó na mu na : ¿ Mukuwi, ebe nésóló dyana le dyiliyanandi ? Vémwetye mu, na mu nava bemétyé upupé, ava vókó na manga na : Kómbókó, ótókó. Na upupe nava waka, na udémbé utubwé nava waka. Na mu nava vókó na wa na : ¿ Rémé ndi epangénywé e nyódyénétyéni nga ? ¿ Rémé ndi eyinywé mba bétyéni na ikamiyé ? Na wa nava nyókó nényóyidi, wamu vókó waméni na waméni na : ¿ Anónana lé ra, ayé dyélé upupé na manga byo kakamu ?

Na wa nava pabaka e mudumbókwé a manga e etébe Gadara. Va betye mu a tótómó elende, na momumbókó nava viya lataka na mu, a vyaka eviya marama, a betyendi na ilina ibeva. A betyendi bodidi e marama, mba bétyé na moto a yóletye mu isaga, dyélé na mehinganakano. Tinandi ro nyebóló a betyendi a pandwétyé meboka tegó na mehinganakano, ndi a patetyendi mehinganakano, né mu óyetyendi meboka ; abebé na moto a yóletye lumbiyé mu. Né egombe éziépi, elu na emanda, atyé tyamaka e mekodi na marama, né mu akwélétyé nyolwadu na malale. Nandi va tóyetye mu Jesus na maséyi, na mu nava okwakumbila, na mu nava bendétyému. Na mu navamaka na ngudi, na : ¿ Remé ndi eyéyé na ngwé, Jesus, Mwanyambé eyé e bolo loba ? Na kanandivé na Anyambé na e tódyetye ngwé ndyuke. Tinandi avótyendi na mu na : véndyémétyé eviya mboka momu nénó, óvé ilina ibeva-e. Na mu navépwaka mu na : ¿ Dina dyavé ndi ra ? na mu nava timbwanaka mu na : Dina dyamé ndi Legion ; tinandi leyéndi wabóló. Na mu nava sósélétyé mu na ngudi na akuduwetye mu eviya etébé méra.

Né dyanga dya ngoya itubwé dye betyendi evara e baka na mokodi dye dyaka. Na malina mabeva maziépi nava, sósélétyé mu na : Lomakéwé e mboka ngoya egala na liretye e nyo. Na Jesus nava bóbókó yo. E ikudwa dya malina mé mabeva mara, na mu néraka e ngoya, na dyanga dya ngoya na gumyaka membila e mbelenge e manga ; nyebetyendi ené tódyeni nyebaye ; na nyo nava lótyiyénétyé.

Na watati ngoya nava tiliyénétyé, na wa nava puliyétyé nga mboka na nga ezityi. Na wa nava tyédyénétyé itóyó dya ima mé e semetye era. Na wa nava pabaka emboka Jesus, na wa nava tóyókó moto mé abetye ilina ibeva dye pariyétyé, a betye na Legion, diya né mu dayeni bedadi né mu amu molo dódó ; na wa nava nyódyénétyé. Wa betye wa tóyókó nyanga e doletye, wa sebwetyendi wa nyanga betye e samaka na a betye na ilina ibeva na egala ngoya tegó. Na wa nava yalétyé isósélé dyadu na a kudwetye e betébé byaya.

Va betye mu amu elende, na a betye a paruwétyé na ilina ibeva nava sósélétyé mu na a diyetye na mu. Ndi Jesus abe bóbó mu, ndi avótyendi na mu na, Tyétyé e mbadavé, etókwavé, névé emu sebwaka wa bema betubwé beyé Anyambé seni navé na nyanga eyé mu otyenivé Mambwangó. Na mu nava tyétyé, amu yalétyé isamaniyé dya sango e Decapolis a bema betubwé be setye Jesus a saka na mu, na waziépi nava mamanaka.

Va dyabwetye Jesus e mudumbókwé na dya elende, ebumbu etubwé e yolenetyendi e mboka mu ; né a betyendi baka na manga. Na enami evókó a Sinagoga, dina na Jairo, nava vyaka, vabetye mu atóyó mu ; na mu nava kwada e mako madu. A sóseletyendi mu na ngudi, na : mwamé a mwado andi bowaka, vyaka névé e batiyé mu mabó mavé egala na óndyetye, né mu adiya eménó. Na mu nava tyétyé na mu, na ramba boló nava vitétyé mu, né wa wamu pambaliyétyé mu.

Na mwadumbókó abetye na edaka e matyiya ukili a dyomu na mepuma mebaye. A betye hindineni ndyuke ebóló eviya mboka meganga mebóló né mu a betyendi a ziya ngumbadu éziépi nényamiyé dya mba kovaka ima tima, ndi edaka e betyendi mu kabo bologwakagó wa. Va betye mu óka egala Jesus na mu na vyaka dya puga e tétéyi a ebumbu na mu nava kupénétyé ibótó dyadu. Tinandi avótyendi na : pagate na kupénéndyé ibótó dyadu vókóna nóngandi. Iwéra mé dyévókó na tongo mé a matyiya ra nava asaka mu ; na mu nava pulétyé e nyolo téyi na óngandi eviya edaka méra.

Ukili mé ómbókó, va betye Jesus puleni e uméni na ngudi e kudwandi eviya mboka mu, na mu nava ilwamaka e mboka ebumbu, ava vókó na : ¿ Randi a kupéné bedadi byamé ? Na bikuwi byadu nava vókó na mu na, óvé etókóte nga pinyiliyéné ebumbuvé, né emugó vókó na ; ¿ Randi a kupéné ngwé ? Na mu nava lóngókó iluweneni sóta, egala itóyó dya moto abé asaka ima méra. Na mwdo mé mura na dyóngó né mu aligamaka, na ipulé dya ima esemetye emboka mu, na mu nava viya kwaka e pwandyadu, na mu nava sebwaka mu pónipóni éziépi. Na mu nava vókó na mu na : Mwa mwado, ikamiyé dyavé dyondyiyéndivé, tyétyé na dyonga, névé emu diyaka ondyeni eviya edakavé.

Mu mba tete ziya ekala, na nga mbada enami a sinagoga nava vidyénétyé, wava vókó na : Mwavé a mwado a wandi : ¿ Na ra malégó ma pariyévé mukuwi ? Va betye Jesus óka ebutye mé e sebwemetyera, na mu nava vókó na enami a sinagoga na : Enyótye, kamiyétyé pa. Abe bóbó moto te moto a vitétyé mu kabo Pedro, na Santiago na Juan mwanyangwé na Santiago.

Na mu nava pabaka e mbada enami a sinagoga, na mu nava tóyókó ngwangwalani e betye, wéyidyénétyé na wa tatiyénétyé na ngudi. E dyira dyadu na mu nava vókó na wa na : ¿ Rémé ndi esinywé isoko ninywé iyidyénétyéni ? Mwa mwado abe weni, a yayandi. Na wa nava tyebaka mu botyebaka, ndi va betye mu wa waziépi kuduweni, na mu navéngaka gangwé na nyangwa mwana, na wabetye wa diyaka na mu, avéraka va betye mwa mwado. Na mu nava bómbókó mwa mwado ebó, na mu nava vókó mu na : Talitha cumi : etóndyé eviya iluwétyé e minaka na : Mwa mwado na vóndi navé na, imwaka. Iwéra mé dyévókó na mwané a mwado mura némwaka, amu tamwaka ; tinandi a betyendi igona dya dyomu na mepuma mebaye. Na wa nava mamanaka némaminidi. Na mu nava vókó na wa na wa pandyetye yo e pulénétyé na moto te moto, na mu nava vókó na wa na wa tayetye mu ima edyowé.

Na mu nava véndyémétyé evara, ava pabaka ezityadu, na bikuwi byadu nava vitétyé mu, Va betye dyoba dya dyókó dye paba, na mu nava yalétyé dyikuwé e sinagoga, na wabóló wa votyiyetye mu nava mamanaka, wa vókó na : ¿ Eve ndi eviya moto ménó na mambo mé ma ? ¿ Ra dyóngwé dyépulé ndi dyeyé mu taweni dyi, dyóngó mé dyabema be mamwéné be sama e mabó madu bi ? ¿ Abe tyapendi mé anó, mwa Maria, mwa nyangwé na Santiago, na Jose, na Judas, na Simon ? ¿ Maluku madu mabete néwé eva ? Na mu nava bétyé wa ekóbilakwé.

Na Jesus nava vókó na wa na : Mosótyi a pédywégó wa ené ezityadu, na e tétéyi a madyawé madu na mbadadu. Abe yólé esa ima tima e mamwéné evara ; kabo pati tiki a mepondyi ndi ondyiyetye mu na bobatiyétyé wa mabó.

Nandi va tóyetye mu Jesus na maséyi, na mu nava okwahumbila, na mu nava bendétyé mu.

Na mu navóndaka wa ramba a dyomu na wabaye, a va yalétyé iloma dyaya ramba a wabaye wabaye ; na mu nava tayaka wa ngudi a ipanga dya malina mabeva. Na mu nava vókó na wa na wendyetye ima tima a etyéndo, kabo motumbe pa, anga elandi a kola, dyélé pémbé, dyélé dólé e belandi byaya. Ndi kabo na wa dayetye makogo e mako, né wa mba dayaka ngóyi nyebaye. Na mu na vókó na wa na : Iboko tiboko dyeyinywé irakani e mbadi nagugu, diyakani e yo kwanga vayinywé a kudwakani eviya téyi. Na mwéziépi ama bétyé mba séndyélétyinywé né mu mba votyiyétyinywé, Vayinywé e kudwakani eviya vara, pupwakani ubulu eviya mabó manu egala tali e mboka wa. E pónipóni na vóndi nénywé na e ngandi bétyé ebóbó e dyoba dya yéké egala nga Sodoma na Gomorra wa na nga mboka méra.

Na wa nava tyédyénétyé, wamu pakwaka na wato welwetye melema. Na wa nava kuduwétyé dévili nyebóló, né wa wa pindwaka mepondyi mavulé, né wa wóndyiyénétyé.

Na upolo Herodes navókaka egala kuma a Jesus, tinandi dina dyadu dyebetyendi dye samana ; na mu nava vókó na : Juan mé e betye e batiyénétyé, a tongwandi eviya mewewe, na tina méra ndi e sama mambo mé ma ngudi ma e mboka mu. Wavókó wa vótyendi na : Andi Elias. Na wavókwé wa vótyendi na : Andi mosótyi, dyélé mosótyi umbókó a ebumbu a mesótyi. Ndi vótyetye Herodes yo, a vótyendi na : Juan mé ebetye ngwé na lenaka ibólu ndi mura ; a tongwandi eviya mewewe.

Tinandi mu méni ndi alometye wato egala idyuse dya Juan, na mu nava pandétyé mu e mbada meboka na tina a Herodias, mwada mwanyangwé Felipe ; tinandi a betyendi a baya mu. Tinandi Juan a votyendi na Herodes na Ebe gondyeneni navé ingaka mwada mwanyungwé. Ndi Herodias a bóndyetyendi mu, né mu a tokaka dyoya dyadu, ndi abe yólé. Tinandi Herodes a nyótyendi Juan, népulé dyana a betyendi momwa gondyeneni na hole, né mu a diliyetyendi mu ; vótyetye mu okaka mu, a setyendi bema bebóló, né mu a votyiyétyé mu na mbya.

Va betye dyobévókó dya lutyeni dye paba dye betye Herodes, e isango dya idyawé dyadu, a sidyétyé bedya bya ekolokolo egala wapandyi wadu, na ngówé nyetubwé na wato watubwé wa Galilea ; Né vabetye mwa Herodias a mwado éra né mu amu dyokaka na yo nava hwémiyétyé Herodes na waziépi wa betye na mu e tagulu na upolo na vókó na mwamé a mwado mura na : Dyombétyé ngwé ima tima ema tokakavé, né ngwé na mandi taka vé yo. Na mu nava kanaka na mu na : Eziépi ema dyombétyévé ngwé na mandi takavé yo, dyéléte epazi a ipanga dyamé. Va kudwetye mu, na mu nava sebwaka nyangué na : ¿ Remé ndi ema dyombétyé ngwé ? Na mu nava vókó na mu na : Molo a Juan Bautista. Na mu nava gunganaka dyira e mbokópolo, na mu nava dyombétyé, na : Na tokandivé e taka ngwé molo a Juan Bautista e tyatyava epélé. Na upolo nava tókó ndyuke ebóló na ngudi, ndi na tina a ikana na wabetye na mu e tagulu, a be toka puliyé dyo. Iwéra mé dyévókó na upolo nava lomaka sódyévókó a ramba sódyé na molwadu mo viwenetye. Na mu nava tyétyé, ava lenaka mu ibólu e mbada meboka, na mu nava viaka na molwadu, epélé, na mu nava tayaka yo e mboka mwamé a mwado mura, na mwamé a mwado mura nava tayaka yo emboka nyangwé. Vótyetye bikuwi byadu yo, na wa na viaka e dyinga dya nyolwadu, na wa nava dyamétyé yo.

Na wa ramba a metodu nava yolénétyé ta e mboka Jesus, na wa nava sebwaka mu bema biéziépi be setye wa na bikuwetye wa. Na mu nava vókó na wa na : Vyakani e pépégu e iboko dya ndyinga, ké emu ódyókóni kwé, tinandi wa betye wa vidyénétyé na wa tyédyénétyé wa betyendi wabóló, wabebé na egombe dyélé a dyaka. Na wa nava tyétyé na dya elende iboko dya palwemeni.

Na wato wabóló nava tóyókó wa watyétyé, na wa nava vekaka wa, na wa nava tyédyénétyé membila na dya zie eviya mamboka maziépi na rago, na wa nava pabaka ebogo na wa, na wa nava yolénétyé e mboka mu.

Va dyabwetye Jesus na mu nava tóyókó ebumbu etubwé, na mu navókaka wa mambwangó, tinandi wa betyendi ené medómbé meyé mba motati ; na mu nava yalétyé dyikuwé dyaya bema bebóló.

Va betye dyoba dyemu tyétyé, na bikuwi byadu nava viaka e mboka mu, na wa na vókó na iboko mé dyi dye yéndi ndyinga na dyoba dye mundi tyéyeni. Tyédyétyé wa egala na wa tyétyé e mamboka né wa sambiyéné pémbé, tinandi wabe néma dyaka. Na mu nava timbwanaka, ava vókó nawa na : Inywé takani wa bedya. Na wa nava vókó na mu na : ¿ Letyétye sambaka pémbé nyeyé nyekwaka isambo dya kama nya denario nyebaye, niwé le taya wa egala wadyaka ? Na mu nava vókó nawa na : ¿ Eyendini na membunda mya pémbé meninga Ta lóngóni. Vabetye wa lóndyeni, na wa nava vókó na mu na : Metanu, na weyi nyebaye.

Na mu nava vókó wa na wa didyetye wa waziépi meramba meramba e mabura. Na wa nava didyénétyé kumba kumba, a kama kama, na a mabo matano mabo matanu. Va betye mu mumbunda mya pémbé metano na weyi nyebaye indyeni, na mu nava lóngókó e loba, na mu nava tuwaka ibótó, na mu nava bukaka membunda mya pémbé, na mu nava tayaka bikuwi byadu egala na wa témiyetye myo e mboka wato. Na wa waziépi nava dyidyénétyé, na wa nava oliyénétyé. Na wa nava nikaka dyomu na belinga bebaye bya nguhu nya pémbé na nya weyi tegó. Wa dyidyenetye wa betyendi tódyeni nya wamu nyetano.

Evara doleni na mu nava sombétyé bikuwi byadu na wa vélemetye e elende, né wa watyé ebogo na mu e mudumbókwé a Bethsaida, ulingo mobetye mu a lityiyétyé ebumbu. Va betye mu wa lityiyeni, na mu nava tyétyé e mokodi ikaliya.

Va betye ekolokolo e paba, elende e betyendi e tétéi a manga, na mu méni ipó nda betye e zie. Na mu nava tóyókó wa wa pépénétyé néduka, tinandi upupé mobetyendi mo kudwanaka wa na dya bogo ; egombe a pepo a nyenayi alu, na mu nava tyétyé e mboka wa a tamwaka e loba la manga, amu saka ené moto a tokaka dola wa. Ndi va tótye wa wa tókó mu a tamwaka e manga, na wa nava pikiliyaka na mo yéndi uvengwa, na wa nava amiyénétyé. Tinandi wa waziépi wa tótyendi na wa nava sisibuwénétyé. Na mu nava gunganaka ikala na wa, ava vókó na wa na : Odókóni : ate ngwé enyótyeni. Na mu nava vélémétyé elende e mboka wa, na upupé nava waka, na wa nava kodyénétyé mege, né wa wa mamanaka na ngudi. Tinandi wabebé bómbiyeni egala membunda mé mya pémbé, tinandi melena myaya me betyendi bonguweni.

Va betye mu dyabweni e mudumbókwé, na mu nava pabaka ezityi a Genesaret, na wa nava dubaka evaningo ibongo. Va tótemetye wa eviya elende, na wa nava vekaka mu. Véluwenetye wa etébé a baka navara, wa yaletyendi ividyéné na mepondyi eviya maboko maziépi e makondo, iboko tiboko dyotyetye wa na a yéndi. Iboko dyéziépi dye pabetye mu, eviya mabókó, na mamboka, na bezityi, wa nandyiyetyendi mepondyi e mareya, né wa wasósé létyé mu na wakupenetyete dyélé ilépu dya ibótó dyadu ; né mwéziépi a kupenetye te óndyetye.

Na Fariseos nava laténétyé e mboka mu, na waléndi wavókó wa betye eviya Jerusalem ; Va tótye wa bikuwi byadu bevókó bedyaka na mabó na ndindo, era ndi na, mba sugaka mabó na wa nava duwaka ponda. (Tinandi Fariseos na bolo Dyu mwéziépi, gondyeneni na belekanako bya watodu, etóndyé wa mba sugaka mabo ro na ro wabe’dya. Né ibutya dya iboko dye sambwé bedya, etóndyé wa mbotaka tuka, wa dya. Na bema bevókwé bebóló be yéndi, bindyetye wa egala itata, ené masuga ma mamógi, na beva na melombo, na makondo.)

Na Fariseos na waléndi navépwaka mu na : ¿ Ra tiné ndi eyé bikuwi byavé mba tamwaka gondyeneni na belekanako bya watodu, nga dyawa wa dyaka na mabó ma ndindo ?

Na muna va timbwanaka na wa na : Inywéni menoki, Isaias a kametyendi sókó egalanu, ené ngayé yo léndweni na : Wato mé wa wa bendéndi ndi ngwé na matepwa, ndi melema myaya me yéndi abiyeneni na ngwé.

Né wa wa kaliyandi ngwé e nané, wékuwénétyé belekanako bya wato ené bebutye byékamiyé.

Tinandi elikakani elekanako a Anyambé, ngayinywé na dyikuwinidi dya wato ; ené masuga ma beva na mamógi, ninywé esakani mambo mavókwé mabóló ma dyóngo mé dyera.

A vótyetegó na wa na : E puliyéndini elekanako a Anyambé na mareya ma kwana masa egala itata dya belekanako bya mbembó nyanu. Tinandi Moises a vótyendi na Hetyiyétyé góngwé na nyungwé, na na : Mwéziépi ama kalaka ebeva egala gangwé dyélé nyangwé, a mandi waka néwedi. Ndinywé e vóndini na : Pagate moto a vó gangwé (dyélé nyangwé na : Ima ebetyevé oka kovaka na ngwé e yéndi Corban (e minaka na taweni e mboka Anyambé ;) Ninywé mbagó pangakani mu asaka ima tima egala gangwé dyélé nyangwé. Evovuwétyéni ndaga a Anyambé na tina a belekanano bya mbémbó nyanu beyinywé témiyeni.

Na mambo mavókwé mabóló ma kwana ma. Va betye mu ebumbu éziépi ondeni, na mu nava vókó na wa na : Okakani ngwé inywéni waziépi, ninywé emu bómbiyétyéni : Ima tima ebe e bwebwe a moto eyé ebeviyétyé mu, na dyira dya e mboka mu ; ndi bekudwa eviya mboka mu, byondi be beviyé moto. Mwéziépi ayé na maló egala dyoka, ótyetye.

Va betye mu avéndyémé eviya e mboka ebumbu, mu ireni e mbadi, na bikuwi navépwaka mu egala mokanakódi mé mura. Na mu nava vókó na wa na. ¿ Inywé tegó ebeni nébómbiyé ? ¿ E bómbiyéni na Ima éziépi a bwebwe ira emboka moto ebe ngudi beviyé mu ; ¿ Tinandi ira e molemadu etéyi, ndi kabo ibumu né yo e kudwa va tyéwé pépégu ? Ivódi mé dyera ndi dyépanga dya bedya biéziépi be diyaka tyéndyéndyé. Ndi a vótyendi na : Ekudwa eviya mboka moto yondi ebeviyé moto. Tinandi eviya dya téyi, eviya e melema mya wato, ndi ekudwa mapikiliya mabeva, menga, mahonde, moya ma wato. Miibi, kakaté, matyitwana, ikóndónó, mambo mévovwa, idikwana, malowana, iméni, ipuwana dya ibómbiyé. Bebeva mé binana biéziépi be kudwandi eviya dya téi, né byo beviyé moto.

Na mu navémwaka eviya vara, ava tyétyé e tétéi nya Tiro na Sidon ; né véretye mu e mbadi, abe toka na moto apuletye ; ndi a be yólé botama. Tinandi mwadumbókó, a betye mwadu a mwado na ilina ibeva, vabetye mu óka egaladu, a vetyendi na mu nava kwaka e mako madu. Mwado mé mura a betyendi Griega, nga Sirofenicia na reya a idyawidi ; a sóseletyendi mu na a kuduwetye dévili méra evia e mboka mwadu a mwado. Ndi Jesus avótyendi na mu na : Ta panga wana wólaka na bogo, tinandi ebe lutyeni na dyinga dya pémbé a wana né yo evugwé e mboka wana wa mbwa. Na mu nava timbwanaka, ava vókó na mu na : E mopandyi ; ndi dyé nyo wana mbwa mé nye dyate eviya e nguhu nya wana e ibumuku dya tagulu. Na mu nava vókó na mu na : Na tina a ndaga méni tyétyé ; déveli mé e kudwandi eviya mboka mwavé a mwado. Va tyétyé mu e mbadi, a kóbetyendi devili e kudwa, na mwamé a mwado mura bya e ikondo.

Va véndyemetye mu ropé eviya etébé a Tiro, na mu nava dolaka dya Sidon kwanga e manga ma Galilea, na dya tétéi nya betébé bya Decapolis.

Na wa nava vyaka mu na motumbókó a betye potye némbutye, na wa nava sósélétyé mu na a batetye mu ébó. Va betye mu a paluwénéna mu eviya ebumbu, na mu nava vélétyé minó myadu e maló madu, va betye mu matyéndye tuweni, na na mu nava kupénétyé elémyadu ; Va betye mu a lóngókó e loba, na mu nava vegumaka na ngudi, na mu nava vókó na mu na : Ephphata ; e minaka na : Dibwamaka. Iwéra mé dyévókó a maló madu nava dibwamaka, na mosago a elémé adu nava vurwamaka, amu kalaka dódó.

Na mu nava vókó na wa na wa sebwetye moto te moto ; ndi ngédeka dye detyetye mu wa dyote dye samaniyetyegó wa sango méra wa na wa. Na wa nava mamanaka na imaminidi, wa vókó na : A sandi bema biéziépi dódó : a pangandi potye nyokaka, na mambutye ma kalaka.

Eminya mé mara, na tina a ebumbu ita né wa mba ima a dyaka, na Jesus navóndaka bikuwi byadu, na mu nava vókó na wa na : Nókandi ebumbu mambwangó, tinandi wa mundi na ngwé ulingo a minya malalo, né wa mbabétyé néma a dyaka. Né etóndyé na viya tyédyétyé wa e mboka nyaya mba dyidyénétyé, wa mandi goviyénétyé e reya ; tinandi wavókó wa rambaya wa viyandi vaba. Na bikuwi byadu nava timbwanaka na mu na : ¿ Eviya rébokwé ndi dyeyé moto a duwaka pémbé nya dyidyétyé wato mé wa e ndyinga va ? Na mu navépwaka wa na : ¿ Eyéndini na membunda mya pémbé meninga ? Na wa nava vókó na : Motobanavókó.

Na mu nava vókó na ebumbu na wa didyenetye e zie, na mu navéngaka membunda mya pémbé motobanavókó, va betye mu akeva tayeni, na mu nava bukaka myo, na mu nava tayaka bikuwi byadu na wa témiyetye wa nyo e pwandya na wa nava témiyétyé nyo e pwandya a ebumbu. Wa betye tegó na pati a wana weyi, na mu nava vambétyé nyo ibótó, na mu nava vókó na nye témuwetye tegó wa e pwandya. Wa dyidyenetyendi na wa nava oliyénétyé, na wa nava nikaka nguhu nye lityenetye, belinga motoba navókó. Tango a wadyetye ebetyendi ené tódyeni nya wato nyenai, na mu nava lityiyétyé wa.

Evara doleni a vélemetyendi elende na bikuwi byadu, na mu nava pabaka e bekulu bya Dalmanutha.

Na Fariseos na vidyénétyé, na wa nava yalétyé ityétyé na mu, wa dyombétyé mu ndembo eviya loba, e bwadyétyé mu. Va betye mu a veguma e ilina dyadu, na mu nava vókó na : ¿ Ra tiné ndi e dyombé igona mé dyi ndembo ? E pónipóni na vóndi nénywé na igona mé dyi dyeva tawé ndembo. Va lityetye mu wa, na mu navagó vélémétyé e elende. na mu nava tyétyé e mudumbókwé.

Wa lendyiyetyendi dyinga dya pémbé, né wa wabe bé wago na umbunda a pémbé umbókóe elende. Na mu nava vókó na wa na : kelevakani, bandamiyétyéni la levadura a Fariseos, tegó na levadura a Herodes. Na waméni na waméni nava kalaka na : Lebe na pémbé. Va betye Jesus a pulé yo, na mu nava vókó na wa na : ¿ Rémé ndi e lalénywé, tina eyinywé mba bétyéni na pémbé ? ¿ Epikiliyani ninywé e bómbiyéni ? ¿ Enditeni melema myanu bondyiyeni ? ¿ Inywéni na migó na migó ndi e tóyeni, ninywénina maló ndi otyeni ? Ninywé e zimbuwéni ? Va betye ngwé na bukaka membunda mya pémbé metano e tódyeni nya wato nyetano, e nityetyendini belinga beninga londeni ti na nguhu ? Na wa nava vókó na : Dyomu na bebaye. Né vabetye membunda mya pémbé motoba navókó e tódyeni nya wato nyenayi, ¿ E nityetyendini belinga beninga londeni ti na nguhu ? Na wa nava vókó na : Motobanavókó. Na mu nava vókó na wa na : ¿ Nandi ra tiné ndi e nditinywé mba bómbiyétyéni ?

Na mu nava pabaka e Bethsaida ; na wa nava viakamu na pógu evókó a momu, na wa nava sósélétyé mu na akupentye mu. Na mu nava bómbókó pógu mé a momura ebó, na mu nava kuduwétyé mu eviya mboka ; va betye mu matyéndyé tuweni e migó madu, né mu mu mabó bateni, na mu navépwaka mu itó a tóte ima tima. Va lóndyetye mu, na mu nava vókó na : Na tóndi wato, nandi na tóndi wa wa tamwaka ené bele. Na mu navagó batétyé mu mabó e migó, na mu nava pangaka mu a longókó ; na mu navóngaka, na mu nava tóyokó wato waziépi na maséi póni bwe. Na mu nava timbiyétyé mu e mbadada, ava vókó na mu na : E pabetye e mboka, névé e sebwetye tegó yo moto te moto e mboka.

Na Jesus na bikuwi byadu nava tyétyé e mboka nya cesarea a Filipo, e reya, na mu navépwaka bikuwi byadu na : ¿ Wato wa vóndi na ngwé ndi ra ? Na wa nava timbwanaka na : Juan Bautista ; né wavókó na Elias ; wavókwé na, Umbókó a ramba a mesótyi. Na mu nava vókó na wa na : ¿ Nandi inywé e vóndini na ngwé ndi ra ? Na Pedro nava timbwanaka, ava vókó na mu na : óvé ndi Cristo. Na mu nava keleviyétyé wa na wa sebwetye moto te moto egaladu.

Na mu nava yalétyé dyikuwé dyaya na, Mwa moto a lukandi tóyó myadi mebóló, né mu a tyiwé na metodu, na sacerdote nye panga né tegó na waléndi, né mu ówé, né mu angandi tongwaka minya malalo doleni. A kaletyendi egali méra póni bwe na bwe. Na Pedro navóndaka mu e pépégu, na mu nava yalétyé mu ideka.

Va betye mu ilwemeni, né mu amu longókó bikuwi byadu, na mu nava bemétyé Pedro, na : Véndyémétyé ngwé e puga, Setani ; tinandi e pulé mambo ma Anyambé ndi kabo ma wato.

Va betye mu ónda ebumbu na bikuwi byadu, na mu nava vókó na wa na : Mwéziépi ama tokaka vité ngwé, a gózietye mu méni, né mu a bapé cruz adu, né mu a vité ngwé. Tinandi mwéziépi ama tokaka dyondyiyé dya eménwadu, a mandi nyamiyétyé yo, ndi mwéziépi ama nyamiyétyé eménwadu na tinamé na a sangwasa, a mandondyiyétyé. Tinandi ¿ rémé ndi eyé moto a kovaka, etóndyé a bómo zie éziépi né mu a nyamiyé ilina dyadu ? ¿ Ra dyóngwé dyéma ndi dyeyé moto a tayaka ené motunda egala ilina dyadu ? Tinandi mwéziépi a mókaka ngwé na ndaga nyamé vigóni e igona mé dyéhonde na dyabeva dyi, Mwa moto tegó a ngandokaka mu vigóni vanga vyaka mu e ivenda dya Gangwé na bendyeli byasa.

Na mu nava tegó’vókó na wa na : E pónipóni na vóndi nénywé na wato wavókó wa tango mé eyé eva eni, wa ngé bétyé mba tyekaka iwedi kabo wóta tóyó ivenda dya Anyambé dye viya na ngudi.

Minya motoba doleni na Jesus navéngaka Pedro, na Santiago, na Juan, na mu nava tyétyé na wa iboko dya paluweneni wa méni na waméni pa e mokodi ódomba ; na mu navélwamaka uvela e pwandyaya. Na bedadi byadu nava panyaka, epuwa ené nieve ; dyóngó dyépuwidi dyeyé mosuzi te mosuzi e zie méni mba yólétyé ipudyé. Na Elias ma Moises nava kudwanaka wa eró, wa betyendi wa kalaka na Jesus.

Na Pedro nava timbwanaka, na mu nava vókó na Jesus na : Mukuwi, eyéndi enyévé néwé le diyaka va, le londyetye besaka belalo ; evókó egalavé, evókwé egala Moises, na egala Elias tegó evókwé evókó. Tinandi abe bómbiyé ima e betye mu a kalaka ; tinandi wa betyendi wa nyódyéné. Na evindi nava viya kulamaka wa, na dyoyi nava kudwanaka eviya evindi méra, na : Anó ndi Mwamé a tóndé ngwé ; okakani mu. Evara doleni va lóndyetye wa, wabegó tó moto te moto e rambaya, kabo Jesus pa.

Va betye wa wagumyaka eviya mokodi, na mu nava vókó na wa na, wa sebwetye moto te moto béma be tóyetye wa, kabo kwanga vanga bétyé Mwa moto a tongwa eviya mewewe. Na wa nava tataka ndaga méra e waméni, wamu ipwanaka waméni na waméni dyoyidi dya ebutye a na : Itongwa eviya e mewewe.

Na wa nava ipwaka mu na : ¿ Ratiné ndi evó waléndi na Elias ndi aluka na viya ? Na mu nava timbwanaka na wa na : Elias e pónipóni ndi a luka nóta viya, né mu akomba bema byéziépi ; ené ngayé yo léndweni egala mwa moto, na a mandi tókó ndyuke nyebóló, né mu a pédywé. Ndi na vóndi nénywé na : Elias e pónipóni a viyendi, na wa nava saka na mu nyanga éziépi e totyetye wa, ené nga yé yo léndweni egaladu.

Va pabetye mu e mboka bikuwi, na mu nava tóyókó ebumbu etubwé wa iuweneni sóta, na waléndi wa sódyaka na wa. Nandi va betye ebumbu e tóyó mé mu, na wa nava sisibuwénétyé, na wa nava tyétyé membila e mboka mu, wava gomwaka mu Na mu navé pwaka wa na : ¿ Ra butye ndi esodyénywé na wa ? Na motumbókó a ebumbu nava timbwanaka, na mu nava vókó na mu na : Mukuwi, na viyandi na mwamé a momu e mbokavé, tinandi ayéndi na ilina dya imbutye. Iboko dyéziépi dye bómbó dyo mu, dye kodyéndi mu na ngudi né mu amu kuduwétyé ivudi, né mu a kaliyétyé magonga, né mu agandi ; na ngwé nava vókó na bikuwi byavé na wa kuduwetye mu dyo, ndi wabe yóle.

Na mu nava timbwanaka, ava vókó na wa na : ! Ah, igona dya mbékamiyé ! ¿ Kwamga era gombé ndi ema bétyé ngwé nénywé ? ¿ Kwanga ra gombé ndi e luka hika ngwé nénywé ? Vyakani ngwé na mu. Na wa nava vyaka na mu e mboka mu, va tótye mu mu, na ilina nava surwétyé mu, na mu nava kwaka e zie amu bindyilaka, a kuduwétyé ivudi. Na mu navepwaka gangwé na : ¿ Edaka méni e mundi namu eviya ragombé ? Na mu nava vókó na : Eviya e motyétyé. Ro nyevókó dye kodyétyé mu e veya, na e meba egala dyoya dyadu, ndi itóna eyete e yólétyé isana, okakéwé mabwangó névé e sanéwé. Na Jesus nava vókó na mu na : Etóndyé eyéte e kamiyé, egala mokamiyi mambo maziépi ma yóléméndi. Na gangwa mwana nava amaka na : Na kamiyéndi, sanaka ngwé e ipuwana dyamé dyé kamiyé.

Va betye Jesus a mu tóyókó na ebumbu e mundi bólókó, na mu nava bemétyé ilina mé ibeva dyira na : Ové ilina dyémbutye na potye na vóndi navé na kudwaka eviya mboka mu, névé iretyegó e mboka mu ropé. Na ilina nava bétyé dyamaka na dyo dye surwétyé mu na ngudi, dyeva kudwaka ; na mu nava likanaka ené ubimba, eva pangaka wabóló wa vókó na a wandi. Na Jesus nava bómbókó mu ebó na mu nava témiyétyé mu, na mu nava témétyé.

Véretye mu e mbadi, na bikuwi byadu navé pwaka mu e pépégu na : ¿ Ra tiné ndi ebiwé mba yólétyé dyo ikuduwé ? Na mu nava vókó na wa na : Dyóngó mé dyi dyebe ngudi kudwa néma tima, kabo na ikaliya na ihindina.

Va kudwetye wa eviya vara, na wa nava pudungénétyé Galilea ; abe toka na moto apuletye na. Tinandi ékuwetyendi bikuwi byadu, né mu a vótyendi na wa na : Mwa moto a mandi bómbuwétyé e mabó ma wato, né wamandi oyaka mu ; ndi mu, a ngandi tongwaka e dyoba dya malalo. Ndi wabe bómbiyé ndaga méra, né wa wa nyóyetyendi dyipwa dyadu.

Na mu nava pabaka e Capernaum ; va betye mu amu e mbadi, na mu navépwaka wa na : ¿ Rémé ndi ebinywé e sódyakani e reya ? Na wa nava votyiyénétyé voo, tinandi waméni na waméni wabetyendi wa sodyaka e reya egala moto ayé inyanga wa e rambaya.

Va betye mu a diya, na mu navóndaka ebumbu a dyomu na wabaye, na mu nava vókó na wa na : Etóndyé moto te moto a viya tokaka idiya dya moto a bogo, alukandi bé e puga a waziépi, na moseyi a waziépi. Na mu navéngaka etumbé evókó, na mu nava témiyétyé yo e tétéyaya, va betye mu a bapé yo e mabó madu, na mu nava vókó na wa na. Mwéziépi a ma ingaka umbókó a tango a betumbé mébi e dina dyamé, éngandi ngwé, né mwéziépi énga ngwé, énga ngwé ndi éngandi a lometye ngwé.

Na Juan nava timb wanaka na mu na : Mukuwi, le tóyóndi motumbókó a véndyiyétyé dévili na dina dyavé, nandi mu mba bétyé movitago ; néwé nava dekaka mu, tinandi avitiwé. Na Jesus nava vókó na : Edetyetyeni mu ; tinandi abe na moto ama saka elembo e dina dyamé né mu a yólétyégó ikala dya ebeva egalamé. Tinandi ayé mba témiyénétyé néwé a yéndi egalago. Na mwéziépi ama takénywé elai a meba e dina dyamé, tinandi eyéndini wa Cristo, e pónipóni na vóndi nénywé na, ava nyamiyé magomwani madu.

Ndi mwéziépi ama bevétyé umbókó a tango mé a wana mé watiki wa kamiyé ngwé wa, enyévé ndi mu atingwétyé ilale dye kókwéné ibólu, né mu avugwé e manga. Etóndyé na ebwavé e pangandivé e bevaka, lenaka yo ; eyéndi enyévé navé iraka eménó ebókulu, wagó navé mabó mabaye névé etyétyé e Héli e veya vya mba dimaka ; Vayé mokudyu a téyi mba waka na veya vya mba dimaka. Né etóndyé ekwavé e diyandyévé ibaku dya kodyétyévé, lenaka yo, eyéndi enyévé navé iraka eménó eko ekulu, wagó navé mako mabaye névé e vugwé e Heli vayé veya vya mba dimaka ; Vayé mokudywaya mba waka na veya vya mba dimaka. Etóndyé na digó dyavé dye yéndivé ibaku dya kodyétyévé, tongwaka dyo ; e yéndi enyévé navé iraka ipanga dya Anyambé na diguvókó, wagó navé migó mabaye névé e vugwé e Héli ; Vayé mokudywa mba waka na veya vya mba dimaka. Tinandi mwéziépi a ngandi mwaswétyé modyu na veya né mwambo mwéziépi mongandi mwaswétyé vianga. Vianga a yéndi nasa ; nandi etóndyé vianga ve nyamiyéndyé modyu adu, ¿ Rémégó eyinywé etimbiyétyéni modywadu ? Diyakani na vianga e inywé méni na inywé méni ; né inywé méni na inywé méni emu diyakani na dyonga.

Na mu navémwaka vara, ava pabaka e betébé bya Judea na e mudumbókwé a Jordan, na bebumbu na vagó yolénétyé e mboka mu, na mu nava ikuwétyé wa ené mbémbé.

Va betye Fariseos wa paba, na wa navé pwaka mu, egala dyadyé dyadu, na : itó eyéte gondyeneni na momu a timbiyétyé mwadadu. Na mu nava timbwanaka, na mu nava vókó na wa na : ¿ Moises a sombetyendinywé dya ? Na wa nava vókó na : Moises abóbetyendi egala iléndé dya ipépu dya dyoya dya iba, na itimbiyé dya mwado.

Na Jesus nava timbuanaka, na mu nava vókó na wa na : Na tina a melema myanu ebonga ndi e léndetye mu inywé elekanak o meni. Ndi eviya dyali dya ivela, Anyambé a veletyendi wa momu na mwado. Na tina méra ndi ema likaka momu gangwé na nvangwé, né mu a lata na mwadadu. Né wa wabetye wabaye, wa mandi bétyé wamu mogoni umbókó, yo tina méra ndi eyé wa mbagó bétyé wabaye, ndi kabo mogoni umbókó. Ndi eyé Anyambé lateni, moto a paluwetye yo.

E mbadi na bikuwi navagupwaka mu egala upako mé mura. Na mu nava vókó na wa na : Mwéziépi ama timbiyétyé mwadadu né mu a baya umbókwé, a sandi ihonde na mu. Né etóndyé mwado a véndyéné eviya mboka momadu, né mu abaya momumbókwé, a sandi ihonde.

Na wa nava viaka mu na wana watiki egala na a kupenetye wa ; na bikuwi nava dekaka wavetye nawa. Va betye Jesus a tóyó nyanga méra, na mu nava numbaka, na mu nava vókó nawa na : bóbókóni wanatiki iviya, e detyetyeni wa, tinandi ipanga dya Anyambé dye yéndi egala dyóngó mé dyaya dyi. Na vóndi nénywé e pónipóni na, ama bétyé mbé ngaka ipanga dya Ayambé ené mwanutiki avéra dyo. Na mu navéngaka wa e mabó madu, né mu wa makóró madu bateni, na mu nava tuwaka wa ibótó.

Va betye mu amu kendyétyé etyéndó, na motunbókó nava viaka umbila, na mu nava vutaka mabóngó e pwandyadu, na mu navé pwaka mu na : Mukuwi asa, ¿ Rémé ndi eyé ngwé nasaka egala duwamaka na eménó a egombe éziépi ? Na Jesus nava vókó na mu na : ¿ Ratiné ndi etubavé ngwé na asa ? abe na moto te moto ayé asa kabo umbókó pa, Anyambé. E puléte belekanako : E hondevetye ; oyetye ; ibetye ; ebetye talavela ; E balenetye na reya a mokóndó ; Hetyiyétyé góngwé na nyungwé. Na mu nava timbwanaka, na mu nava vókó na mu na : Mukuvi na yéndi bi nana biéziépi tateni eviya ngwé te ndémbé.

Va lóndyetye Jesus mu, na mu nava tóndétyé mu, ava vókó na mu na : E likanandi ima evókó ; tyétyé, va sambiyetye bema biéziépi bayé navé, névé e taya byo e mboka mekuge, vókó na e mandi bétyé na hika e hévéni ; né vé eva viaka iviténé dyamé. Na mu nava tókó ndyuke na ndaga méra, na mu nava tyétyé na dyeku, tinandi abetyendi na nguma ebóló.

Na Jesus nava lóngókó iluweneni sóta, na mu nava vókó na bikuwi byadu na : ! Imé dyambo ebonga na wato wayé na ngumba ebóló wéraka e ipanga dya Anyambé ! Na bikuwi nava emamanaka rebo nyadu né maminidi ; na Jesus nava timbwanaka, na mu navagó vókó na wa na : ! Wana, imé ebonga na wa petiyé hika wéraka ipanga dya Anyambé ! E yéndi ebóbó wa na Camello e pobaka e ipóndi dya tombo wa na motwa mabómó éraka ipanga dya Anyambé. Na wa nava mamanaka na imaminidi wa, wamu vókó waméni na waméni na : ¿ Nandi randi ayé óngaka ? Na Jesus nava lóngókó wa, na mu nava vókó na : E yéndi ima a mba yólémetyé na wato, ndi anga na Anyambé tinandi bema biéziépi de yóléméndi esama na Anyambé.

Na Pedro nava yalétyé ivó na mu na ; Hilétyéte, iwé le sendyandi bema biéziépi niwé levitévé. Na Jesus nava timbwanaka, na : Na vóndi nénywé e pónipóni na, abe na moto te moto ayé sendyeni mbadi, dyélé, wana wa nyangwé, dyélé maluku, dyélé gangwé, dyélé nyangwé, dyélé mwado dyélé wana, dyélé bezityi, egalamé na Sangwasa. Ama bétyé mba duwaka bema mé bira kama a ro tyatyava, eva, mambadi, na wananyangwé, na maluku, na wanyangwé, na wana na bezityi na ingongoluwé ta ; nandi na eméno a egombe eziépi. Ndi wabóló wayé e bogo wa ngandi bétyé e puga, né nga puga wa timba nga bogo.

Wa betyendi e reya wa betiyénétyé e Jerusalem ; né Jesus a tyétyendi e bogwaya, wa sisibwenetyendi, na wa nava vitétyé mu na dyóngó ; na mu na vagó ingaka wa dyomu na wabaye e pépégu, na mu nava yaiétyé isebwa dyaya bema be lutyetye dola na mu.

Na : Hilétyéteni, le betandi e Jerusalem, Mwa moto a mandi bómbuwétyé e mboka sacerdotes nya myolo na waléndi, né wa wamandi kodyétyé mu yéké éwedi, né wa wa bómbiyé mu e mboka Gentiles : Wa ngandi tyebaka mu, né wa wadoka mu, né wa wangandi tuwaka mu matyéndyé, né wa wóya mu ; ndi e dyoba dya malalo a ngandi tongwaka.

Na santiago waza Juan, wana wa Zebedeo, nava tyétyé’e mboka mu, wa va vókó na mu na : Mukuwi, letokandivé e sakéwé ima ema dyombétyéwé. Na mu nava vókó na wa na : ¿ Remé ndi etokénywé na na setyinywé ? Na wa nava vókó na mu na : pangakéwé le diyaka ivenda dyavé anó ebwabómwé, né umbókwé ebwaméngwavé.

Na Jesus nava vókó na wa na : Epuléni ima edyombinywé, ¿ Ete e yóléni inya dya elai e nya ngwé, dyélé tetó na e batuwétyéni nébatuwé dyeyé ngwé batuweni ? Na wa nava vókó na mu na na : Lete le yólé. Na Jesus nava vókó nawa na : E pónipóni, emandi nyakani elai e nya ngwé ; ninywé e batuwéni ibatuwedi dyeye ngwé batuweni. Ndi egala idiya dya ebwabómwamé na eméngwame, abe ngwe nayé na bóbókinywé yo, ndi kabo emboka tango mé eyé nyanga méra kendyweni egalaya.

Nandi va betye ramba a dyomu dya bikuwi wóka yo, na wa nava yaiétyé inumba na Santiago na Juan. Va betye Jesus óndawa, na mu nava vókó na wa na : E puléndini na wa témuwé ené wapandyi e betomba wa pangandi wa, né wato watubwé wa ebumbu aya, wa pangandi wa na ngudi. Ndi eva bé na e tétéyanu ; ndi mwéziépi ama tokaka bé motutubwe e tétéyanu, a lukandi bé moseyanu. Na mwéziépi a rambanu ama tokaka diya moto abogo, mundi ama bétyé mosei a waziépi. Tinandi mwa moto abe viya tegó egala idyandywé ndi kabo idyandyana, né taya dya eménwadu ené motunda egala wabóló.

Na wa nava pabaka e Jericó ; va betye mu a kudwaka eviya Jericó, wazia bikuwi byadu na ndumba etubwé, pógu Bartimeo, mwa Timeo a betyendi diya e pépégu a reya a dyombenétyé. Va betye mu óka na ayéndi Jesus a Nazareth, na mu nava yaiétyé dyama, na : Jesus ; mwa David okaka ngwé mambwangó. Na wato wabóló nava dekaka mu, na a votyetye voo : ndi ametyendi wa na wa na : Mwa David, okaka ngwé mambwangó. Na Jesus nava témetyé, na mu nava vókó na wa na wóndetye mu : na wa nava ondaka pógu mé, wava vókó na mu na : Odókó, témétyé, óndandivé. Va betye mu ngóyadu vuzieni, na mu nava témetyé, na mu nava tyétyé e mboka Jesus. Na Jesus nava timbwanaka, na mu navépwaka mu na : ¿ E tokandi na nasetyevé rémé ? na pógu mé nava vókó na mu na : Mukuwi na duwemetye nétóyó. Na Jesus nava vókó na mu na : Tyétyé, ikamiyé dyavé dyondyiyéndivé. Iwéra mé dyévókó, na mu nava duwaka itóyó, na mu nava vitétyé Jesus e reya.

Va betye wa wamu baka na Jerusalem, e Bethfage na Bethania, e mokodi a Olivas, na mu nava lomaka bikuwi bebaye bya rambadu. Na mu nava vókó na wa na : Tyétyéni e mwa mboka mé eyé e bogwanu enyé, vama bétyinywé irani etei, e mandi kóbétyéni etumbé a buru tingweni, eyé moto te moto aga batama ; vurwakani yo ninywé e viyani na yo. Etóndyé moto te moto aviya vókó nénywé na : ¿ Esandini era na ra tiné ? Emu vókóni na Mopandyi ayi yo na mala, vókóna a likandinywé yo bovoliyétyé.

Na wa nava tyétyé, na wa nava kóbétyé etumbe a buru tingweni a umbió e bwebwe, e mani ma reya, na wa nava vurwaka yo. Na wato wavókó wa betye evara nava vókó na wa na : ¿ Inde ndi esénywé era a ivurwa dya etumbé a buru ? Na wa nava timbwanaka wa ené nga betye Jesus a vókó wa ; na wa nava likaka wa. Na wa nava tyétyé na etumbé a buru emboka Jesus, na wa nava yayétyé ngóyi nyaya e loba la yo, na mu nava diyaka yo e loba.

Wabóló wa yayetyendi ngóyi nyaya e reya, na wavókwé wa pataka makai ma bele, né wa wa yayaka mu e reya. Na tango etyétye e bogo, na wa vitetye wa e puga, nava amiyénétyéna : ! Hosana ! ibótó na a viya e dina dya Mopandyi.

Ibótó na ipanga dya lalago David dyeviya ! Hosana e loba la loba !

Na Jesus navéraka e Jerusalem, na e templo, va betye mu iluweneni na ilóngó dya bema biéziépi, na ekolokolo emu tegó, na mu nava tyétyé e Bethania waza wa dyomu na wabaye.

Bya bwe, va timbetye mu eviya Bethania, na mu nókaka rayi. Vo tótye mu ele a higuera (Itóló) e maséi na makai, na mu nava bakamaka e yo, magu na ate a duwa ima tima e téi ; va betye mu apaba e tina, abe duwa ima tima wagó na makai ; tinandi egombyadu a bebuma ebebé pabeni. Na Jesus nava vókó na yo na : Eviya emunya moto te moto a vagó dya ebumavé egombéziépi. Na bikuwi navókaka rebo méra.

Na wa nava pabaka e Jerusalem ; vé retye Jesus e templo na mu nava yalétyé iputa dya wato wa betye wa sambaka na wa betye wa sambiyétyé bema e templo, ava tyibwaka tagulu nya wésiyini dólé, na madidi ma wasambiyi mbenga. Né mu abe bóbó na moto éretye na eva e templo. Ekuwetyendi wa na : ¿ Ebe léndweni na, mbadamé e mandi tubwétyé na betomba biéziépi na mbadékaliya ? Ndi iluwéndini yo mbada mibi.

Na waléndi na sacerdote nya myolo nókaka yo, na wa nava tokaka tina eyé na wa wóyaka mu, tinandi wa betyendi mu na dyóngó, navwana ebumbu éziépi e mamenetyendi dyikuwinidi dyadu.

Va betye ekolokolo e paba, na Jesus nava véndyémétyé e mboka méra.

Va betye wa wa dolaka na mwako, na wa nava tóyókó na ele mé a higuera (Itóló) e betyendi emu mwasani eviya e metamba. Na Pedro nava ezimbuwétyé, na mu nava vókó na mu na : Mukuwi, ta hilé ele mé e lótyetyevé eviya ndasa. Na Jesus nava timbwanaka, na mu nava vókó na wa na : Kamiyétyéni Anyambé. Tinandi navóndi nénywé e pónipóni na mwéziépi ayé avókó na mokodi memu na : Véndyémétyé, névé e tyé kwaka e manga, mu mba tyetyiyétyé e molemadu, né mu na ikamiyé dya na ndaga e kalamu e mandi timaka, eyé mu a vókó e mandi samaka. Yo ndi evó ngwé nénywé na, éziépi eyinywé e dyombétyéni ikaliya, kamiyétyéni na e mandi duwakani yo, né yo e mandi vyaka embokénywé.

Né vayinywé e kaliyakani, iyidyénétyéni, etóndyé na eyéndini na ndaga na moto nógugu, egala na Góngwanu ayé e hévén éyidyetye tegó makóbó manu. Tinandi etóndyinywé mbéyidyénétyéni, Góngwanu ayé e Hévén tegó ava iyidyinywé makóbó manu.

Na wa nava timbaka e Jerusalem ; va betye mu atamwaka e templo na sacerdote nya miolo, na walendi, na metodu nava vidyénétyé emboka mu. Na wa nava vókó na mu na ; ¿ Na ra ngudé ndi esavé bema mébi ? Né tegó randi ayévé tayeni ngudi méninana egala isa dya bema mébi ?

Na Jesus nava timbwanaka, na mu nava vókó nawa na : Ngwé na mategó ipwakénywé rebo vókó ; ké etimbwanakani ngwé, vókóna na sebwandinywé ngudi esa ngwé bema mébi. ¿ Ibatiyéné dya Juan, ¿ Dye vetyendi eviya Hévén, ndi na emboka wato ? Timbwanakani ngwé.

Na wa nava pikiliyaka e waméni na waméni na : Etóndyé leviya vókó na : Eviya Heven, a mandi vókó na ; ¿ Nandi ra tiné ndi ebetyinywé mba kamiyétyéni mu ? Né etóndyé leviya vókó na : Eviya mboka wato, le nyóndi ebumbu tinandi waziépi wa kamiyetyendi na Juan a betyendi mosótyi a pónipóni. Na wa nava timbwanaka, na wa nava vókó na Jesus na : Le pulé. Na Jesus nava tegó timbwanaka na wa na : Ngwé tegó nava sebwénywé ngudi esa na ngue bema mébi.

Na mu nava yalétyé ikala na wa na dya mekanakódi na : Momumbókó a lityetyendi ekanga a vinya (Ivé) , na mu nava lungaka yo na ugómba, na mu nava pudwaka iboko dye tatwé ivé, na bu nava longaka elongo, na mu nava réndiyétyé yo emboka wadyandyi ekanga, na mu nava tyétyé e etyéndó a abiyeneni. Na mu nava lomaka mosei umbókó e mboka wadyandyi ekanga, egombe a bebuma, egala na éndyetye bebuma bya ekanga eviya emboka wadyandyi wa ekanga. Ndi wa bómbetyendi mu, na wa nava dokaka mu, na wa nava timbiyétyé mu mabó evovo. Na mu navagó lomaka moseyumbokwé e mboka wa, na wa nava lumaka mu malale, wa kwéliyetyendi mu e molo, va betye wa mu déngéliyeni pa, na wa nava timbiyétyé mu. Na mu navagó lomaka umbókwé, mura ndi óyetye wa wóyaka ; na wavokwé wabóló, wa dokaka wavókó né wa wóyaka wavókó. A betyendi a likana kabo na mwadwa momu umbókó abetye mu a tóndétyé, na mu nava lityiyénétyé na iloma dyadu e mboka wa, népikiliya dyana ; wa mandi diliyétyé mwamé. Na wadyandyi mé wa ekanga wara nava vókó waméni na waméni na ; Anó ndi modyizi ; vyakani loyetyeni mu, evara ndi vama bétyé ekuha emu ago. Va betye wa wa bómbó mu, wava vugaka mu eviya ekanga na e bwebwe. ¿ Rémé, nandi, ema saka mopandyi ekanga ? A mandi vyaka, né mu a dyiliyé wadyandyi mé wa ekanga wara, né mu a taya ekanga a vinya (Ivé) e mboka wato wavókwé. ¿ Ega langakani iléndwé mé dyi na : Ilale me dye tyiyetye wa londyi dyondi dyemu molo a ibenda ;

Na reya a Mopandyi ndi eyé eni semendi, né yo e yéndi ima a umamo e migó mago ?

Wa totyetyendi ibómbó dyadu ndi wa nyótyendi ebumbu ; tinandi wa bómbiyetyendi na a kanandi mokanakódi mé mura egalaya ; na wa nava likaka mu, wava tyédyénétyé.

Na wa nava lomaka Fariseos na Herodianos nyevókó emboka mu, egala na wa lambetye mu e ndaga na egugu. Va vetye wa na wa nava vókó na mu na : Mukuwi, le puléndi na e yéndi moto a pónipóni, na na ebe na nésóló na moto te moto ; névé tegó e lóngó mendongo mya wato, ndi kabo na pónipóni ndi ikuwénévé reya a Anyambé ; ¿ Eyéte gondyeneni néwé le tayaka César duti, ndi nana ebe gondyeneni ? ¿ Lelukate etaya, ndi na na leluka ta ? Né mu, puleni mbémbó a menoki aya, na mu nava vókó na wa na : ¿ adyéndini ngwé na ra tiné ? viakani ngwé na dóle egala na tókó yo.

Na wa nava viakamu na yo, na mu nava vókó na wa na : Uvela mému na mina méma be yéndi bya ra ? Na Jesus nava timbwanaka, na mu nava vókó na wa na : Tayakani bema beyé bya César e mboka César ; na beyé bya Anyambé e mboka Anyambé. Na wa nava emamanaka yo.

Na Saduceos nava viaka e mboka mu, wavó na itongwa dyebe, na wa navé pwaka mu na : Mukuwi, Moises a léndetyendiwé na, etóndyé mwanyangwé na moto awa, né mu a lika mwado, né mu mba likaka mwana mwanyangwé éndyetye mwado mé mura egala na a duwetye mwanyangwé dyanga. Wa betyendi wana nyangwé motoba na vókó ; na a bogo nava bayaka mwado, na mu nava waka mba likaka ibóngó. Na a wabaye nava bayaka mu, na mu nava waka, né mura tegó abe lika ibóngó ; a walalo tegó nyangamé. Na wa waziépi wa motoba nómbókó na bayaka mu, na wa tegó nava bétyé mba likaka ibóngó ; e malityiyéné na mwado tegó nava waka. E itongwa, nandi, vayé wa waziépi wa tongwaka, ¿ E ramba mé aya era randi a nga bétyé nga mwado ?

Na Jesus nava timbuanaka, ava vókó nawa na : ¿ Ebe tina méni e lemé nénywé, nénywé mba pulétyéni maléndwé dyélé Ngud’Anyambé ? Tinandi vanga tongwaka wa eviya mewewe, wa ngandi bétyé mbagó bayaka, né wa mba tanaka e maba, ndi wayéndi ené bendyéli beyé e hévéni. Né a na wayé wedyeneni wa yéndi nétongwa, ¿ Ebeni landyeni edyanganangobo a Moises egala nyanga e kaletye Anyambé na mu ipaka na : Ngwé ndi Anyambé a Abraham, na Anyambé a Isaac, na Anyambé a Jacob ? Abe Anyambé a mewewe, ndi Anyambé a wayé e migó ; e yéndini kóbeni na ngudi.

Na moléndi umbókó a ramba a waléndi nava pabaka, a betye óka wa wa kalaka, né mu puleni na atimbwenetyendi wa dódó, na mu navé pwaka mu na : ¿ Ra elekanako ndi eyé e bogo e byo biéziépi ? Na Jesus nava timbwanaka na mu na : Elekanako a bogo e biéziépi ndi na : O kaka Israel, Jehova Anyambiago, Mopandyi andi umbókó. Tóndétyé Jehova Anyambiavé na molemavé mwéziépi, nélina dyavé dyéziépi, népikiliya dyavé dyéziépi, na ngdavé éziépi ; eni ndi elekanako e panga. A bebaye e kwanate ené eni, na : Tóndétyé moto a bakama navé ené óvé méni. Ebegó na elekanako evókwé eyé ita wa na bi.

Na moléndi nava vókó na mu na : Dódó, Mukuwi, e kalandi pónipóni, na Anyambé e yéndi evókó né evókwé ebegó kabo mu. Na na itóndé dyadu na molema mwéziépi, nébómbiyé dyéziépi, nélina dyéziépi, nétóndé dya moto a bakama navé ené óvé meni, eyéndi wa na myova mya botumbwétye na miambo miéziépi. Nandi va betye Jesus a tóyó na atimbwanandi népulé, na mu nava vókó na mu na : Ebegó vaba népanga dya Anyambé. Eviya vara ebegóbé na moto a dyidyetye dyipwa dyadu nyuwe.

Va betye Jesus ékuwétyé e templo, a timbwenetyendi na mu nava vókó na : ¿ Ra tiné ndi evó walénsi na Cristo ayéndi mwa David ? David mu méni a vótyendi na ngudi a ilina dyasa na : Mopandyi a vótyendi na Mopandyamé na : Diyaka ebó amé a bómwé, kwanga vayé ngwé na pangaka waloni wavé wadiyaka ené ididi dyetisavé.

Né Devid mé avókó a tubakagó mu na Mopandyi, ¿ Na ra reyé nandi eyé mu mwadu ? Na wabetye ebumbu nava votyiyétyé ndaga nyadu na mbya.

A vótyendi wa e dyikuwinidi dyadu ma : Bandamiyétyéni na waléndi, wa toka tamwa na ngóyi nyabé, né wa wa tóndétyé magomu e beboka. Na madidi ma bogo e sinagoga, na madidi módomba e masango. Wa pukula mbadi nya mekusi, né wa wasaka makaliya mabé egala ponda. Wa ngamdi duwaka makwa ma wa e yéké.

Na Jesus nava diyaka baka na iboko dye betye mwambo mo tawétyé, a lóngókó nyanga betye ebumbu e vélétyé dólé e téi ; wa betye benami wa veletyendi dólé nyebóló. Na mokusamwado umbókó ókuge nava vyaka, na mu nava vélétyé blancas nyeba, nye kwaka isambo dya maravedi mavókó. Na mu navóndaka bikuwi byadu, na mu nava vókó na wa na : E pónipóni na vóndi nénywé na, mokusi mé a mwado a ukuge mu, a véléndi wa na moto mwéziépi wabe wa vélétyé fura e egala ; Tinandi waziépi wa véléndi tango e tuta eviya ngumbaya ; ndi mwado ménó e bonyamwadu a tayandi éziépi ebé na mu, bedya byadu biéziépi.

Va kudwetye mu eviya e templo, ikuwi évókó a ramba a bikuwi byadu nava vókó na mu na : Mukuwi, ta lóngó dyóngó dya malale na dya malonga dyinana. Na Jesus nava timbwanaka, na mu nava vókó namu na : ¿ Etóte mambadi mé matubwé ma ? Ilale ti lale dyeva likana e loba la ivókwé dyema bétyé mba pukwétyé.

Va betye mu e mokodi a Olivas diya lóngólóngó na templo, na Pedro na Santiago na Juan na Andres navépwaka mu e pépégu na ; Sebwakéwé, ¿ Ra gombé ndi e nga bétyé bema mé bi ? ¿ Na ra ndembwé ndi enga bétyé vanga timaka mambo mé ma ?

Na Jesus nava timbwanaka wa, ava yalétyé ivó dyaya na : Bandamiyé tyéni, moto atemiyetyinywé. Tinandi wabóló wa ngandi vyaka na dina dyamé, wavókó na : Ngwé ndi mu né wa wangandi temiyétyé Wabóló. Ndi vangó kakénywé beduka na sango nya beduka, e papeletyeni, tinandi bema mé bera belukandi bé, ndi isutyi dyevabé pabeni. Tinandi etomba e ngandi témiyénétyé na evókwé, na dyira ipanga névókwé, zie engandi tyibénétyé e maboko mavókó, mesalóku na ndyuke be ngandi bétyé ; bira ndi be nga bétyé dyaili dya mambwangó.

Emu diyakani nébandamiyé egalanu méni, tinandi, wa ngandi tadyétyinywé e mbadi nya yéké, ninywé e ngandi dokwétyéni e bolo sinagoga ; engandi ondwétyéni e mendongo mya wapandyi na mepolo na tinamé, ené tali e mboka wa. Né Sangwasa e lukandi ota pakwé e mboka wato ebogo. Né vayé wa wa viaka nénywé egala iyékuwé, e kendyetyeni ndaga ema kalakénywé ebogo na gombe, ninywé ediyetyeni na ndyéli, tinandi abinywé ema kalakani, ndi ilina dyasa ndamakalaka.

Wana nyangwé na wananyagwé wa ngandi tanaka e iwedi, nyanga mé avókó te e gangwé na mwana ; né wana wangandi témiyénétyé na wagangwé, né wa wóya wa. Engandi vinwétyéni na wato waziépi na tina a dina dyamé ; ndi anga lilimiyénétyé kwanga isuku, mut’angóngaka.

Nandi vanga tókunywé ima e vinwé ódyilo, ebetye mosótyi Daniel a vókó na engandi bétyé iboko dyéyé yo mba lukaka ebé (a langa a bombiyetye) , vókóna wayé e Judea wa tiletye e mekodi ; A nga bétyé e moduwa a mbadi a gumietyegó e mbadi, né mu éretyegó egala dyinga dyéma e mbadadu. A nga bétyé ezityi, a timbetyegó na puga e dyinga dya ngóyadu.

Ndi ! madyili na wado wa nga bétyé na memi, na wanga bétyé wa nyandyiyétyé e miniya mé mara ! Ndi kaliyakani, na itila dyanu dyebetye egombe événu. Tinandi minya mé mara ma ngandi bétyé ma etuniya, dyóngó dyeyé mba tete bé eviya dyali dyévela dye veletye Anyambé kwanga e tyatyava, né yo evagó bé. Né Mopandyi a bétyé mba vuviyétyé minya mé mara, te abe na moto a ngóngaka ; ndi na tina a wapónweni, wa betye mu a pónókó, ayéndi minya mé mara vuviyeni.

Nandi etóndyé moto te moto avó nenywé na : Ta hilé, Cristo ndi ano, dyélé na Hiléléno, a yéndi ona, e kamiyetyeni mu. Tinandi Cristo nya evela na mesótyi mya mokóndó wa ngandi viaka, né wa wa ngandi leviyétyé ndembo nye mamwéné, egala ikóndónó, e bétyé ima e yolémé, te dyélé wayé pónweni. Ndi kelevakani ; na puliyéndinywé mambo mé ma maziépi e bogo na egombe.

Ndi e minya mé mara, vanga bétyé etuniya méra doleni, dyoba dye ngandi vindaka, ngóndé eva taya monangadu. Menanga mya loba mengandi kwaka, ne ngudi nye yé e loba nye ngandi tyibénétyé. Evara ndi vanga tókó wa Mwa moto, a vyaka e bevindi na ngudi etubwé na ivenda. Evara ndi vanga lomaka mu bendyeli byadu, né mu a yolé wayé mu póneni eviya masuku ma zie manayi, eviya isutyi dya zie kwanga isutyi dya loba.

Ikwakani ekwani na ele a higo (itóló) ; vabé melabe myadu memu mebóbó, né myo me mu tyétyétyé makai, e pulendini na ezevo e bakamandi. Yo nyanga me avókó te nénywé, vanga tókunywé bema mébi besamaka, pulétyéni na a mundi vavuve e membyó. Na puliyéndinywé na, igona médyi dyeva dola bema mé bi mba samaka. Zie na loba be ngandi dolaka, ndi ndaga nyamé nyeva dola.

Ndi egala dyoba mé na iwéra mé, dyebe na moto apulé dyo ; dyélé bendyél beyé e hévéni, dyélé mwana kabo gangwé.

Kelevakani, pevakani, ninywé e kaliyakani, tinandi epuléni vanga timaka egombe. Te ené moto a tyétye etyéndó a abiyeneni, a lityetyendi mbadadu, na mu nava tayaka waseyi wadu ngudi, na moto na adu ebolo, na mu nava vókó na motati umbyó na a pevetye. Pevakani nandi, tinandi epuléni egombe e nga vyaka mopandyi mbadi ; itó na ekolokolo, dyélé elutema, dyélé egombe e kókóló kuba, dyélé na mwako. Egala na vayé mu a pabaka e matota, a nyókó kóbinywé e yadyénétyéni. Né mambo mé mavó ngwinywé ma, na vóndi mo e mboka mwéziépi, na : pevakani.

Minya mabaye e bogo na Pascua, na isango dya pémbé a mba bétyé nélanda ; na sacerdote nya myolo na waléndi nava tokaka reya eyé wa wa bómbókó mu na dya Mokóndó né wa woya mu. Na wa nava vókó na : Anga e dyoba dyé sango, tinandi isoko dye nyókó sama ebumbu.

Va betye mu Bethania e mbada Simon e betye némba, va betye mu adiya e tagulu a bedya, na mwadumbókó nava vyaka na ikuele dya alabastro a mavulé ma espique ma isambo ibonga na ngudi, na mu nava boyaka ikwele mé, na mu nava tyibwaka mu e molwado. Na wavókó wa betye vara nava numbiyénétyé, wamu vókó e waméni na waméni etéyi na : ¿ Mavulé mé ma sombo ma ma gumbwénéndi na ra tiné ? Tinandi mabéte ma yólé sambuwé e wa na kama nya denario nyelalo né nyo nye tawé e mboka mekuge. Na wa nava sembétyé mwado mémura.

Ndi Jesus a vótyendina : Likakani mu mbwe ; epariyéndini mu na ra tiné ? a sandi ngwé ebolo asa ; Na vwana mekuge meyéte nénywé egombiéziépi, vayinywé a tokakani e yéte e sani wa enyévé ; ndi e beni na ngwé egombiéziépi. Mwado ménó a sandi ngu na iyólidi dyadu, tinandi a pindwandi nyolwamé mavulé egala madyamwé ebogo na egombe. E pónipóni na vóndi nénywé na iboko tiboko dyenga pakwamaka sango mé asa eni e zie éziépi, nyanga mé esa mwado ménó, enga tegó pakwamaka egala izimbuwé dyadu.

Na Judas Iscariote, umbókó a wa dyomu na wabaye, nava tyétyé e mboka sacerdote nya myolo, egala ikóndó dyadu e mboka wa. Wa peyetyendi, na dyoka dya nyanga méra, na wa nava akanaka na wa mandi tayaka mu dólé. Na mu nava tokaka egombe a gondyeneni eyé mu a kóndókó mu.

E dyoba dya bogo dya pémbé a mba ilanda, egombe ebetye wa wó yaka modómbé a pascua, na bikuwi byadu nava vókó na mu na : ¿ Ré bokwé ndi dye tokavé na le tyétye kombaka egala e dyaka pascua ?

Na mu nava lomaka bikuwi bebaye bya ramba a bikuwi byadu, na mu nava vókó na wa na : Tyétyéni e mboka, momumbókó bapeni egaka a meba a mandi kóbétyinywé ró ; Vitétyéni mu. Né iboko dyeméraka mu, vókóni na mopandyi mbadi na : ¿ Mobé mo luka dya ngwé pascua na bikuwi byamé moyendive ? A mandi leviyetyinywé velika vetubwe kombweni e mbada loba ; kendyétyéni egalago evara. Na bikuwi byadu nava tyétyé, na byo nava pabaka e mboka, nava kóbetyébema byézié ngu ené nga vótye mu wa, na wa nava kendyétyé pascua.

Va betye ekolokolo e paba, na mu nava tyétyé na wa ramba a dyomu na wabaye. Va betye wa wadidyéné e tagulu né wa wamu dyidyénétyé, na Jesus nava vókó na : E pónipóni na vóndi nénywé na umbókó a rambamu, a dya na ngwé, a mandi kóndókó ngwé. Na wa nava yalétyé itóyó dya mambwangó, né wa wamu ipwaka mu moto moto na : ¿ Amandi bétyé ngwé ? Né umbókwé nyangamé na ¿ A mandi bétyé ngwé ? Na mu nava timbwanaka na wa na : A yéndi umbókó a ramba a dyomu na wabaye a duba na ngwé ebó epélé. E pónipóni Mwa moto a tyéndi, ené ngayé yo léndweni egaladu, ndi ! maguga na moto mé ama kóndókó Mwa moto mura ! Otyendi bétyé egala moto moto mé mura na te abe dyawé.

Va betye wa wadyaka, na Jesus navé ngaka pémbé, mu yo ibótó tuweni, na mu na bukaka yo na mu nava tayaka wa, ava vókó na : Ingakani eni ndi nyolwamé. Na mu navéngaka imógi, va betye mu akeva tayeni, na mu nava tayaka wa ; na wa nava nyaka e dyo wa waziépi. Na mu nava vókó na wa na : ma nana ndi matyiya mamé ma panga a tyatya, ma yé tyibwemeni egala wabóló. E pónipóni na vóndi nénywé na navagó nya eviya bebuma bya mokódi a ivé, kwanga e dyoba mé dye nga nyaka ngwé e yo inyedi dya tyatya e ipanga dya Anyambé.

Va betye wa vembo imbeni, na wa nava kudwaka wava tyédyénétyé na e mokodi a Olivas.

Na Jesus nava vókó na wa na : Inywé waziépi e mandi kóbókóni na elu méni na tinamé, tinandi eyé lendweni na : Na ngandi kokaka motati medómbé, né medómbé mengandi varanaka. Vanga bétyé ngwé na tongwa, na ngandi tyétyé e Galilea e bogo nénywé.

Na Pedro nava vókó na mu na : Dyéléte waziépi wa kóbóte, ngwé nava kobo. Na Jesus nava vókó na mu na : E pónipóni na vóndi navé na, óvé, emunya, elu mé eyiwé eni, ebogo na kuba na kókólókó ro nyebaye, e mandi gógókó ngwé ro nyelalo. Na mu na kalakagó na ngudi wa na : Dyéléte na wakate navé, nava gógóvé. Nyangamé a vókó tegó evótye wavókwé.

Na wa nava pabaka ekanga e betye e tubwétyé na Gethsemane, na mu nava vókó na bikuwi byadu na : Diyakani eva ukili ukili mo kaliya ngwé na kaliyaka.

Na mu navé ngaka Pedro na Santiago na Juan, na mu nava yalétyé isisibwana, na ivóhómó. Na mu nava vókó nawa na : Ilina dyamé dyokandi dyeku ibóló na ngudi, piéré néwedi, vurétyéni eva ninywé e pevakani. Na mu nava guésétyé e bogo kwé, na mu nava kwaka e zie, ava kaliyaka na itó eyéte e samaka, iwéra mé dyira dye doletye mu. Na mu nava vókó na : Abba, Lalé, bema biéziépi be yéte be yólémétyé navé ; véndyiyétyé mgwé imógi mé dyi, ndi anga nyanga etoka ngwé, ndi kabo nyanga etokavé.

Na mu nava vyaka ava kóbétyé wa wa yadyénétyé, na mu nava vókó na Pedro na : ¿ Simon e yayandi ? ¿ Ebe yóle ipeva iwérivókó ? Pevakani, ne ekaliyakani, evwa enyokurani iyédyudwé ; e pónipóni ilina dyeyéndi kotyiyeni, ndi megoni meyéndi vó. E itimba dyadu ropé, na mu nava kaliyaka, na mu nava kalaka ndaga mé nya nyevókó. Va timbetye mu na mu nava kóbétyé wa wa yadyénétyé ropé, tinandi migó maya ma betyendi dileni ; né wa wabe pulé nyanga eyé wa wa timbwanaka mu. Na mu navagó timbaka e ro a nyelalo, na mu nava vókó na wa na : yadyénétyéni nandi, emu ódyiyénétyéni ; emundi twétwé, iwéra dye pabandi ; hilétyéni mwa moto a kóndwéndi e mabó ma wato wabeva. Imuwénétyéni, okani, hilétyéteni, a kóndó ngwé a mudi vavuve.

Iwéra mé dyévókó, mute andite a kalaka, na Judas, a betye umbókó a ramba a wa dyomu na wabaye nava vyaka, na ebumbu etubwé e rambadu na mekwala miébótó, na bebókwé, wa vyaka eviya mboka sacerdote nya miolo, na waléndi na metodu. A betye a kóndókó mu a betyendi a taya wa ndembo, na : Ama bétyé ngwé na pyópyókó, mu ndi mura ; bómbókóni mu, ninywé emu tyétyéni na mu na ibandamiyé. Va pabetye mu na mu nava bakamaka iwéra mé dyévókó e mboka mu, ava vókó na mu na : Mukuwi, Mukuwi, Na mu nava pyópyókó mu. Na wa nava bómbókó mu, wava dyusétyé mu. Ndi umbókó a ramba mé ebetye vara, nava gótókó ukwala ebótó, Na mu nava kokala yo e mboka moseyi a sacerdote a molo, na mu nava lenaka mu iló.

Na Jesus nava timbwanaka, na mu nava vókó na wa na : ¿ Eviyandini ibómbó dyamé ené mwibi na mekwala mya mabótó na bebokwé ? Dyoba te dyoba na betyendi nénywé e templo nékuwétyé, ninywé ebe bómbóni ngwé ; Ndi eyéndi nyanga méni, egala na maléndwé ma timetye.

Na bikuwi byadu nava likaka mu, wava tiliyénétyé.

Ndi epatye evókó evitetyendi mu kuliyeni modamba évéla e nyolo, na bepatye nava dyusétyé mu. Na mu nava likaka modambévéla, ava tilaka uhamba.

Na wa nava tyétyé na Jesus e mboka sacerdote e panga, na sacerdote nya myolo, na metodu na walendi nava yolénétyé e mboka mu. Ndi Pedro a vitetyendi mu na maséi kwanga na eboka a sacerdote epanga ; na mu nava diyaka na wasei, Okaka veya.

Sacerdote nya myolo na ebumbu a wayétyiyi éziépi wa totyetyendi ebutye a témiyénétyé na Jesus egala dyoba dyadu, ndi wabe duwa yo. Tinandi wato wabóló wa veletyendi mu ndaga, ndi ndaga nyaya nyebe gondyéné. Na wato wavókó nava kudwanaka, wa va velaka mu ndaga na : Iwé leyéndi otyeni mu a vókó na : Ngwé na ngandi pukwaka templo mé eyé longweni na mabó eni, né ukili a minya malalo na ngandi longaka evókwé a mba bétyé longweni na mabó. Ndi na bira byéziépi ndaga nyaya nyebe egondyéné.

Na sacerdote e panga, nava témétyé e tétéyi, na mu navépwaka Jesus na : ¿ E timbwana ndaga te ndaga ? ¿ Ra butyé ndi esuliyé wa nana navé ? Ndi avotyetyendi voo, né mu abe timbwana ndaga te ndaga, Sacerdote e panga épwetyendi mu ropé, na : ¿ Ové ndi Cristo Mwa a ayé nébótó ?

Na Jesus nava vókó na mu na : Ngwé ndi mu ; né engandi tóyókóni Mwa moto diyeni ebwabómwé a ngudi, a viaka e bevindi bya loba. Sacerdote epanga nava nyawaka bedadi dyadu, ava vókó na : ¿ Rémégó eyiwé na mala ma tali ? Okandini nga pédyému Anyambé ; ¿ E tóndini dya ? na wa waziépi nava kodyétyé mu na a yéndi na makwa méwedi.

Na wavókó na yalétyé ituwa dyadu matyéndyé, nédiba dyadu mondongo, nédoka dyadu behapoka, né wa wa vókó na mu na : Sókókó. Na wasei nava dokaka mu ndyóngó a behapoka.

Ndi va betye Pedro elémbé e zie, na mosei umbókó a mwado a ramba a wasei wa sacerdote e panga ; Va tótye mu Pedro ókaka veya, né mu mu lóndyeni, na mu nava vókó na Ové obetyetegó na Jesus a Nazareth. Ndi a gózietyendi, na : Na bómbiyé, né ngwé na pulétegó ima evóvé. Na mu nava kudwaka e bwebwe egala dyirinidi ; na kuba nava kókólókó. Né va tótye mosei mé a mwado mura mu ropé na mu nava yalétyé ikala na wavókwé wa betye vara motémiyénéni na : Ano ayéndi nga rambaya. Na mu nava gógókógó ropé, Mwólingó doleni, na wabetye vara nava vókó na Pedro na : E pónipóni e yéndi nga rambaya ; tinandi eyéndi nga Galilea, né ikalidi dyavé dye kwanandi idyaya. Na mu nava yalétyé ilowa na ikana na : Na pulé moto mé a kalénywé egaladu mura. Na kuba nava kókólókó ro a nyebaye : Na Pedro nava zimbuwétyé ndaga e vótye Jesus na mu na : Ebogo na kuba nó taka kókólo ro nyebaye, e mandi gógókó ngwé ro nyelalo. Va pikiliyetye mu egala ndaga méra, na mu navéyaka.

Na mwako, vabetye sacerdote nya miolo na metodu na waléndi, na ebumbu a wayétyiyi éziépi esoka pa, na wa nava tyétyé na Jesus sagweni, na wa nava bómbiyétyé mu e mboka Pilato. Na Pilato navé pwaka mu na : ¿ Ové ndi upolo a Dyu ? Na mu nava timbwanaka mu na : Yondi evóvéra. Na sacerdote nya miolo nava langaka mu ndyóngwa bebutye. Na Pilato navagupwaka mu na : ¿ E timbwana ndaga te ndaga ? Ta hilé ebólwa bebutye be langa wa vé bi. Ndi na bira biéziépi Jesus abe timbwana ; na yo nava pangaka Pilato a mamanaka.

Ndi e dyoba dyésango a betyendi a kuduwétyé wa umbókumbókó, mwéziépi mo betye wa wadyombétyé. Né wa betyendi nóbokumbókó dina na Barabas, waza rambadu a melogo wa betyendi e meboka na tina a dyoyona e ilogwa dyaya. Na ebumbu nava vidyénétyé, na yo nava yalétyé idyombe dyadu na asetye wa ené nga samu mbémbé. Na Pilato nava timbwanaka, na : ¿ E tokandini na na kuduwetyinywé Upolo a Dyu ? Tinandi apuletyendi na sacerdote nya miolo bómbiyetyendi mu na ivina. Ndi sacerdote nya miolo wa sisetyendi ebumbu, egala na akuduwetye wa Barrabas e masana madu. Na Pilato nava timbwanaka, na mu navagu pwaka wa na : ¿ Nandi etokandini, ngwé na saka na a tubénywé na Upolo a Dyu dya ? Na wa navagó amiyénétyé na : bandaka mu e cruz. Na Pilato nava vókó na wa na : ¿ Na na tine ? ¿ Ra bevé ndi samu ? Na wa nava amiyénétyé na ngudi ropé na : Bandaka mu e Cruz. Ndi Pilato, nétoka dyétóndiyé dya ebumbu, na mu nava kuduwétyé wa Barrabas, na mu nava tayaka Jesus, va betye wamu dotyeni pa egala na abandwetye e cruz.

Na sódyé navéraka na mu e móbé mo tubwé na pretorio, na wa navóndaka rambaya éziépi. Na wa nava dadyétyé mu ibótó dya koikoi ; né wa wa dadyé mu corona e londyetye wa na mayó. Wava yalétyé igomwa dyadu na : ! Mbolo Upolo a dyu ! Wa dotyetyendi mu e molo na motumbe, né wa wa tuwaka mu matyéndyé, né wa wa bendétyé mu mabóngó movutiyénéni. Va betye wa mu tyebeni pa, na wa nava véndyiyétyé mu ibótó dya koikoi, na wa nava dadyétyé mu bedali byadu méni, na wa nava kuduwétyé mu egala ibanda dyadu e cruz.

Na wa nava pangaka motumbókó a betye adolaka bodolaka, Simon a Cirene, gangwé na Alejandro na Rufo, a viaka eviya ezityi, na a bapetye cruz adu.

Na wa nava tyétyé na mu iboko dye betye dye tubwétyé na Golgotha, etóndyé dyiluwé dye minandi na : Iboko dya mbombo. Na wa nava tayaka mu ivé buseneni na mirra, ndi abe nya dyo.

Va betye wa wa banda mu e cruz, na wa nava kabanaka bedadi byadu, wa saka byo kasé, a ima eyé e kwaka e mboka moto moto. Dye betyendi iwéra dya malalo va bandetye wa mu e cruz.

Iléndwé dye léndwetye egala ebutyadu dye betyendi na Upolo a Dyu.

Wa bandetyetegó mibi mebaye e cruz na mu, umbókó ebómwadu na umbókwé e méngwadu. Na iléndwé dye vó na : A langwetyendi na wapuliyi belekanako nava timaka.

Wato wa betye wa doliyénétyé, wa kóduwétyé myolo myaya, né wa wa vókó na : ! Ehé ! ové e pukwa templo névé e longa yo ma minya malalo ; Ondyiyétyévé méni, névé e gumya eviya e cruz. Yo nyanga mé avókó te ebetye sacerdote nya miolo na waléndi wa vókó e botyebaka na : Ondyiyetyendi wavókwé, ké mba yólétyé dyondyiyé dya mu méni. Nandi Cristo, Upolo a Israel, gumyaka chachava eviya cruz egala na le tótye niwé le kamiyé. Wa betye namu bandweni e cruz wa tyebetyetegó mu.

Va betye iwéra dya, motoba dye paba, na iviti nava bétyé e zie éziépi kwanga e iwéra dya ebuwanavókó. E iwéra ebuwa navókó, na Jesus navamaka na dyoyi e loba na : Eloi, Eloi, ¿ Lama sbachthanai ? ira iluweni, e minandi na : Anyambiamé, ¿ Esendyandi ngwé na ra tiné ?

Vótyetye wato wavókó wa betye mo témiyénéni vara wókaka mu a vókó na, na wa nava vókó na ! Ta hiléni óndadi Elias. Nómbókó nava tyétyé umbila, na mu nava dubaka ndambwé e viva meba e vinagre, na mu nava vélétyé yo e motumbe, na mu nava tayaka mu na a nyetye a vókó na : Ta likani le telé tóyó itó Elias a mate viya gumiyé mu.

Va betye Jesus ama, na mu nava dibaka.

Na modamba a epaga a templo na galaka bepazi bebaye eviya e loba kwanga na e zie.

Na centurion e betye témeni e pwandyadu, va tótye yo etókó mu a dibaka na mwamoko, na mu nava vókó na : E pónipóni, moto ménó a béndi Mwa’Anyambé.

Wado wavókó wa betye tegó wa lóngókó na maséi ; wavókó wa rambaya Maria Magdalena, na Maria ma nyangwa Santiago a ndémbé na Jose, na Salomé ; Wado mé wara, va betye mu e Galilea, wa vitetyendi mu, né wa wa dyandyaka mu ; na wado wavókwé wabóló wabetye na mu ramba e Jerusalem.

Va betye ekolokolo e paba, tinandi dye betyendi dyoba dyékendyé, era ndi mwega a dyoba dya dyódyó. José a Arimatea, moto a idiluwé e ramba a wayétyiyi, a betye tegó avurétyé ipanga dya Anyambé, nava viaka, na evemba e mboka Pilato, na mu nava dyombétyé mu ubimba a Jesus. Na Pilato nava mamanaka na na awandi, va betye mu óndiyé centurion, na mu navépwaka mu itó na a wandi. Va betye mu óka eviya mboka centurion na awandi, na mu nava tayaka Jose ubimba : Na mu nava sambaka modamba upuwa, va betye mu avéndyiyé mu, na mu, nava dingaka mu na modamba mé mura, na mu nava dyamétyé mu e rama e betye pudweni e ilale na mu nava vunguliyétyé ilale e umbyó a rama. Na Maria Magdalena, na Maria ma nyangwa José, nava tóyókó iboko dye dyamwetye mu.

Va betye dyoba dya dyódyó doleni, Maria Magdalena, na Maria ma nyangwé na Santiago, na Salomé, wa sambetyendi bema bya sombwasa egala watyé pindwaka mu byo. Na mwako a dyoba dya wiki dya bogo, na wa nava tyétyé e rama, egombe a dyoba dyemu kudweni. Na wa nava vókó waméni na waméni na : ¿ Randa ma vunguliyétyé iwé ilale eviya umbyó a rama ? Va betye wa elóngómé na wa nava tóyókó ilale vunguluweni ; tina ndi dyebetyendi itubwé na ngudi. Véretye wa e rama, na wa nava tóyókó epatye evókó diyeni egala ebwabómwé, kuliyeni ngói epuwa abé ; na wa nava sisibwanaka. Na mu nava vókó na wa na : E sisibwenetyeni ; e tokandini Jesus a Nazareth ówetye e cruz ; a tongwandi, abegóva, lóngókóteni iboko dye nanguwetye mu. Ndi tyétyéni, va sebwetyeni bikuwi byadu na Pedro na, a tyéndi ebogwanu e Galilea, erago ndi ema tóyókunywé mu, ené nga sebwetye mu nénywé. Na wa nava kudwaka eviya e rama membila ; tinandi wa betyendi wa ligamaka na dyóngó, né wa wabe sebwa ndaga te ndaga emboka moto, tinandi wa nyódyenetyendi.

Ndi va tongwetye Jesus e mwako a dyoba dya bogo dya wiki ótetyendi kudwana e mboka Maria Magdalena, a betye mu a kuduwétyé dévili motoba navókó. Va tyétye mu, na mu nava puliyétyé tango mé e betye e diyaka na mu, va betye wa wókaka dyeku né wa wéyidyénétyé. Ndi vótyetye wa na a mundi e migó, na na a tónóndi na mwado mé mura, wabe kamivé yo.

Evara doleni, na mu navagó kudwanaka e dyóngó dyé tindyidi ivókwé e mboka a nga rambaya wabaye va betye wa wa tyétyé ezityi. Na wa nava tyétyé, wawa puliyétyé nyanga méra e mboka wavókwé ndi wabe kamiyé dyélé tegó wa.

Na malityiyéné na mu nava kudwanaka a mboka a wa ramba a dyomu nómbókó waméni, va betye wa didyeneni e tagulu wa dyaka, na mu nava sembétyé wa na tinaya a mbékamiyé na melema ebonga, na tina e betye wa mba kamiyétyé wa tóyetye mu tongweni. Na mu nava vókó na wa na : Tyétyéni e zie éziépi ; emu pakwakani sangwasa emboka ekeha éziépi. Ama kamiyétyé né mu abatuwé, angandoingaka ; ndi ama bétyé mba kamiyétyé a ngandi tawétyé makwa. Né ndembo ményi mye ngandi vitétyé wa nga kamiyétyé ; wa ngandi kuduwétyé devili e dina dyamé ; wa ngandi kalaka mekalo mya tyatya ; Wa ngandi bómbókó né etóndyé wanya ima oyana ebe ngudi otyiyé wa bwayi, wa ngandi babétyé mepondyi mabó, né myo myonga.

Va betye Mopandyi na wa kaleni pa, na mu néngwétyé e hévéni na mu nava diyaka ebwabómwé a Anyambé. Va tyétye wa, na wa nava pakwaka e maboko maziépi, Mopandyi a dyandyaka na wa, né mu a syliyétyé ndaga na ndembo nye semetye. AMEN.

Va beteye wabóló wé ndyetye na, ebó itémiyé dya ipakwa dya bema mé be kamuwé póni póni va y’iwé. Te ené nyanga e bómbiyetye wa iwé byo, wa betye eviya tali nya mgó na waseyi wa ndaga ; E tónetye tegó dódó e mboka ngwé, na ngwé na ibómbiyé dya gondyeneni dya bema biéziépi eviya dyali dya dyali, e iléndiyé dyavé Tiofilo asa. Na evara ndi vama pulétyé’vé póni póni a bema mé bebetye’vé ikuwétyé bi nana.

E betyendi na Prist evókó, e minya ma Hérod a upolo a Judia dina na Sakaraias, a moramba a Abaia : Mwada du a betyendi a wana wa Eron, dina dyadu dyebetyendi Elisebet. Na wa wabaye wa betyendi gondyeneni e pwandya a Anyambé, wa tamwaka na belekanako na sale nya Mopandyi nyéziépi mba bétyé na rembo. Wa bebé na mwana, navwana Elisebet a betyendi tyele ; na wa waziépi wa betyendi wotadu.

E betyendi va betye mu a saka ebano-adu a Prist e pwandya Anyambé gondyeneni na ramba’du. Gondyeneni na isedi dya ebano a Prist mbéyi adu ebetyendi itumba dya ebedi va betye mu éraka e témpél a Mopandyi. Na, ebumbu a wato éziépi na diyaka e kaliyaka e bwebwe e egombe a ebedi. Na Endyéli a Mopandyi na kudwanaka mu e gala ebómwé a Olta a ebedi. Va tóyetye Sakaraias yo, a tóyetyendi ndyuke, na dyóngó na bómbókó mu. Ndi endyéli e vótvendi na mu na, enyóyetye Sakaraias ; navwana ikaliya dyavé dyokanandi ; na mwadavé Elisebet a mandi edyayaka’vé mwa’a momu, névé evandyé, mu dina dyadu na Jóni. E mandi bétyé na mbya na mosaro, wabóló wa ngandi saraka na idyawé dyadu. Navwana a ngandi bétyé utubwé e mondongo a Mopandyi, a va nya ivé dyélé maku ma bonga : a ngandi bétyé londeni na Ilina dyasa, eviya ibumu dya nyangwé. A ngandi’luwétyé wana wa Israél wa bóló e mboka Mopandyi Anyambé aya. A ngandi tyétyé e bogo adu na Ilina na ngudi a Ilaias, e dyiluwé dya melema mya wa gangwé vayé wana, na wayé mba dyoka e ipulé dya gondyeneni ; ikendyé dya wato kotyeni na Mopandyi.

Na Sakaraias na va vókó na endyél na, ¿ na malé pulétyé eni na’ve ? Navwana na mundi motodu né mwad’amé a tegó na minya madu. Na endyél na’vwanaka na vókó na mu na, ngwé ndi Gebriél e témé e pwandya a Anyambé ; na lomwéndi ikala na’vé na ileviyé dyavé Sango mé nya sa nyi. Ndi lóngókóte, emandi diyaka imbutye eva yólé ekala ; kabo dyoba dye nga samaka bema mé bi, navwana ebe kamiye ndaga’nyamé, nyenga semaka egombe a ya.

Na wato nava vurétyé Sakaraias, wa mu emamanaka ima e dindyetye na mu e témpél. Va kudwetye mu, mba yólétyé ekala na wa ; na wa nava pulétyé na a tóyóndi esisila e témpél ; nawana a pépéndi wa, ndi mba kalaka.

Na ebetyendi, va betye minya ma ebolo-adu ma tima, na mu na timbaka, e mbad’adu méni. Nandi va betye minya mé mara doli na mwad’adu Elisebet na dibamaka, na mu na botamaka ngóndé nyetanu, a vóyókó na : Nyanga méni ndi esa Mopandyi a saka na ngwé e minya ma lóngó mu a lóngókó ngwé, ivéndyiyé dya igumya dyamé e mboka wato.

E ngóndé e motoba na endyél Gebriél na lómwétyé eviya e mboka Anyambé, e mboka a Galili, dina na, Nasaret. Vayé ngóni a mbada Devid, e betye sóweni na momu dina na, Joséf ; dina dya ngóni dyebetyendi na Meri. Na endyéli na vyaka va yé mu, na vókó na, mbolo óvé ayé hekuweni na ngudi, Mopandyi ayi navé ; eyi né’bótó e tétéi a wado. Ndi va tóyetye mu yo, a tóyetyendi ndyuke na ndaga nyadu na mu na pikiliyaka na, dyóngó mé dya mbolo dyi dye mé bétyé dye.

Na Endyél na vókó na mu na, Enyóyetye Meri ; navwana e duwandi ehekwé vayé Anyambé. Ndi lóngókóte, e mandi bapétyé dyemi, névé edyaya mwa’momu, emu vandyétyé dina dyadu, na Jesus. A ngandi bétyé utubwé, angé tubwétyé na, Mwa’a Ayé a loba la loba ; Mopandyi Anyambé a ngandi tayaka mu eka a gangwé Devid ; Na mu angé pangaka mbada’Jekob egombié ziépi ; ipanga dyadu dye vabé né sutyi.

Na Meri na vókó na endyél, na, ¿ Eni nana emalé ebétyé dya vayé ngwé mbó’ta pulé momu ? Na endyél na’vwanaka na yo na vókó na mu na, Ilina dya sa dye mandi vyaka e mboka’vé na ngudi a ayé e loba la loba emandi’dibaka vé evara ndi va nga bétyé ima mé a hole e nga dyayaka’vé era e tubwétyé na, Mwa Anyambé. Ndi lóngókóte, mwanyungwé Elisebet a dibamandi mwa’a momu e igona dya todweni, eni ndi ngóndé a motoba, a betye a tubwétyé na tyele. Navwana ebe na ima eyé onyémétyé na Anyambé. Na Meri na vókó, na, Lóngókóte mosei a Mopandyi a mwado ; ediyetye na ngwé gondyeneni na ndagavé.

E mo minya mé mara ndi mé mwetye Meri, na mu na voliyétyé etyéndó e ezityi a mokodi, e mboka a Juda ; Na mu né’raka e mbada Sakaraias, ava gomwaka Elisebet. Na ebetyendi, vó tyetye Elisebet igomwi dya Meri, motyétyé momu sodaka mu ibumu ; na Elisebet na londaka na ilina dvasa. Na mu na kalaka na dyoyi betiyeni na vókó na, eyi’né’bótó e tétéyi a wado, ibótó na ebuma eyé ibumu dyavé. ¿ Eni eviyandi ngwé na’ve eviya nyangwé na Mopandyiamé e mboka ngwé eni ? Navwana lóngókote, dyoyi dya igomwi dyavé dye béte na dyokana e maló mamé, motyétyé mo mu sodaka ngwé ibumu na mbya. Ibótó na mu a kamiyé : navwana bema mé be betye mu a sebwétyé eviya emboka Anyambé be ngandi e samaka. Na Meri na vókó, na, Ilina dyamé dyi’tiyetye Mopandyi.

Na ilina dyamé dye sarandi na Anyambé Mondyiyi amé.

Navwana a tanginandi igumya dya mosey’adu a mwado ; navwana, lóngókóte, eviya tyatya’va magona maziépi ma ngé tubaka ngwé na, ibótó.

Navwana Ayé na ngudi Ayi’ngwé seni bema betubwé na dina dyadu dyendi hole.

Kéngó-adu eyéndi e tango mé e nyóyó mu eviya mbambi na mbambi.

A leviyéndi ngudi na ebó-adu ; A variyéndi nga mamémi na bibiyé bya melema myaya.

A gumiyéndi na ngudi eviya madidi maya, na mu na betiyétyé wa gumieni.

O liyéndi nga rayi na bema bya sa, A timbiyétyé benami gape.

A sanandi mosey’adu Israel, izimbuwé dya kéngó-adu.

Ené nga kaletye Mu na walalé, na Ebraham, né’bóngó dyadu egombiéziépi.

Na Meri nava ediyaka na mu ené wa ngóndé nyelalo, na mu na timbaka e mbadadu méni.

Nandi egombe a Elisabet é’dyadi a gondyeneni e betyendi epaba ; na mu na dyayaka mwa’momu. Na wa betye na mu baka, na wana wa nyangwé wa vó’kaka nyanga e leviyetye Mopandyi mu kéngó-adu etubwé ; na wa nava esaraka na mu.

Na ebetyendi e dyoba dya ebuwa, na wa na vyaka isébé dya mwana ; na wa na vandyétyé mu dina, dina dya gangwé na, Sakaraias. Na nyangwé na’vwanaka na mu na vókó, na, Hanga na ; ndi amé tubwétyé na Jon. Na wa na vókó na mu na, Ebe na idyawé dyavé ayé vandyemeni dina médyi. Na wa nava esaka gangwé ndembo, na, atokalé mu a tubwétyé ra. Na mu né’pwaka ima e léndwéné, na mu na léndétyé na, Dina dyadu ndi Jon, na wa waziépi nava’mamanaka. Na modumbu-adu na dibwaka e ro mé a’vókó, na elémé-adu na hulwamaka, na mu nava kalaka, a bendétyé Anyambé.

Na dyóngó na bómbókó wa betye iluweneni waziépi, na ivódi mé dyi dyéziépi na samanaka e ezityi a mokodi a Judia éziépi. ¿ Wó tyetye dyo waziépi wa nandyiyetyendi dyo e melema myaya, na, Mwa’mé anó a malé bétyé ra dyóngwé ? Ebó a Mopandyi e betyendi na mu.

Na gangwé Sakarias na londaka né’lina dyasa, na mu na sókókó na.

Ibótó na Mopandyi Anyambé a Israel ; navwana a lumbéndi, ng’óbó mu wato wadu.

Emuwéndi’wé tóngó a dyonga e mbada moseyiadu Devid.

Ené nyanga e kaletye mu na modumbu a mesótyi myadu mya hole, me betye eviya e dyali dya zie.

Na evara ndi emó’ngak’éwé eviya waloni wago, na eviya ebó a wa vin’iwé waziépi.

Isa dya kéngó a kwenetye wa lalé wago, na izimbuwé dya ndakono-adu eyé hole ;

Ikana dye kanetye Mu na lala’go Ebraham.

Na angandi tayaké’wé, etóndy’iwé véndyemeni ebó a waloni wago, le mu dyandyaka Mu mbagó dyóngó.

Na hole na gondyeneni e mondongo-adu, minya ma eménó-ago maziépi.

Na óvé mwana engandi tubwétyé na, mósótyi a Ayé e loba la loba, navwana engandi tyétyé e bogo-a Mopandyi ikendyé dya mareya madu.

Itaya dya wato wadu ipulé dya dyonga na dyiyidyé dya bebeva byaya.

Na kéngó a Anyalbé-ago ebóbó, yondi’lumbé mbaka mbaka a dyobé’wé eviya loba.

Itaya dya wayé iviti na’didindyé wedi bwe, itumbwana dya mabó mago e reya a dyonga.

Na mwana na tombwaka amu-ódókó na Ilina, adiyetyendi e ndyinga kwanga dyoba dye levuwetye mu Israel.

E betyendi e minya mé mara, na elekanako na vyaka mboka Sisa Augustus, na zie éziépi e langwetye tango. Tango méni otetyendi e sowé egombe e betye Sairinius góveni a Siria. Na mwéziépi na tyé langwétyé, moto mwéziépi e mboka’du méni.

Na Josef na vyaka eviya e galilli, e mboka a Nazaret, na ityé e Judia, e mboka a Devid e tubwé na Bethlihem (navwana a betyendi a mbadi na umbiko a Devid. A tyé langwétyé na mwadadu a betye mu sóyeni, amu utubwé na dyemi.

Na ebetyendi, va betye wa e vara, na minya ma idyadi na timaka. Na mu na dyayaka ndyad’adu a momu, na mu na dingaka mu na medamba, na mu na nandyiyétyé mu e velika vya hondyo, navwana wa bebé né’boko e mbada wandyi.

E yo ezityi mé ebetyendi na watati wa medómbé wa diyaka e zityi wa tataka myanga myaya na elu. Na lóngókóte, endyél a Mopandyi na vyaka va yé wa, na ivenda dya Mopandyi na panyaka iluweneni wa, na wa nava’nyóyókó na ngudi. Na endyel na vókó na wa na, enyóyetyeni, navwana naviyandi’nywé na sango-asa, a mbya etubwé, ema bétyé a wato waziépi. Navwana A yéndi nywé dyaweni emunya méni e mboka a Devid, Mondyiyi, ayé Kraest Mopandyi. Ndembo ema bétyé né’nywé ndi eni ; emandi kóbétyéni motyétyé dingweni na medamba, bya e velika vya hondyo.

E ro mé-a’vókó ndumba a ebumbu-a loba na bendyél, wa bendétyé Anyambé, na.

Ivenda na Anyambé e loba, (la loba) ezie dyonga, upango a sa na wato.

Na ebetyendi, va tyédyenetye bendyél eviya vabetye wa na tyé bómbó e loba na watati wa medómbé nava evókó waméni na waméni, na, Le telé tyéyéni e Betlihem, itóyó dya ima mé eyé semeni, eyé Anyambé iwé puliyeni. Na wa nava’pabaka bovoliyétyé, na wa nava’kóbétyé Meri na Josef, na motyé tyé bya e velika vya hondyo.

Va betye wa wa tóyó, na wa na puliyétyé upako mé mo puluwetye wa egala mwamé’no. Nandi waziépi wó’tyetye, wa mamenetyendi bema mébesebwetye watati wa médómbé wa. Ndi Meri a tatetyendi bema mé bi biéziépi, na mu a pikiliyaka byo na molem’adu. Na watati wa medómbé na timbiyénétyé, wa tyétyé wa tayaka Anyambé ivenda né’bendé e gala bema be betye wa wó kaka na be tóyetye wa biéziépi, gondye neni na nyanga betye wa wa sebwaka na wa.

Ve betye minya ebuwa ma tima mé’sébwé dya mwana, a vangwetyendi dina na Jesus, dina dye vandyetye endyéli mu evara mu mbó ta bapwé dyeimi.

Va timetye minya madu na ipudywé gondyeneni na elekanako-a Moses na wa na vyaka na mu e Jerusalem, ileviyé dyadu Mopandyi. (Ené nga yé yo léndweni) elekanako a Mopandyi, na momu mwéziépi a dibwa ibumu amé tubwétyé na, hole vayé Mopandyi. Na itaya dya mwambo gondyeneni na eyé vóweni e elekanako a Mopandyi na, wana mapepa mabaye dyélé wana mbenga nyebaye.

Lóngókóte, ebetyendi na momu e Jerusalem, dina na, Simion ; momu abetye a gondyeneni a-sa, a vurétyé isarwéné dya Israel ; Ilina dyasa dye betyendi na mu. E levuwetyendi mu na Ilina Dyasa, na, a vó ta’tóyó iwedi kabo óta tóyó Kraest a Mopandyi. Na mu nava vyaka e témpél né’Lina Dyasa, va betye gangwé na nyangwé wa viya na motyétyé a Jesus isa dya yo mbémbó a elekanako. Na mu né ngaka mu e mabó madu, na mu na bendétyé Anyambé na.

Nandi Mopandyi likaka mosey’avé a tyétyé na dyonga gondyeneni na ndagavé.

Navwana migó mamé ma tóyóndi dyonga dyavé.

Dyebetyevé e kendyétyé e bogo a wato waziépi.

Bwe e panyaka e betomba bevókwé, na ivenda dya wato wavé Israel.

Na Josef na nyangwé na mamanaka bema be kalwetye egal’adu. Na Simion na tuwaka wa ibótó, na mu nava’vókó na nyangwé Meri na, Lóngókóte, mwa’ménó a yéndi témuweni e ikwa na dyimwa dya wabóló e Israel, na ndembo enga kalwétyé ebeva. (E’ukwalé’bótó mongandi tubaka tegó ilina dyavé méni) na evara ndi enga salamaka mapikiliya ma melema mebóló.

E betyendi na Ana evókó, mósótyi a mwado, mwa Fanuel, a umbiko a Aser, abetyendi amu motodu’bólómé, na mu a betyendi na momu mepuma motoba na vókó eviya ngóni. A betyendi mokusi mabo ma mepuma ebuwa na mepuma menayi, mba véndyémétyé eviya e témpél, ndi a diliyetyendi Anyambé na ihindina na rayi na makaliya elu na emanda. Vé retye mu egombe méra na mu na va tayaka tegó Mopandyi akeva, na mu na va e kalaka na wa betye wa tokaka dyóbwé e Jerusalem waziépi e galadu.

Va betye wa wasa bema biéziépi gondyeneni na elekanako a Mopandyi, na wa na va etimbaka e Galili, e mboka’ya méni Nasaret.

Na mwana na tomwaka, na mu nó’dókó na Ilina, londeni na ipulé ; na ehekwé a Anyambé e betyendi e mboka mu.

Ndi gangwé na nyangwé wa betyendi wa tyétyé e Jerusalem upuma t’upuma mwéziépi e isango dyé nókó. Va betye mu amu dyomu dya mepuma na mepuma meba motodu, na wa na va betaka na tyé bómbó e Jerusalem, gondyeneni na isowidi dya isango. Va betye wa wa timiyé minya mé, na wa nava etimbaka, na etumbé a Jesus na likanaka e puga e Jerusalem, ndi Josef na nyangwé wa be pulé yo. Ndi wé biyetyendi na a yéte e moramba, na wa na vé mwaka etyéndó a dyoba ivókó ; na wa na va etokaka mu e madyawé maya na e wadiya waya. Va betye wa mba duwaka mu, na wa navagó timbaka e Jerusalem, wa tyétyé wa tokaka mu. Na ebetyendi e minya malalo na wa na va duwaka mu e témpél, diya e tétéi a wékuwini a votyiyétyé wa, né mu épwaka wa nyuwe. Wó tyetye waziépi wa mamenetyendi ibómbiyé na dyavwinidi dyadu. ¿ Va betye wa wa tóyó mu, na wa na mamanaka, na nyangwé na vókó na mu na, Mwana, eyé l’iwé seni nga nana dya ? Lóngókóte iwé na góngwé le tokandivé na mambwangó. ¿ Na mu na vókó na wa na ebéndi etokakani ngwé nénde ? ¿ Epuléni na, na tokandi diya ebolo a Lalé ? Ndi wabe ebómbiyé isebwidi dye kaletye mu na wa. Na mu na va gumyaka na wa na e Nasaret, a diliyetyendi wa ; ndi nyangwé a betyendi a tataka ndaga ményi nyéziépi ebuma-du a molema.

Na Jesus na tombwaka né pulé na motéyi né’tóndi dy’Anyambé na wato.

E upuma a dyomu na metanu a ipanga dya Taibirlos Sisa Pontius Pailat goveni a Judia, Herod Titrak a Galili, mwa nyangwé Filip Titrak a Ituria na tétéyi nya Trakonaitis, Lisanias Titrak a Abilini. Anas na Kaifas prist nya myolo, na ndag’Anyambé na vyaka vayé Jon mwa’a Sakarias e ndyinga.

Na mu na vyaka e tétéyi nya Jordan nyéziépi a pakwaka baptisma a dyilwa dya melema e iyidyé dya bebeva ; E né’nga yé yo léndweni edyanganangobo a ndaga nya mosótyi Iseas, na, dyoyi dyómbókó dya maka e ndyinga na, Kendyétyéni mareya ma Mopandyi, témiyétyéni metyetye myadu.

Itaba dyéziépi dye ngé londuwétyé, mokodi na ekondolo byéziépi be ngé gumuwétyé, bya tyendyemeni be ngé témuwétyé, reya nya potapota nye ngé pangwétyé vévélé ;

Mogoni mwéziépi mo ngé tóyókó dyonga dya Anyambé.

¿ Na mu na vókó na bebumbu be vetye ibatuwé va yé mu na, A, igona dya nyó ra nda keleviy’inywé na tilakani malingwa ma viya ? Nandi lóngókóni bebuma be yé lutyeni dyilwa dya melema, ni’nywé e yaletyeni’vó e melema myanu na, Le yi na lal’ago Ebraham, navwana na vóndi nénywé na, Anyambé a yéte a yólétyé dyimuwé dya malale mé ma, ma mu wana wa Ebraham. Nandi ubótyé moyétegó nanguweni e tina a bele, evara vókóna el’éziépi eyé e lóngó bebuma bya sa e kwélwéndi né yo e vugwé e veya.

¿ Na wato na vé’pwaka Mu, na, nandi le setye gó rémé ? A vwenetyendi na mu na vókó na wa, na, ayé na ngóyi nyebaye, a kabetye n’ayé mba bétyé ; a yé na bedya, a setye tegó nyanga mé.

¿ Na wéndyi duti na vyaka ibatuwé, na wa na vókó na mu na, Lalé, le setye lé rémé ? Na mu na vókó na wa na, indyetyeni wa, na nyanga eyi’nywé voweni.

¿ Na sódyé né pwaka tegó mu, na, Iwé le setye lé remé ? Na mu na vókó na wa na, esetyeni moto ndyuke, n’inywé e batyetyeni moto ima e gape, n’inywé e mu diyakani swémiyeni né’vé’dyanu.

Va betye wato wa vurétyé, na waziépi wa betyendi wé biyétyé e melema myaya e gala Jon, na ityé mu ndi Kraest, ityé abe ; mu. Jon a’vwenetyendi na mu na vókó na wa waziépi, na, Pónipóni na batiyéndi’nywé na meba, nd’umbókó a yé ngudi wa na ngwé a viyandi, na by’oyeni né’vurwa dya mokódi a makogo madu ; Mu nd’anga batiyétyi’nywé na Ilina Dyasa na veya. A yi na ivyó ebó-adu, A ngé vyóyókó ndék’adu, né Mu a yolé hwit e mbad’adu ; nd’A ngandi dityiyétté bevudu na veya vya mba dimaka. Na bema bevókwé bebóló bya ikeleviyé be pakwetye mu wato.

Ndi va detyetye mu Herod Titrak, e gala Herodias mwad’a mwanyangwé Filip na e gala bebeva byéziépi be setye Herod. A badetyegó eni wa na byéziépi, ivélé dya Jon et meboka.

Nandi va betye wato waziépi wa viya’batuwé, na Jesus na batuwétyé tegó A mu kaliyaka, loba le dibwemetyendi. Ilina Dyasa dye gumyetyendi va yé Mu na uvela a nyolo ené mbenga, na dyoyi na vyaka eviya e loba na. Ovéndi mwamé a tóndé ngwé ; a tóndiyé ngwé dódó.

Jesus uméni a mu tokaka pabiyé mabo ma mepuma malalo motodu (ené nga pikiluwé na) , a betyendi mwa’a Josef, a betyendi mwa’Hilai. A betyendi mwa’a Matat, abetyendi mwa’Livai, a betyendi mwa’a Melkai, a betyendi mwa’a Jana, a betyendi mwa’a Josef. A betyendi mwa’a Matataias, a betyendi mwa’Emos, a betyendi mwa’Neum, a betyendi mwa’Eslai, a betyendi mwa’a Nagi. A betyendi mwa’a Maat, abetyendi mwa’a Matataias, a betyendi mwa’a Sémiai, a betyendi mwa’a Josef, a betyendi mwa’Juda. A betyendi mwa’a Joana, a betyendi mwa’a Risa, a betyendi mwa’Sorobabél, a betyendi mwa’a Salatiél, a betyendi mwa’Nirai. A betyendi mwa’a Melkai, a betyendi mwa’a Adai, a betyendi mwa’a Kosam, a betyendi mwa’a Elmodam, a betyendi mwa’Er. A betyendi mwa’Josi, a betyendi mwa’Eliser, a betyendi mwa’Jorim, a betyendi mwa’a Matat, a betyendi mwa’a Livai. A betyendi mwa’a Simion, a betyendi mwa’Juda, a betyendi mwa’a Josef, a betyendi mwa’Jonan, a betyendi mwa’Eliekim. A betyendi mwa’Milia, abetyendi mwa’Minan, a betyendi mwa’a Matata, a betyendi mwa’a Netan, a betyendi mwa’a Devid. A betyendi mwa’Jesi, a betyendi mwa’Obed, a betyendi mwa’Boos, a betyendi mwa’Salmon, a betyendi mwa’Neason. A betyendi mwa’Aminadab, a betyendi mwa’a Eram, a betyendi mwa’Esrom, a betyendi mwa’Feres, a betyendi mwa’a Juda. A betyendi mwa’a Ebraham, a betyendi mwa’a Tera, a betyendi mwa’a Nekor. A betyendi mwa’Seruk, a betyendi mwa Rego, a betyendi mwa’Felek, a betyendi mwa’a Hibir, a betyendi mwa’a Sala. A betyendi mwa’Kainan, a betyendi mwa’a Arfaksad, abetyendi mwa’a Lemek. A betyendi mwa’a Metusela, a betyendi mwa’Inok, a betyendi mwa’Jered, a betyendi mwa’Malilil, abetyendi mwa’a Kainan. A betyendi mwa’a Inos, abetyendi mwa’Set, abetyendi mwa’a Adam abetyendi mwa’Anyambé.

Na Jesus na vyaka eviya Jodan londeni na Ilina Dyasa, na Mu na tyéwénétyé na Ilina e ndyinga. A diyetyendi mabo ma minya manayi A dywétyé na dévil, A be dyaka e minya mé mara : ndi va ziyetye mo, na mu n’okaka rayi. Na Dévil na vókó na mu na, Etóndyé na eyéndi Mwa’a Anyambé, sombétyé ilale médyi na dye diyetye bedya. Na Jesus na’vwanaka mu na, E-yi léndwéni na, moto a va diya kabo na bedya pa, ndi tegó na ndaga’Anyambé éziépi.

Na dévil na betaka na mu e mokodi ó’domba, na yo na va leviyétyé Mu mapanga ma zie maziépi ukil’utiki. Na dévil na vókó na Mu na, ngudi méni ézié né’venda dyaya, ndi bema etayaka ngwé’vé, na-wana bendi ngwé taweni na moto mwéziépi a ma tokaka ngwé itaya dya byo na taya. Etóndyé ebóbó ikaliya dyamé, biéziépi be mandi bétyé ibyavé. Na Jesus na vwanaka, na mu na, vókó na mu na, véndyémétyé ngwé puga Setan na vwana eyi léndwéni, na, kaliyaka Mopandyi Anyambé’avé, e mu diliyétyé mu ipó.

Na yo na pabiyétyé Mu e Jerusalem, na yo na témiyétyé Mu e sókó a témpél, na yo na vókó na Mu na, Etóndyé na eyéndi mwa’Anyambé pukwaka eviya vara. Navwana eyéndi léndwéni, na, A mandi sombétyé bendyél byadu na be tatetye’vé.

Na byo be mandi egutyétyé’vé e mabó maya, evwa egombe te’gombe enyókó dokama ilale.

Na Jesus na’vwanaka na vókó na mu na, Eyi vóweni na, adyetye Mopandyi Anyambé-avé.

Va betye dévil e sutyé dyadyé dyéziépi, na yo na likaka Mu ukili.

Na Jesus na timbaka e Galili na ngudi a Ilina, na kuma’du na samanaka’tétéyi ményera nyéziépi. Na mu né’kuwétyé e Sinegog nyaya, waziépi wa bendétyé Mu.

Na Mu na vyaka e Nasaret, va tombwetye Mu : Na gondyeneni na mbémbó-adu, Eretyendi e Sinegog e dyoba dya dyódyó, na Mu na témétyé ilanga. Na Mu na bómbuwétyé edyanganangobo a mosótyi Iseas. Va betye Mu edyanga-nangobo dibweni, A duwetyendi iboko dye betye léndwéni, na,

Ilina dya Jehova dyeyi na Ngwé, navwana a yi ngwé tyibweni mavulé ipakwa dya mekuge sango-asa, ayi ngwé lomeni e dyondyiyé dya wayé melema mobukani, ipakwa dya mbala ihulwama, itimbiyé dya pógu migó, ihulwama dya wayé motisamani.

Ipakwa dya upuma mo séngwélé a Jehova.

Na Mu na dibaka edyanganangobo na mu na tayaka yo emboka molomwui, na Mu na diyaka diya, na migó ma wabetye e Sinegog maziépi na vongwamaka e mboka Mu.

Na Mu na yalétyé evó na wa na, emunya méni ndi etima iléndwé mé dyi e maló manu. ¿ Na wa waziépi na pakwaka egala’du, wa mamanaka ndaga nya ehekwé nye kudwetye’modumbu-Adu, na wa na vókó na, Abe mwa Joséf anó ?

Na Mu na vókó na, Emandi kanakani ngwé mokanakódi mému, mbambayé Nganga, ondyiyétyé nyolo-avé, beyi wé otyeni na beyé semeni e Kapernaum, saka tegó byo e zity’avé eva. Na Mu na vókó na, pónipóni na vóndi nénywé na, Mosótyi a séngwélé’ezitya’du méni. Ndi na sebwandi’nywé mbambayé, mekusi mebóló ma betye Israel e minya ma Ilaias, va betye loba dibemeni mepuma melalo na ngóndé motoba, va betye rayi etubwé ezityé’ziépi. Ndi Ilaias a be’lomwé e mboka wa, kabo e Sarepta, mboka a Saidón, vayé mwado a betye mokusi. Na bimba bebóló bebetye e Israel’egombe a mosótyi Ilisius ; wa byo nga no’Mbókó kabo Neman a Siria.

Na wabetye e Sinegog waziépi, na londaka na dyeku, vó tyetye wa bema mébi. Na wa né’mwaka, na wa na ziraka mu e bwebwe a mboka, na wa na tyétyé na Mu e magumidi ma mokodi ma mboka’ya e longwetye, na evara ndi va ma eziraka wa mu e zie molo na zie. Nda doletyendi e tétéy’aya, na Mu na tyétyé adu’gali.

Na Mu na gumyaka e Kapernaum, mboka a Galili, na Mu né kuwétyé wa e dyoba dya dyódyó. Na wa na mamanaka dyikuwinidi’dyadu : navwana ndaga nyadu nye betyendi na ngudi.

E sinegog ebetyendi na moto a betye na ilina dya dévil nyebeva, na Mu na’maka na dyoyi e loba. ¿ Na, likaké’wé mbwe Jesus a Nasaret, le yéndi navé nénde ? ¿ E béndi e vyaka e dyoya dyago ? Na pulété’vé, óvé nd’umbókó a Anyambé a Hole. Na Jesus na dekaka mu, na, vokaka voo, né’vé ekudwa vayé mu, vabetye dévil e vuga mu e tétéyi, e véndyemetyendi’mboka mu mbó tyiyétyé mu bwayi.

Na wa waziépi na mamanaka, wa mu kalaka wa méni na wa méni, na, Eyélé nga ra ndazié eni, navwana a sombéndi malina mabeva na ipanga na ngudi, né mo ma véndyémé. Na kum’adu na tyétyé iluweneni iboko diéziépi dya ezityi méra.

Na Mu né’mwaka e Sinegog na Mu né’raka e mbada Saimon, na nyangwé na mwada Saimon na duwamaka na ivévu itubwé ; na wa na sósélétyé Mu egala’du. Na Mu na témétyé baka na Mu, na Mu na va dekaka ivévu ; na dyo na likaka mu, e ro mé a vókó na mu né mwaka a mu dyandyaka wa.

Nandi va betye dyoba dye tyétyé, wa betye na mepondyi mya mbela nye bóló waziépi wa vetyendi na myo’mboka Mu, na Mu na batétyé mabo madu e mboka myo myéziépi na Mu nóndyiyétyé wa. Na dévil na véndyémétyé e mboka wabóló, nya maka na, Ové ndi Kraest mwa’a Anyambé, na Mu na dekaka nyo, A be bóbó nyo nye kalaka na-vwana ; nye puletyendi na Mu ndi Kraest.

Va betye yo emu emanda na Mu na tyétyé iboko dya ndyinga ; na wato na tokaka Mu, na wa na vyaka emboka Mu, na wa na zimbétyé Mu na, a nyokó elika wa. Na Mu na vókó na wa na, na lukate’pakwa ipanga dya Anyambé e mamboka mavokwé tegó ; navwa-na, yondi e lomwetye ngwé.

Na mu na pakwaka e Sinégog nya Galili.

Ebetyendi va betye wato wa pityilaka Mu e dyoka, dya ndaga nya’Anyambé, na Mu na témétyé e ediba a Jeneraset. Na Mu na tóyókó belende bebaye kubu e ediba, wagombwi wa betyendi wa gumya, wa sugaka belóba byaya. Na Mu na vélémétyé’elende’vókó e betye a Saimon, na Mu na sósélétyé mu na, a gwésiyetye yo na zie kwé, na Mu na diyaka diya na Mu né’kuwétyé Wato e elende.

Nandi va ziyetye Mu ekala, na Mu na vókó na Saimon na, gwésiyétyé na e dóku, e gumiyéni belóba byanu e mogombo. Na Saimon n’avwanaka Mu na, Lalé le yéndi dyandyeni elu méni éziépi egugu mba bómbókó ima, ndi va vó’vé, na mate’gumiyé elóba. Nandi va betye wa wa sa na, wa dibiyetyendi ityinda dya weyi itubwé na ngudi ; elóba emu nyawaka. Na wa na pépétyé nga ramba’ya, wa betye elende’vokwé na, wa vetye’sanaka wa, na wa na vyaka, na wa na londiyétyé belende biéziépi bebaye, be mu tokak’éda.

Va tóyetye Saimon Pité na mu na kwaka e mako ma Jesus na, O Mopandyi, véndyémétyé vayé ngwé ; na-wana nayi motu’beva. Na vwana mu, na wabetye na mu, wa mamenetyendi ityinda dya weyi ny’oyetye wa. Yo nyanga mé te a Jems, na Jon, wana wa Sébédi, wa betye na Saimon e ramba. Na Jesus na vókó na Saimon na, Enyóyetye ; eviya e tyatya’va emandi bómbókó wato. Nandi va betye wa wa tundyé belende byaya ezie, wa lityetyendi biéziépi, na vitétyé Mu.

E betyendi va betye mu e mboka na’gugu lóngókóte moto a betye ti na imba ; a tóyókóte Jesus na Mu na kwaka e pwandya’du, amu esósélétyé Mu na, Mopanndyi, etóndyé e panga, eyéte na ngudi e pudyé ngwé. Na Mu na gambiyétyé ebó-Adu, ava ekupénétyé Mu, na, napangandi, puwaka. Na imba na véndyémétyé va yé mu e romé-a’vókó. Na Mu na sombétyé mu na, a sebwetye moto, ndi tyétyé, né eleviyé nyolo avé Prist, e taya egala ipudywé’dyavé ené nga’sombetye Mosés ené tali e mboka wa. Ndi kum’adu e samenetyendi gó wa ; na bebumbu betubwé na va eyolénétyé, wa viyó’kaka, na wa viyó’nguwétyé mebwayi myaya e mboka Mu. Na Mu na va timbamaka e ndyinga a tyé e kaliyaka.

E betyendi e dyoba’né gugu va betye Mu ékuwétyé, na Farisis na wékuwi wa belekanako wa betye e mboka a Galili, na Judia na Jerusalém dyéziépi na wa na diyaka diya ; ngudi a Mopandyi e betyendi’téyi e dyondyiyé dyaya.

Lóngókóte, wato wa vetyendi na momu a betye na bwayi a nyolo molimbani e ikondo ; na wa na tokaka reya ériyétyé mu, inandyiyé dyadu e pwandya’du. Va betye wa wa diye na ngudi eduwa egali na’gugu ériyétyé mu na tina a ebumbu, na wa nava ebetaka e mbadi’loba, na wa nava egumiyétyé mu na dya moduwa na inango e tétéyi e pwandya a Jesus. Va tóyetye Mu ikamiyé dyaya, a va evókó na mu na, momu bebeva byavé biyidywé ndivé. ¿ Na waléndi na Farisis na yalétyé ipikiliya, na, randi akala malowi anó ? ¿ Ra nda’yé éyidyétyé bebeva hanga Anyambé ipó ? Va betye Jesus a pulétyé mapikiliya maya na Mu na vwanaka wa, na, e pikiliyandini inde e melema myamu ? ¿ Ende ndi eyé ebóbó wa, na ivó dyana, bebeva byavé biyidywéndi’vé ; ityé ivó dyana, imwaka emu tamwaka ? Na, na, evara ndi ema puléty’inywé na Mwa’moto ayi na ngudi e zie iyidyé dya bebeva (Na mu na vókó na upondyi a nyolo limbe limbe na) Na vóndi na’vé na, imwaka, né’vé inga inango dyavé né e tyéyé e mbada’vé. Na mu né mwaka e ro mé-a’vókó e pwandyaya na mu né ngaka ebetye mu bya, na mu na tyétyé e mbada’du méni, a tyétyé a bendétyé Anyambé.

Na waziépi na mamanaka, na wa na bendétyé Anyambé, londeni na dyóngó, na, le yéndi tóyeni bema be mamwéné emunya.

Va betye bi nana be ziya, A tyétyendi na Mu na va toyoko mundyi duti, dina na, Livai diya iboko dyingwé duti ; na Mu na vókó na mu na, vitétyé ngwé. Na mu na likaka biéziépi, na mu né mwaka na vitétyé mu.

Na Livai na sidyétyé Mu isango itubwé e mbada’du méni ; etéyi’betyendi na ndumba’wéndyi duti na wavókwé wa betye diya na wa e bedya. ¿ Ndi waléndi waya na Farisis wa tótyelenetyendi na bikuwi byadu, na Rémé ndi edyé’nywé né inywé enyakani na wéndyi duti na wato wa beva ? Na Jesus na’vwanaka wa na, wayé mepesa wa toka nganga, kabo wato wa daka. Na be vyaka e dyonda dya wa sa, ndi kabo wabeva, e dyilwa dya melema.

Na wa na vókó na Mu na, Rémé lé e hindina bikuwi bya Jon ro nyebóló né wa wa saka makaliya, yo nyanga mé te a bya Farisis ; ¿ Ndi ibyavé be dyaka né byo be nyaka ? ¿ Na Mu na vókó na wa na, eyété pangakani nga velika vyó’bómbi wa hindinaka ukili moyé ubayi na wa ? Ndi minya ma viyandi, ma ngé’ngwénétyé ubayi wa, nandi wa va viya’hindinaka e minya mé mara.

Na Mu na kanaka wa mokanakódi na, ebe na moto a vélé epusi a modamba’tyatya e modamba a vyo, etóndyé asandyé yo vókóna a tyatya mo nyawandi, na epusi mé ingwé a tyatya ebe ngudi gondyéné na a vyo. Ebe na moto a vélé ivé dya tyatya e mbute a vyo, evwa ivé dya tyatya dye nyókó ganda e mbute, né dyo dye tyibwama né mbute e gumbana. Ndi ivé dya tyatya dye velwéndi e mbute a tyatya, vókóna byéziépi be tatamandi. Ebe na moto abé a nya ivé dya vyo, né mu a tokaka gó dya tyatya e ro mé a vókó ; na-vwana a vóndi na, dya vyo, dye yéndi enyévé wa.

E betyendi e dyoba dya dyódyó dya mabaye va betye dya bogo doli na Mu na dolaka e bekanga bya mbasi ; na bikuwi byadu na bukaka mbasi, wa mu edyaka, wa zilaka nyo e makóró maya. ¿ Na Farisis nyevókó na vókó na wa na, E linde-anu esé nywé esakani eyé ebo gondyeneni né’sa e moba ma dyódyó ?

¿ Na Jesus na’vwanaka wa, na, ega langakani dyéléte eni, esetye Devid a saka, va betye mu na wa betye na mu vóka rayi ? ¿ Vé retye mu e mbada’Nyambé, na mu na dyaka pémbé é’levuwé, na mu na tayaka tegó wa betye na mu, eyé ebebé gondyeneni na mu-a dyaka kabo Prist ipó ? Na Mu na vókó na wa, na, Mwa’moto ayéndi Mopandyi tegó a dyoba dya dyódyó.

E betyetegó e dyobé vókwé dya dyódyó na Mu né raka e Sinegog A mu kuwétyé etéyi e betyendi na momu a betye ebó-a’bómwé movisani. Na waléndi na Farisis na bémbétyé Mu, na ityé a mandi ondyiyétyé mu e dyoba dya dyódyó ; na na, evara ndi vama duwaka wa ponda e mboka Mu. Ndi a betyete puleni ipikiliya dyaya, na Mu na vókó na momu a betye ebó movisani na, imwaka né’vé etémé e tétéi, na mu né mwaka na mu na témétyé.

Na Jesus na vókó na wa, na, Na mandi’pwaké’nywé ima evókó, ¿ Eyéte gondyeneni na isa dya enyévé e dyoba dya dyódyó, ityé isa dya’beva ? ¿ Dyondyiyé dya eménó, ityé dyoya dya yo ? Ava elóngókó iluweneni wa waziépi, na Mu na vókó na momu mé, na, gambiyétyé ebó-avé. Na mu na saka na, na ebó-adu na timbaka upesa ené evókwé.

Na wa na londaka na dyeku ibóló ; wamu tingaka wa méni na wa méni nyanga ema’saka wa na Jesus.

Ebetyendi e minya mé mara na Mu na va’tyétyé e mokodi a tyé’kaliyaka, na Mu nava doliyétyé ikaliya dya Anyambé elu egugu.

Va betye yo emu emanda, na Mu nó ndaka bikuwi byadu ; na Mu na pónókó etéyi dyomu na bebaye, be vandyetye Mu na, metodu. Saimon (a betye Mu a vandyétyé na Pité) na mwa’nyangwé Andru, Jems na Jon, Filip na Bartolomiu. Matiyu na Tomas, Jems dya Alfius, na Saimon e betye etubwétyé na Silotes. Na Judas nwa nyangwé na Jems, na Judas Iskariot a betye mokóndi Mu.

Na Mu na gumyaka na wa, na Mu na va témétyé e dyémbé, na ndumba a bikuwi byadu, na ebumbu a wato etubwé e vetye e Judea éziépi na Jerusalém na eviya e betébé bya Tair na Saidon, wa viyó’kaka Mu na dyonguwé dya mebwayi myaya. Na wabetye wa tóyókó ndyuke na malina mabeva na wa na vó nguwétyé. Na ebumbu éziépi na tokaka ekupéné Mu, navwana ngudé’ziépi e vetyendi eviya mboka Mu, na yo nóndyiyétyé wa waziépi.

Na Mu na va betiyétyé migó madu’mboka bikuwi byadu na Mu na vókó na, Ibótó né’nywé mekuge navwana ipanga dya Anyambé dye yéndi idyanu. Ibótó nénywé wóka rayi tyatya’va ; navwana engando’lakani. Ibótó né’nywé wéya tyatya’va ; navwana engandi ziétyétyéni.

Ibótó né’nywé, etóndyé wato wa vinéty’inywé né wa wa paluwéty’inywé e ramba nyaya, né wa wa lowaké’nywé, né wa wa vugaka dina dyanu ené na dyendi ibeva, egala mwa’Moto. Sarakani e dyoba mé dyera, n’inywé emu sodakani na mbya, navwana lóngókóteni magomwi manu mayéndi ma tubwé e loba ; navwana wagangwé waya wa setyete mesótyi isedi mé.

Ndi maguga né’nywé benami, navwana eduwandini mbyaanu póni.

Maguga nénywé wa yé oleni, navwana engando’kakani rayi, maguga nénywé wa ziétyé tyatya’va, navwana engandi tóyókóni mambwangó n’inywé emu’yakani.

Maguga nénywé etóndyé wato waziépi wa kalaka enyévé egala’nu navwana wagangwé waya wa setyete mesótyi mya menoki na.

Ndi na vóndi nénywé wóka na, Tóndétyéni waloni wanu, sakani wa vininywé enyévé. Tuwakani ibótó e tango e lóku nywé, n’inywé emu kaliyakani egala wa ngongoliyi’nywé. Na a mé’ngwaka’vé ibuku ivókó tayaka mu ivókwé na a ma pwataka’vé ekapavé, e detyetye tegó mu e dyinga dya ngóya’vé. Vinyétyé a dyombévé mwéziépi ; a ma pwataka meba byavé ipwetye gó byo. Nyanga ema tokaké’nywé wato wa saké nywé, saka tegóni wa nyanga mé.

¿ Ndi etóndyé e tóndétyéni wa tónd’inywé, eyé léni na ra akevé ? Navwana wato wabeva wa tóndété wa tóndé wa. ¿ Ndi etóndyé e nyévétyéni wa nyév’inywé, eyéli na ra’kevé ? Navwana wato wa beva wa sate nyanga mé. Ndi etóndyé e tayakani iwanu wa petiyi’nywé na wamandi etimbiyé-tyinywé eyé li na ra’kevé ? Na-vwana wato wa beva tayategó wato wa beva na na, evara ndi va ma duwaka gó wa nyanga mé. Ndi tóndétyéni waloni’wanu, nyévénétyéni, vinyénétyéni, mba gó petiyétyéni ima ti’ma, vókona magomwi manu ma mandi itaka, n’inywé e ngandi bétyéni wana wa Ayé’Loba, na-vwana Ayéndi kéngó na wato wa beva na wa wayé wa taya mu akeva. Diyaka tegóni na kéngó ené ngéyé Góngwa’nu na Kéngó.

Eyétyiyenetyeni, vókóna eva yékuwéni, e kodyenetyeni, vókóna eva kodywéni iyidyénétyéni, vókóna iyidywéndini. Tayakani vókóna etawéndini, yéyi-asa, e bandwé na e tyibwéné, né yo e tyibwamaka, yondi e nga tayaka wa e ngonga nyanu, navwana’yéyi a dyéni’nywé, yo tegó enga’dywénéty’inywé.

¿ Na Mu na kanaka wa mokanakódi na, Pógu ete e tumbwana pógu evókwé ? ¿ Wa wabaye wava ekwa e mbela ? Mukwi a be wa na mukuwi-adu, ndi mwéziépi ayé gondyeneni a mandi diyaka ené mukuwi-adu.

¿ Inde ndi e lóngó’vé mosómbó moyé e digó dya mua nyungwé, ndi mba lóngókó mókókó moyé e digó dyavé méni ? Ndi eyélé evókó na mwa’nyungwé, na, mwa’ya ta sa, na véndyiyetye’vé mosómbó moyé’vé e digó, ndóvé méni mba lóngókó mokókó moyé e digó dyavé méni, vókóna e tóyóndi bwe ivéndyiyé dya mósómbó moyé e digó dya mwa’nyungwé.

Navwana ele asa e lóngó bebuma bebeva, na ele ebeva e lóngó bebuma byasa. Navwana ele éziépi e pulénéndi na bebuma byadu méni, navwana wato wa pata Fig e sóngé, né wa wa pata ivé e bombela. Moto asa e ngumba asa a molema’du a kuduwéndi bema byasa ; na mot’ubeva e ngumba’beva a molema’du, a kuduwéndi bema bebeva, navwana e’bóló a molema ndi ekala modumbu-adu.

¿ Ndi elinde etubénywé ngwé na Mopandyi, Mopandyi, ndi mba’sakani bema be vóyó ngwé ? Na mandi e leviyéty’inywé, a viya vayé ngwé, ókaka ndaga nyamé, né mu a saka nyo nyanga e kwana mu. A kwanandi momu a longa mbadi né mu a vwasa yo na dóku, né mu atyé yalétyé e ilale ; va viya tonda na meba maviya zikamaka e mbadi méra na ngudi, ebe na ngudi etyibéné ; navwana eyéndi bandemeni ilale. Ndi abé óka, né mu mba saka a kwanandi momu a londyiyé mbadi e zie, e diyé na idyanga, va zityemetye meba na ngudi na yo na kwaka bovoliyétyé, ndi ipukwa dya mbadi méra dye betyendi itubwé.

Ve betye Mu a sutyé ndaga nyadu nyéziépi e maló ma wato, na Mu né’raka e Kapernaum.

Moseyi a Senturion’vókó mo betye mu a tóyókó dyambo itubwé, a betyendi a dakaka piélé né’wedi. Vó tyetye mu egala Jesus, na mu na lomaka watodu wa Jiu e mboka Mu, wa tyé sósélétyé Mu na A vetye ondyiyétyé mosey’adu. Va pabetye wa e mboka Jesus, wa sóseletyendi Mu na ngudi, na, a tyé esaka’vé eni a yénd’oyeni. Navwana a tóndéndi etomba’go, na mu a yéndi’wé londyeni Sinegog. Na Jesus na tyétyé na wa’va betye Mu mba bétyé abiyeneni na mbadi, na Senturion na lomaka mboyi e mboka Mu, na mu na vókó na Mu, na, Mopandyi e setye nyolo-avé ndyuke ; navwana nabe oyeni na e pabaka ibumuku dya moduwamé.

Né ngwé nabe pikiliye nyolo-amé oyeni na iviya e mboka’vé, ndi kalaka ndaga pa, vókóna moto-amé óngandi. Navwana na yéndi momu a pangwé, né ngwé nayi na sódyé nye panga ngwé, na vóyó na anó na tyétyé né mu-a tyétyé ; nó’mbókwé na vyaka né mu a viya ; na mosey’amé, na, saka eni, né mu asa.

Vó tyetye Jesus bema mébi, na Mu nava mamanaka mu, na Mu né Iwamaka, na Mu na vókó na wato wa vitetye Mu na, nabe duweni ikamiyé ita nga nana, dyélé e Israel. Wa lomwetye va timbetye wa e mbadi, na wa na va kobétyé moseyi mobetye mo dakaka monga.

Bya, bwe, na Mu na va tyétyé e mboka e tubwé na Nen ; bikuwi byadu bebóló be tyétyéndi na Mu, na wato wa bóló. Va betye Mu amu baka na umbyó’gómba a mboka, lóngókóte ubimba a moto mokudwénétyé, nyangwé a betyete mu póni ityika, na nyangwé a betyetegó mokusi ; Wato wa mboka méra waziépi wa betyendi na mu. Va tóyetye Mopandyi mu, na Mu na tóyókó mu mambwangó, na Mu na vókó na mu na iyetyegó. Na Mu na vyaka, na mu na kupénétyé ilala dya ubimba ; na wabapi na témétyé de, na Mu na vókó na, Epatye na vóndi na’vé, na imwaka. Na a betye weni nava diyaka diya, amu e kalaka, na Mu nava bómbiyétyé mu nyangwé.

Na dyóngó na bómbókó mwéziépi, na wa na bendétyé Anyambé, na, Mosótyi utubwé mo kudwanandi e mbokéwé ; na Anyambé a lumbéndi wato wadu. Na upako mému na samanaka e Judea éziépi e gala’du na tétéi méra iluweneni.

Na bikuwi bya Jon na sebwaka mu bema mébi byéziépi. ¿ Na Jón na vóndaka bikuwi byadu bebaye na mu na lomaka byo e mboka Jesus na, Ové ndi A viya ? ¿ ityé le lóndyetye umbókwé ? Va pabetye wamu mé e mboka Mu, wa vótyi na, Jón Baptist a lomandi iwé e mboka’vé na, ¿ Ové nda’viya ? ¿ ityé le londyetye umbókwé ?

Ondyiyetyendi e viya iwéra mé dyera wabóló eviya mebwayi na bevuva, na malina mabeva, na Mu na dibwaka pógu nyebóló migó. Na Jesus na’vwanaka wa, na, Tyétyéni n’inywé esebwani na Jón be binywé e tóyókóni na byoké nywé ; ené nga tóyó pógu, bebóku be tamwaka, bimba be pudywétyé, potye nyo kaka, mebimba me tonguwénétyé na mekuge me pakwétyé sango asa. Ndi ibótó na a ma bétyé mba kóbókó na ngwé.

Va betye metodu mya Jón me tyétyé, a yaletyendi ikala na wato egala Jon, na, ¿ E tyétye léni e ndyinga itóyó dyénde ? ¿ Mongongo mo tyibénétyé nó pupé ? ¿ Ndi e tyétyé ndini itóyó dyénde ? ¿ Momu dayeni ibótó ibóbó ? Lóngókóte wa daya mabótó mé’venda, né wa wa diyaka nó’lunda, wa yéndi e mbadi nya mepolo. ¿ Ndi etyétyendini itóyó dye nde ? ¿ Mosótyi ? E, na vóndi né nywé na wa, na Mosótyi. Anó nana ndi ayé léndweni, na, Lóngókóte na lomandi motodu amé e bogo avé, ikendyé dya reya’vé e bogo-avé.

Ndi na vóndi nénywé na, Ebe na ayé dyaweni na mwado mosótyi moyé ita wa na Jón Baptist ; ndi ayé yéviyeni ipanga dya Anyambé a yéndi ita wa na mu. Na wato waziépi wó tyetye Mu a kalaka, na wéndyi duti wava etayaka Anyambé ngama batuweni na ibatiyé dya Jon. Ndi Farisis na wekuwi wa belekanako wa tyiyetye ndi e gala’ya méni upango a Anyambé, wa be batuwé e mboka Mu.

¿ Na Mopandyi na vókó na, na mandi ekwaniyétyé wamu wa igona médyi nénde ? ¿ Wa kwanandi wana tiké e maketi diye diye wó ndanaka na Le lóngóndi’nywé mabeka, ndi mba dyokakani ? ¿ Le diyandi’nywé e dyébó ndi, mbé yakani ? Navwana Jón Baptist a vetyendi mba dyaka pémbé, mba nyaka ivé, n’inywé na, ayi na dévil. Mwa’Moto a vetyendi a dyaka né Mu a nyaka ; n’inywé na lóngókóte madyake na monyei ivé, mboyi a wéndyi duti na wato wabeva. Nd’ipulé dyeyi kamuweni na wana wadu waziépi.

Na Farisis evókó na tokaka na, a dyetye na mu, na mu né raka e mbada Farisis na Mu na diyaka e bedya. Lóngókóte mwado, a mboka mé, a betye mot’ubeva, va puletye mu na Jesus a yéndi diya e bedya e mbada Farisis na mu na vyaka na mókóbé a Alabasta a uyómbó. Na Mu na témétyé e mako madu e puga, éyaka, amu sugaka mako madu na miguba a titwaka mo na we nya molo adu, a pyópyókó mako madu, a zisaka mo na uyómbó.

Va betye Farisis mé ondetye Mu e tóyó na mu na kalaka mu méni na, momu ménó a bétyé na a yéndi mosótyi, te a puléte mwado mé a kupéné Mu anó na nyanga eyé mu, navwana ayéndi moy’ubeva.

Na Jesus n’avwanaka mu na Saimon, na nayi néma a kalaka navé na mu na vókó na Mukuwi kalaka.

Ebetyendi na moto a betye wananwi wabaye ; umbókó nanweni kama nya fura nyetanu, umbókwé mabo matanu. ¿ Va betye wa mbéma a tayaka, éyidyetyendi wa waziépi, sebwaka ngwé eviya wa wabaye, ra nda’ma tóndétyé mu wa ? Na Saimon n’avwanaka Mu, na, né biyéndi na a betye mu éyidyétyé wa, Na Mu na vókó na mu na, Eyétyiyéndi gondyeneni.

¿ Na Mu né iwamaka e mboka mwado, na Mu na vókó na Saimon na, ¿ Etóyóte mwado ménó ? Né randi e mbada’vé ebe taye ngwé meba ma mako mamé ; ndi ayi suzieni mako mamé na miguba, a titwaka mo na we nya molo-adu. Ebe pyópye ngwé, ndi mwado ménó, ma ngwé né’ra agó dyókó né pyópyó dya mako mamé. Ebe pindwe molo amé mavulé ; ndi mwado ménó ayéndi pindweni mako mamé uyómbó. Ndi na vóndi navé na, bebeva byadu béyé bebóló biyidywéndi ; navwana a tóndéndi wa ; ndi éyidywé na dyana a tóndé tegó na dyana. Na Mu na vókó na mu na, bebeva byavé biyidywéndi’vé. ¿ Wa betye wa dyaka na Mu na yaletyendi evó e melema myaya na, ra gó a mu iyidyétyé bebeva anó nana ? Na Mu na vókó na mwado na, ikamiyé dyavé dyondyiyéndi’vé tyétyé na dyonga.

E betyendi e puga puzié, na Mu né’luwénétyé mamboka na mabókó maziépi, A tyétyé A pakwanaka né Mu a leviyétyé sangoa mbya a ipanga dya Anyambé ; dyomu na bebaye wa betyendi na Mu. Wado wavókó wó nguwetye malina mabeva na mebwai mevókwé, Meri a tubwétyé na Magdalin, a vénguwetye dévil motoba navókó. Na Joana mwada Tyusa tyoli a Herod, na Susana, na wavókwé wa bóló, wa betye wa dyandyaka Mu na ngumba’ya.

Va betye wato wabóló wa vetye e mamboka maziépi wa laténé ta na Mu na kanaka wa mokanakódi. Momwasi ibóngó a tyétyendi imwasé dyé bóngó dyadu, va mwasetye mu, ivókó dye kwetyendi e pépégu a reya ; na dyo na tiswétyé, na linyóni la loba na sóbókó dyo. Na ivókwé na kwaka ilale ; va tyétyetye dyo, na dyo na va visaka, navwana dyebe bé na tóyi a zie. Na ivókwé na kwaka e tétéyi a mekanda ; na dyo na mekanda na tyétyiyenetyé, na dyo na bómbókó kólu. Na ivókwé na kwaka e tyélé nya sa, na dyo na tyétyétyé, na dyo na dyayaka bebuma kama. Va betye Mu a sebwa bema mébi, na Mu n’amaka na, A yé na maló móka ótyetye.

¿ Na bikuwi byadu né pwaka Mu, na, mokanakódi mému mo yéndi evara dya ? Na Mu na vókó, na, Inywé ndi e yéni taweni ipulé dya magóyi mé panga dy’Anyambé ; ndi wa-vókwé kabo na mekanakódi, evara ndi vayé e botóyókó wa be ngudi yólé tóyó ; bokaka wabe ngudi bómbiyé. Nandi mokanakódi ndi mu : Ibóngó ndi ndaga nya Anyambé. Nga pépégu a reya ndi, wabé wóka ; vókóna dévil e viyandi né yo e véndyiyé ndaga e melema myaya, na wa nyókó’kamiyé né wa wónga. Ngé’lale, ndi wa bé wóka, wa pahiya ndaga na mbya ; mba bétyé na metamba, wa kamiyéte ukil’utiké ; egombe a dyadywé né wa kwa. Dye kwetye’mekanda, ndi wa bé otyeni, wa tyétyé, na inaka na hika na usevo a’ménó méni be sandi wa kólu mba dyayaka bebuma bya gondyeneni. Ndi nga tyélé nyasa ndi wa bé wóka ndaga na molema asa a bateni, wa nyo tateni, wa mu dyayaka bebuma na iyika.

Ebe na moto a bé vitwa kaziyeni, né mu a diba vyo na iponde, dyélé ériyé vyo na ibumuku dyé’kondo ; ndi atémiyéndi vyo e hélé a vitwa na, evana ndi vama tóyókó wériyéné bwe.

Navwana ebe néma eyé botemeni enga bétyé mba kudwanaka dyélé eyé iboto, enga bétyé mba pulénétyé né yo e Salama. Bandamiyétyéni nyangó’kénywé ; a yé a mandi tawétyé, ayé mba bétyé, amandi ingwénétyé dyélé etónó na mu na a yi duweni.

Na nyangwé na wana wa nyangwé na vyaka va yé Mu, ndi mba igwésidi va yé Mu, na nguda ebumbu. Na Mu na puluwétyé, na nyungwé na wana nyungwé wa yéndi e boka de, wa tokandi tóyóvé. Na mu n’avwanaka wa, na, lya na wana waya ndi wa nana, wóka ndaga ny’Anyambé né wa wa saka nyo.

Ebetyendi e dyoba né’gugu, na wa na bikuwi byadu na vélémétyé elende ; na Mu na vókó na wa na, Le dyabwetyeni e mudi a ediba umbókwé. Na wa na ziraka, va betye wa wa tamwaka, na Mu na va eyayaka ; na bokudi na vungaka e etima ; wa betyendi wa mu ti na meba, né wa mu tóyókó mazizi. Na wa na vyaka mboka Mu, na wa né muwétyé Mu na, Laleo, Laleo, le dyelandi, na Mu né mwaka, na Mu na dekaka upupé, na meba ma betye ma bukaka ma vótókó, na udémbé na waka. ¿ Na Mu na vókó na wa na, Ikamiyé dyanu dyendi’ve ? ¿ wa nyóyetyendi wamu mamanaka, wamu ekalaka wa méni na waméni, na ra dyóngwé ndi dya moto dyinana ? Navwana a sombéte dyéléte, mepupé na meba, né byo byokate Mu.

Na wa na pabaka ezityi a nga Gadara, eyé lóngólóngó na Galili. Va gumietye Mu e zie, na moto nógugu a mboka a betye na dévil ukili mwabé, mba dayaka bedadi, dyélé idiya dya mbadi, kabo’marama a va lataka na Mu. ¿ Va tóyetye mu Jesus, ametyendi, na mu na kwaka e pwandya’du, na mu na kalaka na dyoyi loba, na, Jesus Mwa’Anyambé eyé e loba la loba, ago navé eyi dya ? na sóséléndivé etódyetye ngwé madyili. (Navwana a sombetyendi’liné’beva na, dye véndyemetye e mboka momu mé mora navwana dye betyendi dye bómbókó mu ne nye bóló, a tatwetyendi na mehinganakano na meboka mopandwéni ; a bukaka meboka, dévil e tyédyétyé mu e ndyinga.

¿ Na Jesus né pwaka mu na dina dyavé lé ra ? na mu na vókó na Lidyon ; navwana dévil nyebóló nyi’retyendi mboka mu. Na nyo na sósélétyé Mu na, A sombetye wa na wa tyétyé ebeya. E téi e betyendi na dyanga dya ngoya itubwé dye dyaka ; na nyo na sósélétyé Mu na, A lityetye wa wa tyétyé va yé nyo, na Mu nava’kamiyétyé. Na dévil na véndyémétyé mboka momu mé mura, na nyo né raka e ngoya ; na dyanga na gumyaka umbilo’mbókó e mbelenge e dóku, na nyo na lótyétyé. Va betye wa-dyidyi nyo wa tóyó nyanga e semetye ; na wa na tiliyénétyé, na wa na tyé sebwaka e mboka na e zityi. Na wa na tyedyénétyé itóyó dya nyanga e semetye, na wa na pabaka e mboka Jesus, na wa na duwaka momu mé, a vénguwetye dévil, diya e mako ma Jesus, dayeni, né’pikiliya dyadu dya gondyeneni ; na wa nava nyóyókó. Wa tóyetye wa sebwetyendi wa nyanga onguwetye a betye na dévil. Na ebumbu éziépi a nga Gadara iluweneni na sósélétyé Mu na A véndyemetye emboka wa ; na-vwana wa bóm betyendi dyóngó ibóló, na Mu na vélémétyé elede na timbaka.

Nandi momu mé avénguwetye dévil a sóseletyeindi Mu na evara ndi e ma diyaka mu na Mu, ndi Jesus a tvédyetyendi mu a vóyókó na. Timbaka e mbadavé, e leviyé bema betubwé beyé Anyambé’vé seni. Na mu na tyétyé, a tyétyé a sebwaka e mboka’ziépi bema betubwé be setye Jesus mu.

Ebetyendi va vetye Jesus, wato wa séndyeletyendi Mu na mbya ; navwana waziépi wa betyendi wa vurétyé Mu.

Na lóngókóte, momu dina na Jairus a vetyendi mboka Mu, a betyendi Mopandya Sinegog ; a kwetyendi’mako madu na mu na sósélétyé Mu na a tyétyé e mbadad’du. Navwana abetyete mwa’mwado umbókó pa, ené dyomu na mepuma mebaye motodu, a betyendi bya e bowaka, ndi va betye mu A tyétyé wato wa pambaliyetyendi Mu.

Na mwado a betye na molema a matyiya dyomu na mepuma mebaye a ziyaka bebetye na mu byéziépi na nganga, a diye na ngud’onga na nyéziépi. A va vyaka e puga’du, na mu na kupénétyé imbundya dya ngoyadu : na molema-adu a matyiya na lenaka. ¿ Na Jesus na vókó na, Ra nda kupéné ngwé ? ¿ va betye waziépi wa goziyéné, na Pité na wabetye na Mu na vókó, na, Lalé, ebumbu e pambaliyétyévé, né yo e pariyétyé’vé, ndi’vókóna, randa kupéné ngwé ? Na Jesus na vókó na, moto a kupénéndi ngwé : navwana na tóyóndi na, nguda dyonga e kudwandi mboka ngwé. Va betye Mwado a tóyó na abe boteme, na mu na vyaka avia via ligamaka, na mu na kwaka e mako madu, na mu na pakwaka tina e kupenetye mu Mu e pwamdya a wato waziépi na nyanga ondyetye mu na ro’vókó. Na Mu na vókó na, Mwa mwado saraka ikamiyé dyavé dyo’ndyiyéndi’vé, tyétyé na dyonga.

Va betye Mu a kalakate, na moto na vyaka’viya mbada mopandya sinégog, na vókó na mu na, mwavé a wandi, esetye Mukuwi ndyuke. Va betye Jesus óka, na Mu na’vwanaka mu, na, Enyóyetye ; pagate ekamiyéndyé, vókóno óngandi. Vé retye Mu e mbadi, a bi’riyé moto, kabo Pite, Jems, na Jon, na gangwé na nyangwé a ngóni. Na waziépi na didyénétyé e kwedi wé’yaka mu, nd’avótyi na iyetyeni ; abe weni, ndi a yayandi. Na wa na tyebaka Mu, puleni na, a wandi. Na Mu na kuduwétyé wa waziépi, na Mu na bómbókó Mu ebó, na Mu nóndaka mu, na, Ngóni, imwaka. Né lina dyadu na timbaka, na mu na gunganaka dyimwa ; na Mu na sombétyé na, a tawetye bedya. Na gangwé na nyangwé na mamanaka ; ndi A sebwetyendi wa na, wa pakwetye moto nyanga’bé e samaka.

Na Mu nó ndaka dyomu na bikuwi byadu bebaye, va yé Mu, na Mu na tayaka byo ngudi na ipanga dya dévili nyéziépi na dyondyiyé dya mebwayi. Na Mu na lomaka wa ipakwa dya ipanga dya Anyambé, na dyondyiyé dya mepondyi. Na Mu na vókó na wa, na, Indyetyeni ima etyéndó, dyéléte metumbe, dyélé elandi a kola, dyélé bedya, dyélé dólé, e diyetyeni dyélé ngóyi nyebaye. Mbadi te mbadi emé’raké’nywé, diyakani etéi, emu kudwaka tegóni etéi. Ama bétyé mbé riyéty’imywé, vé’muwéni’mywé’mboka méra pupwakami tyélé nya mako manu e isebwa dyaya.

Na wa na tyédyénétyé, ma wa’néluwémétyé mamboka, wa pakwaka sangoasa, Wóndyiyétyé e mabókó maziépi.

Ndi Herod Titrak’ótyetyendi bema be setye mu ; ma mu na tóyókó ndyuke, navwana wavókó wa vótyi na, Jon a tongwamdi eviya iwedi. Wa vókó na Ilaias nda kudwana, na wavókwé na, mosótyi umbókó a vyo nda tongwa. Na Herod na vókó, na, Jon nda betye ngwé na lenaka ibólu, nd’anó gó ra, óka gó ngwé bema mébi ? Na mu na tokaka etóyó Mu.

Va timbetye metodu na wa na sebwaka Mu bema besetye wa byéziépi, na Mu na tyétyé na wa’pépégu bo botamaka, e iboko dya ndyinga dya mboka etubwé na Betseda. Va betye wato wa pulé, na wa na vitétyé Mu ; na Mu na séndyélétyé wa, na Mu na kalaka na wa egala ipanga dya Anyambé, na Mu nó ndyiyétyé wabetye na mala ma dyonguwé.

Va betye dyoba dye mu gumyaka, na dyomu na bebaye na vyaka vayé Mu, na wa na vókó na, Tyédyétyé ebumbu, evara ndi’ma tyétyé wa e mamboka ma ezityi eyé iluweneini, wa ty’imbiyétyé, ma itoka dya bedya, navwana leyén di’va iboko dya ndyinga. Nda vótyi na wa na, Inywé tayakani wa bedya, na wa na vókó na, Lebe wa na membunda isamba dya bedya bya wato mé wa waziépi. mya pémbé metanu na weyi nyebaye ; kabo le tyé. Navwana wabetyendi’né todyeni nya wamu nyetanu, na Mu na vókó na bikuwi byadu na, Didyétyéni wa mabo matanu ramba’vókó. Na wa na saka na, na wa na didyétyé waziépi. Na Mu néngaka membunda metanu na weyi nyebaye, va betye Mu loba lóndyeni ma Mu na tuwaka byo ibótó, na Mu na va bukaka pémbé, na Mu na tayaka bikuwi byadu, na, wa témiyetye va yé ebumbu. Na wa na dyidyénétyé, na wa waziépi nó’laka ; na nguhu nye lityiyetye wa na nikwétyé dyomu na belinga bebaye.

¿ E betyendi va betye Mu a kaliyaka ipó, bikuwi byadu na Mu’vara ; na Mu né pwaka wa na, Bebumbu bevóndi na Ngwé ndi ra ? Wa vwenetyendi, na, Jon Baptist, ndi wavókó wa na Ilaias, na wa vókwé wa na, Mosótyi umbókó a vyo nda tongwa gó. Na Mu na vókó na wa na, nandi’vóndini na, ¿ Ngwé ndi ra ? Na Pité na’vwamaka na, Kraest a Anyambé.

Na Mu na keleviyétyé wa, namu na sombétyé wa, na, wa sebwetye moto ima méra ; A va sebwaka na. Mwa Moto a ngandi tóyókó bema bebóló, watodu ma Prist nya myolo na waléndi, wa ngé tyiyaka Mu, a ngando wétyé, né Mu a tonguwé na minya malalo.

Na Mu na vókó na wa waziépi na, etóndyé moto a tokaka e vité ngwé, a gózietye nyolu-adu, né mu a bapé kros adu dyoba te dyoba, né mu amu vitétyé ngwé. Navwana mwéziépi a ma tóndétyé eménó adu, amé nyamiyétyé yo, nda’ma nyanyamiyétyé eménó-adu na tina’mé, mu tegó amó’ndyiyétyé yo. ¿ Navwana inde ndi’ma kovaka moto, etóndyé a dyeya zie éziépi, né mwa nyamiyé nyolo-adu méni dyéléte a vugwé vé ? A mó kaka ngwé na ndaga nyamé vigóni, mu tegó a nga bétyé Mwa’Moto ótyiyétyé vigóni, va nga vyaka Mu né’venda dyadu Méni, na dya Gangwé, na dya bendyél be yé Hole. Ndi na sebwandiné’nywé mbambayé, e yi na wavókó wayé va téme téme, wainga bétyé mba tyikaka iwedi, kabo wóta etóyó ipanga dya Anyambé.

E betyendi ené minya’bua bema mébi doli, na Mu né ngaka Pité na Jon na Jems, na Mu na betaka e mokodi ikaliya. Mu te ikaliya na mondongo-adu né Iwamaka itindyidi’vókwé, na bedadi byadu bemu bepuwa be panyaka. Lóngókóte, wato wabaye wa mu e kalaka na Mu erago, wa betyendi Mosés na Ilaias. Wa kudwetye né’venda wa mu kalaka egala vanga timaka iwedi dyadu e Jerusalem. Ndi Pité na wa betye na mu migó maya mabetyendi mamu madila na viyó ; va betye wa wémwa na wa na tóyókó ivenda dyadu, na wamu mé wabaye wa témetye na Mu.

Ebetyendi va betye wa wa véndyémé va betye Mu, na Pité na vókó na Jesus na, Lalé, eyéndi enyévé na le diyaka’va nana ; le longaka besaka belalo ; Avé evókó, evókó a Mosés na evókó a Ilaias ; a pule adu e kaletye mu. A kalakate bi nana, etéi evetyendi evindi, na yo na ambaka wa ; na wa na nyóyókó vé retye wa e evindi. Na dyoyi na viaka eviya evindi na, Mwa’mé a tóndé ngwé ndi anó, okakani Mu. Ve betye dyoyi dye dola, Jesus a duwemetyete ipó, na wa na botaka yo, wabe’sebwa moto e minya mé mara bema mé be tóyetye wa bera.

Ebetyendi’dyobé’vókwé, va gumyetye wa e mokodi, na ebumbu etubwé na lataka na Mu. Lóngókóte momu a namba amaka, na, Mukuwi na sóséléndi’vé, na, lóngókó ngwé mwa’mé a momu ; navwana na yéte mu mwana umbókó. Lóngókóte ilina dye bómbóndyé mu, né amu amaka matota ; dye ngundyaka mu, a kuduwétyé ivudi, dye tisaka mu manini ma na mba véndyémétyé dyélé bovéndyémétyé. Na va sósélétyé bikuwi byavé na na, wa kuduwetye dyo, ndi wa mba yólétyé.

¿ Na Jesus n’avwanaka, na, E igona dya beiengweneni, na ipuwana dyé’kamiyé, Na malé diyaka nénywé ró kilé, né Ngwé na’yika né nywé ? Pabiyétyé ndyé mwavé eva nana. A vyakate, na dévil né ngwaka mu ubondo, emu ngundyaka mu, Na Jesus na dekaka ilina mé ibeva, na Mu nó’ndyiyétyé mwana, na Mu na bómbiyétyé mu gangwé.

Na wa waziépi na mamanaka ngudi a Anyambé etubwé. Va betye wa waziépi wa mamanaka bema biéziépi be setye Jesus, na Mu na vókó na bikuwi byadu na.

Iriyétyéni ndaga ményi nana e maló manu, navwana Mwa’moto a ngandi bómbuwétyé e mabó ma wato. Wa be bómbiyé ndaga méni, ebetyendi botemeni e mboka wa, nana wa puletye yo ; wa nyóyetyendi dyipwa dyadu ndaga méra.

¿ Na usódyu na duwamaka emboka wa, na, ra ndi ama bétyé ita wa ? Jesus a puletyete ipikiliya dya melema myaya, na mu na vé ngaka etumbé, na Mu na téimiyétyé yo e pwandy’adu. Na Mu na vókó na wa, na A ma séndyélétyé etumbé méni e dina dyamé ; a séndyéléndi Ngwé, a ma séndyélétyé Ngwé, a séndyéléndi a lometye ngwé, navwama ayé yéviyeni wa e mboké nywé, mu tegó a ma bétyé utubwé.

Na Jon na’vwanaka na Mu na vókó na, Lalé le tóyetyeindi umbókó a véndyiyétyé dévil na dina dyavé, né’wé na dekaka mu, navwana abe’vit’iwé. Na Jesus na vókó na mu, na, edetyetye mu, navwana ayé mba hingaka né’wé a yéndi egala’go.

E betyendi va betye egombe e paba ; e betye Mu’gala dyingwé e loba, na Mu na vongwamaka pwandya’du na etyéndó e Jerusalem. Na Mu na va elomaka metodu e bogo-adu ; na wa na tyétyé ; na wa né’raka e mboka a nga Sameria. Wa be’séndyélé Mu, navwana pwandya’du ebetyendi ené a tyétyé e Jerusalem.

¿ Va tóyetye bikuwi byadu Jems na Jon, na wa na vókó, na, Mopandyi, e mate kamiyé le lomaka veya eviya loba, né vyo ve hiniyé wa, ené nga setye Ilaias ? Ndi é Iwemetyendi, na, Mu na sembétyé wa ; na Mu na vókó na, Epuléni ené nyanga’yé malina manu. Navwana Mwa’Moto a be vyaka egala dyoya dya beménó bya wato, ndi kabo e dyondyiyé, na wa na tyétyé iboko ivókwé.

E betyendi va betye wa wa tyétyé e reya, na momu nó’gugu na vókó na Mu, na, Mopandyi, na mandi vitétyé’vé iboko dye ma tyétyé’vé dyéziépi. Na Jesus na vókó na mu, na Mesindyi meyi na mepudu, na linyóni la loba na mumbu ; ndi Mwa’Moto a be né’boko dya batétyé molo.

Na Mu na vókó nó’mbókwé, na, vitétyé ngwé, nda’vótyi na, Mopandyi, ta lika ngwé, na te tyé dyamé lalé dyameni. Ndi Jesus a vótyi na mu, na, Mebimba me dyametye mebimba myaya ; ndi tyétyé ipakwa dya ipanga dya Anyambé.

No’mbókwé na vókó, na, Mopandyi na mandi vitétyé’vé, ndi na te tya’kana na nga mboka’go wa yé’mbadamé. Na Jesus na vókó na mu na, Ebe na moto a bé ebwadu batiyeni e plau, nda timbiyétyé digó’puga, a mundi kotyeni né’panga dy’Anyambé.

Va betye bema mébi be dola na Mopandyi na pónókógó wavókwé mabo motoba na vókó, na Mu na lomaka wa wabaye wabaye e bogo adu e mamboka né’boko diéziépi na na, Mu méni a mandi vyaka. Evara ndi evótye Mu, na wa na, pónipóni ndonda eyéndi’bóló ndi waseyi wayi nyévó, nandi kaliyakani Mopandya ndonda na A lometye wasei e ndonda’du. Tyétyéni ; lóngókóteni, Na lomand’inywé ené wana medómbé e tétéy’a róó. E bapetyeni eland’a dólé, dyélé kola, dyélé makogo, e gomwetyeni moto e reya. Mbadi te mbadi’mé raké’nywé’ziépi otaka e vóni na, dyonga dye betye e mbadi méni. Etóndyé mwa a dyonga a diyate etéi, dyonga dyanu dye zimbemetye’teyi ; etóndyé mba bétyé ; dye mandi timbaka nénywé ropé. Diyakateni e mbadi mé, e dyakani e nyakani bema bema’tayaka wa, navwana mosei a yéndi oyeni na ivé dyadu. Imwetyeni eviya e mbadi’vókó na evókwé.

Mboka’ziépi e ma betaké’nywé, né wa wa séndyéli’nywé, dyakani bema bema témuwétyé e pwandy’anu. Ondyiyétyéni mebwayi meyé vara, né inywé na wa na, Ipanga dy’Anyambé dye bakamandi’mboké’nywé. Ndi mboka e ma betaké’nywé éziépi, etónddyé wa mba séndyéléty’inywé, kudwakani e mboka méra, né evóni na. Le pupwat’inywé dyélé na tyélé nya mboka’nu nye y’iwé nanemeni e mako ; Ndi pulétyéni eni pónipóni na ipanga dy’Anyambé dye bakamandi mboké nywé. Ndi na vóndi né’nywé na, e dyoba mé dyera tómókógó Sodom, na mboka méra.

Maguga navé Koresin, Maguga navé Betseda, na-vwana bebolo betubwé bey’inywé soweni be bétyé be sowétyé Tair na Saidon, te wa betyendi wé Iwa, diyeni na banguisi na ibu e vyo. Ndi tómókógó Tair na Saidon e dyoba dya yéké, né’nywé. Na óvé Kapernaum eyé betuweni’loba, e ngé pukuwétyé e hél.

Oké’nywé ókandi Ngwé, na a pédy’inywé a pédyéndi Ngwé ; na a pédyé Ngwé a pédyéndi a lometye Ngwé.

Na mabo motoba na vókó na timbaka na mbya, na, Mopandyi dyélé na dévil nye béndi nyo kaké’wé na dina dyavé. Na Mu na vókó na wa na, na béndi na tóyókó Setan a kwaka e viya loba ené nyémbé. Lóngókóteni na tayandi’nywé ngudi e tisa nyóó na mabubaletyi, wa na ngudi éziépi a ndoba ; e be né’ma eyé e kotyiyéty’inywé. Ndi esaretyeni na eni, a na malina ma béndi mókaké’nywé ; ndi tómókó esarani, na na mina manu mayéndi léndweni e loba.

Iwéra mé dyera ndi dye betye Jesus a saraka e ilina, na Mu na vókó na Lalé, Mopandyi a loba na zie, na tayandi’vé akeva na nyanga eyévé boteni ngé’pulé na nga bokeli bema mé bi nana ; névé etyé kuduwétyé byo metyétyé ; e nyanga méra Lalé ; navwana na ndi etónetye yo enyévé e migó mavé. Lalé ayi ngwé tayeni bema byéziépi ; ebe na moto a pulé ayé Mwana kabo Gangwé ; ebe tegó na moto a pulé a yé Gangwé kabo Mwana, na ayé Mwana a leviyétyé.

Na Mu né’lwamaka e mboka bikuwi byadu, na Mu na vókó nawa igói na, Ibótó na migó ma tóyó bema mé be tóyunywé bi. Navwana Na sebwandi né’nywé na, mesótyi na mepolo mebóló wa totyetyendi’tóyó bema mé be tóyunywé bi, ndi wabe etóyó byo, na dyoka dya byo, ndi wa byoka.

¿ Lóngókóte, mopakwi a belekanako umbókó a témetyendi, na mu nava adyétyé Mu, na, na setye rémé, idyiga dya eménó a egombé’ziépi ? ¿ Na Mu na vókó na mu na, eyélé léndueni e belekanako dya ? ¿ E langandi dya ? Na mu na’vwanaka na, Tóndétyé Mopandyi Anyambé avé na molema’vé mwéziépi, né’lina dyavé dyéziépi, na ngud’avé’ziépi, né’pikiliya dyavé dyéziépi ; na moto a bakama nave ené nyolo avé méni. Na mu na vókó na mu na, A vwanandi gondyeneni ; esandyé eni vókóna ongandi.

¿ Ndi a tokaka e kamiyé nyoloadu, na mu na vókó na Jesus, na, Ndi moto a bakama na ngwé ndi ra ? Na Jesus n’avwanaka mu na, Moto nógugu a betyendi a gumyaka eviya e Jerusalem na tyé bómbó e Jeriko, na mu na bonganaka na mibi me pwatetye mu ngóyi nyadu, na myo ma kwélétyé mu, na myo na tyédyénétyé, lityeni mu pyéré na bowaka. Na Prist evókó na gumyaka na reya méra, va tóyetye mu mu, na mu na bambwaka e pépégu’vokwé. Na a Livai tegó, va betye mu iboko mé, na mu na vyaka na tóyókó mu, na mu na bamwaka’pépégu’vokwé. Ndi a Samaria na’gugu, va tyétyé mu etyéndó a du, na mu na pabaka va betye mu ; va tóyetye mu mu, na mu na tóyókó mu mambwangó. Na mu na tyétyé va betye mu, na mu na va’sagaka mavendye madu, a tyibwaka mavulé na ivé, na mu na didyétyé mu e nyama’du méni na mu na vyaka na mu na e mbada wandyi, a mu bandamiyétyé mu. Dyoba bwe, va betye mu a tyétyé, na mu na gótókó fura nyebaye na mu na tayaka nyo nga mbadi, na mu na vókó na mu na, Bandamiyétyé mu ; na ngate’timbiyévé e nga peliyétyé’vé wa, va nga timbaka ngwé. ¿ Nandi e walalo wa nana, ra nda pikiliyavé na a betyendi moto a bakama na a latetye na mibi ? Na mu na vókó, na mu a betye a leviyétyé mu kéngó, na Jesus na vókó na mu na, Tyétyé né’vé esa tegó nyanga mé.

Nandi e betyendi, wa tyétyéte na Mu né’raka e mboka na’gugu etiki ; na mwado nó’gugu dina na Martha, né ngaka Mu e mbada du. A betyendi na mwanyangwé a tubwétyé na Meri a diyetye tegó e mako ma Jesus, ókaka ndaga nyadu. ¿ Martha a betyendi a nyémbélénétyé né’dyandya na mu na vyaka e mboka Mu na, Mopandyi, e sóló ené nga lika mwa’ya ngwé na, na dyandyetye ipó ? sebwaka mu evara ndi ma bétyé mu a viya’sanaka ngwé. Na Jesus n’avwanaka na mu na vókó na mu na, Martha, Martha, e nakandi né’vé e tóyóndi ndyuke na bema bebóló : Ndi ima evókó ndi eyé na mala ; Meri nd’apónó ngabo-a sa, eyé ebe ngudi ngwéné mu.

E betyendi va betye Mu a kaliyaka iboko né’gugu, Mu pa na ikuwada evókó na vókó na Mu na, ikuwéty’iwé ikaliya, ené ngé’kuwé Jon bikuwi byadu.

Na Mu na vókó na wa na, va kaliyénywé, vókóni na, Lal’ago a yé’loba, Dina dyavé dye diyetye hole, Ipanga dyavé dye vetye, Upango-avé mo semetye e zie ené nyanga eyé yo e loba. Tayaké’wé dyoba te dyoba bedya byago bya dyoba igugu. Né’vé emu’yidyétyi’wé bebeva byago ; navwama li’yidyétegó way’iwé nanweni waziépi, Etadyety’iwé e dyadywé, ndi véndyiyétyiwé e ebeva.

Na Mu na vókó na wa na, ra ndayé vay’imywé abé mu na mboyi, né yo e paba vayé mu na’lu tema, né yo evó na mu na, mboyamé, tayaka ngwé’va membunda melalo. Navwana mboya’mé e viya etyéndó e lumbéndi ngwé, na be né’ma a mbaka mu ; Nga mbadi téyi a mandi avwanaka na mu, na, enyungwetye ngwé ; ikukale dye dibamandi, iwé na wana wamé le mund’ikondo ; na va yol’imwa né ngwé na tayavé. Na vóndi né’nywé na, Dylélé a bi mwe mé mu a taya mu egala na a yéndi mboy’adu, ndi navwana ililimiyé dyadu dya ikuta a mandi’mwaka né mu a taya mu nyanga e toka mu.

Né ngwé na vóndi né’nywé na, Ipwakani, emandi etawétyi’nywé tokakani, e mandi duwakani, kutakani, dye mandi dibwétyinywé. Navwana mwéziépi épwa a pahiyandi, a toka a duwandi ; na a kuta dye dibwéndi mu.

¿ Etóndyé mwa’momu a dyombé inywéni wa yé wa gangwé pémbé, Amé tayaka mu ilale ? ¿ Dyélé épwa mu weyi, a mé taka mu nyóó e gala weyi ? ¿ Dyélé épwa ditye, a mé tayaka mu ibulaletyi ? ¿ Palélé inywé wayé wa beva, epulé léni itaya dya wana wanu bema byasa : natyé kumbwénétyé góngw’anu a yé loba Anga na amandi tayaka wé pwa Mu Ilina dyasa wa ?

A betyendi a véndyiyétyé dévil e bety’imbutye, ebetyendi va betye dévil e véndyémé, na imbutye na va’kalaka ; na wato na mamanaka. Ndi wa vókó e ramb’aya wa vótyi, na, A véndyiyéndi dévil na Bielsibub upoloa dévil. Wavókwé wé pwetyendi Mu ndembo eviya loba e bwadyétyé Mu.

Ndi Mu puleni ipikiliyedi dyaya, A vótyi na wa, na, Ipanga dyéziépi dye gala na dyo méni dye mandi e dyiliyaka, na mbadi e gala na mbadi e mandi kwaka. ¿ Etóndyé tegó Setan a galaka na mu méni, ipanga dyadu dye malé témétyé dya ? Na-vwana evóndini na, na véndyiyéndi dévil na Bielsibud. ¿ Ndi etóndyé na, na véndyiyéndi dévil na bielsibud, ndi wana wanu wa véndyiyéndi nyo nénde ? Eviya téyi ndi ema bétyé wa wayétyiyi wanu. Ndi etóndyé ngwé na munó a Anyambé na véndyiyétyé dévil mba ityétyé ipanga dy’Anyambé dye viyandi vay’inywé.

Etóndyé mot’ubonga na bevolani a tataka iboko dya du, iyumba dyadu dye mandi’bétyé swé. Ndi etóndyé ayé ngudi wa na mu a viya va yé mu, né mu a balé mu, a puata mu bevolani be bé mu a petiyétyé byéziépi, nandi a va viya kabaka imano.

A yé abe na ngwé abe egal’amé ; na ayé a laté na ngwé a variyéndi. Etóndyé iliné’beva dye véndyémé na moto, dye tamwandi’maboko ma mwasani a tokaka dyódyó ; mba duwaka, na mu na vókó na, na mandi’timbaka e mbadamé va vetye ngwé. Va viya mu, na mu na kóbétyé yo vyóweni na kembweni. Nandi va tyéye mu na dyinga na mu méni malina mavókwé motoba na vókó ebeva gó wa na mu méni, na mu néraka na diyaka etéyi ; malityiyéné ma moto mé mayéndi ebeva wa na bogo bogo.

Ebetyendi va betye Mu a kalaka bema mébi, na mwado umbókó a moramba na va betiyétyé dyoyi dya du, na mu na vókó na Mu na, ibótó na ibumu dye bapetye’vé na mabéné ma nyandyetye vé. Na Mu na vókó na, E, ndi ibótó wa na wóka ndag’Anyambé, né wa wa tataka yo.

Wa betye wato wa buséné ta, a yaletyendi evó na, dyi nana ndi igoné beva ; dye tokandi ndembo ; ndi ebe na ndembo eyé dyo dye tawétyé, kabo ndembo a mosótyi Jonas. E né nyanga’betye Jonas ndembo a nga Niniva, na tegó’nga bétyé Mwa’moto e igona médyi. Konde é’ko a ngandi témétyé yéké na wamu wé’gona mé dyi, né mu a kodyé wa, nav-wana evetyendi’viya masuku ma zie e dyoka dya ipulé dya Solomon ndi lóngókóte utubwé wa na Solomon a yéndi eva. Wato wa Niniva wa ngandi’mwaka e yéké na igona médyi, né wa kodyé wa ; navwama wé Iwetyendi né pakwidi dya Jonas, ndi lóngókóte ay’ita wa na Jonas A yéndi’va. Ebe na moto a bé a kaziyé vitwa né mu a témiyé vyo né’boko dya botemeni, hanga tegó ibumuku dya kwe, ndi a paté ndi vyo, né wamé raka e mbadi wa tóyó bwe. Bwe a nyolo ndi digó, ndi etóndyé digó dyavé dye tóyóndyé bwe, nyoloavé’ziépi e mé londaka na bwe, ndi etóndyé dye diyandy’ibeva, nyoloavé emé londaka né viti. Bandamiyétyé, evwa bwe’yé n’avé e nyókó diya iviti. Nd’etóndyé nyoloavé’ziépi e diya ti na bwe, mba, egali eyé néviti, nyoloavé’ziépi e mé bétyé ti na bwe ené nga panya vitwa ve koya na ngudi ve tayavé bwe.

Va betye Mu a kalaka, na Farisis na’gugu na sósélétyé Mu na Adyetye na mu, na Mu né raka na diyaka e bedya. Va betye Farisis e tóyó, na mu na mamanaka na abe suzie mabó na Mu nó taka diya e huma. Na Mopandyi na vókó na mu ma, Hóngé inywé Farisis e pudyéndini séngé na bepélé e bwebwe, ndi a téy’anu ti na madyake na ebeva. ¿ Inywéni betiketike, a bete a veletye bya bwebwe a veletye bya téyi tegó ? Ndi tayanakani beyé né’nywé vókóna bema byéziépi be mundi bwe né’nywé.

Maguga nénywé Farisis, navwana evéndyiyéndini a dyomu dya mint na ru na bema be tombwa byéziépi ndi e doliyétyéni yéké nétóndi dy’Anyambé, bi ndi be lutyetye esé’nywé, ndi mba tegó likakani bevókwé mba sowétyé.

Maguga né nywé Farisis, navwana e tóndéndini madidi ma tubwé e Sinegog na magomui e maketi. Maguga nénywé, waléndi na Farisis, menoki, navwana, eyéndini ené marama ma tónó, na wato wa nókó mo mba pulénétyé.

Na mopuli a belekanako umbókó na’vwanaka na vókó na Mu na, Mukuwi va vó’vé na, e sembéte né’wé ta. Na Mu na vókó na, maguga tegó nénywé wapuli wa belekanako, navwana e bapi yéndini wato mómba ma dila né bapé, ninywé méni mba zilamaka mómba mé na munóanu umbókó.

Maguga né’nywé, navwana e longandini marama ma mesótyi, myo yetye wagóngwé wanu. Mambayé e leviyéndini na e kamiyéndini besedi bya wa góngwé wanu, navwama mbambayé wandi wó yetye wa, n’inywé e longandini marama maya. Evara ndi e sebwa ipulé dy’Anyambé na, na mamdi elomaka mesótyi na metodu e mboka wa, wangandi oyaka wa vókó né wasaka wa vókó évita. Evara ndi va ngé’pwétyé matyiya ma mesótyi maziépi ma soletye eviya dyali dya zie e igona médyi. Eviya matyiya ma Ebél na tyé bómbó ma Sakaraias a wetye e tétéya Olta na témpél, Na sebwandi né’nywé póni póni, na, Be ngandi ipwétyé igona médyi.

Maguga nénywé wa puli wa belekanako, navwana evéndyiyéndini enunguna é’pulé, ni’nywé méni mbé’rakani, né inywé e zimbiyétyéni wa toké’ra.

Va betye Mu a kalaka na wa bema mébi, wa-léndi na Farisis wa mu vyataka Mu bakita bakita, e bosisétyé Mu na a kaletye bema bebóló. Wa bémbétyé Mu, wa tokaka inga ima e modumbwadu, ema kodyétyé wa na Mu.

E gombe méra, va betye wato wabóló wa laténé ta wa diye na tango, wa tisanaka na ebóló, a mu yalétyé’vó na bikuwi byadu na bogo, na, Kelevakani na ilanda dya Farisis dye yé idibana dya migó. Navwana ebe né’ma’yé kulemeni, e nga bétyé mba salamaka, dyélé a botemeni, enga bétyé mba pulénntyé. Evara ndi eyé ekalety’inywé né’viti, e ngé pulénétyé e bwe ; na ekalety’inywé e maló e lelika be ngandi samuwénétyé e meduwa.

Na vóndi nénywé mboyi nyamé na, Enyóyetyeni wó’ya nyolo, era pa wa diye gó na e yé wa wa saka. Ndi na kele viyénd’inywé anu a yi’nywé e nyóyókóni Mu, a yé óya né Mu na ngudi a vugaka e hél, e, na vóndi né nywé, na, nyóyókóni Mu. ¿ Témbéléndyé nye tanu nye sambwé fathing nyebaye ? na’vókó ebe ngudi lengama e mbok’Anyambé. Ndi na we nyanu nya molo nyéziépi nye yéndi tango, Enyóyetyeni : e yéndini wa na témbéléndyé nye bóló.

Ndi na vó tegó né’nywé, na, mwéziépi a ma mémétyé ngwé e pwandya a wato Mu tegó a nga bétyé Mwa’Moto a mémétyé e pwandya’bendyél by’Anyambé. Nd’ama gógókó Ngwé e pwandya a wato a nga tegó’gógwétyé e pwandya a bendyél bya Anyambé.

Na ama’kalaka ndaga egala Mwa’Moto, emandi iyidywétyé mu ; ndi ama elowaka Ilina dya-sa a vé yidywé.

Va nga pabiyétyé wa inywé e Sinegog, na e wapandyi, na nga ngudi, e natyetyeni nyanga’ma’vwanaké’nywé, dyélé ema vóku’nywé. Navwana Ilina dya-sa dye ngate ikuwi’nywé nyanga luké nywé ivó iwéra mé dyera.

Na moto nó’gugu a ramba na va vókó na Mu, na, Mukuwi, kalaka na mwa’ya na, a kabetye na ngwé ekuha. ¿ Na Mu na vókó na mu, na, ra nda pandyetye Ngwé Moyétyiyi na mokabi e tétéy’anu ?

Na Mu na vókó na wa, na, Kelevakani, né emu bandamiyé tyéni né’tóngina ; navwana eménó a moto ebe e bema be bóló be piga mu.

Na Mu na kanaka wa mokanakódi, na zie a enami na egugu e lóndyetyendi bebuma be bóló : ¿ Na mu na pikiliyaka na molema, na, na mé saka dya navwana na be né’boko dya tyibwaka bebuma byamé ? Na mu na vókó, na, nga ndi ema saka ngwé, na mandi pukwaka sitowa nyamé, né ngwé na longa etubwé ; etéyi ndi ema tyibwaka ngwé bebuma byamé na ngumba’mé’ziépi. Né Ngwé na vó né’lina dyamé, na, Ilina e kotuwéndi ngumba’bóló a mepuma mebóló ; ódyókó, dyaka, nyaka, saraka. Nd’Anyambé a vótyi na mu, na, Eyéndi etiketike, ilina dyavé dye tokwéndi emunya méni : ¿ vókóna beviya kusé’vé bera beyi bya ra ? Yo nyanga mé te eyé na a kumé hika’du méni ava bé enami egal’Anyambé.

Na Mu na vókó na bikuwi byadu, na, yondi evó ngwé nénywé na, E natyetyeni eménwa’nu sasé, beyinywé dyakani ; dyélé na bya nyolo nyanu, na bey’inywé’dayakani. Eménó e yéndi wa na bedya, na nyolo wa na bedadi. Lóngókóteni melubwa, na-vwana wa liya né myo me dyandya mebe na belungu dyélé mambadi ; ¿ nd’Anyambé a dyidyé te myo ; Ebeni enyévé wa na linyóni ? ¿ Ra nd’ayé vay’inywé ayé a badétyé ekulu abama ené eguba e motéi’adu na bonokaka ? ¿ Etóndyé inywé mba ngudi a saka ima eyé tetyemeni, inde ndi e naké’nywé bevókwé ? Lóngókóteni ené nga tombwa mayanga ; ma dyandya, né mo ma visa ; ndi navóndi né’nywé, na, palélé Solomon né’venda dyadu dyéziépi a be daya ené mayanga mé ma. Ndi palélé Anyambé a dadyélé mabura, mayé’munya ezityi, eméné ma vélwé umbiko ; ¿ Abe ngudi’dadyi’nywé wa ? Etotyetyeni anu ema dyaké’nywé, dyélé ema nyaké’nywé, e diyetye tegóni na melema mya ityétyé. Navwana betomba bya zie wa tokandi bema mébi byéziépi ; ndi góngwanu a yéte puleni na eyéndini na mala na bema mébi. Ndi tómó tokakani e bogo ipanga dy’Anyambé, vókóna bema mébi byéziépi be badwénd’inywé.

Dyanga itiké, enyóyetyeni navwana góngwanu andi tóndiyeni itaya dyanu ipanga. Sambiyétyéni beyé né’nywé, tayakani mekuge ; kendyétyeni egal’anu belandi beyé be duna, ngumba a loba a mba ziyaka, vayé mwibi mo bakama, vayé nyélélé ebe ngudi dyungulé. Na-vwana vayé ngumb’anu, te vama bétyé melema myamu.

Beduwe byanu be diyetye tingweni na litwa lanu le koyaka. Né inywé méni ené wato wa vuré mopandy’aya, va yé mu a vyaka eviya iba, evara ndi vanga bétyé mu a viyandyé a kutaka, wa dibwaka mu na ro vókó. Ibótó na waseyi mé wara, wa nga bétyé mopandyi a kóbétyé wa pevaka va nga timbaka mu ; Na sebwandi’nywé pónipóni, na, a ngandi tingaka utumba, né mu a didyé wa e bedya, né mu a viya aviya dyandyaka-wa. Etóndyé na a ngé vyaka e ivuré dya mabaye, dyélé ivuré dya malalo, né mu a kóbé wa na, ibótó na waseyi mé wara. Ndi pulétyéni, eni, na, nga mbadi a bétyé a pulétyé iwéra dye ma vyaka mwibi, te a pevandi, abe ngudi elika mbad’adu etubwétyé. Diyaka tegóni kotyiyeni ; navwama Mwa’moto a viyandi iwéra dye y’inywé epikiliyani.

¿ Na Pité na vókó na Mu, na Mopandyi, iwéte wa kana’vé mokanakódi mému ityé na waziépi ? ¿ Na Mopandyi na vókó, na, ra nd’ayé molo-a tyoli na ipulé a nga bétyé mopandy’adu a témiyétyé mu mopevi a mbada du éziépi itaya dyaya ngaboaya e gombe a gondyeneni ? Ibótó na moseyi mé mura, monga, bétyé va nga vyaka Mopandy’adu a kóbétyé mu a saka na. Pónipóni na sebwandi né’nywé, na, a ngandi témiyétyé mu mopaindyi a beyé na mu biéziépi. Ndi etóndyé moseyi mémora movó na molema’du, na, Mopandy’amé a dilandi iviya dyadu ; a mu yalétyé idoka dya waseyi wa wado na wa wamu, a dyaka, anyaka a saraka. Mopandyi a moseyi mé mura a ngandi vyaka’dyoba dye nga bétyé mu mba lóngókó mu, iwéra dyenga bétyé mu mba bandamiyétyé, a ngé lenaka mu tya, né mu a taya ngaboadu na wayé wa kamiyé. Moseyi mé mopuletye upango a mopandy’adu, némba kendyétyé muméni dyélé isa dya gondyeneni nó’pangwadu a ngandi dokwétyé mbéti ebóló. Né a betye mba pulétyé a viya saka bema twétwé na ekokwé, a ngé dokwétyé na dyana, navwana a tawé bebóló a nga tegu pwétyé bebóló ; abé wato wa bómbiyétyé bebóló, mu tegó a bé wa wé pwaka wa.

Na viayandi itaya dya veya e zie ; ¿ inde ndi ema tokaka Ngwé etóndyé vekoya ? Ndi nayi né batuwé dye ma batuwétyé Ngwé na nakag’unde yo mbó ta ziya. ¿ Eminandini na Na viyandi’taya dya dyonga e zie ? Na sebwandi’nywé, na, nyawé ; te kabo igala. Eviya egombe méni watanu e mbadi evókó wa mandi galaka, walalo wa galaka na wabaye, wabaye wa galaka na walalo. Gangwé a mandi’galaka na mwa’momu, na mwa’momu na gangwé ; Nyangwé a mandi’galaka na mwa’mwado, mwa’mwado amandi’galaka na nyangwé ; nyangwé lukwé no’bómbi, n’óbómbi na nyangwé lukwé.

Na Mu tegó na vókó na wato, na, Ebéteni étóndyé e tóyóni evindi’kudwaka e gala manga, mba pedi inywéni na monyéndyé mo viyandi, né yo e diya tegó na. Nó pupé éko mo vungaka, inywéni na, Ebabadi e mandi bétyé, né yo e samaka. ¿ Wa dyungulini, epuléndini dyibiyé dya mondongo-a loba na zie, ndi inde ndi ’yi nywé mbé biyétyéni egombe méni ?

¿ E, ndi inde ndi’yi’nywé mba yétyiyétyéni inywé méni eyé gondyeneni ? Etóndyé e tyétyé na molon’avé e mboka moyétyiyi, gunganaka mu ilika dya nyoloavé e reya : evwa a nyókó dula’vé vayé moyétyiyi, né moyétyiyi mo tayavé mobómbi n’adu né a vugavé e meboka. Na sebwandi’vé, na, ebe ngudi e kudwa e téyi, kabo etaya epusi a malityiyéné.

Etéyi ebetyendi na wavókó wa puliyetye Mu egala nga Galili, wa betye Pailat a busénétyé matyiya maya na myambo myaya. ¿ Na Jesus na’vwanaka na Mu na vókó na wa, na, nga Galili wara wabetyendi ebeva wa na nga Galili waziépi navwana wa sowetyendi bema mébi ? Ndi na sebwandi nénywé, na, Nyawé, inywéni waziépi e ngate wakani nyanga mé, kabo ilwamani. ¿ Epikiliyandini na dyélé dyomu na’buwa mé, e kuluwetye na elongo e Siloam, na yo na vó’yaka wa, wayi ebeva wa na nga Jerusalem waziépi ? Ndi na sebwandi né nywé, na, Nyawé ; inywé waziépi e ngate wa-kani nyanga mé, kabo ilwamani.

A kanetye tegó mokanakódi mé mu, na, Momu nógugu a betyendi na ele a Fig liyeni e’kanga’du, na mu na vyaka itoka dya bebuma a téyi ndi mba duwaka. Na mu na vókó na motati a ekanga’du, na, Lóngókóte e mepuma mé melalo di ndi meviya ngwé itoka dya bebuma e ele mé-a fig eni, ndi mba duwaka, kwélétyé yo ; ¿ e pariélé zie nénde ? Na mu na’vwamaka na vókó na mu, na, Mopandyi, ta lika tegó yo upuma mému mbwe, na te vwasa yo na bwasiyé yo ; ityé e mate dyaya bebuma : Ityé e dyayate bebuma ; dódó, nd’etóndyé mba dyayaka, nandi eva viya ekwélétyé yo.

A betyendi é kuwétyé e Sinegog’vókó e dyoba dya dyódyó. Lóngókóte mwado a betye né lina dya’kósó dyomu dya mepuma na mepuma ebuwa, vutemeni, mba yólétyé etepwa na’pusi. Va tóyetye Jesus, mu, na Mu nó’ndaka mu na va betye Mu, na Mu na vókó na mu, na, mwado, e vurwamandi eviya edaka’vé. Na Mu na batétyé mu mabó madu ; na mu na témétyé ro’vókó, a bendétyé Anyambé.

Na mopandyi a Sinegog n’avwanaka na malingwa, navwana Jesus óndyiyetye-ndi mu e dyoba dya dyódyó, na mu na vókó na, ebumbu, na, Leyi na minya motoba ma luka wato wa saka bebolo ; vyakani nandi eviyo nguwétyéni e minya mémara, ndi hanga e dyoba dya dyódyó. ¿ Na Mopandyi n’avwanaka mu, na, Ové modyungulini, inywéni waziépi ebeni na moto a vurua nyati dyélé buruadu e dyoba dya dyódyó e mbada bimbe, né mu atyé nyidyétyé yo meba ? ¿ Nandi te mwado mé ayé mwa Ebraham anó, ayé Setani sazieni, e dyomu na mepuma ebuwa mi nana, abe luka vurwé mesago mé mi e dyoba dya dyódyó ?

Waloni wadu waziépi wa tóyetyendi vigóni, va betye Mu a kalaka bema mébi, na ebumbu eziépi na saraka na bema byé’venda be betye Mu a saka byéziépi.

¿ Na Mu na vókó na, ipanga dy’Anyambé dye kwana lé rémé, na malé e kwaniyétyé dyo né nde ? Dye kwanandi motonga a’buma a mustard e betye moto éngaka, na mu na vugaka yo ekangadu, na yo na tombwaka emu ele etubwé, na linyóni la loba na longaka mumbu e melabi myadu.

¿ Na mu na vókógó na, Na mé kwaniyétyé ipanga dy’Anyambé inde ? Dye kwanandi ilanda, dyi ndyetye mwado na mu na va góbénétyé dyo na beyéyi bya pémbé belalo, na byo byéziépi na vudétyé.

Na Mu na pudungénétyé e mamboka na mabókó a pakwanaka a tyétyé na egala Jerusalem.

¿ Na umbókó na vókó na Mu, na, Mopandyi, wa mó ngaka wayi nyévó ? Na Mu na vókó na wa, na. Saka na dyayi e dyira dyé’kukale itiké, navwana na sebwandi’nywé na, wabóló wa ngandi tokaka dyira, ndi wa va yólé. Ndi etóndyé nga mbadi émwa-ndyé, né mu a dibé’kukale, nandi eva viya létyéni itémé e bwebwe, emu kutakani ikukale na, Mopandyi, Mopandyi dibwakéwé, a ngandi avwanaké’nywé, na, Na pulé egali viyé’nywé. Engandi yalétyé vóni na, Le dyetyete né’wé le nyetyete e pwandya’vé, né’vé ikuwetyete e beboka byago. Nda’ngé vókó, na, na sebwandi né’nywé na, napulé egali’viyé nywé, véndyé métyéni vayé ngwé inywéni waziépi waseyi wa’beva. Eró e ngé bétyé duwe nékaliyé dya magonga, vanga tóyóku’nywé Ebraham na Aisak, na Jekob, na mesótyi myéziépi, e ipanga dy’Anyambé, ndi inyé méni e putwétyéni. Na wanga vyaka eviya ezityi, na eviya motema, na eviya mbeko, na eviya iko, wa ngandi diyaka ipanga dy’Anyambé. Ndi lóngókóteni, nga malityiyéné wa ngandi bétyé nga bogobogo, na nga bogobogo wa ngandi bétyé nga Malityiyéné.

E dyoba mé na Farisis nyevókó na wa na vókó na Mu na, Imwaka, véndyémétyé eva nana, na vwana Herod a tokand’oya’vé. Na Mu na vókó na wa, na, Tyétyéni, va sebwetyeni mosindyi mé mora, na, Lóngókóte na putandi dévil, né Ngwé na mandi ondyiyétyé mepondyi umunya na eméné, nandi bwe mé evókwé ra, na va timiyétyé. Ndi dyéléte na, Nayéndi na mala ma na tamwaka emunya na eméné, na eméné vokwé ; navwana ebe na ngudi’bé na mosótyi mo mandi waka e bwebwe e Jerusalém.

O Jerusalém, Jerusalém, Ové oyetye Mesótyi, névé e lumaka wa lomwetye vayévé malale ; ro nye bóló ndi nye bóbetye ngwé ilaté dya wana wavé ta, ené mwada kuba mo latétyé wana wadu e mapépu madu ndi nywé mba bóbókóni ; Lóngókóteni, mbada’nu e likanandi nywé ólyillo, na sebwandi né nywé pónipóni, e vagó tóyóni ngwé, kabo egombe eviya vanga vóku’nywé, na Ibótó na viya na dina dya mopandyi.

E betyendi va betye Mu a tyétyé e mboka a Farisis, evókó e tubwé a tyé dyaka pémbé e dyoba dya dyódyó, wa mu bémbétyé Mu. Lóngókóte, éteyi e betyendi na moto nó gugu a betye na dyemi dya rambé. Na Jesus n’avwanaka, na Mu na vókó na wékuwi wa belekanako na Farisis, na, ¿ Eyéte gondyeneni na dyondyiyé e dyoba dya dyodyo ? Wa te voo, na Mu né ngaka mu, na Mu na vó’ndyiyétyé mu, na Mu na tyé dyétyé mu. ¿ Na Mu na’vwanaka wa, na, ra nd’ayé vay’inywé abé mu na nyatadu dyélé burwa du ekwa e mbela, abe ngudi gungana gótó yo e dyoba dya dyódyó ? Wa begó yólé avwana Mu bema mébi.

Na Mu na kanaka wóndwetye mokanakódi, va betye Mu atóyókó wa wa pónókó madidi ma tubwé ; na Mu na vókó na wa na. Etóndyé onduéni na moto isango dya iba, ediyetye ididi dya beteni, ityé mu óndandi moto ayé beteni wa na’vé. Né abé óndaka’nywé a viya vókó navé, na Tataka momu ménó iboko ; vókóna etyéndi na vigóni e dyinga dya ididi dya gumyeni. Ndi etóndyé ondué, va diyetye ididi dya gumyeni, na evara ndi ema bétyé abé óndakavé va ma vyaka mu né mu avó navé na, mboyamé betaka na evanyé, vókóna eduwamandi na idiluwé e pwandy’awa yé na vé e bedya. Navwana a betiyé nyoloadu méni a ngandi gumuwétyé, na agumiyé nyoloadu méni a ngandi betuwétyé.

Na Mu na vókó tegó na óndetye Mu, na, Etóndyé esaka bedya bya’manda dyélé bya ekolokolo, ondetye mboyi nyavé, dyélé wana nyungwé, dyélé madyawé mavé dyélé na wa bakama na’vé watubwé, evwa wa nyókó tegó onda’vé né’vé eduwa itimbuwé. Ndi etóndyé esaka isango, ondaka mekuge, na bezienga, na bebóku na pógu. Vókóna e tuwéndi’bótó, navwana wa wabe na ngudi etimbiyé’vé, ndi engandi timbuwétyé’vé e itomgwa dya wasa.

Vó tyetye moto nó gugu a betye diya na Mu e bedya ókaka bema mébi, na mu na vókó na Mu, na, Ibótó na anga dyaka pémbé e ipanga dy’Anyambé. Na Mu na vókó na mu, na, Moto nó gugu a sidyetyendi isango itubwé na ekolokolo, na mu nó ndiyétyé wabóló. Egombe’é sango na kolokolo na mu na lomaka mosey’adu na mu na vókó na wóndwetye na, vyakani ; navwana bema biéziépi be kokandi. Waziépi timbemi modumbu’mbókó wa mu yalétyé itaya dya tina, A bogobogo na mu, na, na yéndi sambeni epazi a ezityi, eyi na mala na ngwé na tyé tóyókó yo, na sóséléndi’vé na papuwétyé ngwé. Nó mbókwé na vókó, na, na yéndi sambeni dyomu dya nyati, na tyénda dyétyé nyo ; na sóséléndi’vé, paluwétyé ngwé. Nó mbókwé na vókó, na, nayéndi bayeni mwado, eviya vara nava yólé’viya. Na moseyi mé mura na vyaka, na mu na sebwaka mopandy’adu bema mébi, na mopandya mbadi na va elingwaka na mu na vókó na moseyadu, na, Tyétyé wówó e beboka na e mareya ma mboka, névé eviya na mekuge na bezienga na bebóku na pógu. Na moseyi na vókó, na, Mopandyi esamandi ené nga sombévé, ndi maboko mayéte. Na Mopandyi na vókó na moseyi, na, tyétyé e mareya matubwé, na mani, emu pambaliyétyé wa, na wa vety’iraka e mbadamé e londetye. Navwana na sebwandivé, na, wamu mé wabé wótakó ndwé wara wa vagó tyeka isango dyamé nó’mbókó.

Bebumbu be tubwé be tyétyendi na Mu, na Mu né Iwamaka na vókó na wa na. Etóndyé moto a vyaka vayé ngwé, mba vinétyé gangwa na nyanwé na mwad’adu na wana nyangwé na maluku, e, na eméno-adu tegó, abe ngudi diya ikuwi-amé. A ma bétyé mba bapétyé kros’adu né mu a vité, Ngwé, abe ngudi yólé diya ikuwi amé.

¿ Navwana randayé vayi’nywé vara a bémbéné a pangaka ilonga dya mbadi etubué, né mu mbóta diya diya, né mu a langaka nyanga e mó yaka yo, ityé a yéte twétwé na iziya dya yo ? Evwa a nyókó bé mu idyanga yaleni, a diyegó na ngud’a manyétyé yo, na wa ma lóngókó waziépi wa mu yalétyé mu ndyebo. Na momu ménó a yaletyendi ilonga ndi mba yólétyé dyo eziya.

¿ Dyélé ró polwé ndi mo tyéye e dyana dya eduka’nó polu’mbókwé, óta diya diya agondyénétyé ityé mu na dyomu dyadu dya tódyeni wa mate eyólé e lata na a viya mboka mu na mabo ma tódyeni mabaye ? Etóndyé mba bétyé na, vókóna a lomandi watodu, wa laté dyonga, va ndite umbókwé abiyeneni na maséyi.

Yo nyanga mé te a mwéziépi ayé vay’inywé a ma bétyé mba likaka beyé na mu biéziépi, abe ngudi diya ikuwi amé.

¿ Vyanga ayi nasa, nd’etóndyé vyanga ve nyamiyé modyu adu, ve mégó duwaimaka molélé eve ? Ve lukagó na nga zie, dyélé na wa metyé ; ndi wato wa vugandi vyo, Ayé na maló moka ótyetye.

Na wéndyi duti na wato wa beva na va vyaka e mboka Mu wa viyó’kaka Mu. Na Farisis na waléndi na tókólónókó na, Momu méno a séndyéléndi wato wabeva, né Mu a dyaka na wa.

Na Mu na kanaka wa mokanakódi mému, na. Ra motwé ndi ayé vay’inywé ayé mu na kama a medómbé ; ¿ né mo nyama umbókó e tangwa’ya, abe ngudi lika mabo ebuwa na vókó na ebuwanavókó e ndyinga, né mu a tyéyé itoka dya moyé nyameni ? ¿ Kabo óta eduwa yo ? Va bé mu a duwa yo, a baténdi yo e mabétyé madu a saraka. Va paba mu e mbadi, vókóna óndandi mboyi nyadu na wayé ma mu baka, né mu avó na wa, na, Sarakani na ngwé, navwana na duwandi modómbé mé amé mobé nyameni. Na sebwandi’nywé, na, yo nyanga mé te enga bétyé mbya e loba egala motubeva, élwamaka, wa ma egala mabo ma wato wasa ebuwa na vókó na ebuwa navókó, wayé wabe na mala ma dyilwa.

¿ Dyélé ra mwadwé ayé a bétyé mu na dyomu dya fura nya hika epuwa, né mu a nyamiyé fura evókó ava kaziyé vitwa, né mu a vyóyó mbadi, a mu tokaka na bokeli kabo óta duwa yo ? A duwandyé yo, vókóna óndandi mboyi nyadu na wayé na mu baka, na, Sarakani na ngwé ; navwana na duwandi fura mé amé e nyametye. Na sebwand’inywé, na yo nyanga mé a vókó te eyé mbya e pwandya a bendyél by’Anyambé e dyilwama dya motubeva umbókó.

Na Mu na vókó, na, Momu nó gugu a betyendi wana wabaye. Na abetye a ndémbé na vókó na gangwé, na, Lalé, tayaka ngwé mbéyi a iyumba dye yé dyé kwaka mboka ngwé, na mu na kabanaka wa nyanga e betye na mu. Minya mabe abiyéné na a ndémbé na yolétyé byéziépi ta, na mu na saka etyéndó e zityi a’biyeneni, na mu na dyungulétyé iyumba dyadu erago na idiyedi dya mboma. Ndi va betye mu a vyaka eziya biéziépi, na rayi etubwé na va kwaka ezityi méra ; a mu yalétyé inyamana. Na mu na va’tyé elataka nó mbókó a wadiyi wa ezityi méra, na mu nava elomaka mu ekang’adu atyé dyidyétyé ngoya. A mu yegaka na te a londiyéndi ibumu dyadu na bekokobo be betye ngoya wa dyaka, abe bé na moto a vinyétyé mu.

¿ Vé retye yo e ipikiliya dyadu méni, na mu na vókó, na, Lalé a yé lé waseyi wa lomwé wa ninga wa yé na pémbé wa na e koka na wa, ndi ngwé kabo bowaka na rayi ? Na téméndi né ngwé na tyéyé e mboka Lalé, né ngwé na vó na mu, na, Lalé, na yéndi seni ebeva egala Hévén na e pwandyavé. Na begó oyeni na ngwé na tubwétyé na mwavé ; pangaka ngwé mosey’avé a maloma umbókó. Na mu na témétyé na vyaka e mboka a gangwé. Ndi va tóyetye gangwé mu, andite a biyeneni, na mu na tóyókó mu mambwangó, na mu na tyétyé membila, na mu na zikamaka ibólu dyadu na mu na pyópyókó mu. Na a mwama na vókó na mu, na, Lalé, na yéndi seni ebeva egala hévén, na e migo mavé, nabegó oyeni na ngwé na tubwétyé na mwa’vé. Ndi gangwé a vótyendi na waseyi wadu, na, Kuduwétyéni ibótó dya sa, e dadyéni mu, e véléni mbonga e munó adu, na makogo e mabó madu. N’inywé e viyani na etumbé a nyati a mavóngó, oyani ; le mu dyakani, le sarakani : Navwana mwa’mé amé anó abetyendi weni, atimbandi eménó ropé ; a betyendi nyameni ; a duwamandi. Wa mu yalétyé esara.

Ndi mwa’du a motodu a betyendi ekanga ; va vetye mu, a bakamaka na mbadi, a mu-okaka mabeka na lembo. ¿ Na mu nóndaka moseyi umbókó, na mu na babétyé mu, na, bema mébi bendi dya ? Na mu na sebwaka mu, na mwa’nyungwé a pabandi, na góngwé navó’yidyétyé etumbé a nyati a mavóngó, navwana a duwate mu upesa. Na mu na va lingwaka, abe bóbó dyira, evara ndi va kudwetye gangwé, na mu na sósélétyé mu. Na mu na’vwanaka, na mu na vókó na gangwé, na, Lóngókóte mepuma mebóló meyé ngwé dyandyeni’vé mi nana, na be ne egombe eyé ngwé puliyeni elekanako-avé ebe ngwé tayeni dyélé mwa’taba egala na, na saretye na mboyi nyamé. Nandi iviya dye viya mwa’mé-avé anó a zidyé iyumba dyavé na bevove, ewedyéndi mu mwa’etumbé a nyati a movóngó. Na mu na vókó na mu, na, Mwana eyéte na ngwé egombé’ziépi, na beyé na ngwé biéziépi beyéndi’byavé ; Ebetyendi dódó né’wé le saraka, n’iwé le tóyókó mbya ; navwana mwané a nyungwé-anó a betyendi awa ndi amundi migó ropé, abetyendi nyameni a duwamandi.

Na Mu na sebwaka tegó na bikuwi byadu, na Enami a momu na’gugu a betyendi na molo a tyoli ; A saluwetye mu na a dyunguléndi mu iyumba dyadu. ¿ Na mu nó ndaka mu na vókó na mu, na, Rémé lé oka ngwé nó kaka eni egalavé ? Ta puliyé ngwé nyanga bévé esaka va bévé molo-a tyoli ; navwana evagó’bé molo a tyoli ; ¿ Na Molo a tyoli na vókó e molema téyi, na, Na malé esaka dya ? navwana mopandyamé avéndyiyéndi ngwé eviya molo-a tyoli ; nabe na ngudi yólé ipudwa ; nayétegó na vigóni na idyombéné. Na mandi esaka nyanga méni, na vayé ngwé na véndyémé molo a tyoli né wa wamu iriyétyé ngwé e mambadi maya. ¿ Na mu nondaka wa betye gangwé nanweni waziépi na mu na vókó na a bogobogo na, Eyélé nanweni moyandyamé dya ? Na mu na vókó, na, kama a beyéyi a mavulé, Na mu na vókó na mu na, Ingaka edyanganangobo-avé, e diya wówó, névé e vélé mabo matanu. ¿ Na mu na vókó nómbókwé, na, Eyélé nanweni dya ? Na mu na vókó na, kama a beyéyi bya hwit, Na mu na vókó na mu na, ingaka edyanganangobo-avé, e léndé mabo ebuwa. Na mopandyi nava ebandiyétyé molo a tyoli mé mobetye mba saka gondyeneni mora, navwana asetyendi bokeli ; navwana wana wa zie méni wa yéndi e igona dya ya ipulé wa na wana wa bwe.

Na sebwandi nénywé, na, Latakani mboyi na Mamoni ma ebeva yondi yé vay’inywé e véndyéméni, wé ngénywé e madidi ma gombiéziépi. A bómbó ikéngé na betiké, a mategó bómbókó ikéngé na bebóló ; na ama sumamaka na betiké amategó sumamaka na bebóló. ¿ Nde’tóndyé’inywé mba bómbókóni’kéngé na mamoni ma ebeva, ra nd’ama bómbiyéty’inywé hika a mbambayé ? ¿ Ndi etóndyé inywé mba bómbókó né’kéngé na bya motu’mbókwé, ra nda ma tayaké’nywé e ibyanu méni ? Ebe na moseyi moyé mo diliyétyé wapandyi wabaye ; navwana ayéndi a viné umbókó, né mu a tóndé umbókwé, etóndyé mba bétyé na vókóna a mandi bómbiyétyé umbókó né mu a vovuwé umbókwé, Ebe na ngudi diliyéni Anyambé na Mamoni.

Na Firisis nye betye nétóngina, nó kaka bema mébi byéziépi wa mu’tyebaka Mu. Na Mu na vókó na wa, na, Inywé ndi e kamiyéni nyolo nyanu méni e pwanda mya wato ; ndi Anyambé a yéte puleni melema myanu ; navwana e tónó dyambo itubwé na wato eyéndi ima e vinwé e mondongo-a Anyambé.

Belekanako na mesótyi be sutyetyemdi e Jon ; eviya egombe méra ipanga dya Anyambé dye pakwéndi, na moto mwéziépi a pityilandi e dyira e téyi. Eyéndi ebóbó wa na zie na loba be dolaka, ndi hanga na epusi etiké e puswaka e belekanako.

A ma e véndyiyétyé mwad’adu né mu a baya umbókwé, a sandi ihonde, na ama ebayaka mwado mé ayé veguweni na momadu mura, a satego ihonde.

E betyendi na enami a momu e betye e dayaka mangóla na mavéla masa, abetye a dyaka bedya byasa dyoba dyéziépi. Ebetyendi na modyombini dina na Lasarus, a betye a nanguwétyé umbyó adu, pendye mu e nyolo ti. A tokaka e dyidywé na nguhu nye betye nye kwaka e tagulu a enami mé a momu era, na mbwa nye betye tegó nye viya méngwétyé pendye nyadu. E betyendi va wetye modyombini mo waka, na mu na bapwétyé na bendyél na e ngonga Ebraham ; na Enami tegó na va ewaka, na mu na va dyamwétyé : Na mu nava ebetiyétyé migó madu e Hél, a mu e myadi, na mu na tóyókó Ebraham abiyeneni, na Lazarus e nogng’adu. Na mu na va’maka, na mu na vókó na, Lalé Ebraham tóyókó ngwé mambwangó, né’vé e loma Lasarus, na, adubetye munó adu e meba, né mu ótiyé ngwé elémé-amé, navwana natóyóndi myadi e mongonyi mému. Ndi Ebraham a vótyi na, Mwana, zimbuwétyé egombe ebetye’vé e migó ebetyendi eduwaka bema byavé bya’sa, Lasarus tegó bema bebeva, ndi tyatya méni a mundi tóyókó mbya, ndi óvé e tódywétyé myadi. Dyéléte byéziépi be diyete, le yéndi na ebeya etubwé kombweni tétéy’ago na’vé, evara ndi eyé wayé wa tokaka edola eviya eva na vayé’vé wa be ngudi e yólé ; na wa viya erago, wa va yólé tegó edola na vay’iwé’enu. Na mu na vókóna, na sóséléndi’vé Lalé, lomaka mu e mbada lalé. Navwana nayi na wana wa’ya watanu ; evara ndi eyé mu a pakwaka wa, evwa wa nyókó viya iboko mé dya myadi dyi. Ebraham na mu, na, Wayi na Moses na mesótyi ; wótyetye wa. Na mu na vókó, na, Nyawé, lalé Ebraham ; ndi etóndyé umbókó a tyéyé e mboka wa eviya iwedi, vókóna wé Iwamandi. Na mu na vókó na mu na, etóndyé wa mbó kaka Mosés na mesótyi, wa va tegó oka, dyéléte umbókó a tongwa eviya iwedi.

Na Mu na vókó na bikuwi byadu, na ibaku dye kóbiyéné dye va bé mba vyaka ndi maguga na ama epabiyétyé dyo ; Eyéndi enyévé wa e mboka mu na mu a tingwétyé ilale dye kókwéné e ibólu dyadu, né mu avugwé e manga, wa na mu a kóbiyétyé umbókó e watiké wa nana.

Bandamiyétyéni inywé méni né’nywé méni, Etóndyé mwa’nyungwé a bevé’vé, sembétyé mu ; etóndyé élwa iyidyétyé mu. Ndi etóndyé a bevé’vé ro motoba na vókó e dyoba, né mu a timba tegó e mboka’vé ro motoba na vókó e dyoba, na, né Iwamandi, iyidyétyé mu.

Na metodu na vókó na Mopandyi, na, Sadéty’iwé ikamiyé. Na Mopandyi na vókó, na, E bétyéni na ikamiyé ené motonga a ebuma a mustard, té’yéte’vókóni na ele mé a Sikamaen eni, na, Pumbwamaka na metambe, etyé liyamaka e manga ; né yo e mat’okénywé.

¿ Ndi rand’ayé vay’inywé, a be mu na moseyi mo pudwaka na plau dyélé mo dyidyétyé bimbe, a vyakate eviya ekanga, né mu na mu na, egombe tegombe va diyetye e bedya ? Hanga na amandi evókó na mu na, kendyétyé ibyamé iboko dye ma e dyaka ngwé, etinga utumba, emu vurétyé ngwé nóta dya dyeni, né ngwé na nya ; ¿ nandi óvé eva viya dyaka né emu nyaka ? ¿ A tayandi moseyi mé mora akeva navwana a sandi bema be bé mu a sombétyé mu ? na pikiliya. Yo nyanga mé te anu, etóndyé esandyéni bema biéziépi beyinywé sombweni, vókó teni na, Leyéndi waseyi wa yé mbé’kova, le yéte seni nyanga eb’iwé le lukaka esa.

Ebetyendi va betye Mu a tyétyé na tyé bómbó e Jerusalem, na mu na dolaka e tétéyi a Sameria na a Galili.

Va betye Mu éraka e iboko né gugu, na dyomu dya wamu wa betye na bimba na lataka na Mu, na wa na témétyé abiyeneni. Na wa na betyyétyé moyi maya na vókó, na, Jesus, Mukuwi tóyók’uwé mambwangó. Ndi vatóyetye Mu wa, na Mu na vókó na wa, na, Tyétyéni, e leviyéni nyolo nyanu e mboka Prist. E-betyendi va betye wa wa tyétyé na wa na puwaka. Umbókó a rambaya, va tóyetye mu, na óngandi, na mu na timbaka, amu bendétyé Anyambé na dyoyi’loba. Na mu na kwaka na mondongo-adu e mako madu, a tayaka Mu akeva, na mu a betyendi a Sameria. ¿ Na Jesus na’vwanaka na Mu na, vókó, na, wabe onguwetyé dyomu ? ¿ ndi ebuwa na vókó emundi’ve ? Wabe duweme itimba itaya dy’Anyambé ivenda kabo mwéndyi mému. Na Mu na vókó na mu, na, Témétyé, tyétyé e rey’avé ; ikamiyé dyavé dyo’ndyiyéndi’vé.

Va betye Farisis wé’pwa Mu, na, Ipanga dy’Anyambé dye ngalé vyaka e ra gombé, na Mu na’vwanaka wa, na, Ipanga dy’Anyambé dye viya en’ima etónó ; Né wa wa na vóyó, na, Lóngókóni eva, dyéléte na, evanyé, navwana ipanga dy’Anyambé dyeyi nénywé.

Na Mu na vókó na bikuwi byadu, na, minya ma viyandi ma nga tokaké’nywé itóyó dya dyobé’vókó dya mwa’Moto, ndi eva tóyóni dyo. Wa ngandi vókó né’nywé, na, Tóyókóte eva ; tóyókóte evanyé, etyétyéni ; ninywé e vitetyeni wa. Navwana tené nyanga’yé evévéli, e vélima isuku dya loba ivókó, e panyate na tyé bómbókó isutyi dya loba ivókwé ; yo nyanga mé te enga bétyé dyoba dya mwa moto. Ndi e bogobogo a lukandi tóyó betuniya na bema be bóló na igona médyi dyota tyiya Mu tyiyeni.

Te ené nga betye yo e minya ma Noa, na tegó enga bétyé yo e minya ma mwa’moto. Wa dyaka, wa nyaka, wa bayaka, wa tayanaka e maba, kwanga na dyoba dyi retye Noa e Ark, na tonda na vyaka na dyiliyétyé wa waziépi. Ené nga betye yo e minya ma Lot, wa dyaka, wa nyaka, wa sambaka, wa sambiyétyé, wa liyaka, wa longaka. Ndi dyoba mé dye kudwetye Lot e Sodom te dye nóyetye veya na Sulfer eviya loba, na dyiliyétyé wa waziépi. Na tegó e nga bétyé yo e dyoba dye nga kudwanaka mwa’moto.

Edyoba mé dyera anga bétyé e mbadi loba, né mu na bema byadu e mbadi a lókó’gumya ivéndyiyé dya byo ; na anga bétyé ezityi, a timbetye tegó na puga. Zimbuwétyé mwada Lot : Mwéziépi a ma tokakó’ndyiyé eménó-adu, a mandi nyamiyétyé yo, na mwéziépi ama nyamiyétyé eménó-adu te a ma tataka yo. Na sebwand’inywé, e elu méra wamu wabaye wa ngandi bétyé e ikond’uvókó, umbókó a ngandi’ngwétyé né umbókwé a likana. Wado wabaye wangandi kókótó ta, umbókó a ngandi’ngwétyé umbókwé a likana. Wamu wabaye wa ngandi bétyé ezityi, umbókó a ngandi ngwétyé, umbókwé a likana.

¿ Na wa na’vwanaka Mu, na, E ve Mopandyi ? na Mu na vókó na wa, na, Iboko dyeyé ubimba dyote dye buséné Mbela (vinyóni).

Na Mu na kanaka wa mokanakódi, na, wato wa lukandi ekaliya egombé’ziépi, mba vóhómókó. Na, e betyendi na moyétyiyi e mboka’vókó, mo betye mba nyóyókó Anyambé, né mu mba sólókó tegó moto. Ebetyendi na mokusi e mboka mé, na mu na vyaka emboka mu, na Kundaka ngwé molon’amé. Ndi abe bóbó ukili ; ndi na puziépuzié a va evókó e molema etéyi, na, Dyéléte nga yé ngwé mba nyóyókó Anyambé, né ngwé mba sólókó tegó moto ; Ndi navwana mokusi mému mo sandi ngwé ndyuke, na mandi kundaka mu, evwa a nyókó vóhiyé ngwé na bovyaka na bovyaka.

Na Mopandyi na vókó, na, Okakateni nyanga vóyó moyétyiyi ubeva. ¿ Ndi Anyambé a va kunda wa yé Mu póneni wéyidyéné elu na emanda vayé Mu dyélé mu a yikaka egombe abé na wa ? Na sebwandi nénywé, na, a mandi gunganaka e kunda wa. ¿ Mété vanga vyaka Mwa’moto, a ngate duwa ikamiyé ezie ?

Na Mu na kanaka mokanakódi mé mu e wabetye wa petiyetye waméni na, wayéndi gondyeneni, ndi wa pédyétyé wavókwé. Wato wabaye wa betetyendi e Tempél ikaliya, umbókó a Farisis umbókwé a mundyi duti. Na Farisis na témétyé, na Mu na kaliyaka na nyolo-adu nga nana, Anyambé, na tayandi Ové akeva, navwana nabe ené ngayé wato wavókwé, ené wapambaliyini, ené wayé wabe gondyeneni, nga ihonde, tegó ené mundyi duti mé mu nana. Na dyidyandi rayi e wiki’vókó ro nyebaye, na tayaka mbéya dyomu a monguma’amé. Na mundyi duti na témétyé abiyeneni, a diye na ngudi ebetiyé dyélé na migó madu e loba, a kutaka ngonga’du, na, Anyambé okaka ngwé mambwangó ngwé motubeva. Na sezwandi’nywé, na, momu ménó a gumyetyendi na tyétyé e mbadadu kamuweni wa na umbókwé ; navwana ama ebetiyétyé nyolo adu mwéziépi nd’ama gumuwétyé, ndi a ma gumiyétyé nyoloadu nd’ama betuwétyé.

Na wa na vyaka tegó Mu na metyétyé, na na a kupenetye myo, ndi va tóyetye bikuwi byadu, na wa nava e dekaka wa. Ndi Jesus óndetyendi wa va betye Mu, na vókó na, Likakani wana tiké wa vetye e mboka ngwé, e detyetyeni wa, navwana dyo dyóngó médyera ndi dya ipanga dya Anyambé. Pónipóni Na vóndi nénywé, na, Ama bétyé mba séndyélétyé ipanga dy’Anyambé ené mwa motiké a véra eteyi na pusi.

¿ Na mopandyi nó’gugu né’pwaka Mu, na, Mukuwi a sa, na setye lé rémé idyiga dya eménó-a egomby’éziépi ? Na Jesus na vókó na mu, na, e tubalé Ngwé na asa nénde ? Ebe na ayé na, sa kabo Umbókó, mundi Anyambé. E yéte puleni belekanako, esety’ihonde, Oyetye, Ibetye, Ebapetye upako a evela, Hetyiyétyé góngwé na nyungwé. Na mu na vókó, na, bi biéziépi te beyé ngwé tateni eviya ngwé ndémbé.

Ndi vótyetye Jesus bema mébi, na Mu na voko na mu, na, endite e nyamanaka ima evókó ; sambiyétyé beyé navé byéziépi emu kabaka na mekuge, vókóna emundi na hika e Hévén, eviya ivité dyamé. Vótyetye mu eni, a tóyetyendi mambwangó mabóló, navwana a betyendi na ngumba ebóló.

Va betye Jesus a tóyó na, a tóyóndi mabwangó ma bóló na Mu na vókó, na, eyéndi ebonga’bóló na wayé na hika ebóló wé’raka ipanga dy’Anyambé. Navwana eyéndi ebóbó na kamél iraka ipóndi dya tombe, wa na moto ayé iteni éraka ipanga dy’Anyambé. ¿ Na wótyetye na vókó, na, nandi rand’amó ngaka ? Na Mu na vókó, na, Bema beyé bebe ngudi esama na wato beyéte besamaka na Anyambé.

Na Pité na vókó, na, Lóngókóte le sendyandi byéziépi névité dyavé. Na Mu na vókó na wa, na, Pónipóni Na vóndi nénywé, na, Ebe na moto ayé sendyeni mbadi, dyélé gangwé na nyangwé, dyélé wana wa nyangwé, dyélé mwado, dyélé wana, egala ipanga dya Anyambé ; Anga bétyé mba duwaka wa a tyatya méni eva, na e zie eviya eménó a egombé’ziépi.

Na Mu néngaka dyomu na wabaye, na Mu na vókó nawa, na, Lóngókóteni le betandi e Jerusalem, e bema be léndetye mesótyi egala mwa’Moto itima dya biéziépi. Navwana a ngandi bómbuwétyé e betomba, a ngandi tyebwétyé, A ngandi sowétyé dyóngó dya ebeva dyéziépi, Angandi tuwétyé matyéndyé. Wa ngandi dokaka Mu, né wa wóya Mu, na e minya malalo vókóna A tongwandi. Ndi wabe bómbiyé bema mébi na a’vókó ; ndaga méni ebetyendi botemeni e mboka wa, na wa bepulé bema be betye be kalwétyé.

Ebetyendi va betye Mu amu baka na Jeriko, na pógu na egugu ebetye diya e pépégu a reya a dyómbénétyé. ¿ Vó tyetye mu ebumbu e dolaka, na mu na vé’pwaka na, eni eyé lé dya ? Na wa na sebwaka mu, na, Jesus dya Nazaret nda dola. Na mu na’maka, na, Jesus mwa’a Devid okaka ngwé mambwangó. Na wa tyétye e bogo na dekaka mu, na na, a votyetye voo, ndi ametyigo wa, na, Mwa’Devid okaka ngwé mambwangó. Na Jesus na témétyé, na Mu na sombétyé na, aviwenetye na vayé Mu, va betye mu a bakama, na Mu né pwaka mu na, ¿ Etoka lé ngwé na saka’vé dya ? na mu na vókó, na, Mopandyi na duwemetye na itóyó. Na Jesus na vókó na mu na, duwamaka na itóyó, ikamiyé dyavé dyo’ndyiyéndi’vé. Na mu na duwaka itóyó bovolaka na mu na vitétyé Mu a tyétyé a bendétyé Anyambé, va tóyetye wato waziépi, na wa na tayaka Anyambé ibendé.

Na Jesus né raka na dolaka na dya Jeriko. Lóngókóte, momu dina, na Sakius, a betye molo a wéndyi duti, né abetyetegó na ngumba, A totyetyendi etóyó Jesus ené nga betye Mu, ndi abe eyólé na ebumbu, navwana abetyendi na motéyi uvuvé. Na mu na tyétyé membila ebogo, na mu na betaka ele a Sikamor na na a mandi etóyókó Mu ; navwana A betyendi na A-dolandi dya reya méra. Va pebetye Jesus iboko mé, na Mu na lóngókó e loba na Mu na tóyókó Mu, na Mu na vókó na mu, na, Sakius voliyétyé névé egumya, navwana na yéte na diyaka emunya méni e mbada’vé. Na mu na voliyétyé, na mu na gumyaka, na mu né riyétyé Mu na mbya.

Ndi va tóyetye wa yo, wa waziépi wa mu nyinyilaka, na, A tyéndi’raka e mbadi a motu’beva. Na Sakius na témétyé, na mu na vókó na Mopandyi na, Lóngókóte Mopandyi ; ekulu a ngumba’mé ndi e taya ngwé mekuge ; ndi etóndyé né ngana moto te moto ima na bopwataka, na mandi timbiyétyé mu benayi. Na Jesus na vókó na Mu, na, Emunya méni ndi e paba dyonga e mbadi méni, navwana mu a yéte mwa’a Ebraham. Navwana Mwa’Moto a viyandi itoka na dyondyiyé dya ebetye nyameni.

Vó tyetye wa bema mébi, na Mu na badétyé na kanaka mokanakódi ; navwana A betyendi Amu baka na Jerusalem, navwana wa betyendi wa pikiliyaka, na, ipanga dya Anyambé dye mandi kudwanaka e ro evókó. Evara ndi evótye Mu na, Enami a momu na’gugu e tyétyendi ezity’abiyeneni a tyi’ngaké’panga egaladu méni, né a timba. Na mu nó’ndaka dyomu dyadu dya waseyi, na mu na bómbiyétyé wa dyomu dya mawéla, na mu na vókó na wa, na, Dyandyakani kwanga na vanga vyaka ngwé. Ndi iwadu wa mboka wa betye wa vinétyé mu, wa lometyendi mbando e puga’du, na, Le toka momu ménó a pangaké’wé. Ebetyendi va betye mu a timba, a duwa, ipanga, na mu na sombétyé na, waseyi mé iwadu wa tayetye mu dólé wóndwetye na vayé mu, na evara ndi ema bétyé mu a pulétyé nyanga e kova moto moto na ukita. Na a bogobogo na vyaka, na, Mopandyi, iwéla dyavé dye kovandi dyomu dya mawéla. Na Mu na vókó na mu, na, Gondyeneni, mosey’asa, navwana e bombondi ikéngé na betiké pangaka dyomu dya mamboka. Na a wabaye na vyaka, na, Mopandyi, iwéla dyavé dye kovandi mawéla matanu. Na mu tegó na vókó na mu, na, Diyaka tegó óvé nga mamboka matanu. Nó’mbókwé na vyaka, na, Mopandyi, lóngókóte iwéla dyavé ndi dyi dye bé ngwé tateni batyiyeni na modamba. Navwana na nyóyetyi’vé, nana eyéndi mot’ubonga, enikate beyévé mba nandyiyétyé, névé e pumbwaka be betyevé mba liyaka. Na mu na vókó na mu na, Ové moseyi ubeva, na mate’yétyiyétyé’vé na bya modumbu avé méni, Ové te pulepule na, nayéndi mot’ubonga, na nikandi be bé ngwé mba nandyiyétyé, na kwélétyé be bé ngwé mba liyaka. ¿ Ndi inde ndi ebetye’vé mba tayaka dólé-amé e ikova, evara ndi vangé pwaka ngwé ibyamé né’kova e iviya dye nga vyaka ngwé ? Na mu na vókó na wa betye baka, na, Ingakani mu iwéla médyéra, ni’nywé e tayani dyo e ayé dyomu dya mawéla. (Na wa na vókó na mu, na, Mopandyi, ayéndi na dyomu dya mawéla). Navwana na vóndi nénywé, na, Ayé wa mwéziépi ndama tawétyé, ayé mba bétyé wa, a mandi’ngwénétyé dyélé te ibyadu be yé na mu. Ndi vyakani na waloni mé iwamé eva, wa betye mba tokaka ngwé na panga ka wa, ni’nywé oyani wa e pwandy’amé.

Va betye Mu a vyaka kala, na Mu na tyétyé e bogo, bobetaka natyé bómbókó e Jerusalem.

Ndi ebetyendi va betye Mu a vyaka baka na Betpeje na Betane, e mokodi mo tubwétyé na, mokodi a Olivs, na Mu na lomaka bikuwi byadu bebaye. Na, tyétyéni e ibókó dyeyé e bogoanu ; e betakateni e téyi e mandi duwakani etumbé a buru tingweni, eyé ega diwé na moto ; vurwakani yo eviyani na yo na eva. ¿ Ndi etóndyé moto te moto épwé’nywé, na, evurwandini yo nénde ? emu vókóni na mu nga nana, navwana Mopandyi ayi yo na mala. Na wa lomwetye na va tyétyé na wa na kobétyé ené nga betye Mu a sebwaka na wa. Va betye wa wa vurwaka buru, na wa betye nga yo na vókó na wa, na, ¿ evurwandini buru nénde ? Na wa na vókó, na, Mopandyi ayi nayo na mala. Na wa na vyaka na yo e mboka a Jesus ; na wa na babétyé ngóyi nyaya e buru, na wa na batiyétyé Jesus e téyi. Nga betye Mu a tyétyé, wa yayaka ngóyi nyaya e reya.

Va betye Mu a mu baka na igumidi dya mokodi a Olivs ebumbu éziépi a bikuwi emu yalétyé esara né’bendé dy’Anyambé na moyi’loba egala bebolo mé betubwé be tóyetye wa ; Wa vókó, na, Ibótó na Upolo mo viya na dina dya Mopandyi, dyonga e hévén, ivenda e loba la loba.

Na Farisis nyevókó nya ebumbu na vókó na Mu, na, Mukuwi dekaka bikuwi byavé. Na Mu na’vuanaka, na Mu na vókó na wa, na, Na sebwandi nénywé na, wa nana wa vokandyé, vókóna malale mayéte ma gunganaka dyama.

Va betye Mu a bakama na Mu na lóngókó mboka, na Mu né yaka yo duwe. Na Ové, kabo Ové, ebétyé e pulétyé, e dyoba mé idyavé dyi, bebolo bya dyonga dyavé ; ndi tyatya méni be botwéndi e migó mavé. Navwana minya ma viyandi vayé’vé manga bétyé waloni wavé wa vwasakavé metyetye iluweneni, né wa ové dibiyeni sóta dibiyeni’vé begali biéziépi. Wa ngandi nandyiyétyé’vé na zie vévélé, na wana wavé wa yé’vé etéyi, na wa wa va lika’vé dyélé na ilale ivókó batemeni na ivókwé ; navwana ebebé puleni egombe é’lumbwé dyavé.

Na Mu na tyétyé e témpél, na Mu na yalétyé ikuduwé dya wa betye wa sambaka e téyi, na wabetye wa sambiyétyé tegó. Mu na wa, na, Eyi léndweni, na, mbad’amé eyéndi mbadé’kaliya, ndi epangandini yo iboko dya mibi.

Ekuwénétyé e Tempél dyoba te dyoba, ndi prist nya myolo na waléndi na wato wa tubwé wa totyetyend’oya Mu. Wa be duwa nyanga eyé wa wa saka : navwana wato waziépi wa betyendi Mu na ivotyiyé ibóló.

E betyendi dyoba ivókó e mo minya mé mara, ékuwétyé wato e tempel, a pakwaka sango asa, na prist nya Myolo na waléndi na watodu na vyaka e mboka Mu. ¿ Na wa na kalaka na Mu, na, Sebwaké’wé, ngudi esa navé bema mébi ? ¿ dyélé ra nda tayetye’vé ngudi méni ?

Na Mu na’vwanaka na Mu na vókó na wa, Na, Na mategu puakénywé ndaga evókó, n’inywé e sebwani Ngwé. ¿ Ibatiyinidi dya Jon, dye betyendi dya Heven ityé dya wato ? Wamu sokanaka wa méni na waméni, na, Etóndyé le vó na eviya loba ; ¿ A mandi’vókó na ndi ebetye léni mba kamiyétyéni mu nénde ? Ndi itó le vó, na, dya wato, waziépi wa mandi lumaké’wé malale ; navwana wa ditetyendi Jon na a betyendi mosótyi. Na wa na timbwanaka, na, wa be na ngudi eyólé esebwa egali e vetye yo. Na Jesus na vókó, na, né Ngwé na va tegó sebwé’nywé ipanga dye sa na ngwé bema mébi.

Na mu na yalétyé e kana wa mokanakódi mému : Momu nó’gugu a liyetyendi ekanga na mu na likaka yo wa-liyi na mu na tyétyé ezity’abiyeneni ukili mwabé. E egombe, na mu na lomaka waseyi vayé waliyi, na, wa tayetye mu bebuma bya ekanga ; ndi waliyi wa dotyetyendi mu, na wa na timbiyétyé mu gape. E ro’vókwé na mu na lomaka moseyi umbókwé, na wa na dokaka tegó mu, na wa na saka mu isedi dya vigóni, na wa na timbiyétyé mu gape. Ro’vokwé na mu na lomaka a walalo, na wa na kwélétyé tegó mu, na wa na vugaka tegó mu eboka. ¿ Na Mopandyi a’kanga na vókó, na, na mé saka dya ? na mandi lomaka mwa’mé a tóndé ngwé ; eyéte e diyaka na, wa yéte wa bé wa tóyó mu, né wa wa diliyé mu. Ndi va tóyetye waliyi mu, na wa na sokanaka wa méni na waméni, na, modyizi ndi mu ; vyakani, loyetyeni mu, né ekuha emu ago. ¿ Na wa nava ekuduwétyé mu e bwebwe a ekanga, na wa nóyaka mu, Mopandya’kanga a malé saka’vara dya ? A ngé viya dyiliyétyé waliyi mé wara, né mu a taya ekanga e wavókwé, va betye wa wóka vo, wa na, Anyambé a dekandi.

¿ Na mu na lóngókó wa, na Mu na vókó, na, Eyé léndwéni eni eyé lé dya ? ¿ Ilale mé dye tyiyetye walondyi ndi dye mu molo a esuduku ?

Moto mwéziépi a kwa ilale médyi a mandi bukaka, ndi ayé dyo dye tisaka mu mwéziépi dye mé kókókó mu nguhu.

Na Prist nya myolo na waléndi na tokaka ebómbo Mu iwéra mé dyera ; ndi wa nyóyetyendi wato ; navwana wa tóyetyendi mokanakódi mé mura na moyéndi aya.

Wa mu bémbétyé Mu, na wa na lomaka ndódu, nye kuduwenetye ené wato wasa, na na wa mandi bómbókó ndaga nyadu, na evara ndi ema pabuwétyé Mu e ngudi na ipanga dya góveni. Na wa né’pwaka Mu, na, Mukuwi, le puléndi na evóndi névé ikuwétyé gondyeneni, névé é sóló tegó moto mwéziépi, ndi ikuwéndi reya a Anyambé pónipóni. ¿ Eyéte gondyeneni na le tayaka Sisar duti ityé ebe ?

¿ Ndi a tóyetyete ugono aya, na Mu na vókó na wa, na, Adyéndini ngwé nénde ? ¿ Leviyétyéni ngwé fura, eyéndi nóvela na dina dya ra ? na wa na timbwanaka na vókó, na, dya Sisar. Na Mu na vókó na wa na, tayakani Sisar bema beyé bya Sisar né Anyambé bema beyé bya Anyambé. Ndi wabe yólé ebómbó ndaga nyadu e pwandya wato, na wa na mamanaka dyavwana dyadu, na wa na votyiyénétyé voo.

Na Sadusi nyevókó na vyaka e mboka Mu nye betye nye gógókó na, itongwa dyebe na wa né pwaka Mu, Na, Mukuwi, Moses a léndetyendiwé, na, etóndyé mwanyangwé na moto awa, né mu alika mwado, awa mba likaka wana, né mwanyangwé a mu’ngaka mwadadu, né mu a témiyé mwa’nyangwéibóngó. E betyendi na wa nyangwé evókó motoba na vókó : na a bogo né’ngaka mwado, na mu na waka mba mwana. Na a wabaye néngaka mu e bobayaka, na mu na waka, mba bétyé na mwana. Na a walalo né ngaka ; yo nyanga mé te a motoba navókó mwéziépi, wa wetyete mba likaka wana. E malityiyéné na a mwado na waka tegó. ¿ Angandi bétyé vo mwada ra e itongwa ? Navwana wa waziépi motoba na vókó mé te wa bayetye mu.

Na Jesus na timbwanaka na vókó na wa na, wana wa zie méni wa bayandi né wa wa tawétyé e maba. Ndi wa nga tónókó oyeni né duwa dya zie méra, na itongwa eviya iwedi, wa baya né wa wa tawé e maba. Na wa wa vagó ewa ; navwana wa mate bétyé ené bendyél ; wa mundi wana wa Anyambé wa yé wana wa itongwa. A na wato wa tongwandi, palélé Moses a leviyetyete e ezityi (Ipaka) va tuba mu Mopandyi, na Anyambé a Ebraham na Anyambé a Aisak, na Anyambé a Jekob. Navwana A be Anyambé a mewewe, ndi A wayé migó ; navwana waziépi wa yéte migó e mboka Mu.

Na waléndi wa-vókó m’avwanaka, na, Mukuwi, esebwandi dódó. Eviya vara wa begu’pwa Mu nyuwe te nyuwe.

¿ Na Mu na vókó na wa, na, Inde ndi evóyó wa, na, Kraest a yéndi mwa’a Devid ? Nandi Devid mu uméni a mu evókó edyanganangobo a Psamu, na, Jehova a vótyi na Mopandyamé, na, Diyaka ebóamé a’bómwé.

Kabo na panga waloni wavé mbata e tisa’vé.

¿ Devid a tubaka Mu, na, Mopandyi nd’ayélé mwadu dya ?

Na Mu na vókó na bikuwi byadu e maló ma wato waziépi, na. Kelevakani na waléndi, wa toka etamwa na ngóyi nyabé, wa tóndétyé magomwi e maketi, na madidi matubwé e Sinegog, na lelika la beteni e masango. Wa pukula mambadi ma mekusi, na wa wasaka makaliya mabé e dyabé dya wato ; wa wara wa ngagó duwaka ivomuwé itubwé wa.

Na Mu na betiyétyé migó, na Mu na tóyókó benami wa vélétyé mavé maya ma botayaka e’gala a mongumba. Na Mu na tóyókó tegó mokusi nó’gugu mo vélétyé mait mabaye etéyi. Na Mu na vókó, na, na sebwandi nénywé e pónipóni, na, ukuge mé a mokusi mu nana mo véléndi wa na wa waziépi. Navwana wa nana waziépi wa véléndi mataya maya ma Anyambé eviya ebóló aya : Ndi mu na bonyamu adu a véléte nyanga ebé na mu éziépi.

Va betye wavókó wa kalaka egala tempel nyanga ebetye yo kóvuweni na malale ma sa na mataya a vótyendi, na. Ndi egala bema mé be lóngunywé bi, minya ma viyandi, ma nga bétyé mba likanaka ilale ivókó né vókwé bateneni, ma nga bétyé mba sadywétyé.

¿ Na wa né’pwaka Mu, na, Mukuwi bema mébi be nga lé ebétyé era’gombé ? ¿ na elé ra ndembwé e nga bétyé va nga samaka bema mébi ? Bandamiyétyéni evwa e nyókó temwéni ; navwana wabóló wa ngandi vyaka na dina dyamé, na, ngwé ndi Kraest ; egombe e bakamandi ; evitetyeni wa. Ndi vangó kaké’nywé egala beduka na bedungu enyóyetyeni, navwana bema mébi ndi bengó taka na’yalé ; ndi isuku dyega bétyé.

Na Mu na vókó na wa, na, era etomba e nganda’naka na etomba evókwé, dyera ipanga na ipanga ivókwé. Zie engandi tyibénétyé na ngudi e maboko mavókó, rayi nyetubwé na bevuva, na belembo bya mazizi na ndembo nyetubwé nye ngandi tónókó eloba.

Ndi ebogo na bi byéziépi nó taka, wa ngandi batétyé mabó maya e mbokénywé na ingongoliyé dyanu, wa nga ndi pabiyéty’inywé e sinegog, na e mbada meboka, e pabuwétyéni e mendongo mya mepolo na wapandyi egala dina dyamé. Engandi bétyé mbokénywé na tiné’pakwa. Nandi leniyétyéni yo e melema myanu, otetye e pikiliyani nyanga ema timbwanaké nywé. Navwana na ngandi tayaké’nywé modumbu na ipulé dye nga bétyé waloni wanu waziépi mba yólétyé suliyé né’dibiyé dyanu. Engandi kóndwétyéni na wa dyayé’nywé, na wana wa nyungwé, na madya wé na mboyi, wa ngando yidyéty’inywé wavókó. Engandi vinwétyéni na wato waziépi, egala dina dyamé. Ndi dyélé na we a molo anu eva enyama. Duwamaka teni e malina manu na iyika dyanu.

Va nga tóyók’unywé Jerusalem iluweneni na ndumba, pulétyéni, na, udyilo adu mo mundi vavuve. Nandi wayé e Judia wa tiletye e mekodi, na wanga bétyé evara tétéyi wa véndyemetye, wa nga bétyé ezityi wa nyóku ra etéyi. Navwana mo minya mé ma ndi ma ngunda, nana evara ndi e nga gondyénétyé bema byéziépi be yé léndweni. Ndi maguga na wa nga bétyé na memi, na wanga bétyé wa nyandyiyétyé, navwana etuniya etubwé e ngandi bétyé e zie, na pilé na wato mé wa. Wa ngandi kwaka na rebo ó’kwalé’bótó, wa ngandi tyéwénétyé mbala e betomba biéziépi, né Jerusalem amu tiswétyé na betomba kabo egombe enga bétyé betomba be gondyénétyé.

Ndembo e ngandi bétyé e dyoba na ngóndé, na menanga ; e zie madyili na betomba, na ndyuke ; manga na bevuluwa be bumbaka. Melema mya wato me ngé pévétyé na dyóngó, na ilóngó dya bema beviya e zie ; navwana ngudi nya loba nye ngandi tyibénétyé. Nandi wa va viya tóyókó Mwa’moto a vyaka evindi na ngudi névenda itubwé. Vanga bétyé bema mébi be yalé esama, nandi eva lóngókóni e loba ni’nywé e betiyéni myolo myanu ; navwana dyóbwé dyanu dye bakamandi.

Na Mu na kanaka wa mokanakódi, na, Lóngókóteni ele é’tóló, na bele byéziépi ; Etóndyé bemu kuduwétyé makayi, inywé méni e tóyóteni né epu léteni, na, egombe a’babadi e mundi vavuve. Yo nyanga mé te anu, vanga tóyóku’nywé bema mébi be samaka, pulétyéni na ipanga dy’Anyambé dye mundi vavuve. Na sebwandi né’nywé pónipóni, na, Igona médyi dye va dola, kabo biéziépi bi be sama. Zie na loba ndi be nga dolaka ; ndi ndaga nyamé nyeva dola.

Bandamiyétyéni inywé méni, evwa egombe te’gombe melema myanu menyókó londa na bema bya eménó méni na iluya na peya, né dyoba mé dyera dye kóbi’nywé matota. Navwana dye ngandi vyaka ené vilambo e mwéziépi a diya e mondongo a zie éziépi. Nandi vurétyéni ni’nywé e mu kaliyakani egombé’ziépi ; evara ndi enga tónóku’nywé oyeni itila dya bema mé be viya bi byéziépi, na itémé e mondongo a Mwa’Moto.

Na emanda a betyendi ékuwétyé e tempel ; e elu na Mu na kudwaka, natyé diyaka e mokodi a Olivs. Na wato waziépi na pundaka na mwado e mboka Mu e tempel, waty’okaka Mu.

Nandi isango dya pémbé a mbé’landa dye betye dye tubwétyé na, isango dyé’nókó, dyebetyendi dye mu baka. Na prist nya myolo na waléndi na tokaka nyanga emó’yaka wa wóyaka Mu ; navwana wa nyóyetyendi wato.

Na Setan né raka e molema a Judas a betye a tubwétyé, na, Iskariot, a tango a dyomu na bebaye. Na mu na tyétyé adu egali na mu na lataka na Prist nya myolo na ngówé nyanga e ma kóndókó mu Mu e mboka wa. Wa tóyetyendi mbya, na wa na panganaka itaya dyadu dólé. Na mu na akanaka ; a mu tokaka egombe a kóndókó Mu e mboka wa vayé ebumbu mba bétyé.

Na dyoba dya pémbé a mbé’landa na pabaka, dye mówétyé inókó. Na Mu na lomaka Pité na Jón, na Tyétyéni va kendyetyeni iwé Inókó, le dyetyeni. ¿ Na wa na vókó na Mu, na, E malé’tokaka le kendyétyé eve ? Na Mu na vókó na wa, na, Lóngókóteni, va mé raké’nywé e mboka, moto a mandi bonganaka né’nywé etéyi, bapeni imógi dya meba, o viténétyéni mu e mbadi emé raka mu. Ni’nywé evóni na momu asa a mbadi, na, Mukuwi a vóndi na’vé, na, móbé a wandyi mo ma dyaka ngwé inókó na bikuwi byamé moyi’vé ? A mandi leviyety’inywé velika vya loba vetubwé kombweni ; emu kendyetyéni e téyi. Na wa na tyétyé na wa na kóbétyé ené nga sebwetye Mu wa ; na wa na kendyétyé Inókó.

Va betye iwéra dye paba, na Mu na dyomu na metodu mebaye na didyénétyé e tagulu. Na Mu na vókó na wa, na, Né’yega ndi dye betye Ngwé na yegaka edya inókó médyi nénywé na Ngwé nó taka tóyó betuniya. Navwana na vóndi nénywé, na, Na vagó’dya dyo, kabo vanga gondyénétyé dyo e ipanga dy’Anyambé. Na Mu né ngaké’mógi, na Mu na tayaka akeva, na, ingakani eni, emu kabanakani inywé méni nénywé méni. Navwana navóndi nénywé na, Na vagó nya ebuma a mokódi, kabo ipanga dy’Anyambé dye viya.

Na Mu né ngaka pémbé na Mu na tayaka akeva, na Mu na bukaka yo, na Mu na tayaka wa, na, Nyolwamé eyé taweni egala’nu yondi’ni ; sakani eni izimbuwé dyamé. Na Mu na tayaka gó imógi, bedya pa, na, imógi médyi dye yéndi panga a tyatya e matyiya mamé ma sola e gal’anu.

Ndi lóngókóteni, ebó a akóndó Ngwé eyéte na Ngwé e tagulu. Pónipóni Mwa’Moto a tyéte ené nyanga eyé yo pangweneni ; ndi maguga na moto mé a ma kóndókó wa Mu. ¿ Na wa na yalétyé dyipwana etétéy’aya méni na, ra ndi a ramb’aya a toka esa ima méni ?

¿ Wa betyetegó na mogo e tétéy’aya méni, na, ra nda’ma langwétyé ita wa ? Na Mu na vókó na wa, na, Mepolo mya betomba me pangandi wa ; na wa panga wa wa ndi wa tubwé na wasa enyévé. Ndi inywé eva béni na ; ndi a ma bétyé utubwé vay’inywé, a diyetye ené ndémbé ; a ma bétyé molo adiyetye ené modyandyi. ¿ Mété ra nd’ayé ita wa, a diya e bedya ityé a dyandya ? hanga na a diya e bedya ? Ndi nayéndi vay’inywé ené a dyandya. Inywé ndini wa yé lilimiyeneni na Ngwé e madywé mamé. Na tayandi’nywé ipanga ené nga tayetye Lalé Ngwé dyo. Na evara ndi enga béty’inywé e dyakani e nyakani e tagulu amé ipanga dyamé, diya e beka e yétyiyétyéni dyomu na membiko mebaye mya Israel.

Na Mopandyi na vókó, na, Saimon, Saimon, lóngókóte Setan a yegand’inywé na evara ndi e ma sagaka mu inywé ené hwit. Ndi na kaliyandi egala’vé, na evara ndi ema bétyé ikamiyé dyavé mba nyamaka ; va nga bétyé’vé ilwa e mu-ódiyétyé wana nyungwé. Na mu na vókó na Mu, na, Mopandyi, na yéte kotyiyeni ityéyé na’vé, e mbada meboka, na iwedi. Na Mu na vókó, na, Pité, na sebwandi na’vé na, kuba eva kókóló emunya méni ndó’vé mba gógókó ro nyelalo, na, epulé Ngwé.

¿ Na Mu na vókó na wa, na, va lometye Ngwé inywé mba elandi a dólé na elandi a kola, na makogo, epuwenetyendini ima ? Na wa na vókó, na, dyélé epusi. Na Mu na vókó na wa, na, ndi e tyatya méni, ayé na elandi a dólé éndyetye yo, ayé na elandi a kola a setye nyanga mé ; ayé mbó’kwala é bótó, a sambiyetye ngóy’adu né mu a samba umbókó. Na vóndi né nywé, na, eyé léndweni eni e mandi timaka na Ngwé, na Mu na langwétyé na waseyi ebeva ; navwana bema be yé e gala’mé beyéte né sutyi. Na wa na vókó na Mu, na, Mopandyi, lóngókóte mekwala myé bótó mebaye ndi mi, na Mu na vókó na wa, na, Emute twétwé.

Na Mu na kudwaka, na Mu na tyétyé e mokodi a Olivs te ené nga betye Mu asaka mbémbé Na bikuwi byadu na vitétyé Mu. Va betye Mu amu iboko mé, na Mu na vókó na wa, na, Kaliyakani evwa enyóku’rani e dyadywé.

Na Mu na véndyémétyé va betye wa ené ivuga dyé laie na Mu na kwaka na mabóngó, na Mu na kaliyaka. Na, Lalé etóndyé ebóbó, véndyiyétyé imógi médyi eviya mboka Ngwé, ndi hanga upango Amé, nd’avé mosemetye. Na Endyél na kudwanaka mboka Mu, eviya loba emu ódiyétyé Mu. Va betye Mu amu toyoko myadi, na Mu na vagó kaliyaka wa ; ebabada’du emu ené matété ma matyiya matubwé ma kwaka ezie. Vé’mwetye Mu ikaliya, na Mu na vyaka va betye bikuwi byadu, na Mu na kóbétyé wa wa tikaka na mambwangó. ¿ Na Mu na vókó na wa, na, E yayaléni nénde ? témétyéni, e mu kaliyakani evwa enyóku’rani e dyadywé.

Va betye Mu a kalaka, lóngókóte ebumbu, na a betye a tubwétyé, na, Judas, a dyomu na wabaye, a tyétyé ebogo aya, na mu na bakamaka na Jesus atyé pyópyókó Mu. ¿ Ndi Jesus a vótyi na mu, na, Judas, e kóndóndi mwa’Moto né’pyópyó ?

E wa betye Mu iluweneni va tóyetye wa bema bema vitétyé, wa na Mu, na, Mopandyi, le kotyetye no’kwalé’bótó ? Na aya umbókó na kokaka moseyi a prist a molo na mu na lenaka mu iló dyadu dya’bómwé. Na Jesus na timbwanaka, na, Sutyétyé evara, na Mu na kupénétyé iló dyadu, na Mu nó’ndyiyétyé Mu.

¿ Na Jesus na vókó na prist nya myolo, na ngówé nya tempel, na watodu wa vetye e mboka Mu, na, eviyandini na mekwala na metumbe ené e viyandini vayé mwibi ? Va betye Ngwé né’nywé e tempel dyoba te dyoba, ebe gambiyéni mabó manu e mboka Ngwé ; ndi iwéra dyanu ndi dyi, na ngudi éviti.

Na wa na vé’ngaka Mu, na tyétyé na Mu, na wa nava epabiyétyé Mu emboka a Prist a molo, na Pité na vitétyé e abiyeneni. Va betye wa wa laté umbiko e tétéya móbé, wa etéyi mo didyénéni, na Pité na diyaka tegó e tétéy’aya. Ndi ngóni na egugu e tóyetyi mu diyeni baka na veya, mu mu digó sii, mu na, anó a betye tegó na Mu. Na Mu na gógókó, mu na, mwado, na pulé Mu. Mwó’kili kwé nó’mbókwé na tóyókó mu, na mu na vókó, na, Eyé tegó aya, na Pité na vókó, na Momu, nabe. Ukili ené iwéra ivókó doli, nómbókwé na vókó dyoyi bondyiyeni, na, e pónipóni anó a betye tegó na Mu : navwana ayéndi nga Galili. Na Pité na vókó na, moto, na pulé nga vóvé, a kalakate nga e ro mé a’vókó kuba e kókólókó. Na Mopandyi na vongwamaka, na Mu na lóngókó Pité, na Pité na zimbuwétyé ndaga Mopandyi, ené nga vótye Mu na mu, na, na kuba na kókólókó, engandi gógókó Ngwé ro nyelalo. Na Pité na kudwaka eboka, a mu’yaka na ngudi.

Na wamu mé wa bómbetye Jesus na va etyebaka Mu, wa dokaka Mu. ¿ Va betye wa wa diba Mu migó, wamu’ngwaka Mu e mondongo, wé’pwaka Mu, na, sókókó, ra ndé’ngwa’vé ? Na bema bevókwé bebóló be betye wa wa kalaka egala’du bolowaka.

Va dibwetye dyoba, na metodu na Prist nya myolo na waléndi na va elaténétyé, na wa nava e pabiyétyé Mu esoka ya, wa vókó, na ; ¿ Ové ndi Kraest ? Sebwaké’wé. Na Mu na vókó na wa, na, Etóndyé na sebwé’nywé eva’kamiyéni. Etóndyé né’pwa tegu’nywé, eva’vwanani Ngwé. Eva doli Mwa’Moto a ngandi diyaka ebó a bómwé a ngudia Anyambé.

¿ Na wa waziépi na vókó na, Eyéndi mw’Anyambé ? Na Mu na vókó na wa, na, E vóndini na, Na yéndi. ¿ Na wa na vókó, na, Le yigó na ra malé ma tali ? navwana iwé méni lokandi eviya modumbu-adu méni.

Na ebumbu aya éziépi né’muwénétyé, na wa na tyétyé na Mu e mboka Pailat. Na wa na yalétyé ibatyé dyadu, na, Le duwand’anó éluwé etomba, né Mu a dekaka na Sisar a tawetye duti, na na Mu méni ndi Kraest Upolo. ¿ Na Pailat né’pwaka Mu, na, Ové ndi Upolo a Jiu ? na Mu na’vwanaka mu, na Mu na vókó, na, Evóndi yo.

Na Pailat na vókó na Prist nya myolo na e mboka wato, na, nabe duwe moto ménó ebutye. Na wa na lolwakagó wa, na, A sisétyé wato, ékuwétyé e Judia éziépi, a yalétyé e Galili na tyé bombókó eva. Vó tyetye Pailat egala Galili, na mu né’pwaka ityé ayénda Galili. Va betye mu a pulé na ayénda ngé’panga dya Herod, na mu na tyédyétyé Mu e mboka Herod, mu méni a betyete eró e Jerusalem e minya mé mara.

Herod a tóyetyendi mbya ebóló va tóyetye mu Jesus ; navwana abetyendi a tokaka etóyó Mu eviya egombe abé, navwana a betyendi óka bema bebóló egal adu ; a yegaka na, ta’ngando taka tóyó Mu a saka elembo. Na mu né’pwaka Mu ndaga nyebóló, ndi abe avwana mu ima. Na Prist nya myolo na waléndi na témétyé wa batyétyé Mu na ngudi wa. Na Herod na wamu wadu wa’duka na vovuwétyé Mu, wa mu tyebaka Mu, na, wa, na dadyétyé Mu ibótó dye panya, na wa na timbiyétyé gó Mu e mboka Pailat Dyo dyoba mé te dye latetye Pailat na Herod mboyi ; na vwana wa betyendi na eloni e vyo waméni na waméni.

Va betye Pailat ónda prist nya myolo na wapandyi wa wato. Mu na wa, na, e vetyendini ngwé na moto ménó, na, éluwéndi wato ; lóngókóteni na kókóte Mu e pwandya’nu, nabe duwe momu ménó rembo egala bema mé ibyanu be baty’inywé Mu. E, dyélé na Herod ; navwana na tyédyéte inywéni Mu e mboka mu ; ndi lóngókóteni, ebe na ima a lutyeni né’wedi e sowé e mboka Mu. Vókóna na mandi dokaka Mu, na lika Mu. Navwana e mala ndi ma totyetye mu ilika dyó’mbókó (lkuduwé) emboka wa Isango. Na wa n’amaka ramba’vókó, na, véndyémétyé na moto ménó evara, né’vé e liké’wé Barabas (A vélwetye e mbada meboka, na egala ivengo né’gugu dye sowetye e mboka na dyoyana).

Pailat a betyendi nó pango a igótó dya Jesus, na mu na kalakagó na wa. Ndi wa’metyendi, na, Bandakani Mu e kros, bandakani Mu e kros. ¿ Na mu na vókó na wa ro a nyelalo, na, na rémé, asalé ra’bevé ? Na be Mu duweni na tina é’wedi : Vókóna na mandi dokaka Mu, na tyédyé Mu. Na wa na va lolwaka gó wa moyi loba, wé’pwaka na a bandwetye e kros : na moyi maya na ma prist nya myolo na balétyé. Na Pailat na lenaka, na, e diyetye nyanga e dyombé wa. Na mu na likaka a betye wa wa dyombétyé, éruwetye e meboka na ivengo dya dyoyana, ndi a tayetyendi Jesus e itotyidi dyaya.

Va betye wa wa tyétyé na Mu, na wa na bómbókó Saimon evókó a a Sairini a vyaka ezityi, mundi a betye wa wa zityiyétyé kros, na a bapiyetye yo e puga a Jesus.

Na ramba a wato etubwé na wado na vitétyé wé’yaka mu, né wa wa tatabanaka. Na Jesus na vongwamaka e mboka wa na Mu na vókó na, Wana wado wa Jerusalem, iyetyeni Ngwé, ndi iyakani egala’nu na wana wanu. Navwana lóngókóteni minya maviyandi, ma nga vóyókó wa na, Ibótó na wayé tyele, na mabumu ma mba dyayaka, na mabéné ma mba nyandyiyétyé. Wa ngandi yalétyé’vó na mekodi na, Kwakani vay’iwé ; nabekondolo na, kuliyétyéni’wé. ¿ Palélé wa salé bema mébi e ele eyé migó, wa malé saka a mwasani dya ?

Ebetye tegó na wavókwé wabaye, wa setye ebeva, wa tyéwenetye tegó na Mu e dyowé.

Va pabetye wa iboko dye tubwétyé, na, Kalvari, na wa na bandaka Mu e kros etéyi, na wa setye ebeva, umbókó ebóa’bómwé umbokwé a’méngu. Na Jesus na vókó, na, Lalé, iyidyétyé wa ; navwana wa pulé nyanga esa wa, Na wa na kabanaka ngoy’adu na gótókó kasé.

Na wato na témétyé ilóngó, Na wa na wapandyi na tóbókó tegó Mu, na, Ondyiyetyendi wavókwé ; a tel’ondyiyé nyolo adu méni, Etóndyé na anó te Kraest ayé pónweni n’Anyambé. Na sódyé tegó wa mu tyebaka Mu, wa vyaka mboka Mu, wa viya tayaka Mu vinigar. Wa vókó na, Etóndyé na eyéndi Upoloa Jiu ondyiyétyé nyoloavé méni.

Na ebutye na léndwétye e moloadu na molapo a Grik, na Latin, na Hibru, na, Upolo a Jiu ndi Mu.

Na moto a setye ebeva umbókó a betye tyélemeni na lowaka Mu, na, etóndyé na eyéte Kraest, ondyiyétyé nyoloa’vé né’wé. ¿ Nómbókwé na’vwanaka na dekaka Mu, na e nyóyó Anyambé, óvé eyé e mo makwa mé ? Ndi iwé gondyeneni mbambayé ; navwana le pahiyandi magomwi na besedi byago, ndi momu ménó abe seni ima t’ima. Na mu na vókó na Jesus, na, Mopandyi, zimbuwétyé ngwé vama pabaka’vé ipanga dyavé. Na Jesus na vókó na mu, na, mbambayé, na sebwandi’vé, na, emunya méni ndi e ma diyaka’vé na Ngwé e Paradais.

Ebetyendi egombe a mawéra motoba, na iviti na diyaka e zie éziépi kwanga na mawéra ebuwa navókó. Na dyoba na vindaka, na modamba utubwé a tempel na lenaka na’tétéyi.

Va betye Jesus ama na dyoy’itubwé na Mu na vókó na, Lalé, Na bómbiyéndi ilina dyamé e makóró mavé, Va betye Mu na vóyeni na Mu na dibaka.

Va betye Senturion a tóyó be semetye, na Mu na bendétyé Anyambé, na, Pónipóni moto ménó a betyendi moto asa.

Bebumbu biéziépi be voienetyendi itóyó, va betye wa wa lóngó bema be semetye, na wa na timbiyénétyé, wa tyétyé wa kutaka ngonga nyaya. Megangano myadu myéziépi, na wado wa vitetye Mu eviya Galili, wa témetyendi na maséyi, wa lóngókó bema mébi.

Lóngókóte, e betyendi na momu dina ; na, Josef, a esoka, né mu a betye tegó moto asa, a gondyeneni. Mu nd’abetye mba kamiyétyé esok’aya na isedi dyaya) a betyendi nga Arematia, mboka a Jiu né mu méni a betye tegó a vurétyé ipanga dy’Anyambé. Momu ménó a tyétyendi e mboka Pailat, na mu na dyombétyé nyolo a Jesus. Na mu na gumiyétyé yo, na mu na dingaka yo na ivéla, na mu na nandyiyétyé yo e rama e pudwetye ilale, e betye mbóta nanguwé moto né vókwé. Dyo dyoba mé dyera ndi dyebetye dya ikendyé na mobetyendi mwega a dyoba dya dyódyó. Na wado wa vetye na Mu e Galili tegó na vitétyé, na wa na lóngókó rama, na nyanga e nanguwetye Nyolo’adu. Na wa na timbaka ikendyé dya meyómbó na mavulé, na wa na vó dyókó e dyoba dya dyódyó, gondyeneni na elekanako.

Nandi e dyoba dya wiki dya bogobogo na wa na wavókwé na pundaka na mwako na wa na vyaka e rama, wa tyétyé na bema bya kango be betye wa wa kendyétyé. Na wa na kóbétyé ilale bingulweni eviya e rama. Na wa né’raka, ndi wa be kóbé nyolo a Mopandyi Jesus.

E betyendi va betye wa wa nakaka egali méra, lóngókóte, wamu wabaye wa betye na ngóyi nyé panya de vavuve na wa. ¿ Va betye wa wa nyóyókó na wa na baliyétyé mendongo myaya e zie, wa na wa, na, Etokandini ayé migó e wa wewe nénde ? A be va nana, ndi A tongwandi ; zimbuwétyéni nyanga e kaletye Mu né’nywé va betye Mu a ndite e Galili. A vókó na, Mwa’moto a ngandi bómbuwétyé e mabó ma wato wabeva, né Mu a bandwé e kros, na minya malalo né Mu a tongwa gó.

Na wa na zimbuwétyé ndaga nyadu. Na wa na timbaka eviya rama, na pabiyétyé sango a bema mébi biéziépi e mboka dyomu nó mbókó na wavókwé waziépi. Wa betyendi Meri Magdalini na Joana, na Meri mya nyangwé na Jems, na wado wavókwé wa betye na wa, wa sebwetye metodu bema mébi. Ndaga nyaya nye tónetyendi mboka wa ené bekalékalé wa be’kamiyé wa.

Na Pité né’mwaka, na tyétyé membila e rama, na mu na balamaka, na mu na tóyókó medamba mya linéni idyadu’boko bya, na mu na timbaka, a tyétyé atyé mamanaka na molem’adu e bema beyé semeni.

Lóngókóte iwaya wabaye e dyoba mé wa betyendi wa tyétyé e ibókó dina na Emaus, dye betye mabo ma nanda motoba eviya e Jerusalem. Na wa na tyétyé wa tyétyé’kalaka egala bema mé be yé semeni bi byéziépi. E betyendi va betye wa watyé watyé’kalaka, na magondyéné, na Jesus uméni na bakamaka, na tyétyé na wa. Ndi migó maya ma zimbuwetyendi na wa puletye Mu.

¿ Na Mu na vókó na wa, na, ra ndazié ndi nye pépén’inywé méni né’nywé méni etondyénétyéni na mambwango va tamwé’nywé nyi nana ? ¿ Na aya umbókó a betye dina na Kliopas, na timbwanaka, na vókó na Mu, na, Eyéndi mété mwéndyi e Jerusalem, nga yévé mba pulétyé bema beyé semeni e téyi e minya mé ma nana ? ¿ Na Mu na vókó na wa, na, Ra bemé ? na wa na vókó na Mu, na, bya Jesus a Nazaret, momu a betye mosótyi mu’tetye na besedi na ndaga E mondongo’Anyambé Ma wato waziépi. Na Prist nya myolo na wapandyi wago na bómbiyétyé Mu e yéké’wedi, na wa na bandaka Mu e kros. Ndi lebetyendi le petiyétyé na, Mu nda’betye óka óbókó Israel ; ndi na bi byéziépi, emunya nda minya malalo na bema mébi na sama. E ; na wado wa ramba’go wavókó wa bé wa pundaka e rama, wa pangandi’wé le mamanaka. Va betye wa mba duwaka nyoloadu, na wa na timbaka, na wa na vókó, na, wa tóyóndi esisila a bendyél, bebé be sebwaka wa, na, A mundi e migó. Na nga rambago wavókó na va tyétyé e rama, na wa nava kóbétyé tegó ené nga bé wado wa vókó ; ndi Mu nda’yé wa wabe tóye.

Na Mu na vókó na wa, na, A, betiketike, na melema meyé edila né’kamiyé dya byéziépi be kaletye mesótyi ; ¿ Kraest a be luka tóyó ndyuke ményi na dyira ivenda dyadu ? Na Mu na yalétyé na Moses na mesótyi myéziépi, A mu galaka wa malén dwé maziépi bema egal’adu méni.

Na wa na bakamaka e iboko dye betye wa wa tyétyé, na Mu na saka ené a tokaka e tyéyé kwé. Ndi wa patemetyendi na Mu, na, Imbiyétyé né wé ; navwana, emundi ekolokolo, né dyoba dye tóngómóndi, Na Mu na vatyé imbiyétyé va betye wa. Ebetyendi va betye wa na Mu wa didyéné e bedya na Mu né’ngaka pémbé, na Mu na tuwaka yo ibótó na mu na bukaka yo Ava’tayaka wa. Na migó maya nava dibwaka, na wa na va epulétyé Mu, na Mu na nyóngókó e migó maya.

¿ Na wa méni na waméni na vókó, na, melema mebete betye memu tokaka kandé’wé e reya va bé Mu a kalaka néwé na va bé Mu a dibwaké’wé maléndwé ? Na wa na témétyé e iwéra mé dyé’vókó, na wa na timbaka e Jerusalem, na wa na kóbétyé dyomu nómbókó, na wabetye na wa lateneni. Wa sebwaka na, Mopandyi a tongwandi pónipóni, kudwanandi e mboka Saimon. Na wa népwaka bema be semetye e reya, na nyanga ebetye wa wa pulétyé Mu na ibuka dya pémbé.

Va betye wa wa kalaka nga nana, na Jesus Mu méni na témétyé e tétéya’ya, na Mu na vókó na wa, na, Dyonga nénywé. Ndi wa liziemetyendi na dyóngó, na wa, na, pikiliyaka na wa tóyóndi ilina. ¿ Na Mu na vókó na wa, na, Etóyóléni ndyuké’nde ? ¿ Mapikiliya mé mwandi e melema myanu nénde ? Lóngókóni makóró mamé, na ayéte ngwé méni ta zilamani Ngwé né étóyóni, navwana ilina abe na megoni na bevezie ené nga tóyunywé ené nyanga’yé ngwé. Va betye Mu nga vóyeni na Mu na leviyétyé wa makóró madu na mako madu. ¿ Va betye wa mbóta’kamiyé na mbya, wa mamanaka, Mu na wa, na, Ebeni né’ma edyowé eva ? Na wa na tayaka Mu ekulu a weyi a bodupaka, na ekango a boyi. Na Mu néngaka byo, na Mu na dyaka byo e pwandya’ya.

Na Mu na vókó na wa, na, nyi nana ndi ndaga nye kaletye Ngwé né’nywé va betye Ngwé na ndite né’nywé, na bema byéziépi be mandi etimaka, bebetye léndweni e elekanako a Moses na mesótyi na e Psamu egala’mé. Na Mu na dibwaka wa mapikiliya maya, na wa bómbiyetye maléndwé. Na Mu na vókó na wa, na, Eyi léndweni nga nana, na nga nana ndi e lutyetye Kraest a waka né Mu a tongwa eviya wa wewe dya minya malalo ; Na dyilwa dya melema na ivéndyiyé dya bebeva dye mu e pakwétyé e betomba biéziépi e dina dyadu, dyali na Jerusalem. Inywé ndini tali nya bema mé bi nana. Lóngókóteni na bandiyéndi ndakonoa Lalé vay’inywé, ndi ta diyani e mboka Jerusalem, kabo va nga pugwéty’inywé na ngudi eviya loba.

Na Mu na tyétyé na wa kwanga na e Betani, na Mu na betiyétyé mabó madu na Mu na tuwaka wa ibótó. Ebetyendi va betye Mu a tuwa wa ibótó na Mu na paluwénétyé na wa, na Mu na betwénetye e Héven. Na wa na kaliyaka Mu na wa na timbaka e Jerusalem na mbya bóló. Wa betyendi lilimiyeneni e tempel, wa bendétyé né tuwa dya Anyambé ibótó. Amen.

Ndaga ebetyendi e dyali, né ndaga ebetyendi na Anyambé, né ndaga méra ebetyendi Anyambé. Yote ebetye na Anyambé e dyali. Mu ndi a veletye bema biéziépi ; ebe néma evelwetye, mu mba bétyé, eyé velweni. Eménó e betyendi na Mu eménó méra ebetyendi bwe a wato. Ndi bwe méra e bumwetyendi e iviti, ndi iviti dyebe epulé yo.

Ebetyendi na momu a lomwetye eviya vayé Anyambé, dina dyadu ndi Jon. Mu ndi avetye mopakwi, egala ipakwa dya bwe méra, na evara ndi vama kamiyétyé wato waziépi Mu. Abe mu abetye bwe méra, ndi alomwetyendi egala ipakwa dya bwe méra.

Era ebetyendi bwe a póni póni, edibwama emboka moto mwéziépi aviya eviya e zie. Abetyendi e zie, mu tegó a veletye zie, ndi zie ebe’pulé mu. Avetyendi emboka iwadu méni, ndi iwadu méni wabe’séndyélé mu. Ndi tango mé ebetye e séndyélétyé mu, yondi ebetye mu atayaka ngudi, né wa wamu wana wa Anyambé, wa betye wa kamiyétyé dina dyadu. Wabe edyawé na matyiya, né wa wabe edyawé nópango a megoni, né wa tegó wabe edyawé nópango a moto, kabo upango a Anyambé.

Ndaga méra iluwetyendi e megoni, na yo nava diyaka vai’wé, (néwé nava etóyókó ivenda dyadu, ené ivenda dya mwa’gangwé umbókó) ayé londeni ti na ehekwé na póni póni. Jon a pakwetyendi egala’du, na mu nava amaka na, mundi anó nana, abetye ngwé na vóyókó na, aviya e pugamé, ayéndi wa na ngwé, tinandi abetyete evara ngwé mbó taka ediya. Ilonda dyadu ndi dyeyiwé waziépi duweni ehekwé e ehekwé. Tinandi belekanako be tawetyendi na Moses, ndi ehekwé na póni póni bevetyendi na Jisu Kraest. Ebe na moto ayé tóyeni Anyambé egombe te egombe ; muanó’mbókó ayé e ngonga a gangwé, mundi ayé pakweni egala’du.

¿ Upako a Jon ndi mu nana, nga betye Jiu wa loma Prist na nga Livai eviya e Jerusalém, egala dyipwa dyadu na, Ové léra-e ? Na mu nava emémétyé, abe egógó, ndi a mémetyendi na, abe ngwé Kraest. ¿ Na wa né pwaka na mu na, Rémé ? ¿ Ové ndi Ilaias ? ¿ Na mu na vóyókó na abe ngwé mu, Ové ndi mosótyi ? Na mu nava avwanaka na nyawé. ¿ Na wa nava evóyókó na mu na nandi Ové lé ra ? ¿ egala na le tyétye esebwaka wabé wa lomaké’wé, ndi evólé dya egala’vé méni ? Na mu na vóyókó nawa na, ngwé ndi dyoyi dyómbókó dyama e ndyinga, na, témiyétyéni reya nya Anyambé, ené nyanga evótye mosótyi Isaias.

Wa betye wa lomwétyé wa betyendi wa nga Farisis. ¿ Na wa népwaka mu na, etóndyé na ové ebe Kraest, dyale Ilaias dyélé mosótyi ndi ebatiyéndi na ra tiné ? Na Jón nava avwanaka na wa na, na batiyénéndi na meba, ndi umbókó ayéndi vayi’nywé de, ayi’nywé epuléni : Mu ndi aviya e puga’mé, ayéndi pónweni ebogo na ngwé, nabe oyeni na ivurwa dya mokódi adu a makogo. Bema mébi be semetyendi e Betabera e mudu’mbókwé a Jórdan, vabetye Jón a batiyénétyé. Jón a tóyetyendi Jisu a vyaka, emboka mu, e dyobévókwé, na mu na vóyókó na, lóngókóni mwa’modómbé a Anyambé, avéndyiyé ebeva a zie. Mu ndi anó abetye ngwé na vóyókó na momu aviyandi e puga’mé, ayé pónweni e bogo na ngwé, tinandi abetyete ebogo na ngwé nótaka ebé. Na bebé na pulétyé mu, ndi angé levuwétyé Israel, evara ndi vambatiyétyé ngwé mu na meba.

Na Jón nava epakwaka na, na tóyetyendi ilina dye gumiaka eviya e loba ené mbenga, na dyo nava ebatamaka emboka mu. Nabe epulétyé mu eviya ebogo, ndi abetye alomaka ngwé ibatiyéné na meba, mundi avótye na ngwé na, ama bétyévé etóyókó ilina dye gumiaka eviya e loba né dyo dye batama emboka mu, mundi mura, abatiyéné na ilina dyasa. Na ngwé nava etóyókó, na ngwé nava epakwaka upako, na, anó ayéndi mwa’Nyambé.

Bya bwe Jón na bikuwi byadu bebaye wa betyendi témeni evara. Va betye mu atóyókó Jisus a dolaka ; na mu na evóyókó na, Lóngókóteni mwa a modómbé a Anyambé. Bikuwi mé bebaye na bio navókaka mu akalaka nyanga méra na bio na vitétyé Jisu. Yo ndi ilwama Jisu, na mu nava etóyókó wa wavitétyé mu, na mu nava evóyókó na wa na, ¿ Etokandini rémé ? ¿ Na wa nava evóyókó na mu na, Rabai, (Eminaka na Mukuwi). ¿ Ediyandi eve ? Na mu na vóyókó na wa na, vyaka vatóyetyeni, na wa nava etyétyé, wava etóyókó iboko dyebetye mu adiyaka, na wa nava enangaka dyoba médyera e mboka mu ; Tinandi mabetyendi mamu mawéra manayi.

Umbókó a wabaye abetye ókaka Jón a kalaka, na mu nava evitétyé Jisu, abetyendi Andru, mwa’nyangwé na Saimón Pité. A kóbetyendi ebogobogo mwa’nyangwé Saimón, na mu nava evóyókó na mu na, le duwandi Mesaias (E minaka na Kraest). Na mu nava etyétyé na mu e mboka Jisu, va tóyetye Jisu atókó mu na mu nava evóyókó mu na, ové ndi Saimón mwa’Jonas, emandi etubwétyé na, Sifas dye minaka na ilale.

Bia bwe Jisu apandyetyendi etyéndó e Galili, nga betye dyoba dyevinda, Namu nava etóyókó Filip, na mu na vóyókó mu na vitétyé ngwé. Filip abetyendi a nga Betséda, mboka a Andru na Pité.

Filip a duwetyendi Nataniél, na mu nava evóyókó na mu na. Leduwandi mu abetye Mosés a léndétyé e belekanako na mesótyi na, Jisu dya Nazaret mwa’Josef. ¿ Na Nataniél nava evóyókó na mu na, Ima asa eyéte e vyaka e Nazaret ? Filip a vótyendi na mu na vyaka va tóyetye.

Jisu a tóyetyendi Nataniél a vyaka vayé mu, na mu na vóyókó na, tóyókóte ayé a nga Israél a pónipóni ayé abe mokondini. Nataniél a vótyendi na mu na, ¿ Epulélé ngwé nave ? na Jisu nava avwanaka na mu na, na tóyótevé, vabétevé e tina a ele a itóló evara Filip mute Mbóta ondavé. Nataniél avwenetyendi na mu nava evóyókó na mu na, Rabai, eyéndi Mwa’Anyambé ; Ové ndi upolo a Israél. Jisu avwenetyendi na mu na vóyókó mu na, ekamiyéndi na tina ebé ngwé na sebwa’vé na na tóyótevé va bévé e tiné’tóló, engandi tóyókó bema betubwé beyégó wa na bi nana. Na mu na vóyókó na mu na, póni póni na sebwandi né’nywé na, eva doleni engandi tóyókóni dyoba négugu loba bwe, né bendyél bia Anyambé bebetaka né byo be gumyaka vayé mwa’a Moto.

Iba dyebetyendi minya malalo doleni e Kenan a Galili, nyangwé a Jisu abetyendi erago. Jisu na bikuwi byadu wóndwetye tegó e iba.

Va betye wa wa toka ivé, na nyangwé a Jisu nava evókó na mu na, wabe na ivé. ¿ Na Jisu nava evóyókó na mu na, Mwado, na malé asaka navé dya ? iwéra dyamé dyega pabaka. Nyangwé a vóyetyendi na waseyi na, ima éziépi ema evóyókó mu inywé na sakani, emu esakani yo. Evara ebetyendi na bepondo motoba egala meba, bya malale bedandyini bya Jiu, bingandi evókó galón nyebaye dyalé nyelalo. Jisu avótyendi na wa na, londiyétyéni bepondo na meba, nawa nava elondiyétyé byo na e modumbu. Na Jisu nava evóyókó na wa na, dangakani ké etyéni na byo-e mboka mopandyi isango, na wa nava etyétyé nabyo.

Va betye mopandyi isango etyikamé meba mé méluwetye ivé, abe epulé egali evetye dyo, (Kabo te waseyi mé wa dandyetye meba te wa betye wa pulétyé, na mu navó’ndaka mobayi. Na mu na evóyókó na mu na, moto mwéziépi a témiyéndi ivé dya’sa ebogo, né etóndyé wato wa nyandyé gondyeneni ké eva témiyétyé ibeva, ndi óvé e tatandi ivé dya’sa kwanga e’gombe méni.

Dyali mé dya belembo mébi ndi besetye Jisu e Kenani a Galili, na yo nava eleviyétyé ivenda dyadu, na bikuwi byadu nava ekamiyétyé mu.

Na mu nava etyétyé e Kapernaum, va betye eni pa, na nyangwé na wana wa nyangwé na bikuwi byadu, wabe’dinga minya mabóló erago.

Isango dya Jiu dya inókó dyebetyendi dye mu pyélé, na Jisu nava etyétyé e Jerusalem. Na mu nava ekóbétyé e témpél, wa sambiyi nyati na medombé na mbenga na wésiyini wa dólé modidyénéni. Va betye mu ukasa a mekódi metiki seni, na mu nava eputaka waziépi e témpél, na medómbé na nyati, na mu nava etyibwaka dólé nya wésiyini né mu amu etyibwaka tagulu. Na mu nava evóyókó wabetye wa sambaka mbenga na, véndyiyétyéni bema mébi eva nana, enyókó epangani mbada lalé ilwamaka mbadi a masambo.

Na bikuwi byadu nava ezimbuwétyé na eyéndi léndweni e maléndwé, na, ibado dya mbada’vé dye bómbóndi ngwé.

¿ Na Jiu nava esebwaka na mu na, nandi óvé e saka bema mébi, ndi mba leviyétyé wato ndembo na egugu ? Na Jisu nava avwanaka na wa na, pukwakani témpél méni né ngwé na témiyé yo na minya malalo. ¿ Na Jiu nava evóyókó na mu na, témpél méni indyetyendi mabo ma mepuma manayi na mepuma motoba ilongwé, ké óvé na etémiyétyé yo na minya malalo ? Ndi mu akaletyendi egala témpél a nyolwa’du méni. Va betye mu a tongwa eviya e iwedi, na bikuwi byadu nava ezimbuwétyé na yondi e kaletye mu na wa ; nawa nava ekamiyétyé iléndwé na ndaga e kaletye Jisu.

Va betye mu e isango dya inókó e Jerusalém, wabóló wa kamiyetyendi dina dyadu, va betye wa wa tóyó belembo be betye mu a saka. Ndi Jisu abe etayaka wa nyolo tinandi abetyendi a pulétyé wato waziépi. Né mu tegó abe etokaka moto te moto a pakwaka mu egala motu’mbókwé, tinandi abetyendi a pulétyé nyanga eyé molema a moto e téyi.

Ebetyendi na momu a Farisi dina na Nikodimós, mopandyi a Jiu. Mu ndi a vetye e mboka’Jisu na elu, na mu nava evóyókó na mu na, Rabai, Leyéndi puleni na, eyéndi mukuwi moyé viyeni eviya e mboka Anyambé ; tinandi ebe na moto ayé a saka belembo mé besavé bi nana, kabo Anyambé a diya namu.

Jisu a timbwenetyendi na mu na, na vóyóndi navé póni póni na, moto abe na ngudi etóyó ipanga dya Anyambé kabo óta edyawé ro evókwé. Nikodimos avóyetyendi na mu na, Moto a magó edyawétyé dya, mu amu motodu, ¿ Amégó iraka ibumu dya nyangwé ro evókwé né mu adyawé ?

Jisu avwenetyendi mu na, póni póni na vóyóndi navé na, kabo moto adyawé na meba na ilina, ké nandi avé’raka ipanga dya Anyambé. Ayé dyaweni na megoni andi megoni ; na ayé dyaweni né’lina ayéndi ilina. Emamenetye ené nyanga ebé ngwé na vóyókó na’vé na emu dyawétyéni ro evókwé. Upupé mo vungandi iboko ti’boko dye tóndiyé yo ; óvé okate edungwa’du, ndi epulé egali e tyéyé yo ; nyanga mé a evókó te edola yo na moto ayé dyaweni né’lina.

¿ Nikodimós a timbwenetyendi na mu na, bema mébi be malé esamaka dya ? ¿ Jisu ava etimbwanaka na mu na, Ové ené mukuwini e Israél ké etyé ekataka bema mébi ? E póni póni na sebwandi navé na, iwé le kalagó wa na bema be puliwé, né le pakwaka ibyago beyi’wé tóyeni, ndi inywé na biéziépi bi ingani upakwa’go. ¿ Etóndyé na sebwénywé mambo ma zie méni, inywé mba kamiyétyéni mo, Eyélé ekamiyétyéni dya, etóndyé naviya sebwakénywé bya Hévén ? Ebe na moto ayé beteni e hévén, kabo mu a vetye e hévén, Mwa’moto yaé e hévén. Ené nyanga e betiyetye Mosés nyóó e ndyinga, nyanga méra tegó enga betuwétyé Mwa’moto e loba. Egala na mwéziépi ama ekamiyétyé mu ava enyama, ndi amandi eduwaka eméno a egombié’ziépi.

Tinandi nyanga méra ndi etóndetye Anyambé zie, namu nava etayaka Mwad’umbókó, na, mwéziépi ama ekamiyétyé mu, ava enyama, ndi ayéndi na eménó a egombié’ziépi.

Navwana Anyambé abe elomaka mwadu e zie egala ikodyé dya zie, ndi kabo na, na, reyadu ndi ema bétyé zie ongaka. A kamiyé mu, abe kweni ; ndi ayé mba kamiyétyé mu, akwandi póni, tinandi abe kamiyeni dina dya Mwa’Nyambé umbókó. Makwa ndi ma nana, na, bwe evetyendi e zie na wato nava etóndétyé iviti wa na bwe, tinandi besedi byaya bebetyendi bebeva. Tinandi moto mwéziépi asa ebeva avinéndi bwe, egala na besedi byadu benyókó esembwé. Ndi asa gondyeneni, a kudwanandi e bwe, egala na evara ndi vama epulénétyé besedi byadu na besamandi na Anyambé. Eviya evara na Jisu nava etyétyé na bikuwi byadu e Judea, na mu nava diyaka na wa erago, abatiyénétyé. Jón abetyetegó abatiyénétyé e Enon, baka na Selim, tinandi erago ebetyendi na meba mabóló, na wa nava etyétyé erago na wa nava batuwétyé. Navwana Jon abebé vélweni e mbaka meboka.

Bikuwi bya Jón na Jiu wabetyendi na ityétyé, tita na ibatuwé. Na bikuwi bya Jón nava etyétyé emboka mu, na wa na vóyókó na mu na, momu mé abetye navé e mudu’mbókwé a Jordan mura, apakwavé upako egala du mura, lóngókóte mu tegó amundi ebatiyénétyé, né wato waziépi wa tyéndi emboka mu. Na mu nava evóyókó na wa na, moto abe ngudi eduwa ima kabo etawé mu eviya e Hévén. Inywé méni eyéndini tali nyamé, na navóyóndi, na, abe ngwé Kraest, ndi nayéndi lomweni ebogo’adu. Mobayi mundi moto ayé na ubómbi, ndi mboyi a mobayi, ayé témeni ipeva na isa dya masombé madu, a sarandi na ngudi ebóló na dyoka dya dyoyi dya mobayi, mbya amé e londandi a tyatya’va. Mu alukandi étaka ké ngwé na tekamaka.

Aviya eviya e loba ayéndi wa na waziépi ayé a zie, ayéndi a zie, né mu a kalategó bya zie, aviya e loba ayéndi wa na waziépi. Beyé mu tóyeni na beyé mu otyeni, byondi be pakwa mu, ndi ebe na moto a kamiyé upakwa’du. A kamiyé upakwa’du, apakwandi né’kamiyé dyéziépi na Anyambé ayéndi póni-póni. Ayé Anyambé lomeni, a kalandi ndaga nya Anyambé, tinandi Anyambé abe etaya mu ilina na eyéyi. Gangwé a tondéndi Mwana, ayéndi tayeni bema biéziépi e mabó madu. A kamiyé Mwana ayéndi na eméno a egombe eziépi, ndi ayé a kamiyé Mwana, ava etóyó eméno, ndi kabo na pilé a Anyambé eyéndi na mu.

Nga betye Jisu a pulé na Farisis wa puléndi na mu aduwandi bikuwi né mu abatiyénétyé wa na Jon. Ndi Jisu uméni abe ebatiyénétyé kabo bikuwi byadu. Na mu nava imwaka e Judea, ava etyétyé e Galili.

Ndi a betyendi lutyeni a dolaka na dya Samaria. Na mu nava epabaka e mboka a Samaria, e tubwé na Saikar, baka na epazi a ezityi etayetye Jakob mwa’du Joseph. Evara ebetyendi né’dango dyo ndwétyé na idango dya Jekob, na Jisu nava okaka nyolo vóó na etyéndó, na mu nava ediyaka na idango, dyebetyendi dyemu baka na diné.

Na mwada Sameria na vyaka evara idanga dya meba, na Jisu nava evóyókó na mu na, vinyétyé ngwé meba ma nyaka. Navwana bikuwi byadu babetyendi be tyédyéné e mboka egala isamba dya bedya. Na mwada Samaria nava etimbwanaka na mu na, ¿ Era linde óvé a Jiu ké edyombétyé ngwé mwada Samaria meba ? Navwana nga Jiu na nga Samaria wa lata. Na Jisu nava etimbwanaka na mu na, ebétyé epulétyé itaya dya Anyambé névé epulétyé moto mé adyombévé meba ma nyaka, te e dyombéndi mu né mu a tayavé meba ma eménó.

¿ Na mwado mé mura na vóyókó na mu na, óvé ebe néma edangwéné, né idango tegó dyeyendi na edóku, Nandi eduwalé meba mé ma eménó mara na dyeni ? ¿ Ové ndi eyé ita wa na lalago Jekob, atayetyi’wé idango, dyebetye mu méni anyaka, na wana wadu, na bimbe byadu ? Na Jisu nava etimbwanaka na mu na, moto mwéziépi anya meba méma amandi okaka evézié ropé. Ndi mwéziépi ama enyaka meba mama etayaka ngwé mu avagó oka evézié ; ndi meba mama etayaka ngwé mu mamandi ebétyé idango dya meba dye vovola kwanga e’ménó a egombié ziépi. Na mwado nava evóyókó na mu na, lalé tayaka ngwé meba mé mara, evara ndi vama bétyé ngwé mbagó okaka evézié né ngwé mbagó vyaka eva idanga.

Jisu avóyetyendi na mu na, vóndetye momavé, névé eviya nava nana. Na mwado, ava avwanaka na mu na, nabe na momu, Jisu avóyetyendi na mu na, evóyóndi dódó na ebe na momu. Navwana eyéndi baneni na wamu wa tanu, na ayé navé e tyatyava abe momavé, era ndi esebwa’vé póni póni.

Na mwado nava evóyókó na mu na, lalé na puléndi na eyéndi mosótyi. Wa lalé wago wa kaliyetyendi e mokodi mému nana ; ndi inywé na e Jerusalém ndi iboko dye luka wato wa kaliyaka. Jisu avótyi na mu na, mwado, kamiyétyé ngwé, iwéra dyeviyandi, dyema ebétyi’nywé mbagó kaliyakani dyélé e mokodi mému dyélé e Jerusalém. Inywé ekaliyandini ima eyi’nywé epuléni, iwé le puléndi ima ekaliyéwé, navwana dyonga dyeyéndi dyajiu. Ndi iwéra dyeviyandi, dyo tegó dyi, dye luka wakaliyi wa gondyeneni wa kaliyaka gangwé nélina na pónipóni, tinandi wakaliyi mé wara ndi wa toka gangwé, na wa kaliyetye mu. Anyambé ayéndi ilina ; wa kaliya mu, wa lukandi wa kaliyaka mu né’lina na pónipóni.

Mwado avótyendi na mu na, na puléndi na Mesaias a viyandi, atubwé na Kraest, vanga vyaka mu angandi pakwakéwé bema biéziépi. Jisu avótyendi na mu na, ngwé na kala navé anó, ngwé ndi Mu.

¿ Nga nana na bikuwi byadu nava epabaka, na wa nava emamanaka nana akalandi na mwado mémura, ndi ebe na moto a yóletye dyipwa dyadu na etokandi rémé ? ¿ dyalé na, Rémé ndi ekalavé na mu ?

Na mwado nava elikaka epondwa’du, na mu nava etyétyé emboka, na mu nava evóyokó na wamu na. ¿ Okani, va tóyetyeni momu, ayé ngwé pakweni bema biéziépi beyé ngwé seni, Evóndini na abe Kraest anó ? Nawa nava etyétyé eviya e mboka kwanga emboka mu.

Eviya egombe méra na bikuwi byadu nava sombétyé mu na va dyetye. Na mu nava evóyókó na wa na, nayéndi na bedya beluka ngwé na dyaka beyi’nywé epuléni. ¿ Na bikuwi byadu nava ekalaka wa méni na waméni na, Ndi nana moto aviyandi mu na bedya ? Jisu avóyetyendi na wa na, bedya byamé ndi isa dyó’pango a alometye ngwé, na imanyé dya ebolo’adu. ¿ Evóyóni, na, ngóndé nyenayi vókóna ndonda e pabandi ? Lóngókó-teni, na vóyóndi nénywé na, betiyétyéni migó né elóngóni e bezityi ; bemundi bepuwamé na ndonda. E motumbé mé a sangwa’sa mu nana, a gaya a duwandi ivé dyadu, né mu a yolétyé bebuma e’ménó a egombié ziépi, evara ndi vama ebétyé wa wabaye, a gaya na a liya wa saraka waziépi ta. Eva ndi etima mokanakódi mé ana, umbókó aliyaka ké umbókwé apumbwaka. Ngwé na lomandi’nywé ipumbwa dya bebetyi’nywé mba liyaka, wato wavókwé ndi wa dyandyetye, ndi inywé irandini e bebolo byaya.

Nga Samaria wabóló nga mboka méra wa kamiyetyendi mu, na nyanga evóyetye mwado na, apak wandi ngwé bema beyé ngwé seni biéziépi. Va pabetye nga Samaria emboka mu, wa sóseletyendi mu na akóbenetye na wa evara ; na mu nava diyaka nawa minya mabaye. Wavókwé wabóló wa kamiyetyendi na dyoka dya ipakwa dyadu. Na wa nava evóyókó na mwado na, lebe kamiye mu na isebwidi dyavé, ndi iwé méni lokandi, néwé tegó lepuléndi na anó andi póni póni Mondyiyi a zie méni.

Minya mabaye doleni na mu nava evéndyémétyé evara, ava tyétyé e Galili. Navwana uméni Jisu avótyendi na, mosótyi a hekuwé e’zityadu méni. Va pabetye mu e Galili, nga Galili wa séndyeletyendi mu, wa tóyetyendi bema biéziépi besetye mu e Jerusalém e isango, tinandi wategó wa tyétyendi isango.

Na Jisu navagó tyétyé ropé e Kenan a Galili, e mboka mé iluwetye mu meba ivé, momu umbókó utubwé mwadu abetyendi a dakaka e Kapernaum. Va betye mu óka na Jisu aviyandi eviya e Judea a tyétyé na e Galili, Na mu nava etyétyé e mboka mu, amu e sósélétyé mu na atyétyo’ndyiyétyé mu mwadu, tinandi abetyendi amu e bowaka. Yondi evó Jisu na mu na, inywé ukili mobémbéni’nywé mba tóyókóni belembo ekamiyéni. Momu mé utubwé mura avótyendi na mu na, lalé vyaka ebogo na mwana nótaka ewa. Jisu avóyetyendi na mu na, tyétyé mwavé óngandi, nga betye momu mémura akamiyé ndaga esebwetye Jisu mu, na mu nava etyétyé. Va betye mu a tyétyé, na waseyi wadu nava tyéty ibongana dyadu e reya na wa nava esebwaka na mu na mwavé amundi dódó. Na mu navé pwaka iwéra dyebetye mu ayalétyé dyonga na wa nava evóyókó na mu na, dye lityetyendi mukolo iwéra ivókó. Evara ndi e puletye gangwé na, dyebetyete iwéra mé dyebetye Jisu a vóyókó na mu na mwavé ayéte e migó ; na mu uméni na mbadadu eziépi nava ekamiyétyé. Eni ndi elembo evókwé a bebaye esetye Jisu va tyétyé mu e Galili a vyaka e Judea.

Eni doleni, ebetyendi na isango dya Jiu ; na Jisu nava etyétyé e Jerusalém.

Nandi e Jerusalém eyéndi na etima va sambuwé médómbé, e tubwétyé na Hibru na, Betesda, etima méra ma diyaka na belémbé betanu. E téyi ndi enanguwé ebumbu etubwé a mepondyi, pógu, wa sobé na nga malango molimbani, wa vurétyé ityibéné dya meba. Navwana Endyéli ebetyendi e tyétyé begombe bevókó ityibéné dya meba, moto te moto abetye a pabaka evara na bogo bogo va bémbéné meba ma tyibwéné, vókóna óngandi eviya e mbela a edaka ediya na mu.

Momu’mbókó a betyendi e téyi a betye adinga na edaka mabo ma mepuma malalo na mepuma ebuwa. ¿ Nga betye Jisu etóyómé mu bya, na mu nava epulétyé na adingandi na itindyidi mé dyera, eviya e’gombe abémé, na mu nava evóyókó na mu na, etokandi ediya upesa ? Na upondyi nava avwanaka na mu na, Mopandyi, nabe na moto ayé a vélétyé ngwé e’tima, etóndyé va bémbéné meba ma tyibwéné, na béte na vyaka, vókó na umbókwé a pabandi ebogo na ngwé. Na Jisu nava evóyókó na mu na, imwaka, bapétyé ikondo dyavé névé emu etamwaka. Ukili utiké nga nana, tegó momu mé mura amu upesa, na mu nava ingaka ikondo dyadu, amu etamwaka, dyoba médyera ma diyaka dyoba dya dyódyó.

Jiu wa vótyendi na momu mé mura, abetye ónguwétyé na, dyi ndi dyoba dya dyódyó, ebe dódó navé ebapétyé ikondo dyavé. Na mu nava avwanaka na wa na, abé óndyiyétyé ngwé, mu ndabé a vóyókó ngwé na, ingaka ikondo dyavé névé emu etamwaka. ¿ Na wa navé’pwaka mu na, abélé ra abé a vóyókóvé na ingaka ikondo dyavé névé emu etamwaka ? Ndi momu mé ónguwetye abe’pulé mu, tinandi Jisu anyóndyetyendi va betye wa, ebumbu a wato ebetyendi iboko mé dyera.

Bi nana doli, na Jisu nava ekóbénétyé na mu e témpél, na mu nava evóyókó na mu na, ta lóngó e mundi upesa, esetyegó ebeva, evwa ima ebeva evókwé a wa enyókógó viya e mbokavé. Na momu mé mora na véndyémétyé, na mu navatyé sebwaka Jiu na moto mé óndyiyetye mu mundi Jisu. Na Jiu nava esaka Jisu ndyuke, né wa wamu etokaka mu dyoya, navwana a setyendi bema mébi e dyoba dya dyódyó.

Ndi Jisu a vóyetyendi na wa na, lalé a sandi e’gombe méni, ngwé tegó na sandi. Evara ndi va betye Jiu wa tokakó’yamu, navwana abe oyaka kabo dyoba dya dyódyó ipó, ndi a vóyetye tegó na gangwé ndi Anyambé, né mu énganandi na wazia’Nyambé wa yéte nyanga evókó.

Jisu avwenetyendi na mu na vóyókó na, póni póni na vóyóndi né’nywé na, mwana abe ngudi esa ima na’du méni, kabo ima etóyó mu gangwé a saka, navwana bema besa mu, byo tegó besa mwa’du asaka. Navwana gangwé a tóndéndi mwana, ayéndi mu leviyeni bema biéziépi besa mu ; né mu amategó eleviyétyé mu bebolo betubwé wa na bi nana evara ndi vayi’nywé e mamanakani. Ené nyanga e tonguwé gangwé mewewe né mu a panga wa wa diyaka e migó, yo nyanga mé yo te etonguwé mwana adu ayé mu a tokaka. Tinandi gangwé a yétyiyé moto, ndi ayéndi tayeni yéké éziépi e mboka a mwana. Evara ndi vama ediliyétyé moto mwéziépi mwana ené te nga diliyé wa gangwé, ayé a diliyé mwana, a diliyé gangwé e lometye mu.

Na voyondi nénywé póni póni na, óka ndaga nyamé, né mu akamiyétyé a lometye ngwé a yéndi na eménó a egombiéziépi, avagó e paba e makwa ndi a dolandi iwedi na tyé bómbókó eménó. Ndi na sebwandi’nywé póni póni na, iwéra dyeviyandi, né dyo dyemutegó tyatya méni eva, vama okaka mewewe dyoyi dya Mwa’nyambé ; wango kaka dyo wa ngandi etongwaka. Ené nyanga eyé gangwé na eménó mu’méni, yo tegó eyé mu tayeni na Mwana a diyetye na eménó méni. Ayé tegó mu tayeni ngudi éyétyiyéné, tinandi ayéndi Mwa’moto. E mamenetyeni eni, navwana iwéra dye viyandi, dya mwéziépi ayé e marama. Va ngó kakawa dyoyi dyadu, Wangandi etonguwénétyé, wayé seni enyévé e itongwa dya eménó ; wayé seni ebeva e itongwa dya ivomuwé.

Nabe ngudi esa ima ngwé méni ; na yétyiyéndi ené nyanga oka ngwé, yékamé eyéndi a gondyeneni navwana na toka esa upangwa’mé méni, kabo upango a gangwé e lometye ngwé. Etóndyé ngwé na pakwaka upako e galamé, vókóna upakwa’mé mobe póni póni.

Umbókwé a pakwa upako egalamé ayéndi, na puléndi na upako mo pakwa mu egalamé, mo yéndi póni póni. E lometyendini dyipwa e mboka Jón na mu nava epakwaka upako e póni póni. Ndi ngwé na pahiya upako e mboka, ndi na vóyóndi bema mébi egala na evara ndi vama onguwétyi’nywé. Jón a betyendi kandy ebetye e koyaka, né yo e panyaka, ndi inywé e betyendini bóbeni na isara na bwa’du e mwa egombe etikémé.

Ngwé na yéndi na upako utubwé wa na Jón, navwana bebolo be betye gangwé a tayaka ngwé na na timiyetye byo, byondi besa ngwé, be pakwandi egala’mé na, gangwé ndi elometye ngwé. Gangwé e lometye ngwé mu méni ayétegó pakweni egalamé, ega okakani dyoyi dyadu egombe te egombe, né tegó ebeni tóyeni uvela’du. Ndaga nyadu nyebe e mboké’nywé ; tinandi e kamiyéni adu ayé mu lomeni.

Butakani maléndwé, navwana evara ndi epikiliyénywé na eyéndini na eménó a egombiéziépi, mondi ma pakwa egala’mé. Na e toka eviyani e mboka ngwé, egala na evara ndi vama duwaké nywé eméno.

Na duwa ihekuwé mboka wato. Ndi na puliyéndi’nywé na, ebeni na itóndi dya’Nyambé. Na vetyendi e dina dya lalé, ndi ebe diliyeni ngwé, etóndyé umbókwé a viya na dina dyadu méni mundi ama bétyinywé ehetyiyétyéni. ¿ Eyélé e kamiyétyéni dya ? inywé wa duwama na ihekuwé umbókó no’mbokwé, nandi inywé mba takakani ihekuwé dye viya emboka uméni Anyambé.

Enyókó e pikiliyani na namandi etubaké’nywé e mboka gangwé, ayi nómbókó a tubwé mundi Mosés, anu a petiyi’nywé. Navwana ebétyéte e kamiyétyéni Mosés te ekamiyéteni ngwé, navwana a léndetyendi egala’mé. ¿ Nandi etón dyi’nywé mba kamiyétyéni maléndwé madu, e malé ekamiyétyéni ndaga nyamé dya ?

Bema mébi doleni, na Jisu nava edyabwaka e mudu’mbókwé a manga ma Galili, mayé e’tima a Tibirias. Na ebumbua a wato etubwé nava evitétyé mu erago, tinandi wa tóyetyendi belembo besetye mu na mepondyi. Na Jisu nava ebetaka e mokodi, na mu nava ediyaka erago na bikuwi byadu. Isango dya Jiu dya inókó dye betyendi dyemu e bakamaka.

¿ Va betiyetye Jisu migó madu, na mu nava etóyókó etotodu a ebumbu a wato e vyaka emboka mu, avóyetyendi na Filip na, le malé esambaka pémbé nyema edyaka wa eve ? (A vóyetyendi mu ndaga méni nana egala dyadyé dya’du, tinandi a puletyete nyanga eyé mu asaka.) Filip a timbwenetyendi mu, na, kama nya fura nyebaye nyebe na ngudi esa wa ima, dyélé moto moto éngaka epusi. Ikuwi adu evókó, Andru, mwanyangwé na Saimón Pité, avóyetyendi na mu na. ¿ Mwana ayéndi eva nana ayé na membunda mya pémbé a barli metanu na weyi nyetiki nyebaye, Ndi nye malé esaka rémé e ndyóngó mé a moto eni ?

Na Jisu nava evóyókó na wa na, didyétyéni wato mé wa, (Iboko médyera dyebetyendi na mbwésanga nyebólómé) na wamu nava edidyénétyé e zie ené tódyeni nyetanu e tangwa’ya. Na Jisu nava ingaka pémbé ; va betye mu ataya akeva na mu nava ekabaka nyo na bikuwi byadu, na bikuwi nava etayaka ebumbu mé edidywetye e zie era, na mu nava tegó esaka nyanga mé a’vókó na weyi nyanga ebetye wa wa tokaka.

Nga betye wa wóliyéné, avóyetyendi na bikuwi byadu na, latétyéni nguhu nyebé nye likanaka, evara ndi ema bétyé ima mba nyamaka. Na wa nava enikaka nyo ta, dyomu dya belinga na belinga bebaye beva elondaka na nguhu nya pémbé nya barli nyetanu, nyebetye nye likanaka bal eni wa betye wa dyaka.

Yondi ebe tye wato mé wara etóyó mé élembo mé esetye Jisu era, nawa na evóyókó na, póni-póni anó ayéndi mosótyi mé monga vyaka e zie.

Nga betye Jisu a pulé na wa yanandi idyusé dyadu na reya’ngudi né wa wa panga mu adiyaka upolo, na mu na véndyémétyé ava etyétyé na e mokodi, uméni ipó erago.

Va betye dyoba dyemu ekolokolo, na bikuwi ibyadu nava tyétyé e manga. Na wa nava evélémétyé e’lende, nawa nava edyabwaka e manga kwanga e mudi a Kapernaum, iviti dyebetyendi dyemu, ndi Jisu abebé pabeni vayé wa. Na manga nava ebevaka na tina a upupé utubwé mobetye movungaka. Va betye wa dutyeni ené mabo ma folong mabaye na folong nyetanu dyélé mabo malalo, nawa nava etóyóko Jisu a tamwaka e manga, avitétyé baka na elende, nawa nava enyóyókó. Ndi avóyetyendi na wa na ayéte ngwé enyóyetyeni. Na wa nava etóndiyétyé dyinga dyadu e’lende, kwé tegó elende e pabaka e zie ebetye wa wa tyétyé.

Bya bwe va betye wato témeni e mudumbókwé a manga, wabe etóyó elende evókwé erago kabo evókó ebetye bikuwi be vélémétyé, Jisu tegó a tyéyé na bukuwi byadu elende, ndi bikuwi byadu be tyétyete byo méni. (Ndi belende bevókwé bevetyendi eviya Tibirios, baka na iboko dye betye wa wa dyaka pémbé, va betye mopannyi a tayaka akeva. Va betye wato etóyómé na Jisu abe evara dyélé bikuwi byadu, na wa nava evélémétyé e belende, na wa nava epabaka e Kapérnaum, wa tokaka Jisu. ¿ Va betye wa wa kóbé mu, e mudu’mbó kwé a manga, wa vóyetyendi na mu na, Rabai, Evetyendi eva era’gombé ? Jisu avuenetyendi wa, na mu na evóyókó na, na vóyóndi nénywé póni-póni na, etokani ngwé na tina a itóyó dya belembo besetye ngwé, ndi kabo te na, na tina ana edyetye ndini pémbé nénywé nólakani. Dyandyakani nandi mba bétyé egala bedya, be nyama, ndi dyandyakani egala bedya bediya egombe éziépi, bema bétyé Mwa’moto atayaké nywé ; navwana Anyambé a gangwé, ayéndi mu seni evetyi.

¿ Na wa nava ipwaka mu na, Lesetye dya, egala le saka bebolo bya Anyambé ? Jisu a timbwenetyendi na wa na, ebolo’Anyambé ndi eni, na kamiyétyéni mu ayé mu lomeni.

¿ Wa vóyetyendi na mu na, Ra ndembwé ndi eleviyé óviwé eyiwé le toyokó, né iwé le kamiyévé ? ¿ Ra bemé lé besavé ? Wa lalé wago wa betyendi wa dyaka Mana e motove ené nyanga eyé yo lendweni na, atayetyendi wa pémbé e dyowé eviaka eviya e hévén. Na Jisu na vóyókó na wa na, na vóyóndi nénywé póni-póni na, Mosés abe etayénywé pémbé evetye eviya e Hévén, ndi lalé ayéndi’nywé tayeni pémbé a póni-póni eviya viya e loba, navwana pémbya’Nyambé ndi mu avetye eviya e Hévén né mu atayaka eménó e zie.

Wa vóyetyendi na mu na Mopandyi tayaké’wé pémbé méra egombe éziépi. Jisu a vóyetyendi nawa na, ngwé ndi pémbé a eménó, ama vyaka emboka ngwé ava oka rayi, a kamiyé ngwé avagó oka evézié. Ndi na vóyóndi nénywé na, eyéteni ngwé tóyeni, ndi ekamiyéni. Waziépi wayé gangwé ngwé tayeni, wa ngandi’pabaka vayé ngwé, amategó evyaka vayé ngwé na ikamiyé nava eputamu. Navwana nabe egumyaka eviya e Hévén, isa dyó’pango amé méni, kabo isa dyo’pango a alometye ngwé. Upango a alometye ngwé ndi mu, na éziépi eyé mu ngwé tayeni eva’nyama, ndi nangandi etonguwétyé yo e dyoba dya malityiyéné. Upango a alometye ngwé ndi mu, na mwéziépi a tóyó Mwana, né mu akamiyétyé mu, ayéndi na eménó a egombe éziépi ; na ngandi etonguwétyé mu e dyoba dya malityiyéné.

Jiu wa tótyelenetyendi mu, navwana avóyetyendi na, mundi pémbé évetye eviya e hévén. ¿ Na wa nava evóyókó na, Abe Jisu anó ? ¿ mwa’Joséf, le katandi ganngwé na nyangwé ? ¿ Ndi elé rémé evóyó mu na, a gumyetyendi eviya e Hévén ?

Na Jisu nava etimbwanaka na wa na, etótyelenetyeni inywé méni né’nywé méni. Ebe na moto ayé a vyaka emboka ngwé, kabo gangwé e lometye ngwé adula mu, né ngwé na tonguwé mu e dyoba dya malityiyéné. Eyéndi léndweni e Mesótyi, na, wa waziépi wa ngandi ikuwétyé na Anyambé, mwéziépi ayé votyiyeni gangwé né mu tegó otyeni egala gangwé, aviyandi e mboka ngwé. Ebe na moto te moto ayé tóyeni gangwé, kabo mu ayé a Anyambé, mundi ayé tóyeni gangwé.

Na sebwandi nénywé pónipóni na, akamiyé ngwé ayéndi na eménó a egombe eziépi. Ngwé ndi pémbé a eménó. Wa góngwé wanu wa betyendi wa dyaka Mana e motove, ndi wa viyendi ewedyéné. Eni ndi pémbé eviya eviya e Hévén, eyé etóndyé moto adyandyé yo, vókóna avagó’wa. Ngwé ndi pémbé eyé e migó evetye eviya e Hévén.

Etóndyé moto adyandyé pémbé méni, a mandi ediyaka egombe éziépi, pémbé ema tayaka ngwé yondi megoni myamé, menga etayaka ngwé egala eménó a zie. ¿ Na Jiu nava esodyaka wa méni na waméni, na, momu ménó alé atayaka megoni myadu idyowé dya ? Jisu avóyetyendi na wa, na, evabéni na eménó etóndyé inywé, mba dyakani megoni mya mwa’Moto, né inywé enyani matyiya madu. Mwéziépi adya megoni myamé né mu anyaka matyiya mamé ayéndi na eménó a egombié’ziépi, né ngwé nangandi etonguwétyé mu e dyoba dya malityiyéné. Tinandi megoni myamé e pónipóni meyéndi bedya, né matyiya mamé tegó enya e pónipóni. Ama edyaka megoni myamé, né mu anyaka matyiya mamé, adiyandi e mboka ngwé, né ngwé tegó e mboka mu. Ené ngayé gangwé e lometye ngwé eménó, né ngwé na diyaka na gangwé nyanga méra tegó eyé adya ngwé, amategó diyaka na ngwé. Eni nana ndi pémbé mé e vetye eviya e hévén, mba bétyé ené nga betye wa góngwé wa detye Mana, ndi wa wendi, ama edyaka pémbé méni amandi diyaka egombié’ziépi.

A kaletyendi bema mébi nana e Sinégóg, va betye mu ékuwétyé e Kapérnaum.

¿ Bikuwi byadu bebóló, nga betye wa wóka ndaga méni nana wa betyendi wamu evóyókó na eni nana eyéndi ndaga e bonga, ralé ama eyólétyé yo dyoka ? ¿ Nga betye Jisu a pulé na bikuwi byadu be tókólónóndi yo, a vóyetyendi na wa na, Eni e numbiyéndi’nywé ? ¿ Eyélé e diyaka dya etóndyé eviya tóyókóni Mwa’moto a betaka egali ebetye mu a vyaka ? Ilina ndi dye taya eménó, megoni me kova ima’tima ; ndaga nye kala ngwé né nywé nye yéndi nya ilina na nya eménó. Ndi wayéndi na wavókó e ramba’nu wayé wa kamiyé, navwana Jisu a pule tyete eviya e bogo wayé wa kamiyé, na ama ekóndókó mu.

Na mu na evóyókó na, tina méra ndi e vóyó ngwé nénywé na, abe na moto ama e yólétyé eviya e mboka ngwé kabo e tawé mu eviya e mboka’lalé.

Eviya e dyoba médyera bikuwi byadu bebóló be timbiyenetyendi na puga, wabegó e lenganaka na mu ropé. ¿ Na Jisu nava evóyókó na dyomu na bebaye na, inywé e mategó etyétyéni ? ¿ Na Saimón Pité nava etimbwanaka na mu na, Mopandyi, le mégó’tyétyé emboka ra ? Ové ndi eyé na ndaga nya eménó a egombié’ziépi. Le yéndi kamiyeni, néwé tegó puleni na óvé ndi Kraest mé a Mwa’Nyambé, a migó. ¿ Jisu a vwenetyendi na wa na, abe ngwé méni na pónetyi’nywé dyomu na wabaye ? ¿ Ndi umbókó a rambanu abe Dévili ? A kaletyendi egala Judas Iskariote mwa’Saimon, navwana mundi mura anga e kóndókó mu, abetye a nga dyomu na wabaye.

Bema mébi doleni, Jisu abetyendi a tamwaka e Galili, abe’tokakagó etamwa e Judea, tinandi Jiu wa betyendi wa tokaka oyamu. Isango dya Jiu dyondwé na dya besaka dyebetyendi dyemu baka. Wana wanyangwé wa vóyetyendi na mu na, imwaka eva nana, ké etyétyé é Judea, evara ndi vama tegó tóyókó bikuwi byavé bebolo byavé. Tinandi moto abe ngudi esa bema bobotamaka etóndyé mu a tokaka epuléné, etóndyé na esandi bema mébi nana, leviyétyé nyolwa’vé ezie. Tinandi wanawa nyangwé wabe ekamiyétyé mu. Na Jisu nava evóyókó nawa na, egombyamé ega pabaka, ndi egombyanu eyéte kotyeni egombyé’ziépi. Zie ebe na ngudi evininywé, ndi evinéndi ngwé, navwana na kalandi egala yo, navwana bebolo byadu bayéndi bebeva. Tyétyéni e isango médyi, tinandi egombya’mé ega timaka. Ngabetye mu akala nawa ndaga ményi na mute nava ediyaka e Galili.

Ndi nga betye wana’nyangwé wa tyédyéné, na mu tegó nava etyétyé e isango, mba bétyé e bwebwe, ndi na reya ené bobotamaka. ¿ Na Jiu nava etokaka mu e isango, na, Ayéndi ’ve ? Wato wabetye ndi na itókólónó ibólómé na tina’du ; tinandi wavókó wa vóyetyendi na, ayéndi motwa’sa ; wa vókó na nyawé a kóndóndi wato. Ndi moto te moto abe ekala e bwebwe egala’du na dyóngó dya Jiu.

Nga betye isango dye mu e tétéyi, na Jisu nava e Témpél amu ikuwénétyé. ¿ Na Jiu nava emamanaka, na, moto, ménó apulélé maléndwé ma Hole nga dya, mu mba vyaka e sukulu ? Jisu avwenetyendi nawa na, dyikuwéné dyamé dyebe dyamé, ndi dyeyéndi dya alometye ngwé. Mwéziépi a toka upangwa’du, amate’pulé itó dyikuwinidi dyeyéndi dya’Nyambé, dyélé te na na kalandi egalamé méni. Mwéziépi a kala egala’du méni atokandi ivenda dyadu méni, ndi atoka ivenda dya alometye mu, mundi pónipóni. né mu abe na ebeva. ¿ Mosés abe’tayénywé belekanako ? ¿ na bera biéziépi eteni dyalé umbókó a tata byo ? ¿ Ndi elé rémé etoké’nywé dyoya dyamé ?

¿ Ebumbu e timbwenetyendi na mu na, eyéndi na dévili, Ralé a toka’vé dyoba ? Na Jisu nava avwanaka na wa na, nayéndi seni ebolo evókó e mamanénywé waziépi. Ndi Mosés a tayetyendi’nywé elekanako a isébwé, (Hanga egala na dye yéndi dya Mosés, ndi dyeyéndi dya wagangwé) né inywé esébéndini wato e dyoba dya dyódyó. ¿ Etóndyé na moto a sébwéndi e dyoba dya dyódyó evwa dyóngó dya dyova dya elekanako a Mosés, Eyélé ra tiné elingwénywé na ngwé itó nóndyiyé moto ugugu e dyoba dya dyódyó ? E yétyiyetyeni a bwebwe, ndi yétyiyétyéni yéké a gondyeneni.

¿ Yondi evóyó wa wa vóyókó wa nga Jerusalém na, abe mu a tokéwé dyoya anó nana ? ¿ Na biéziépi bi, tókóteni nyanga e kala mu mba dyóngó, mba tegó moto te moto a kala mu ima, evwana wapandyi wa puléte na Kraest ndi anó ? Iwé le puléndi egali evetye anó nana, ndi vanga vyaka Kraest, ebe na moto anga’pulétyé egali enga vyaka mu. Na Jisu nava amaka va betye mu ékuwénétyé e témpél, na, inywé e pikiliyandini na epuléndini ngwé, né epulétegóni egali evetye ngwé, nabe ekudwanaka ngwé méni, ndi alometye ngwé ayéndi pónipóni ayi’nywé epuléni. Ndi ngwé na puléte mu, na vetyendi eviya vayé mu, né mu tegó ayé ngwé lomeni. Okamé o tyetye wa ndaga méra, na wa nava saka mala ma idyusé dyadu ; ndi moto te moto abe eyólé ebaté mu mabó, tinandi iwéra dyadu dye bebé pabeni.

¿ Wabóló wa ebumbu méra wa kamiyetyendi mu, nawa nava evóyókó na, vanga vyaka Kraest, angandigó esaka bema wagó na besa momu ménó bi ? Farisis wó tyetyendi na ebumbu e kalandi bema mébi egala’du, na Farisis na Prist nya myolo nava elomaka wato ibómbó dyadu. Na Jisu nava evóyókó nawa na, na y été nénywé eva mwa egombe etiké, vókóna natimbandi emboka a lometye ngwé. Engandi etokakani ngwé ndi eva e tóyóni ingwé, eva yólé epabani iboko dyenga ebétyé ngwé.

¿ Jiu wa méni na wa méni wa vóyetyendi na, Amé etyétyé eve ema bétyiwé mba tóyókó mu ? ¿ Amandi e tyétyé e mboka a wayé vareneni e betomba bevókwé, egala atyi’kuwétyé betomba bevókwé ? ¿ A béndi a pikiliyaka dya isebwa dya ndaga méni ? ¿ né vódi mé dyana, emandi etokakani ngwé ndi eva tóyóni ngwé, né tegó ebe ngudi’pabani iboko dyenga ebétyé ngwé ?

Edyoba dya malityiyéné dya isango, Jisu a téme tyendi na mu nava amaka na, moto ayé na evézié avetye enyaka emboka ngwé. Ibumu dya a kamiyéngwé ené nyanga esebwa iléndwé dye mandi’vovolaka ediba a meba ma eménó. Akaletyendi eni nana egala ilina dyenga duwaka wa kamiyé mu, navwana ilina dyasa dye bebé taweni, tinandi Jisu abebé beteni ivenda dyadu.

Wa bóló wa ebumbu méra nga betye wa wóka ndaga méra wa vóyetyendi na, póni póni anó ayéndi mosótyi mé. ¿ Wavókó na, anó ayéndi uméni Kraest, wavókwé na, Kraest angé vyaka na dya Galili ? ¿ Etónó bwebwe e iléndwé na e ibóngó dya David, na e ibókó dya Bétléhém Va betye David a diyaka, ndi enga kudwanaka Kraest ? Na ebumbu nava ekabanaka na tina’du. Wa vókó e rambaya wa totyetyendi ebómbó mu ; ndi moto abe ebatiyé mu mabó.

Na wato wa lomwetye ibómbó dyadu nava etimbiyénétyé na e mboka Prist nya myolo na Farisis, nawa navé pwaka wa na, ¿ Ebéndi mba vyakani na mu nénde ? Nawa nava etimbwanaka na wa na, ebegó nómbókwé a kala ndaga nyasa ené momu ménó. ¿ Na Prist navé pwaka wa na, inywé abwé tegóni ? ¿ Wapandyi dyalé Farisi wayéte nómbókó ayé mu kamiyeni ? Ndi ebumbu mé eyé epulé belekanako eni eyéndi lókweni.

Nikodimos avótyi na wa na, (Atyétye emboka Jisu na élu, abetyetegó umbokwa’ya) na. ¿ Elekanako ago eyétyiyéte moto dyalé yo mbótaka oka mu akalaka ebogo, na ipulé dya ima esa mu ? ¿ Wa vwenetyendi na mu na, Ové eyétegó anga Galili ? Butaka né elóngó, navwa mosótyi mobe kudweneni e Galili. Na moto mwéziépi nava etyétyé e mbada’du méni.

Na Jisu nava etyétyé e mokodi a Olivi. Na mu nava epundaka na mwako e Témpél, nga betye mu adiya, na wato waziépi nava evyaka e mboka mu, na mu nava ediyaka e dyikuwé dyaya.

Waléndi na Farisis wa vetyendi mu na mwadu’mbókó a bómbwetye na ihonde, nga betye wa wa témiyé mu e tétéyi. Na wa nava evóyókó na mu na, Lalé, mwado ménó a bómbwéndi né’honde. ¿ Mosés a sombetyendi’wé e belekanako iluma dya dyóngó médyi malale, Ndi ové ndaga’vé ndi dya egali méra ? Wa kaletyendi ndaga méni e dyadyé dyadu pa, egala na evara ndi vama duwaka wa mu ebutye, na Jisu nava esaka ené moto abyotye ndaga, namu nava ebalamaka ezie amu eléndétyé na munó. Nga betye wa mu kabo bosipétyé na bosipétyé, na mu nava etepwaka, na mu nava evóyókó na wa na, ayé abe na ebeva e’bumbwa’nu, ayaletye mu na iluma dya ilale. Na mu navagó ebalamaka ropé amu eléndétyé e zie. Melema mya wótyetye ndaga méra me kobiyetye ndi wa, nawa nava ekuduwénétyé umbókó umbókó, yaleni na motodu kwanga a malityiyéné ; Na Jisu nava e likanaka ipó, mwado e tétéyi de. ¿ Va betye Jisu etepwamé, abe etóyó moto kabo mwado pa, avóyetyendi na mu na, mwado wato mé wabé wa tubakavé wamu eve ? ¿ ebe na moto akodyévé ? Avótyendi na mu na moto abe, Jisu avóyetyendi na mu na, ngwé tegó nava ekodyévé ; tyétyé, ndi esetye gó ebeva ropé.

Yondi e kalagó Jisu nawa na, ngwé ndi bwe a zie, ama evitétyé ngwé ava etamwa néviti ndi amandi ebétyé na bwe a eménó.

Yondi evóyó Farisis na mu na, ové méni te e pakwa upakwa’vé, upakwa’vé mobe a pónipóni. Jisu avwenetyendi na mu nava evóyókó wa na, dyalé na pakwate upakwamé ngwé méni, upakwa’mé mote a pónipóni ; navwana na puléndi egali evetye ngwé, na egali etyéyé ngwé. Eyétyiyé-ndini na megoni, ndi ngwé na yétyiyé moto. Ndi etóndyé na yétyiyétyé, yéka’mé eyéndi a pónipóni ; navwana nabe ngwé méni, ndi iwé na gangwé e lometye ngwé ndi leyé. Eyétegó léndweni e elekanako anu, na upako a wato wabaye moyéndi póni-póni. Ngwé ndi umbókó na pakwa egalamé méni, né tegó gangwé e lometye ngwé apakwa tegó egalamé. ¿ Wa vóyetyendi na mu na, Góngwé avéndi’ve ? Jisu avuenetyendi na wa na, inywé epuléni ngwé, kwanga tegó lalé epuléni mu, ebétyéte epulétyéni ngwé te epulétegóni lalé.

Jisu a kaletyendi ndaga ményi e iboko dye tatwé dólé vabetye mu ékuwénétyé e témpél, moto abe eyólé mu ebómbó tinandi iwéra dyadu dyebebé pabeni.

Yondi evóyó Jisu na wa na, natyéndi e reya’mé, emandi etokakani ngwé emandi ewakani na bebeva byanu ; iboko dyema etyétyé ngwé, eva yóleni epaba erago. ¿ Na Jiu na vóyókó na, Amandi oyaka nyolwa’du ? Na-vwana avóyóndi na, leva epaba iboko dyema etyétyé mu. Avóyetyendi nawa na, eyéndini nga zie, ngwé nayéndi anga loba, inywé eyéndini wa zie méni, ngwé nabe nga zie méni. Yondi evóyó nawé né nywé na, e mandi ewakani na bebeva byanu, tinandi etóndyé inywé mba kamiyétyéni na ngwé ndi mu, emandi ewakani na bebeva byanu.

¿ Na wa navé pwaka mu na, Ové léra ? Na Jisu na vóyókó na wa na, ngwé ndi mu a betye eviya e dyali a yéte inywé sebweni. Nayéndi na bema bebóló bya kalaka na bya yétyiyétyi’nywé ; ndi alometye ngwé ayéndi pónipóni, na kalandi na zie bema beyé ngwé otyeni na mu. Ndi wabe epulétyé na akalandi nawa egala gangwé. Jisu a vóyetyendi na wa na, vanga betiyétyinywé Mwa’moto e loba, evara nandi enga pulétyinywé na ngwéndi mu. Na nasa ima ngwé méni, ndi na kalandi bema mébi ené nga betye lalé ékuwétyé ngwé. A lometye ngwé ayéndi na ngwé, gangwé abe ngwé lityeni ipó, tinandi nasandi bema be tóndiyé mu egombe éziépi. Wa bóló wa kamiyetyendi mu, va betye mu a kalaka ndaga ményi nana.

Yondi evóyó Jisu na Jiu mé dyebetye dyekamiyétyé na, etóndyé e lilimiyé ndyéni e ndaga’mé, vókóna eyéndini bikuwi byamé mbambayé. Vókóna emandi pulétyéni pónipóni, né pónipóni emandi pangaké’nywé humu. Wa timbwenetyendi mu na, le yéndi wa ibóngó dya Ebraham moto te moto a biwé niveni, ¿ Nandi rémé lé evóyóvé na lemé diyaka humu ?

Jisu atimbwenetyendi wa, na, ponipóni na sebwandi nénywé na, asa ebeva mwéziépi ayéndi uwaka a ebeva. Moseyi a diya e mbadi egombiéziépi, ndi Mwana ndi adiya egombiéziépi e mbadi. Nandi etóndyé Mwana apangandyé inywé humu, vókóna ediyandini humu mbambayé. Na puléndi na eyéndini wa ibóngó dya Ebraham, ndi etokandini oya ngwé, navwana ndaga nyamé nyebe né’boko embokénywé. Na kalandi ibyamé beyé ngwé tóyeni na lalé ; inywé tegó esandini ibyanu be tóyetyi’nywé na góngwa’nu.

Wa’vwenetyendi mu, na, Lala’go ndi Ebraham. Jisu avótyendi na wa na, ebétyéni wana wa Ebraham, te esateni bebolo bya Ebraham. Ndi tyatya méni etokandi oyani ngwé moto mé asebwé nywé pónipóni, eyé ngwé otyeni na Anyambé. Ebraham abe esaka nyanga méni. Esandini besedi bya góngwa’nu, yondi etimbwana wa na mu na, lebe edyawé madyali, leyéte gangwé evókó kabo Anyambé pa.

Jisu avóyetyendi na wa na, Anyambé abétyé góngwa’nu, te etóndéteni ngwé, navwana na kudwenetyendi na ngwé na vyaka eviya emboka Anyambé, nabe evyaka ngwé méni, Mu ndi alometye ngwé. ¿ Rémé lé epangé-nywé mba bómbiyétyéni ikalidi dyamé ? Navwana ebe ngudi yóléni dyoka dya ndaga’mé. Eyéndini wa góngwanu Dévili, bedoko bya góngwa’nu te bema bóbókó inywé isa, góngwa’nu abetyete moyini eviya e dyali, abebé e pónipóni ; navwana pónipóni ebebé e mboka mu, Etóndyé a kala bodyowa a kalate ibyadu méni navwana ayéndi modyungulini né mutegó gangwé a bodyowa. Ekamiyéni ngwé navwana na kalandi’nywé pónipóni. ¿ Randi ayé e rambanu ama ekobiyétyé ngwé na ebeva ? ¿ Nandi etóndyé na kalaka pónipóni, Rémé ndi eyinywé mba kamiyétyéni ngwé ? Ayé Motwa’Nyambé ókandi ndaga nya Anyambé, inywé okani nyo, navwana ebeni wa Anyambé.

¿ Na Jiu nava etimbwanaka na mu na, Lebete ekame né vóyó dyavé na eyéndi a nga Sameria, névé eyétegó na Dévili ? Jisu avwenetyendi nawa na, nabe na Dévili, ndi na hetyiyéndi lalé, inywé e hetyiyéni ngwé. Na toka tegó ibendé dyamé méni, eyi nómbókó atoka, né mu ayétyiyétyé. Pónipóni na vóyóndi nénywé na, etóndyé moto atataka ndaga nyamé abe ngudi ewa na tyé bómbó egombié ziépi.

Yondi evóyó Jiu na mu na, nandi le puléndi na eyéndi na Dévili, eloba la Ebraham na mesótyi waviyendi ewedyéné ké óvé evóyókó na etóndyé moto atatandyé ndaga nyavé ava ewa. ¿ Ové ndi ebalé lalago Ebraham abetye a waka ? ¿ kwanga na mesótyi tegó mewedyenetye ? ¿ Inganandi egala’vé Dya ? Jisu avwenetyendi, na, etóndyé na hetyiyétyé nyolwamé méni vókóna ihetyiyé dyamé dyebe ima, lalé ndi a hetyiyé ngwé, avunywé evóyókóni na Anyambia’nu. Inywé epuléni mu, ngwé ndi na pulé mu, etóndyé na vóyóndyé na napulé mu vókóna nayéte modyodyowi eni’nywé, ndi ngwé na puléndi mu, né ngwé na tatandi ndaga nyadu. Góngwa’nu Ebraham asaretyendi né tóyó dya dyoba dyamé, na atóyetyendi dyo na mu na saraka.

¿ Yondi evóyó Jiu na mu na, ega timiyétyé igona dya mabo ma mepuma ma tanu névé na etóyendi Ebraham ? Jisu avóyetyendi na wa na, na vóyóndi nénywé pónipóni na, ebogo na Ebraham abétyé ngwé na betyete. Nawa nava enikaka malale ma lumaka mu, ndi Jisu abotetyendi nyolwa’du, na mu nava ekudwaka e témpél, a doletyete e tétéya’ya na mu nava edolaka nyanga méra.

Vabetye Jisu a dolaka, na mu na tóyókó momu abetye pógu eviya idyawidi dyadu. ¿ Bikuwi byadu bipwetyendi mu, na, mukuwi, Randi asetye ebeva ndi na mu méni, Ndi na gangwé na nyangwé, eyé pandyeni mu a dyawétyé pógu ? Jisu avwenetyendi, na, momu ménó abe seni ebeva, dyalé na gangwé na nyangwé, ndi eyéndi egala na bebolo bya nguda’Nyambé bepulenetye na reyadu. Na lukandi nasaka bebolo bya alometye ngwé, va ndite dyoba emanda, elu eviyandi, vayé moto avagó eyólé isa dya ebolo. Ukili mondite ngwé e zie méni ngwé ndi bwe a zie.

Nga betye mu kaleni pa, na mu nava etuwaka matyéndyé e zie, na mu nava ebuwaka mo na tyélé, na mu nava egosaka mu tyélé ményera e migó (ma pógu). Avóyetyendi na mu na, va tutyetye e’tima a Siloam (Dye minaka na bolomwétyé) dyélé na lomweni, na mu nava tyétyé e’tuka na mu nava etimbaka amu etóyókó.

¿ Wato wa betye wa diyaka baka na mu, wa betye wa dinga wa toyókó mu va dyawetye mu pógu, wa vóyetyendi na, Abe mu abetye diya a dyombénétyé anó nana ? Wa vókó wa na, mundi mura, wavókwé na akwanandi mu, ndi avóyetyendi na wa na ngwé ndi mu. ¿ Na wa navé pwaka mu na, Migó mavé ma dibwamandi dya ? Avwenetyendi wa na, momu mé atubwé na Jisu, óbiyetyendi tyélé, na mu nava ezisaka ngwé nyo e migó, na mu nava evóyókó ngwé na, va tutyetye e’tima a Siloam, na ngwé nava tyé tukaka, nava etóyókó. ¿ Na wa navé pwaka mu na, Ayéndive ? Na mu nava evóyókó na napulé.

Na wa nava etyétyé na abetye pógu mura emboka a Farisis. Dyebetyendi dyoba dya dyódyó, dyebetye Jisu óbiyétyé tyélé né mu a dibuwé mu migó madu. ¿ Na Farisis népwaka gó mu ropé na, Ra reyé ndi epandyetye’vé e duwaka itóyó ? avóyetyendi na wa na, a véletyendi ngwé tyélé e migó, na ngwé nava etukaka, na ngwé nava etóyókó. Evara ndi evóyetye Farisis na momu ménó abe motwa’Nyambé, navwana a tata dyoba dya dyódyó. ¿ Wavókwé na, Moto mu ubeva ayélé asaka elembo a dyóngó médyi dya ? Na igalana nava duwamaka e tétéya’ya waméni. ¿ Wa vóyetyendi na mu abetye pógu mura na, Ové etólé egala momu mé mura dya va dibwa mu’vé migó ? Na mu na vóyókó na ayéndi mosótyi.

Ndi Jiu wabe ekamiyé egala’du na abetyendi pógu, né mu amu etóyókó, kwanga vabetye wa wónda gangwé na nyangwé. ¿ Na wa navé’pwaka wa na mwamé anu avóyunywé na adyawetyendi pógu ndanó ? ¿ ndi atóyógó e tyatyava nénde ? Gangwé na nyangwé wa’vwenetyendi wa na, le puléndi na mwago ndi anó nana, né mu adyawetyendi pógu. Ndi ima epanga mu atóyókó ndi eyiwé lepulé, né moto tegó abé adibwaka mu migó le pulé tegó mu, mu amu tegó idyadu igona, tépwani mu, uméni amate’kala. Gangwé na nyangwé wa kaletyendi ndaga ményi navwana wa nyóyetyendi Jiu, tinandi Jiu wa betyendi wa lata na moto ama mémétyé mu na abetyendi (Jisu) Kraest a mandi ekuduwétyé e Sinégog. Yondi epandyetye gangwé na nyangwé wa vóyókó na amundi idyadu igona ipwakani uméni.

Yondi ondagó wa momu mé abetye pógu, na wa na evóyókó na mu na, bendétyé Anyambé, leyéndi puleni na momu ménó ayéndi motu’beva. Na mu nava etimbwanaka na wa, na, ityé na ayéndi motu’beva, dyélé motwa’sa napulé, na puléndi ima evókó na, nabetyendi pógu nga sikama etóyó ngwé.

¿ Yondi evó wa na mu ropé na, Asetyendivé dya ? ¿ a dibuwetyendivé migó mavé dya ? ¿ Avwenetyendi nawa, na, nabéte na sebwa nénywé ndi ebyotyeni ; etokagó okakani ro evókwé dya ? ¿ egombe etoka tegó diyani bikuwi byadu ? Nawa nava elowaka mu, wava evóyókó na mu na, óvé ndi eyé ikuwi adu, ndi iwé leyéndi bikuwi bya Mosés. Le puléndi na Anyambé a kaletyi na Mosés ; ndi anó lepulé egali e kudwenetye na mu.

Na momu mé, nava avwanaka nawa na, eni ndi ima ómamo na nyanga eyinywé mba pulétyéni egali evetye mu, ndi adibwandi ngwé migó mamé. Le puléndi na Anyambé óka wato wabeva, ndi etóndyé moto adiyandyé mokaliyi a Anyambé, né mu asaka upangwa’du, mundi óka mu ókaka. Eni ebe otyeneni eviya e dyali dya zie, na moto te moto andi dibuweni migó ma moto ayé dyaweni pógu. Momu ménó abétyé mba bétyé motwa’Nyambé te abe yólé isa dya ima ti’ma. ¿ Na wa nava etimbwanaka na mu na, óvé ebetye edyawétyé na ebeva ké etokaka dyikuwé dyago ? Na wa nava ekuduwétyé mu eboka.

¿ Nga betye Jisu óka na wa kuduwéndi mu eboka, va betye mu aduwa mu, a vóyetyendi na mu na, Ekamiyété mwa’Nyambé ? ¿ Na mu na evóyókó na mu na, Mundi ra mopandyi, egala na kamiyétyé mu ? Jisu avóyetyendi na mu na eyéte mu tóyeni, mu tegó a kala navé anó. Na mu nava evóyókó na, Mopandyi na kamiyéndi, na mu na vutaka mabóngó emboka mu, namu nava ekaliyaka mu.

Na Jisu na vóyókó na naviyandi e zie méni e yéké egala na wayé mba tóyókó wa tóyetye, né wa tóyó wa diyetye pógu.

¿ Na Farisis nyevókó nyebetye’vara navó’kaka ndaga méra, nawa navé pwaka na mu, na, Iwé leyetegó Pógu ? Na Jisu nava avwanaka nawa na, ebétyéni pógu te ebeni na ebeva, ndi vayinywé na etóyóteni ; na tina méra te eyé ebeva’nu endite nénywé.

Na sebwandi nénywé pónipóni na, ayé éra na dyé’kukale natyé’bómbókó ibemba dya medómbé kabo a betaka na ivókwé andi mwibi na mopwatini. Ndi mu éra na dya ikukale mundi motati a medómbé. Mundi a bémbéné motati ikukale a dibwaka, né medómbé myokandi dyoyi dyadu, mundi ónda medómbé myadu na mina, né mu akuduwétyé myo na e bwebwe. Va kuduwé mu medómbé myadu méni, atyéndi e bogwa’ya né medómbé myovitétyé mu, tinandi me puléndi tyingwa’du. Mebe ngudi évité mwéndyi, me mandi etilaka mu, navwana mepulé tyingó nya wandyi. Jisu a kanetyendi wa mokanakódi mé mura ; ndi wabe ebandamiyé bema be kaletye mu na wa. Jisu a vóyetyendi na wa ro evókwé na, póni póni, na vóyóndi nénywé na, Ngwé ndi ikukale dya medómbé. Waziépi wayé viyeni e bogo na ngwé, wa yéndi mibi na wapwatini ndi medómbé mebio’ka wa. Ngwé ndi ikukale, moto te moto amé’raka na reya’mé, a mando’ngaka, né mu amandi iraka etéyi, né mu a kudwa e bwebwe, mba kodumaka, né mu amandi epahiyaka iboko dya dyaka. Mwibi mo viyagó wa na mala ma dyiba, na ma dyoyana na idyiliyé. Ndi ngwé na yéndi viyeni egala na medombé me duwetye eménó, né evara ndi vama eduwaka myo eménó ebóló wa.

Ngwé ndi motati a medómbé asa, mota’tasa a tayandi eménwa’du egala medómbé. Ndi mobandwi ayé abe motati a medómbé, ayé abe nga myo, a tóyóndyé róó e vyaka vókóna a likandi medómbé, né mu a tila, né róó e bómbó myo, né yo e variyé myo. Mobandwi a tilandi navwana ayéte bobandwétyé, abe nésóló egala medómbé. Ngwé ndi motata’sa na yéndi puleni medómbé myamé, né imyamé me puléndi ngwé. Ené nga pulé gangwé a pulétyé ngwé, nyanga mé a’vókó tegó eyé ngwé puleni gangwé, na yéndi nandyiyeni eménwa’mé egala medómbé myamé. Na yétegó na medómbé mevókwé meyé mebe mya ibemba médyi, myondi mema vyaka na ngwé, myo tegó me mandi okaka dyoyi dyamé, vókóna me diyandi moramba umbókó, motati tegó umbókó. Na tina méra yondi etóndé lalé ngwé, navwana na tayandi eménwamé egala medómbé myamé, nana na mandi ingaka yo ropé. Ebe na moto ayé énganaka ngwé yo ; navwana nayéndi yo tayeni itotyidi dyamé méni, na yéte na ngudi etaya yo né ngwégó na ngudi a dyinga dya yo. Elekanako méni ndi eduwetye ngwé e mboka lalé.

Eviya e dyoka dya ndaga ményi nana na Jiu na galanaka wa méni na waméni. ¿ Wato wabóló wa vóyetyendi na ayi na dévili, andi ipipi, Rémé ndi evotyiyinywé mu ? ¿ Wavókwé na nyi nyebe rebo nya moto na dévili. Dévili ayéte a yólétyé idibuwé dya migó ma pógu ?

Ebetyendi e Jerusalém isango dya itaya dya témpél ebetyetegó egombe a ivévu. Jisu a betyendi a kómbaka e témpél e elémbé a Solomon.

¿ Na Jiu nava etyétyé va betye mu, nawa nava iluwénétyé mu, na wa navé’pwaka na mu na, Rémé ndi epangavé iwé le diyaka melema nguangualani egalavé ? sebwakéwé póni bwe ityé na óvé ndi Kraest. Jisu avwenetyendi na wa na, na pakwandi’nywé, ndi e kamiyéni, bebolo besa ngwé na dina dya lalé, be pakwandi egalamé. Ndi’nywé ekamiyéni, navwana ebeni medómbé myamé, te ené nga bé ngwé na sebwaka nénywé. Medómbé myamé myokandi tyingwa’mé, né ngwé na pulé tegó myo, né myo méviténdi ngwé. Na yéndi myo tayeni eménó a egombyé’ziépi ; né myo meva enyama egombe te egombe, ebe tegó na moto ayé a pwataka myo e mabó mamé. Lalé atayetye ngwé myo, ayéndi ita wa na moto mwéziépi, ebe tegó na moto ayé apwataka myo e mabó ma lalé. Iwé na gangwé leyéte mo tu’mbókó.

Jiu na dyoka dya rebo méra, na wa nava enikaka malale egala iluma dyadu. ¿ Jisu atimbwenetyemdi wa, na, nayéndi’nywé leviyeni bebolo byasa bebóló na ngudi e vyaka emboka lalé, ndi Nara tiné ndi eluménywé ngwé malale e bebolo mé bera ? Jiu wa timbwenetyendi mu na, le lumavé malale ityé esaka ebolwa sa ; ndi na tina a ilowa dya Anyambé, né tegó óvé moto, ké inganaka nyolwavé ené Anyambé.

¿ Jisu avwenetyendi na wa na, Ebe léndweni e elekanako’anu na, na vóyóndi na eyéndini byanyambé ? Nandi etóndyé na atubetyendi wa na byanyambé, wa betye ndaga nya’Nyambé nye lumbétyé, iléndwé dyebe na ngudi owé. E vóyóindini na ayé Anyambé nyéviyeni, ¿ abetye mu alomaka e zie, na na lowandi Anyambé, na tina évó dyana ngwé ndi Mwa’Anyambé ? Ekamiyetyeni ngwé, etóndyé ngwé mba saka bebolo bya lalé. Ndi etóndyé na saka byo, dyalégó ebe kamiyéni ngwé, ké emu kamiyétyéni bebolo, evara ndi vama pulétyi’nywé, né inywé ekamiyéni na, gangwé ayéndi emboka ngwé, né ngwé tegó emboka mu. Evara ndi vabetyegó wa wa tokaka ebómbó mu, na mu nava etilaka a mabó maya.

Na mu navagó etyétyé e mudumbókwé a Jordan, iboko dyebetye Jon abatiyénétyé ebogobogo, na mute nava ediyaka evara. Na wabóló nava etyétyé emboka mu, na wa na vóyókó na, Jon abe’sa elembo ndi bema biéziépi bekaletye mu egala momu ménó, bebetyendi póni-póni. Wa bolo wa kamiyetyendi mu evara.

Momu umbókó abetyendi egombe méra na edaka dina na, Laserós, nga Betane, mboka a maluku madu Meri na Martha. Méri mé mera ndi mebetye me tyibwaka Mopandyi mavulé ma sombo, na mu nava titwaka mu mabó madu na we nyadu, ndomya’du Lazeros ndi abetye a dakaka. Na maluku madu nava elomaka mbando emboka mu, na, Mopandyi, tóyókóte avé a tóndévé adakandi. Nga betye Jisu óka yo, avóyetyendi na edaka méni ebe a iwedi, ndi eyéndi a ibendé dya Anyambé, egala na evara ndi vama ehekuwétyé Mwa’nyambé na yo. Jisu a tóndetyendi Laseros, na maluku madu Martha na Meri.

Va betye mu óka na, adakandi, na mugó nava enangaka iboko me dyebetye mu dyera minyagó mabaye. Minya mé mara doleni, na mu na evóyókó na bikuwi byadu na, le tyétye nigó e Judea. ¿ Bikuwi byadu be vóyetyendi na mu na, etyatyava yote ebé Jiu wa tokaka eluma’vé malale, Ké óvé etyétyégó erago ?

Jisu avwenetyendi wa na, ¿ Dyobé’vókó abe dyomu na mawéra mabaye ? etóndyé moto a tamwaka na emanda ava evoluma, tinandi atóyóndi bwe a zie méni. Ndi etóndyé moto a tamwaka na elu, vókóna amandi evolumaka, tinandi abe na bwe.

Va betye mu ndaga ményi kaleni, na mu na vóyókó na bikuwi byadu na, mboyago Laseros a yayandi, ndi natyéndi imuwétyé mu e viyó mévera. Na bikuwi byadu na vóyókó na, Mopandyi etóndyé na ayayandi vókóna a matonga. Ndi Jisu akaletyendi egala iwedi dyadu, ndi bikuwi wa pikiliyetyendi na magu akalandi egala dyódyó e viyó. Nandi na Jisu nava eviya sebwaka wa bwe na bwe, na, Laseros awandi. Ndi na tóyóndi mbya egala’nu, na nyanga ebé ngwé mba bétyé erago egala na kamiyétyéni. Okani vayé mu.

Yondi evóyó Tomas, etubwé na Didimos, na bikuwi byadu, na, iwé tegó le tyéndi, egala na lewetye tegó na mu.

Na Jisu nava epabaka, ndi akóbetyendi mu amu na edyamwé minya manayi.

Betane abetyete vavuve na Jerusalém, ené dyomu na nanda nyetanu. Jiu nyebóló nyevetyendi emboka Martha na Meri egala dyódiyé dyaya egalé’wedi dya ndomyaya. Vótyetye Martha na Jisu aviyandi, na mu nava ekudwaka ibongana dyadu : Ndi Meri abetyete diya e mbadi.

Na Martha na evóyókó na Jisu na, Mopandyi ebétyé eva te mwa’ya abe wa. Ndi na puléndi bwe na, etyatyava eyévé e dyombétyé Anyambé, amandi etayaka vé yo. Jisu avóyetyendi na mu na, ndomya’vé amate etongwa. Martha a vóyetyendi na mu na, na puléte na angé tongwaka e itongwa dya dyoba dya malityiyéné.

Jisu a vóyetyendi na mu, na, ngwé ndi itongwa na eménó : Ama ekamiyétyé ngwé dyaléte adiyate weni amate ediya e’ménó. ¿ Mwéziépi ama ekamiyétyé ngwé mu e migó avagó ewa egombié-ziépi. ¿ Ekamiyéte yo ? Na mu nava evóyókó na mu na, E, mopandyi, na kamiyéndi na óvé ndi Kraest mwa’Nyambé, ayé viyeni e zie.

Va betye mu ndaga méni kaleni, na mu navatyé ondaka mwa’nyangwé Meri bobotamaka, na, mukuwi apabandi, óndandi’vé. Vó tyetye mu rebo méra namu navé mwaka bovoliyétyé, va betye mu. (Jisu abetyete mbó taka epaba e mboka, mute iboko mé dye kóbetye Martha mu de). Eviya vara Jiu mé dyebetye’dyódiyétyé wa e mbadi va tóyetye wa Meri a kudwaka bovoliyétyé, na wa nava evitetye mu, na atyéndi iyaka vara e rama.

Va pabetye Meri iboko dyebetye Jisu, na itóyó dyadu, na mu nava ekwaka e mako madu, na mu na vóyókó na, ebétyé okabé eva te ndomyamé abe’wa. Etóyó mé etóyetye Jisu Meri éyaka, na Jiu dyevetye namu ramba wéyidyénétyé, na ilina dyadu nava esisibwanaka, na mu nava etóyókó ndyuke. ¿ Na mu nava evóyókó na, Elityetyendini mu erébokwé ? Wa vóyetyendi na mu, na, mopandyi vyaka va tóyetye. Na Jisu navé yaka. Na Jiu nava evóyókó na, lóngókóteni nga tóndé mu atóndétyé mu ! ¿ Na wavókó wa ramba’ya na vóyókó na ; abetye adibuwétyé pógu migó anó a byoka panga a diyaka mba waka ?

Na Jisu navé’Iwamaka molema, na mu nava etyétyé e rama, ebetyendi e budu é lale, ké ilale eloba zikuweni. Jisu a vóyetyendi na, véndyiyétyéni ilale, na Martha iluku dya awetye na vóyókó na, Mopandyi amundi ebóyókó, navwana amundi nawa na minya manayi. ¿ Na Jisu na vóyókó na mu na, Nabe vóyetye navé na etóndyé ekamiyéndyé emandi tóyóku’venda dya Anyambé ? Nawa nava evéndyiyétyé ilale va betye ubimba vélweni, na Jisu nava ebetiyétyé migó madu e loba, na mu na evóyókó na ; Lalé na tayandi’vé akeva na nyanga okavé ngwé.

Na puléndi na okandi ngwé egombiéziépi ; ndi na tina a ebumbu mé eyé iluweneni ngwé eni, yondi evóyó ngwévé, egala na evara ndi vama ekamiyétyé wa, na, óvé ndi elometye ngwé. Nga betye mu rebo ményi kaleni, na mu nava amaka na, Lazeros kudwaka e bwebwe. Na abetye weni, namu na kudwaka, mabó na mako madu mosagwéni na medamba, né mondongwa’du tego sagweni na evéléyi, na Jisu na vóyókó nawa na vurwakani mu, né inywé elikani mu a tyétyé.

Na Jiu mé dyevetye emboka Meri, wabóló nawa nava ekamiyétyé, va betye wa watóyó bema mé besetye Jisu bi nana. Ndi wavókó iwaya wa tyétyendi emboka Farisis, nawa nava esebwaka wa bema biéziépi besetye Jisu.

¿ Yondi e laténé Prist nya myolo na Farisis esoka, na wa na vóyókó na, Lesetyeni dya ? Tinandi momu ménó asandi belembo bebóló. Etóndyé lelikandyé mu na, vókóna mwéziépi a kamiyéndi mu, vókóna nga Roma wa viyandi né wa wa pwata etomba’go na ezitya’go. Na Kaefas, umbókó aya, abetye Prist a molo e upuma mé mura, nava evóyókó na wa na, inywé epuléni ima ti’ma. Né tegó epikiliyani na mot’umbókó a lukandi awaka egala mboka, ndi hanga na etomba eziépi e nyametye. Ndi abe ekalaka yo na ipikiliya dyadu méni, ndi kabote na, mu ené Prist a molo e upuma mé mora, abetyendi a sókó na Jisu angandi ewaka egala etomba. Ndi hanga kabo etomba méra ipó, ndi kabote na amandi eyolétyé tego wana wa Anyambé wayé vareneni evaba wa diyaka iboko ivókó.